O dúo vigués dará a coñecer aos medios de comunicación o seu novo álbum a través dunha instalación escultórica que o público poderá visitar na tarde do martes 7 e ao longo do mércores 8
O acto inclúe unha pequena actuación e, ao remate, haberá un pequeno almorzo e as artistas atenderán aos medios presentes
Fillas de Cassandra presentarán este martes, 7 de abril, a exposición ‘TERTÚLIA: doce cancións, doce cadeiras’. Trátase dunha experiencia única de preescoita do seu novo disco, que verá a luz nas plataformas dixitais o 24 de abril.
‘TERTÚLIA: doce cancións, doce cadeiras’ agroma daportada do novo disco de Fillas de Cassandra. Trátase dunha imaxe poderosa ideada por María SOA e Sara Faro en colaboración coa fotógrafa Arancha Brandón, a deseñadora Kika V. Ramil e o colectivo escenográfico As dúas e punto. Protagonizada por doce cadeiras dispostas en círculo, a obra explora que forma, textura ou cor terían as cancións de Tertúlia se fosen obxectos.
Así, a Fundación Granell acollerá os días 7 e 8 de abril unha instalación aberta ao público na que as doce cadeiras da portada se transforman nun dispositivo no que a canción toma forma: cada unha delas, correspondente a un tema do disco, deixa de ser un simple moble para converterse nunha mensaxe en si mesma.
Ao igual que as letras de ‘Tertúlia’, estas pezas non perseguen a compracencia nin a comodidade neutral do mobiliario urbano. Polo contrario, toman partido e interpelan a quen as mira; algunhas son refuxio que acolle e protexe, mentres outras, na súa crueza, incomodan ou expulsan, obrigando a quen escoita a situarse fronte á obra.
A elección da cadeira como protagonista da portada e como símbolo non é casual: remite ás sobremesas infinitas e ás mulleres que sacaban o asento á rúa para saír á fresca, conversar e converter o espazo público nun lugar de transmisión oral, unha das ideas centrais que atravesa o disco.
A presentación á prensa terá lugar na mañá deste martes 7, a partir das 11:00 horas,na Fundación Granell.. As e os asistentes poderán escoitar por primeira vez o disco e conversar, de xeito distentido, coas artistas, que tamén ofrecerán unha pequena actuación ao vivo.
Haberá un pequeno almorzo, polo que se prega confirmación de asistencia e informar previamente das posibles intolerancias ou alerxias para que todas as asistentes poidan participar desta singular tertúlia.
Martes 7 de abril de 2026 11:00 horas Fundación Eugenio Granell (Praza do Toural, 8. Santiago de Compostela) Duración aprox.: 60 minutos (inclúe unha pequena actuación do dúo)
Presentación da exposición e experiencia de preescoita do novo disco de Fillas de Cassandra, que se publicará nas plataformas dixitais o 24 de abril. Ao finalizar o acto, as artistas conversarán de xeito distendido coas asistentes e ofrecerán declaracións aos medios de comunicación presentes até as 14:00 horas.
* IMPORTANTE: Os medios interesados en manter unha conversa en profundidade e presencial con María e Sara, poderán acordar unha entrevista co equipo de prensa de Tremendo Audiovisual para a tarde do martes 7 ou na mañá do mércores 8 *
HORARIO DE APERTURA DA EXPOSICIÓN AO PÚBLICO Martes 7, de 17:00 a 20:00 horas Mércores 8, de 11:00 a 14:00 e de 17:00 a 20:00 horas
O dúo vigués desvela hoxe nas súas redes sociais a portada do disco: doce cadeiras que transforman a música en materia
A Fundación Granell de Santiago acollerá os días 7 e 8 de abril a exposición ‘TERTÚLIA: doce cancións, doce cadeiras’, onde o público poderá preescoitar de xeito exclusivo o álbum a través dunha ducia de pezas escultóricas
Fillas de Cassandra presentará o seu novo espectáculo no Recinto Feiral de Pontevedra o 9 de maio
O vindeiro 24 de abril, María SOA e Sara Faro lanzarán ‘Tertúlia’, o seu agardado segundo LP. Un traballo que supón un paso firme na súa evolución artística, onde o orgánico e o electrónico se entrelazan para dar voz a un diálogo que transcende o tempo.
Neste novo traballo, producido xunto a Çantamarta polas propias Fillas de Cassandra, a electrónica —desde os ritmos rotos ao ambient— convértese na linguaxe protagonista, reflectindo o latexo da xeración de mozas galegas á que pertencen. ‘Tertúlia’ é un convite a desobedecer a través do encontro.
O álbum articúlase arredor de 12 temas que funcionan como un espazo de confianza, un xesto político de escoita nun contexto de fragmentación social. Desa ducia, xa se coñecen tres adiantos: a declaración de intencións que foi ‘saír á fresca’, o hedonismo comunitario de ‘insolación’ e a recente ‘déixate ver’. Esta última, en colaboración coa madrileña Ede, é unha elegía á nostalxia e á defensa das prazas como lugares públicos de conexión e encontro.
Hoxe desvélase a portada do disco, unha imaxe poderosa ideada por María SOA e Sara Faro en colaboración coa fotógrafa Arancha Brandón, a deseñadora Kika V. Ramil e o colectivo escenográfico As dúas e punto. Protagonizada por doce cadeiras dispostas en círculo, a obra explora que forma, textura ou cor terían as cancións se fosen obxectos.
A elección da cadeira como símbolo non é casual: remite ás sobremesas infinitas e ás mulleres que sacaban o asento á rúa para saír á fresca e converter o espazo público nun lugar de transmisión oral. Nesta colaboración con As dúas e punto, Fillas de Cassandra logran que a canción non só se escoite, senón que se encarne.
Exposición e preescoita: ‘Doce cancións, doce cadeiras’
Como antesala ao lanzamento, os días 7 e 8 de abril, a Fundación Granell de Santiago de Compostela acollerá a exposición ‘TERTÚLIA: doce cancións, doce cadeiras’. Unha experiencia única de preescoita do novo disco de Fillas de Cassandra, onde a ducia de elementos que conforman a portada do álbum se transforman nun dispositivono que melodía e a materia dialogan sen intermediarios.
Cada unha das doce cadeiras deixa de ser un simple moble para converterse nunha mensaxe en si mesma: ao igual que as letras de ‘Tertúlia’, estas pezas non perseguen a compracencia nin a comodidade neutral do mobiliario urbano. Polo contrario, toman partido e interpelan a quen as mira; algunhas son refuxio que acolle e protexe, mentres outras, na súa crueza, incomodan ou expulsan, obrigando a quen escoita a situarse fronte á obra.
O proxecto expositivo está deseñado para que o silencio da escoita sexa, en realidade, o disparador dunha palabra compartida. A Fundación Granell transformarase nunha gran praza pública na que tecer comunidade a través da escoita, dos tempos de espera e do diálogo.
O acceso será libre en horario de apertura do espazo museístico o martes 7 e o mércores 8. Para unha mellor experiencia, recoméndase que cada visitante empregue os seus propios auriculares para ser parte da ‘Tertúlia’.
A gran ‘Tertúlia’ celebrarase o 9 de maio en Pontevedra
Após a publicación do álbum nas plataformas dixitais o 24 de abril, a gran presentación de ‘Tertúlia’ terá lugar 9 de maio no Recinto Feiral de Pontevedra. O escenario transformarase nunha gran praza aberta onde Fillas de Cassandra citarán ao público para poñer, por fin, a palabra no centro. As entradas para este encontro xa están á venda.
O artista conversará con Nuno Pico (Grande Amore) o martes 7 de abril
A cita supón o regreso de Cuevas á cidade antes do seu único concerto en Galicia, que terá lugar o 30 de abril no Coliseum
Os medios interesados en cubrir o evento terán que solicitar a súa acreditación antes das 12 horas do martes 7
O martes 7 de abril ás 20:00 horas a Fundación Luis Seoane da Coruña acolle un encontro especial entre Rodrigo Cuevas e Nuno Pico, o rostro detrás de Grande Amore. O acceso será libre ata completar capacidade.
Hai artistas que non caben nunha soa palabra. Rodrigo Cuevas é cantante, acordeonista, percusionista, DJ, compositor, performer, axitador folclórico e, sobre todo, unha anomalía fermosa no panorama musical español.
Nacido en Oviedo en 1985, Cuevas pasou anos en Galicia, onde aprendeu a falar galego e se iniciou na música e no baile tradicional, antes de construír un universo propio onde a música electrónica conversa co humor, a sensualidade e a crítica social, convertendo os seus espectáculos nunha experiencia cultural e sensorial única.
A súa proposta incorpora bases electrónicas á música tradicional, cunha estética escénica que mestura o rural co cabaret e o pin-up. Rodrigo Cuevas, sinxelamente, fai o que ninguén máis fai: rescatar as raíces para levalas a onde nunca estiveran. Considéraselle un dos maiores talentos do panorama musical español actual e os premios déronlle a razón: o Premio Nacional das Músicas Actuais en 2023, o Premio Arcoíris, o Premio Ollo Crítico de RNE e o MIN ao Artista Revelación.
O seu último traballo, Manual de Romería, foi elixido Mellor Disco Nacional por Rockdelux e agora chega a súa nova entrega: Manual de Belleza, coa que pecha unha triloxía que redefiniu o que pode ser a música popular neste país. Este novo traballo preséntase como un exercicio de etnografía pop, onde Cuevas se detén na contemplación da estética do cotiá, o paso do tempo e a dignidade das identidades disidentes no rural.
No musical, este peche de triloxía consolida a madurez dun son que funde as texturas orgánicas de pandeiros e acordeóns cunha electrónica de vangarda que bascula entre o ambient e o techno. Ao integrar gravacións de campo e testemuños reais de aldeas, Cuevas consegue que ritmos ancestrais como a xota ou o xiringüelu soeen tan contemporáneos como calquera sesión de club berlinés. Esta proposta converte o seu próximo concerto no Coliseum o 30 de abril nun auténtico ritual moderno.
Pola súa banda, Nuno Pico (Grande Amore) é unha das figuras de referencia da xeración millennial na música pop galega. O seu singular son de punk electrónico conquistou a miles de persoas que conectan coas súas penas retratadas en sons de rave. Dúas maneiras de entender a tradición, a identidade e a transgresión nunha conversa que promete ser tan honesta coma imprevisible.
A Asociación de Actores e Actrices de Galicia renderá homenaxe ao histórico actor e dramaturgo, finado no verán de 2025, nun evento que se presentará oficialmente o luns 6 de abril no Teatro Rosalía Castro
Gloria Rico Galán é unha das figuras máis versátiles da escena teatral galega contemporánea, desenvolvendo un labor integral como actriz, directora e produtora
Festexar a vida e a herdanza de Manuel Lourenzo. Esta é a premisa central que tecerá a 30ª edición da Gala dos Premios de Teatro María Casares, a gran cita da escena galega. Organizada pola Asociación de Actores e Actrices de Galicia, terá lugar o mércores 8 de abril no Teatro Rosalía Castro. A entidade rende así homenaxe ao compañeiro e mestre finado o pasado verán, cuxa obra é fundamental para entender a nosa escena.
Nesta ocasión, a dirección da gala recaerá en Gloria Rico, unha das figuras máis versátiles da escena teatral galega contemporánea. A artista, coñecedora desde a proximidade da vida e traballo do Premio Nacional de Literatura Dramática no 1997, propón a idea de festexar a súa obra. O espectáculo contará cunha posta en escena que se alonxará do drama para por en valor o imaxinario de Lourenzo.
“Queremos reivindicar tanto as loitas como as facetas laboral e artística de Manuel, e farémolo desde a celebración. O espectáculo será coma unha festa popular ao vivo: será un espazo no que cantaremos, bailaremos e reflexionaremos a vida e obra de Lourenzo, mais sen caer na melancolía. Celebraremos o traballo dunha persoa e compañeiro excepcional, de todo un referente da nosa cultura ”, expón.
Os detalles da gala, que terá lugar o mércores 8, presentarase o vindeiro luns, 6 de abril, ás 12.30 horas no Teatro Rosalía Castro. Será nunha rolda de prensa que contará coa presenza e participación da propia Gloria Rico, ademais de representantes da AAAG, Concello da Coruña, Deputación da Coruña e Xunta de Galicia. A gala tamén conta co apoio da Fundación AISGE e Gadisa.
Sobre Gloria Rico
Licenciada en Filoloxía pola Universidade de Santiago de Compostela, a traxectoria de Gloria Rico está estreitamente vinculada ao teatro universitario e profesional desde os seus inicios, desenvolvendo un labor integral como actriz, directora e produtora.
Fundadora da compañía Teatro En Punto (TEP), Gloria Rico traballou con algunhas das formacións máis sobranceiras do país, como Matarile, Teatro Bruto, Casahamlet, Teatro do Atlántico e o Centro Dramático Galego (CDG). No seu currículo como intérprete destacan pezas como Cachorros sen domesticar (1996), Ninguén chorou por nós (2000), Rosalía (2001) ou a recente Invocación (2025).
A súa faceta como directora e axudante de dirección permitiulle colaborar man a man con referentes como Manuel Lourenzo e Xulio Lago. Entre as súas direccións máis recentes destacan Unha rosa entre as pernas (2013), 9999 (2014) e a peza de autoría propia Oca (2023), estreada no Festival Amigos de la Ópera da Coruña. No 2025, presentou no Museo Centro Gaiás a cocreación Olladas converxentes.
Máis alá das táboas, a súa carreira esténdese ao ámbito audiovisual, con participacións en títulos como a longametraxe Martes de Carnaval (1990) ou a mítica serie Mareas Vivas (2000). Como autora, publicou Contos troianos na colección de Manuais de Teatro de Casahamlet e participou no grupo de traballo DramaturXa 2018 do CDG.
