Este próximo sábado, 7 de novembro, ás 20 horas, estará MINGUANTE na Casa-Museo Manuel María. Veñen presentar, en acústico, o seu último traballo musical, Pequenos Incendios, alén de tocar outras pezas de anteriores traballos.
Miguel Alonso e Óscar Martínez, MINGUANTE, fan música pop de autor en galego.
Velaquí unha ligazón onde se poden algúns dos temas deste último traballo
A compañía catalá Titzina iniciará no festival a xira estatal de Disección de la bondad en tres actos, unha farsa de investigación sobre os límites entre a verdade, a memoria, a identidade e a mentira; será o venres 30, ás 21.00 horas
Rafael Álvarez, El Brujo, pechará o sábado 31 a programación escénica coa estrea en Galicia de La segunda venida de Cristo o el yoga de Jesús, un monólogo que combina humor, improvisación, música en directo e reflexión espiritual
Esta última semana do FIOT35, do xoves 29 ao sábado 31 de outubro, inclúe un Onda FIOT de Titzina con Daniel Galindo, xornalista cultural de RNE, con entrada libre para todos os públicos, este xoves 29, ás 20.00h, no Pazo da Cultura, e as exposicións Zoom FIOT 2025 e Manuel Lourenzo. A pegada que continúa
Todos os detalles desta 35ª edición do FIOT poden consultarse en www.fiot.gal
O Festival Internacional Outono de Teatro de Carballo, o FIOT, afronta a súa sexta e última semana de programación coa que será a despedida dunha 35ª edición marcada pola diversidade de linguaxes, a presenza de grandes nomes da escena e o apoio á creación contemporánea. Do xoves 29 ao sábado 31 de outubro, o festival reunirá dúas propostas destacadas: Disección de la bondad en tres actos, da compañía Titzina, que iniciará en Carballo a xira estatal da súa nova montaxe, e La segunda venida de Cristo o el yoga de Jesús, a estrea en Galicia do novo espectáculo de Rafael Álvarez, El Brujo.
A recta final do FIOT comezará este xoves cun encontro de Titzina con Daniel Galindo, xornalista cultural e director do programa La Sala, de RNE, no marco de Onda FIOT – Escola do Espectador nas Ondas. Será ás 2000 horas, no pazo da Cultura de Carballo. O venres, a compañía catalana presentará no Auditorio do Pazo da Cultura a súa nova creación, ás 21.00 horas, unha farsa en tres actos que explora os mecanismos da bondade, o engano e a construción da verdade. O sábado 31 ás 20.00 horas, será a quenda de El Brujo, que pechará o Programa de Sala cun monólogo no que dialogan os evanxeos, a filosofía oriental e a tradición do ioga. A programación completarase cun novo espazo de encontro entre público e compañía e coas exposicións que acompañaron esta edición. Paralelamente, o FIOT acollerá una nova actividade sectorial no marco de festival: una reunión da comisión artística da Rede Galega de Teatros no FIOT, que levarase a cabo en Carballo o venres 30, convocada pola Agadic, coa participación da directora artística do FIOT Carmen Castro, integrante da comisión.
TITZINA REGRESA AO FIOT CON ‘DISECCIÓN DE LA BONDAD EN TRES ACTOS’
A compañía catalá Titzina, referente dunha creación escénica construída a partir da investigación da realidade e dunha mirada poética sobre o comportamento humano, chegará ao FIOT o venres 30 de outubro, ás 21.00 horas, no Auditorio do Pazo da Cultura, con Disección de la bondad en tres actos. A montaxe, que se estrea en Galicia, marca o inicio da xira do novo espectáculo da compañía, que regresa a Carballo despois de que o público do festival puidese achegarse ao seu proceso creativo na pasada edición a través dunha lectura dramatizada.
A obra presenta unha farsa en tres actos arredor da cambiante natureza da verdade. Un mago e o seu axudante recorren a métodos cada vez máis disparatados para cobrar a pensión dunha nai falecida; un agricultor manipula a súa memoria para conseguir unha indemnización millonaria; e un defraudador encantador, que vive baixo múltiples identidades, saquea o seu contorno máis próximo. Tres historias nas que a realidade e a ficción se confunden e nas que os personaxes desafían os límites entre o que aconteceu, o que lembran e o que están dispostos a facer crer.
Fieis ao seu inconfundible estilo, Diego Lorca e Pako Merino constrúen unha viaxe escénica que combina investigación, ironía e poesía para interrogar o público sobre a memoria, a identidade, a mentira e a verdade. A proposta deixa abertas máis preguntas das que resolve e invita a observar ata que punto a bondade, a honestidade e a propia versión dos feitos poden transformarse segundo as circunstancias.
A creación, dirección e interpretación corresponden a Diego Lorca e Pako Merino, con dramaturxia de Lorca, escenografía de Luis Crespo, vestiario de Sergi Cerdán, deseño de iluminación de Jordi Thomàs e música e espazo sonoro de Arnau Obiols.
UN ENCONTRO CO PROCESO CREATIVO DE TITZINA
Como antesala da función, o xoves 29 de outubro, ás 20.00 horas, o Salón TV do Pazo da Cultura acollerá unha nova sesión de Onda FIOT – Escola do Espectador nas Ondas, con Titzina e Daniel Galindo, xornalista cultural e director de La Sala, de RNE. O encontro, aberto ao público ata completar a capacidade e sen necesidade de inscrición, permitirá coñecer de primeira man os detalles e os segredos do proceso de creación de Disección de la bondad en tres actos.
A conversa gravarase en directo en formato podcast e incorporarase ao arquivo dixital de Onda FIOT, a iniciativa coa que o festival amplía os seus espazos de mediación e formación de públicos máis alá das funcións presenciais.
ESTREA EN GALICIA DO ÚLTIMO ESPECTÁCULO DE EL BRUJO
O sábado 31 de outubro, ás 20.00 horas, Rafael Álvarez, El Brujo, será o encargado de pechar a programación escénica da 35ª edición do FIOT con La segunda venida de Cristo o el yoga de Jesús, unha proposta que chega por primeira vez a Galicia e que combina humor, palabra, xesto, improvisación, música en directo e reflexión espiritual.
Poucos intérpretes son capaces de converter un escenario baleiro nun universo enteiro. Desde a súa longa experiencia sobre as táboas e a súa conexión directa co público, El Brujo revisita a figura de Xesús desde unha perspectiva pouco habitual, poñendo en diálogo os evanxeos coa filosofía oriental e a tradición do ioga. O espectáculo abre así un espazo para as grandes preguntas sobre a conciencia, a espiritualidade e a condición humana, sen renunciar ao humor nin ao carácter festivo do teatro.
A proposta bebe da tradición dos antigos xograres e da influencia de Dario Fo, combinando reflexión e comicidade nun monólogo no que a palabra, o xesto e a improvisación constrúen un universo escénico propio. A música en directo, a cargo de Javier Alejano, completa unha experiencia que invita a mirar desde outro lugar unha figura esencial da tradición cultural e espiritual.
Rafael Álvarez asume a interpretación, a creación e a dirección do espectáculo, acompañado pola composición musical e a interpretación en directo de Javier Alejano. A montaxe propón unha aposta arriscada na que o coñecemento, a risa e o xogo escénico conviven para celebrar o poder transformador do teatro.
AS EXPOSICIÓNS ACOMPAÑAN A DESPEDIDA DO FESTIVAL
Durante os tres últimos días do FIOT35, o público poderá visitar no Pazo da Cultura as exposicións Zoom FIOT 2025 e Manuel Lourenzo. A pegada que continúa, abertas de 17.00 a 21.00 horas. A primeira recupera a memoria visual da pasada edición do festival a través das imaxes que documentan espectáculos, artistas e momentos compartidos co público. A segunda rende homenaxe a Manuel Lourenzo, figura fundamental do teatro galego contemporáneo, e convida a descubrir a pegada artística e humana dun creador que marcou varias xeracións da escena galega.
Estas propostas expositivas prolongan o espírito do FIOT máis alá das funcións e reivindican a memoria teatral como parte esencial da vida cultural de Carballo e de Galicia.
UNHA COIDADA SELECCIÓN CO MELLOR DA ESCENA ACTUAL EN CARBALLO
“Cando todo cae, ven ao teatro”. Baixo este lema, chega unha nova entrega do FIOT, o Festival Internacional Outono de Teatro de Carballo, que celebra a súa 35ª edición do 23 de setembro ao 31 de outubro de 2026. Un ano máis, o festival busca reunir o mellor da escena actual en Carballo ao longo de cinco semanas, nun cartel ecléctico no que hai Programa de Sala, OTNI, Rúa dos Contos, Teatro de Rúa, FIOT en Ruta, FIOTeen, FIOTiño e Micro-escenas M2.
No programa da 35ª edición do Festival Internacional Outono de Teatro de Carballo danse cita nomes imprescindibles da escena galega, española e internacional, como Alba Flores, Alberto Velasco, almealera, Andrés Lima, Carles Sans (fundador de Tricicle), Chévere, a Companhia do Chapitô, Delphine de Vigan, Esther Carrodeguas, Gloria Muñoz, Juan Carlos Fisher, Lúa Mosquetera, María Velasco, Mofa e Befa, Rafael Álvarez, El Brujo, Spinish Circo, Titzina e moitas máis figuras que merece a pena revisitar ou descubrir.
En total, ‘o corazón do teatro en Galicia’ achegará a todos os públicos 43 espectáculos, 8 estreas absolutas, 9 estreas en Galicia, procedentes de dous países (España e Portugal) e 8 comunidades autónomas (Andalucía, Aragón, Cataluña, Comunidade Valenciana, Comunidade de Madrid, Castela León, Galicia e Illas Baleares).
Á cita con esta nova entrega do FIOT non faltarán tampouco coproducións, residencias artísticas e máis dunha vintena de actividades de mediación de públicos e apoio á creación teatral, como a exposición ZoomFIOT, presentación de libros e coproducións, gravación en directo dos podcasts do OndaFIOT, os Café con…, un homenaxe a Manuel Lorenzo, lecturas dramatizadas, encontros co público ao rematar a función, a colaboración coa Noite Europea das Persoas Investigadoras, o Premio do Público, o Certame de Teatro Lido ou a entrega do galardón Xograr de Outono a Antonio Porteiro.
Toda a información de horas e venda de entradas está dispoñible na web do festival en www.fiot.gal. O FIOT – Festival Internacional Outono de Teatro está organizado pola Asociación Telón e Aparte eo Concello de Carballo, co patrocinio da Xunta de Galicia, a Deputación da Coruña, o Ministerio de Cultura e a Fundación Luís Calvo Sanz. Un ano máis, conta tamén coa colaboración da Libraría Brañas, Camiño Escena Norte, o Colectivo RPM e o CCA Carballo.
SOBRE O FIOT: 35 ANOS CREANDO TEATRO
O Festival Internacional Outono de Teatro (FIOT) é un festival que ofrece un programa comprometido coas artes escénicas e cos proxectos máis prestixiosos do teatro actual. Está organizado pola Asociación Cultural Telón e Aparte e conta coa colaboración do Concello de Carballo. Pola súa traxectoria, a calidade da programación, a variedade das propostas de intermediación cultural que ofrece e pola súa proxección, o FIOT sitúase como un dos festivais máis importantes de Galicia e referente cultural durante o outono: un mes completo de programación, con preto de 40 espectáculos e ducias de actividades paralelas, converten a Carballo na capital das artes escénicas da comunidade galega.
Desde hai 35 anos, o FIOT dá a coñecer en Carballo o traballo de compañías de referencia e de creadoras emerxentes. Mais, especialmente, busca atraer novos públicos ao teatro. O festival nace en 1992 como espazo para ofrecer unha programación de teatro de calidade na comarca de Bergantiños e impulsar unha estrutura creativa arredor das artes escénicas na zona. Desde entón, FIOT é o lugar de encontro entre artistas, compañías e programadoras, e aposta por estimular a creación e o traballo en rede tanto a través da oferta de espazos para residencias artísticas como da implicación, do propio festival, na produción e novos espectáculos, fundamentalmente de compañías galegas.
Nas súas pasadas 34 edicións, FIOT contou coa participación das compañías máis relevantes de Galicia e España, ademais do ámbito internacional, outorgando así espazo a numerosas disciplinas, novas linguaxes, xéneros e formatos; ademais de ofrecer estreas absolutas ou no territorio galego. Desde xeito, máis de 360 formacións e artistas presentaron os seus traballos no FIOT, con nomes tan salientables no marco do panorama escénico galego, nacional e internacional coma Blanca Portillo, Pablo Messiez, Rafael Álvarez, El Brujo, Yllana, Ron Lalá, Pont Flotant, Titzina, Kamikaze Producciones, Compañía do Chapitô, Leo Bassi, Chévere, Timbre 4, Mofa e Befa, Xosé A. Touriñán, Quico Cadaval, Pablo Remón, Andrés Lima…
Ao longo da súa traxectoria, diversos recoñecementos acreditaron o intenso traballo do FIOT para achegar as artes escénicas do século XXI á cidadanía e recoñeceron o festival como unha das iniciativas teatrais do noroeste peninsular máis relevantes na actualidade. Entre outras distincións cítanse, ademais da ‘Insignia Cultural’ do ‘Observatorio de la Cultura’ da Fundación Contemporánea como mellor proxecto cultural de Galicia en 2022, o Premio da Cultura Galega 2018 no ámbito das artes escénicas outorgado pola Xunta de Galicia ou o Premio Galego do Ano 2018, entre outros.
O Instituto de Estudos Chairegos, coa colaboración do Concello de Vilalba e a Área de Cultura-Vicepresidencia da Deputación de Lugo, organiza a representación teatral INSTRUCIÓNS PARA TOMAR CAFÉ, espectáculo de narración oral a cargo de Carlos Rebolo, de Ítaca Teatro.
O acto terá lugar o venres 6 de novembro de 2026, ás 20:00 horas, na Sala de Exposicións do Auditorio Municipal de Vilalba, con entrada de balde.
O Instituto de Estudos Chairegos (IESCHA) en colaboración coa Academia Galega do Audiovisual, a Área de Cultura-Vicepresidencia da Deputación de Lugo e o Concello de Vilalba, organiza a proxección da longametraxe de ficción SAN SIMÓN, de Miguel Ángel Delgado, continuando deste xeito co CICLO MESTRE MATEO-2026 que nos está brindanado a oportunidade de poder disfrutar das películas finalistas (documentais, longametraxes e curtas) dos XXIV PREMIOS MESTRE MATEO.
Esta oitava proxección terá lugar no Auditorio Municipal de Vilalba o sábado 7 de novembro de 2026, ás 20:00h.
A entrada é de balde, pero haberá que facer a correspondente reserva de localidade en entradasvilalba.es.
A directiva da Asociación Galega das Empresas Musicais decidiu outorgar á banda de Muros o Premio a Artista do Ano 2026 porque representa unha das realidades máis estimulantes da música galega actual e é embaixadora dunha escena musical galega viva, contemporánea e con moito que dicir, ademais de ser un exemplo de como a conexión co público pode converterse nunha das grandes fortalezas dun proxecto
Na categoría de Persoa do Ano, desde a Xunta Directiva de AGEM, organizadora desta segunda edición dos Premios da Industria Musical de Galicia xunto á Xunta de Galicia, seleccionaron á Fundación Paideia polo seu compromiso sostido coa industria musical galega e pola súa labor de acompañamento, formación e profesionalización cuxo valor é difícil de cuantificar, contribuíndo, desde un proxecto sin ánimo de lucro, a que o talento emerxente galego poida desenvolverse e atopar o seu lugar no sector
Paralelamente, o público elixiu por votación popular ao Surfing The Lérez como proxecto gañador do Premio á Excelencia na Experiencia do Público neste 2026, mérito que o festival pontevedrés acada por segundo ano consecutivo
A Asociación Galega de Empresas Musicais organiza así a segunda edición dos Premios da Industria Musical de Galicia, que buscan poñer en valor aquelas traxectorias, proxectos e iniciativas que destacan polo seu compromiso coa creatividade, a innovación, o respecto e a sustentabilidade no sector musical galego
A Sala Capitol de Santiago de Compostela acollerá a noite do martes, 3 de novembro, a gala de entrega de premios: un encontro sectorial no que se darán a coñecer os gañadores no resto de categorías e se entregarán os galardóns a todos os e as premiadas
Os II Premios da Industria Musical de Galicia, rebautizados como Premios PALCO, impulsados por AGEM e a Xunta de Galicia, co apoio da Deputación da Coruña, veñen de anunciar aos proxectos seleccionados pola Xunta Directiva da Asociación Galega das Empresas Musicais como Artista do Ano e Persoa do Ano 2026 nesta segunda edición dos galardóns. AGEM decidiu outorgar a The Rapants o Premio ao Artista do Ano 2026, mentres que, na categoría de Persoa do Ano 2026, foi elixida a Fundación Paideia.
Paralelamente, o público seleccionou por votación popular ao Surfing The Lérez como proxecto gañador do Premio á Excelencia na Experiencia do Público neste 2026. A votación en liña finalizou o pasado martes, 27 de outubro, ás 23.59 horas, e a iniciativa máis votada nesta categoría aberta ás apartacións da audiencia foi o festival pontevedrés, que acada o mérito por segundo ano consecutivo, seguida en número de votos por outros queridos proxectos como Gulliver Fest e Osa do Mar. Con este galardón, a Asociación Galega de Empresas Musicais busca recoñecer aqueles festivais, concertos, salas e proxectos musicais que destacan pola organización, a atención ao público, a accesibilidade, os servizos, o ambiente ou o coidado de cada detalle, poñendo ás persoas espectadoras no centro e ofrecendo unha vivencia inesquecible.
En palabras de Josiño Carballo, tesoureiro de AGEM, “desde a Asociación Galega das Empresas Musicais recoñecemos a The Rapants co galardón ao Artista do Ano nesta segunda edición dos Premios PALCO, os Premios da Industria Musical de Galicia, porque representan unha das realidades máis estimulantes da música galega actual”.
E engade: “Coa creación de The Rapants Club, a banda de Muros foi quen de construír algo que vai moito máis alá dun disco ou dun concerto: unha comunidade na que o público se recoñece, coa que se identifica e da que quere formar parte. Encher o Multiusos Fontes do Sar cun proxecto propio, desde Galicia e cunha proposta dirixida especialmente a unha xeración nova, é un fito que merece ser celebrado e recoñecido. Demostra a capacidade do talento galego para mobilizar milleiros de persoas, crear referentes propios e conquistar espazos tradicionalmente asociados a grandes artistas estatais e internacionais”.
Finalmente, destaca: ”The Rapants son hoxe embaixadores dunha escena musical galega viva, contemporánea e con moito que dicir, ademais dun exemplo de como a conexión co público pode converterse nunha das grandes fortalezas dun proxecto artístico”.
Josiño Carballo anunciou, tamén, que “desde a Xunta Directiva de AGEM, organizadora de PALCO xunto á Xunta de Galicia, decidimos outorgar o recoñecemento á Persoa do Ano 2026 á Fundación Paideia”, confirmando que este recoñecemento “responde ao seu compromiso sostido coa industria musical galega e a un labor de acompañamento, formación e profesionalización cuxo valor é difícil de cuantificar. Desde unha posición sen ánimo de lucro, Paideia leva anos ofrecendo ferramentas, oportunidades e apoio a artistas e proxectos emerxentes, contribuíndo a que o talento poida desenvolverse e atopar o seu lugar no sector”.
“A achega da Fundación Paideia vai moito máis alá da formación: representa unha guía constante para quen comeza, unha oportunidade para adquirir capacidades profesionais e un impulso decisivo para que novas propostas musicais poidan medrar, gañar visibilidade e construír unha traxectoria”, engadiu Carballo. E concluíu: “Recoñecer á Fundación Paideia é recoñecer tamén a importancia de traballar colectivamente polo futuro da música galega, investindo nas persoas, no talento e nas condicións que fan posible unha industria máis sólida, preparada e sostible”.
Ademais destes tres galardóns hoxe anunciados, un xurado profesional composto polas asociacións AGEM, AGATEC, TESGAL, AGPXC e CLUBTURA, xunto ás e aos gañadoras e gañadores da pasada edición dos premios, seleccionou un total de 42 proxectosfinalistas nos Premios PALCO 2026, 3 por cada unha das 14 categorías xerais contempladas nos premios. A noite do martes, 3 de novembro, daranse a coñecer os proxectos gañadores nun encontro sectorial na Sala Capitol de Compostela, onde tamén terá lugar a entrega dos galardóns.
FINALISTAS DOS PREMIOS PALCO 2026
Iniciativas e profesionais nomeados e nomeadas nas categorías xerais dos Premios PALCO 2026:
Mellor deseño de iluminación
Álvaro Moreno (The Rapants)
Gabriel Alvarado (Treixadura)
Laura Iturralde e José Faro (Gala i Ovidio)
Mellor implementación de son
Nerea Bello (Bala)
Ricardo Barroso (The Rapants)
Rubén Montes (Carlos Ares)
Mellor produción de servizos
Emsac
Global Setup
Kachet
Mellor profesional de produción
Adela Otero
María Galdón
Olalla Camaño
Mellor manager
Aitana Cuétara (Luneda)
Álvaro Creo (Off Stage)
Alberto Lora & Carles Montalt (Galunk)
Mellor produción discográfica
Dani Cornes e Crnds (Aquí sempre tes casa, Dani Cornes)
Iago Pico, Gabi Fernández e Tanxugueiras (O Cuarto, Tanxugueiras)
Xoel López e Adrián Seijas (Oniria Popular, Xoel López)
Mellor posta en escena
As dúas e punto (Tertúlia, Fillas de Cassandra)
Laura Iturralde e José Faro (Gala i Ovidio)
The Rapants crew (Rapants Club)
Mellor promotor / programador
Alberto Alfonso (Art Music Agency)
David Pedrouzo (Todomedre)
Suso Santamaría e Iván Viturro (A Pousada da Galiza Imaxinaria)
Mellor proxecto de comunicación
EmigraSON
Lucía Pita (Tertúlia, Fillas de Cassandra)
PortAmérica
Mellor identidade visual
Julia Salgado Barca, Mar Suárez e Agustina Shuan (Anfibia por veces, Antía Muíño)
Melania Freire (De Ninghures)
Zeltia Iglesias (Mondra)
Mellor videoclip
Daniel Pérez, El Membrillo (subir subir, Karmento & Mondra ft. El Nido)
Daniela Rey Faraldo (Simplemente, Candela Liste)
Juan Barbazán, Sergio Goce e Manuel Seoane (Non sei como, The Rapants)
Mellor evento cultural / musical
AC Fanto Fantini – Osa do Mar
PortAmérica
Resurrection Fest
Mellor espazo musical
A Cofradía Taberna Cultural
Mardi Gras
Sala Rebullón
Mellor proxecto de sustentabilidade
Arteficial
PortAmérica
Sinsal
SOBRE THE RAPANTS, ARTISTA DO ANO NOS PREMIOS PALCO 2026
The Rapants é talento, actitude e diversión. Nada en Muros (A Coruña) no 2018, a banda do momento da escena galega surfea entre o pop, o garage e o disco cun directo “sen descanso”, coa intención de facer bailar, sen prexuízos, ao público.
A adrenalina que desprende The Rapants durante os seus concertos é unha das grandes bazas e clave do éxito do cuarteto, que nos últimos meses levou as melodías de herdanza disco e rock de La máquina del buen rollo (2024) -Premio MIN ao Mellor Álbum en Galego-, por escenarios de toda a Península Ibérica.
Logo de consolidar a identidade e a enerxía “rapante” tanto en salas de concertos coma en grandes festivais, o cuarteto muradán regresa con Rapants Club, un álbum que leva a súa música a outro nivel. Variedade estilística, guitarras frenéticas, sintetizadores e retrousos pegadizos conflúen nun traballo que amosa a evolución do grupo, á vez que mantén, máis viva que nunca, a identidade rapante.
SOBRE A FUNDACIÓN PAIDEIA, PERSOA DO ANO NOS PREMIOS PALCO 2026
A Fundación Paideia Galiza traballa na profesionalización da industria musical galega, impulsando iniciativas que promoven o talento emerxente e o acompañamento a artistas nas distintas etapas da súa carreira profesional. A través de Estudios Mans, ofrece formación, mentorías, gravación e promoción musical, contribuíndo ao desenvolvemento de novos proxectos e á súa consolidación na escena musical.
QUE É PALCO?
PALCO é o primeiro punto de encontro da industria musical que se celebrará en Galicia, organizado pola Asociación Galega das Empresas Musicais (AGEM) e a Xunta de Galicia, a través da Agadic e os Concertos do Xacobeo, co apoio do Ministerio de Cultura del Gobierno de España na organización de GALICIA CONECTA, da Deputación da Coruña na organización dos Premios PALCO e Mondo Sonoro Noroeste como medio oficial.
Terá lugar en Santiago de Compostela do 3 ao 5 de novembro e reunirá a profesionais da industria musical arredor dunha programación pensada para compartir coñecemento, descubrir proxectos, atopar novas conexións e facer que xurdan oportunidades.
Ademais do encontro, que se desenvolverá no Museo Gaiás da Cidade da Cultura de Galicia os días 4 e 5 de novembro, PALCO acollerá, a velada do martes, 3 de novembro, na Sala Capitol de Compostela, a gala da segunda edición dos Premios da Industria Musical de Galicia, rebautizados como Premios PALCO.
Este punto de encontro da industria musical celebrado en Galicia nace coa idea de aportar visibilidade ao talento, aos proxectos e ao ecosistema musical galego. E, tamén, coa fin de favorecer conexións e oportunidades para a música feita en Galicia, fomentando as relacións entre artistas, empresas, programacións e institucións, así como xerando contextos útiles para a colaboración e o desenvolvemento.
Durante tres días, do 3 ao 5 de novembro 2026, Santiago de Compostela converterase no escenario onde a industria musical –principalmente a galega– conversará e se proxectará, cos obxectivos de descubrir, aprender, compartir experiencias e construír futuro.
Toda a información do proxecto pode consultarse na web www.palco.gal.
EQUIPO ORGANIZADOR DE PALCO
PALCO é un proxecto codeseñado no marco do Plan Estratéxico da Industria Musical de Galicia, impulsado por AGEM –entidade que defende os intereses profesionais das entidades galegas ligadas á xestión cultural e aos espectáculos vinculados á música ao vivo– e a Xunta de Galicia. Nace da vontade compartida de reforzar a conexión, a vertebración e a proxección do sector. A súa creación responde a unha das principais conclusións extraídas durante o proceso de elaboración do plan: a necesidade de contar con espazos compartidos, útiles e sostibles, pensados desde dentro da propia industria e ao servizo das súas necesidades reais.
SOBRE OS PREMIOS PALCO
No marco de PALCO, o primeiro encontro da industria musical que se celebrará en Galicia do 3 ao 5 de novembro, terá lugar, tamén, a segunda edición dos Premios da Industria Musical de Galicia, rebautizados como Premios PALCO, que un ano máis buscan poñer en valor aquelas traxectorias, proxectos e iniciativas que destacan polo seu compromiso coa creatividade, a innovación, o respecto e a sustentabilidade no sector musical galego.
Esta segunda edición dos Premios PALCO terán lugar na Sala Capitol de Santiago de Compostela a noite do martes 3 de novembro, a partir das 19.30 horas. Será un encontro sectorial no que se darán a coñecer os gañadores e se entregarán os galardóns, nun formato próximo, pensado para favorecer a cooperación e a convivencia entre os diferentes axentes da industria musical galega.
Neste 2026, os Premios PALCO regresan dar resposta ao gran momento que está a vivir a música galega, cunha madurez e unha diversidade extraordinarias. En palabras de AGEM e a Xunta de Galicia: “queremos celebralo e agradecer o talento e o compromiso de quen fai posible o crecemento da nosa industria e para recoñecer o valor das persoas e proxectos que converten o sector nun verdadeiro motor cultural e humano para Galicia. Un ano máis, os Premios PALCO pretenden ser unha ferramenta para dar visibilidade ao talento galego e fortalecer a industria musical como motor cultural, social e económico”.
Con esta iniciativa, AGEM reafirma o seu compromiso de traballar colectivamente por un sector máis profesional, recoñecido e sostible. Os premios enmárcanse dentro do Plan Estratéxico da Industria Musical de Galicia, asinado por AGEM co impulso da Xunta de Galicia.
SOBRE A ASOCIACIÓN GALEGA DE EMPRESAS MUSICAIS (AGEM)
A Asociación Galega de Empresas Musicais (AGEM) nace en 2007 para defender os intereses profesionais das empresas galegas vinculadas á música ao vivo: produtoras, promotoras, managers, axentes de contratación, compañías de representación artística, editoras fonográficas e empresas técnicas, entre outras actividades relacionadas coa xestión cultural e os espectáculos.
AGEM está integrada por empresas que conforman a cadea de valor da actividade cultural e musical. Empresas que realizan actividades de deseño, xestión e produción de eventos de carácter cultural, musical, educativo, social e de entretemento, destinados a ser realizados en locais pechados ou a ceo aberto e, en xeral, todas as actividades técnicas e preparatorias para a execución destes eventos ou servizos, incluída a actividade comercial, de representación de artistas, festivais, distribución e xestión.
Estas entidades traballan en distintos mercados de artistas internacionais, que conforman as programacións de numerosos festivais e espectáculos producidos en Galicia e noutros territorios. Igualmente, hai empresas que representan a diversos artistas, na súa maioría galegos, que traballan en mercados de todo o mundo. As socias de AGEM son promotoras de festivais maioritariamente producidos en Galicia, pero tamén noutros territorios. Empresas de produción técnica e persoal técnico especializado que traballan en numerosos espectáculos producidos dentro e fóra de Galicia.
Distintas gravacións producidas ou editadas por integrantes de AGEM teñen repercusión en mercados internacionais e son sincronizadas tanto a nivel fonográfico como editorial en producións audiovisuais; longametraxes, curtas, documentais e publicidade.
O impulso industrial propiciado por AGEM vai máis alá do facturado polas empresas asociadas. O impacto económico dos espectáculos nos que participa AGEM, tanto de artistas en solitario coma de festivais, é de mais de 100 millóns de euros. As empresas que conforman AGEM son a raíz do sector cultural e resultan fundamentais na industria global da cultura, na música e no seu tecido económico.
Glockenwise estrea en España Vale tudo para chegar a algum ladocon dous concertos en Vigo e Santiago
A banda rock de Barcelos presenta en directo o seu sexto LP este venres 30 de outubro en La Fábrica de Chocolate (Vigo) e o sábado 31 en Riquela Club (Santiago de Compostela)
Tras a estrea do disco no Theatro Circo de Braga, o cuarteto trae a Galicia as súas primeiras datas en España, nas que estará acompañado de Guilherme Zapata
Un traballo entre o art-pop e o rock que parte da Guerra do Caulino para preguntarse polos futuros que nos prometeron
Glockenwise cruzan a raia para presentar por primeira vez en España Vale tudo para chegar a algum lado, o seu sexto LP. A banda de Barcelos, unha das máis salientables da escena rock portuguesa actual, ofrecerá esta fin de semana dous concertos en Galicia: o venres 30 de outubro en La Fábrica de Chocolate (Vigo) e o sábado 31 en Riquela Club (Santiago de Compostela). En ambas as citas, o grupo estará acompañado de Guilherme Zapata.
Os directos galegos chegan despois do concerto de estrea do álbum no Theatro Circo de Braga, o pasado 10 de outubro, e antes da presentación en Lisboa, na Culturgest, o 16 de decembro. Para Glockenwise son tamén un regreso a un público que xa os coñece: a banda tocou en Galicia en citas como o Festival Sinsal SON Estrella Galicia ou Osa do Mar.
Publicado o pasado 23 de setembro co selo da propia banda, Vida Vã, Vale tudo para chegar a algum lado chegou precedido dos sinxelos Vai dar e Guerra do Caulino. O disco continúa a viaxe do grupo polo art-pop sen renunciar á enerxía que os fixo coñecidos, e toma como punto de partida a Guerra do Caulino, o conflito veciñal que mobilizou a Barqueiros (Barcelos) arredor da explotación deste mineral, e que coincidiu no tempo co nacemento dos membros da banda.
A partir dese marcador cronolóxico, Glockenwise reflexionan sobre o futuro, as expectativas colectivas e a capacidade, ou a impotencia, de cadaquén para darlle forma. Así o explica o grupo: “Condenados a vivir nunha sala de espera, queremos indagar sobre o futuro. Queremos saber se somos o que no pasado proxectamos para o futuro, ou o que aínda estamos a tempo de intentar ser”. O álbum está dispoñible en todas as plataformas dixitais e en vinilo a través do Bandcamp da banda. As entradas para os dous concertos xa están á venda.
Glockenwise é unha banda de Barcelos composta por Nuno Rodrigues (voz e guitarras), Rafael Ferreira (guitarras), Rui Fiusa (baixo) e Cláudio Tavares (batería). Nos seus quince anos de traxectoria actuaron nos principais festivais e salas do seu país (Paredes de Coura, MEO Kalorama, Tremor), pero tamén en grandes citas europeas. Ademais de Vale tudo para chegar a algum lado (2026), teñen editados Building Waves (2011), Leeches (2013), Heat (2015), Plástico (2018) e Gótico Português (2023).
Concertos de Glockenwise en Galicia
Vigo · Venres 30 de outubro
La Fábrica de Chocolate · 22:00 h · 15€ anticipada (18€ na billeteira)
Santiago de Compostela · Sábado 31 de outubro
Riquela Club · 21:00 h ·15€ anticipada (18€ na billeteira)
Na outra banda, a primeira creación escénica de formato completo de Chechu Riquelme, estrearase o vindeiro 14 de novembro, ás 20.00 h, no Auditorio Municipal de Cangas
Na outra banda é unha obra de danza contemporánea con música en directo que nace da experiencia migratoria e da necesidade de construír unha identidade lonxe da terra de orixe. A través do encontro entre a danza contemporánea, o baile tradicional galego e o folclore arxentino, a peza percorre tres momentos —A viaxe, A ferida e A convivencia— para reflexionar arredor do desarraigo, a memoria, a pertenza e a construción de comunidade.
Esta proposta foi a gañadora do programa Da Man 2026, unha iniciativa de acompañamento á creación emerxente en danza impulsada por Amarelo en colaboración co Centro Coreográfico Galego, dependente da AGADIC.
A creación está dirixida e interpretada por Chechu Riquelme, coa coreografía de Daniela López Álvarez, coreógrafa arxentina, e a música en directo de Xandre Outeiro. Conta tamén coa colaboración de Márcia Vázquez como ollada externa no proceso coreográfico, co deseño de iluminación de Héctor Pazos e coa distribución de Amarelo.
