O vindeiro venres, 15 de marzo, a partir das 20 horas, no salón de actos da Casa da Cultura de Vilalba celebrarase a presentación do libro DINAMITADAS. EL DESPERTAR DE LA IRONÍA, de Ticiana Ghiglione Darriba. Este acto organizado por Culturalia GZ, en colaboración co Concello de Vilalba, contará coa participación da escritora Ana Mar Fraga Rábade, da artista multidisciplinar Luz Darriba, de Martiño Maseda, Administrador de Culturalia GZ e da propia autora do libro.
Culturalia GZ e NPG comprácense coa publicación dun novo poemario de Jesús Trashorras, A CHAMADA DE BRIGID. Este libro de poemas, do autor nado na parroquia de Vilariño en Castroverde, súmase a outros títulos nos que xa amosou a súa fondura poética, tal é o caso de O silencio do orballo.
O autor en Penas de Rodas
Jesús Trashorras Nogueira naceu no ano 1956 en Castroverde (Lugo). Diplomado en EXB e licenciado en Ciencias da Educación. Exerceu de mestre en varias localidades do Occidente de Asturias, maiormente na Veiga, e na última época en escolas de localidades preto de Lugo: Corgo, Friol, Nadela. Actualmente está xubilado.
Participou en varios proxectos colectivos: Mesturas, Roteiros das artes, Roteiro das artes internacional, revista Xistral, Libro homenaxe a Manuel María, Portugalicidades.
En marzo de 2017 publica o seu primeiro poemario O silencio do orballo, que se atopa esgotado na actualidade. Este é polo tanto o seu segundo libro de poemas. Poemas inspirados nunha viaxe realizada no verán do 2016 por terras irlandesas.
Como xa se adiantou, o xermolo dos versos que compoñen A CHAMADA DE BRIGID atopámolo nas palabras do propio autor, recollidas na Introdución do libro:
“No verán de 2016, xunto con dous amigos emprendemos unha viaxe no noso propio coche, camiño da Illa Esmeralda. Chegamos ao porto de Roscoff, na Bretaña francesa e alí embarcamos no ferry “Oscar Wilde” (axeitado nome o seu) rumbo a Rosslare e desde alí a Wesford, cidade natal do escritor John Banville, onde pasamos a primeira noite. Logo viría un percorrido por toda a illa, ata rematar novamente en Wesford.”
No seguinte enlace pódese acceder ao contido deste poemario.
A CASA-MUSEO MANUEL MARÍA PROXECTA ESTE SÁBADO, APÓS O DÍA INTERNACIONAL DA MULLER, “TECIDO RESISTENTE”, DE MARINA CHIAVEGATTO
Estesábado día 9 de marzo, ás 20 hrs, após a xornada reivindicativa do Día internacional da muller, a Casa-Museo Manuel María proxecta Tecido Resistente, un documentario de Marina Chiavegatto que foi o gañador, en 2018, do I Premio Luísa Villalta de Proxectos Culturais pola Igualdade convocado pola Deputación da Coruña.
O documental recupera a historia dos centos de mulleres que protagonizaron “unha silenciosa revolución” na vila de Présaras (Vilasantar) nos primeiros anos do século XX e que mudaron a economía e a organización social de toda unha comarca. É un relato sobre o empoderamento e o feminismo. Trailer: https://vimeo.com/289877887
Tras a proxección de Tecido Resistente, de 40 minutos de duración, haberá un coloquio coa súa directora, Marina Chiavegatto.
A entrada para ver o documental é libre até encher o aforo e pode reservarse o billete de entrada en contacto@casamuseomanuelmaria.gal ou chamando ao tel. 698177621.
*Información achegada desde a Casa-Museo Manuel María.
O pasado venres, 1 de marzo, inaugurouse na sala de exposicións da Casaa da Cultura de Vilalba a NATUREZA ÍNTIMA, da artista multidisciplinar Adolfina Mesa Nesa inauguración contouse coa participación poética de Pilar Maseda, Beatriz Dourado e Martiño Maseda, que engalanaron cos seus versos o ambiente cromático e conceptual que mana de NATUREZA ÍNTIMA. E tamén se estivo presente a concelleira de Cultura de Vilalba, Chery Grandío, que abriu o acto de inauguración, o cal rematou coas palabras da propia Adolfina Mesa, que a través de verbas explicativas convidou ao público asistente a realizar unha peregrinaxe visual e emocional pola exposición que achegou á vila chairega.
A exposición NATUREZA ÍNTIMA está composta por un total de trinta e seis obras, das cales tres son instalacións. Vinte obras, e mais as instalacións xa mencionadas, abarcan o tema da figura feminina, o feminismo, a loita pola igualdade de xénero, o maltrato, a violencia machista, etc. Amosando tamén no resto das obras un compromiso de protesta, crítica e reflexión en diversas temáticas sociais. Nunha das instalacións titulada CLAUSTRO PATRIARCAL, a artista Adolfina Mesa afirma “vivimos nun claustro patriarcal, onde a diario a violencia contra as mulleres así como o caso omiso que se fai delas e as súas denuncias, dos seus dereitos e da súa existencia. Só o feito de que teñamos que seguir dando a loita en todos os ámbitos sociais, profesionais, etc., sobre todo para vivir sen medo a ser asasinadas, maltratadas ou violadas… O feito de que continúen noticias, que observamos diariamente, sobre feminicidios ou atentados contra a liberdade da muller son o mellor exemplo diso.”
Esta exposición permanecerá aberta na Casa da Cultura de Vilalba durante todo o mes de marzo.
Comezamos o ano cunha nova edición das Foliadas de Inverno de Castiñeiro Milenario, como sempre na Casa do Pobo da Asociación Veciñal do Castro (Begonte). Nesta ocasión, os eventos previos á foliada, veñen con novidades, pois faremos a presentación do I Ciclo de Cine Galego de Castiñeiro Milenario. Un proxecto que levamos intentando sacar adiante desde hai tempo e que este ano, por fin, vai ver a luz. A primeira cita co Ciclo de Cine (do que teredes novidades en breve) vai ser a proxección do mediometraxe documental de Xurxo Souto e Martín Rodas titulado “Dos Gaiteiros do Mar”. A película proxectarase ás 19:15 e servirá tamén como unha pequena lembranza a un dos seus protagonistas, Lito de Pinténs, recentemente falecido.
Despois deste inicio
espectacular, seguiremos co concerto que vai dar a banda de gaitas, Sons da Chaira. A
partires da 8 da tarde, a banda vai tocar o repertorio co que representaron, de
xeito fantástico, á Escola de música de Rábade, Begonte e Outeiro de Rei no
afamado Festival de Lorient este pasado verán.
Logo dun ratiño para repoñer
forzas e dar paso aos momentos festeiros coa foliada propiamente dita, que
empezará a partir das
21:15, aproximadamente. Nesta ocasión contamos con dous grupos.
Por primeira vez, cruzamos a fronteira luguesa e veñen a facer unha festaza das
boas, Os Feroces da Galgueira, desde As Pontes, e despois, un dos grupos
míticos da música tradicional de Lugo, A Volta do Agro. Sen dúbida dúas
agrupacións que van facer que o torreiro se quente en pleno inverno. Ao remate
da súas intervencións, comezará a foliada
aberta.
