O sábado 23 de outubro de 2021, ás 20:00 horas, no Auditorio Municipal de Vilalba, celebrarase o acto de entrega do IV Premio Agustín Fernández Paz de narrativa infantil e xuvenil pola igualdade a Iria Misa, gañadora do mesmo polo seu libro A CIDADE DO ÁTOMO.
Véxase nota informativa de dito evento literario.
O IESCHA organiza senllos actos sobre o PXOM a celebrar os venres 22 e 29 de outubro de 2021, ás 20:30 horas, na Casa da Cultura de Vilalba O día 22 de outubro terá lugar unha conferencia a cargo da arquitecta técnica Fátima López Soto, co título O planeamento. A ferramenta para facer cidade. E o día 29 celebrarase o debate entre os representantes dos partidos políticos BNG, PP, PSOE e VA.
Velaquí a nota informativa de ditos actos.
Este sábado, 16 de outubro, ás 17 hrs, na Casa-Museo Manuel María inician unha nova tempada para as familias e crianzas. E faraón cunha peza de monicreques, “Xogo revolto”, de Trécola Producións.
Catro protagonistas, cada un deles cunhas experiencias vividas, cada un deles entende a vida da súa maneira, cada un deles é especial e único. Son amigos, xogan e aprenden xuntos aínda que ás veces non saiban comunicarse ou comportarse como deberan…
Unha proposta de monicreques de fío en que nenas e nenos sentiranse directamente identificados desde o principio xa que o guión está baseado en situacións da súa vida cotiá.
O billete para asistirdes ao espectáculo é de 2 € e é necesario reservar en contacto@casamuseomanuelmaria.gal ou a través do whatsapp 698177621
O venres 15 de outubro, no pazo de San Marcos de Lugo, celebrarase a inauguración da exposición “A Ulloa. Fotografías centrípetas”, promovida polo Instituto de Estudos Ulloáns e comisariada polas socias de dito Instituto, Patricia Coucheiro e Susana Varela Negro.
A exposición está integrada no programa “Mulleres rurais”, da Rede Museística da Deputación de Lugo, organizado pola súa xerente, Encarna Lago, para conmemorar o día da Muller Rural.
Trátase dunha exposición colectiva de catorce fotógrafas que pon en diálogo diferentes olladas de mulleres ulloás sobre o seu propio territorio, con propostas fotográficas que parten dunha reflexión, crítica ou posta en valor dalgún aspecto relacionado coa comarca da Ulloa.
Velaquí o díptico da exposición
A Rede do Patrimonio presentou por rexistro unha solicitude que considera primordial na salvagarda da saúde do noso patrimonio. Que se poñan á disposición pública, na rede, as fichas de catalogación referidas as áreas perimetrais de cada parque
As entidades adheridas a REDE do PATRIMONIO EXPOÑEN:
1. Que é de todos/as sabido que neste momento están en tramitación (en fases diferentes) preto de 200 proxectos eólicos no territorio galego.
2. Que as obras previstas van traer consigo unha grandísima repercusión sobre o patrimonio natural e cultural do país.
3. Que nunca antes se puxeron en marcha dun xeito simultáneo tantas obras de promoción privada e desta magnitude.
4. Que é previsible a irreversibilidade de moitas das accións que se acometan.
5. Que as dimensións tan extraordinarias destes proxectos demandan tamén un esforzo extraordinario na protección do noso patrimonio.
6. Que é dificilmente entendible o silencio da Dirección Xeral de Patrimonio ante todas estas obras e ás posibles agresións que poden supoñer sobre o patrimonio.
7. Que tal e como recentemente se acaba de demostrar co informe do ICOMOS sobre a Candidatura da Ribeira Sacra para Patrimonio Mundial, que obrigou á súa retirada, a instalación de parques eólicos pode impedir futuros desenvolvementos en amplas zonas do territorio ao ficar alterada a súa paisaxe e patrimonio. Citamos:
ICOMOS notes with some concern the visual impact of wind turbines on the proposed Outstanding Universal Value of the nominated property. One large wind farm is located in the buffer zone between two of the nominated property’s components, and three others, while more distant, are also visible.
2021. Evaluations of nominations of cultural and Mixed Properties. Icomos report for the World Heritage Committee.
44 extended session. Fuzhou (China)/ online meeting 16-31 July 2021.
WHC-21/44. COM/INF. 8B1
E é por iso que, en nome das asociacións e colectivos asinantes, SOLICITAMOS:
1. Que se poñan á disposición pública, na rede, as fichas de catalogación referidas as áreas perimetrais de cada parque en tramitación facilitando á veciñanza a elaboración das alegacións.
2. A creación dunha Comisión de asesoramento técnico con carácter multidisciplinar e independente que estude un por un cada proxecto eólico xa nas fases primeiras de tramitación e que advirta das posibles afectacións sobre o Patrimonio cultural.
3. Que esta comisión elabore de oficio informes para cada un dos proxectos.
4. Que a Comisión advirta aos órganos asesores competentes sobre Patrimonio (Consello da Cultura Galega, Real Academia de Belas Artes do Rosario, Universidades) daqueles bens do Patrimonio que se atopen ameazados ou en perigo polos proxectos eólicos en tramitación e que, estes órganos, á súa vez tamén se pronuncien ao respecto.
5. Que con carácter preventivo se paralice calquera posible obra sobre a que recaia sospeita de posible destrucción irreversíbel do Patrimonio ata que os tribunais se pronuncien, no caso de estar en litixio, e sempre que as partes demandantes lle comuniquen formalmente á Consellería de Cultura a presentación destas demandas.
6. Que os Servizos Xurídicos da Consellería de Cultura estuden personarse naqueles procedementos xudiciais nos que se dirima a posible destrución de Patrimonio antes, durante ou despois das obras de execución dos proxectos eólicos.
—
Rede do Patrimonio Cultural