Hai historias que te resistes a contar porque son tan fóra do común que temes que te traten de tolo. Isto foi o que me pasou este pasado mes de abril e que hoxe, despois de darlle moitas voltas, atrévome a compartr con vós.
Quedara cun amigo de Santalla de Ozcos a xantar no Cantábrico, na Fonsagrada. Mentres esperaba por el, tomando uns viños pola vila, recibo unha chamada súa dicíndome que por un imprevisto non podía acudir á cita.
Seguín de peregrinación polos bares e, segundo entro no Avenida, atópome cuns amigos que levaba tempo sen ver, co que iso supuxo de beber unhas cantas cuncas de máis. Xa sabedes como é ir á Fonsagrada.
Preto das dúas e media e co apetito minguado polo exceso de etílico, por fin estou no restaurante. Xusto na mesa de en fronte, tres homes e unha muller, todos eles arredor dos oitenta anos. Fico ollando para un que me soa de algo, pero non acerto a lembrar de que. Déixoo pasar, pero xa cando estabamos na sobremesa, nun momento dado, cruzámonos as nosas miradas. Foi como unha aparición sobrenatural. Aquela mirada e aqueles ollos azuis non podían ser máis ca del. Polo xeito como me mirou souben que se decatara de que o recoñecera. Terminei de xantar e, cando me ía marchar, ergueuse e achegándose a min, case nun murmurio, díxome:
—Xa sei que sabes quen son, pero por favor non digas nada. De todos modos, se o contas, ninguén che vai crer, pero por se acaso cala a boca. Agradeceríacho, levo anos de incógnito. Todos cren que son un inglés acaudalado, que foi o que inventei para a miña nova vida.
Saín de alí sen dar creto ao que me viña de pasar. Era o mesmiño, Elvis Presley. Que razón tiñan os que aseguraban que non morrera. O que ninguén se imaxinaba era que se agochara na Fonsagrada. Despois preguntei por el e contáronme que era un inglés que vivía nunha aldea preto da vila, desde ía para máis de vinte anos. Que enseguida se adaptara e que mesmo, moi rápido, aprendera falar galego. Do que vivía, ninguén o explicaba, pero debía ser de boa familia, pois cartos non lle faltaban.
Nada dixen, coma el me pedira, ata hoxe, que xa non aguantei máis e tiven que contalo, iso si, sen dar máis detalles, que xa din abondos. Agora chamádeme tolo, se queredes, pero eu xa me desafoguei.
Dios Ke Te Crew esgota todas as entradas da celebración ‘Tremendos Anos 20’, na que festexará dúas décadas sobre os escenarios
A cita será nun mes, o sábado 2 de decembro, e contará con Hermano L, High Paw, DJ Mil, Grande Amore, Malandrómeda, Boyanka Kostova, Leo i Arremecághona, Santino, Vituco Neira (Ruxe Ruxe), Guillerme (Quempallou), Los Rastreadores, Rebeliom do Inframundo, Saibran Yi yi, Ra Velenosa, Rico Suávez, Chicho Selector, Padre Murdock e Croma
Dios Ke Te Crew vén de pendurar o cartel de “entradas esgotadas” para a celebración das súas dúas primeiras décadas sobre os escenarios. Xa non quedan billetes dispoñibles para asistir á xornada maratoniana de directos que terá lugar o 2 de decembro en Santiago de Compostela e na que a banda, ademais de revisar os seus grandes éxitos, se acompañará de numerosos artistas do país para festexar vinte anos de rap en galego.
Co gallo da efeméride, o público recibirá, como agasallo pola compra da súa entrada, un disco-fanzine de edición exclusiva, formado por 20 ilustracións doutras tantas artistas gráficas, e 20 remixes de dúas decenas de temas de Dios Ke Te Crew, feitas por outros tantos produtores musicais. O disco-fanzine, que se editará en formato A5, poderase recoller na Sala Capitol o propio 2 de decembro, e contará con QR’s para a escoita directa das versións das cancións de DKTC.
FESTA TREMENDOS ANOS 20
Nun mes, o vindeiro 2 de decembro, a banda máis emblemática do hip hop galego celebrará por todo o alto as súas dúas décadas de traxectoria musical. A festa Tremendos Anos 20 preséntase, en palabras de DKTC, como unha ocasión “única” e “irrepetible” que, a modo de “exclusiva cerimonia litúrxica”, festexará vinte anos de vida a través dun “abraiante akelarre musical de amizades”.A banda acompañaranse de artistas como Malandrómeda, Grande Amore, Boyanka Kostova, Leo i Arremecághona, Vituco Neira (Ruxe-Ruxe), Santino e Guillerme (Quempallou), con quen compartirán escenario con DKTC na noite do 2 de decembro na Sala Capitol, espazo no que tamén actuarán Hermano L, High Paw e DJ Mil desde as 19.30 horas.
Os festexos continuarán na Sala Malatesta. Entre as 00.30 e as 05.00 horas, celebrarase o concerto de Los Rastreadores (Ortiga & Grande Amore) e os showcases de Rebeliom do Inframundo, Saibran Yi yi, Ra Velenosa e Rico Suávez, ademais dos dj sets de Chicho Selector, Padre Murdock e Croma, e outras sorpresas adicionais.
O Instituto de Estudos Chairegos (IESCHA), en colaboración coa Academia Galega do Audiovisual, coa Área de Cultura Vicepresidencia da Deputación de Lugo e co Concello de Vilalba, organiza a proxección do documental A FOREIGN SONG, de César Souto Vilanova, continuando así coa programación do CICLO MESTRE MATEO que durante o ano 2023 bríndanos a oportunidade de poder disfrutar das películas finalistas (documentais e longametraxes) dos XXI PREMIOS MESTRE MATEO.
Esta sexta proxección terá lugar no Auditorio Municipal de Vilalba o DOMINGO 5 DE NOVEMBRO DE 2023, ás 20:00H.
VERÓNICA CODESAL, COMPOÑENTE DE IALMA, PRESENTA, O DOMINGO 12 DE NOVEMBRO, NA CASA-MUSEO MANUEL MARÍA O SEU PROXECTO, 100 VOLTAS
Faino acompañada do acordeonista belga Didier Laloy e o violinista italiano Damien Chierici
Verónica Codesal presentará o próximo domingo día 12, ás 12:30h, na Casa-Museo Manuel María, o seu recente traballo musical 100 VOLTAS. Estará acompañada polo acordeonista belga Didier Laloy e o violinista italiano Damien Chierici. Verónica Codesal (voz e pandeireta) é compoñente do coñecido grupo galego-belga Ialma, que conta con sete traballos publicados e que está formado por catro mulleres nacidas e residentes en Bruxelas, mais que son de orixe galega e conforman o seu repertorio con música do noso país. Ademais, Verónica Codesal representou a Bélxica no Festival de Eurovisión no ano 2003 formando parte do grupo Urban Trad. Fíxoo coa canción “Sanomi” quedando na segunda posición. Nesta ocasión, dous músicos de proxección internacional acompañarán a Verónica Codesal. Por unha parte Didier Laloy (acordeón diatónico e stompbox), é un dos mellores instrumentistas de acordeón diatónico do mundo e solista en orquestras sinfónicas de Alemaña, Italia, Cuba e Bélxica. Pola outra, Damien Chierici (violino e instrumentos electrónicos), intérprete, compositor e arranxista polifacético (música clásica, folk, composicións para cinema…), o que o levou a compartir escenario con artistas internacionais como Glen Hansard ou Lisa Hannigan, a crear bandas sonoras cinematográficas como a serie belga PANDORE ou á realización de xiras con moitos grupos belgas por Europa. “100 VOLTAS” é un traballo cheo de cultura e tradición galega que conta cun repertorio que preserva a esencia do pasado ao mesmo tempo que incorpora elementos contemporáneos e diferentes instrumentos. Nel recóllese o compromiso de Verónica Codesal como muller feminista, de maneira que moitas das súas composicións realizáronse sobre textos de distintas poetas galegas (Rosalía de Castro, Xohana Torres, Andrea Nunes, María Lado, Lucía Aldao, Yolanda Castaño, María do Cebreiro, Brais Fernández, Rosalía Fernández Rial, Xavier Queipo) a través dos que contan, xunto a textos tradicionais, as súas historias de mulleres, compañeiras, nais, fillas, amigas, traballadoras, artistas, activistas… O concerto da Casa-Museo Manuel María forma parte da xira por Galiza para a a presentación de “100 VOLTAS” en que o grupo realizará seis concertos entre os días 11 e 16 de novembro, sendo o único na provincia de Lugo.
