por martinho | Feb 27, 2018 | Autores/as, Novas, Xeral
O sábado 17 de marzo, ás 20 hrs, e dentro da programación cultural que vimos desenvolvendo desde o auditorio da Casa-Museo Manuel María, celebraremos cos Diplomáticos de Monte-Alto un concerto especial denominado Poesía para cantar.
O outro lado da música, a poesía, escribiu Luísa Villalta. Seguindo tal mandato Os Diplomáticos de Monte-Alto achegarán melodía algúns dos seus poetas máis queridos, Teresa Ramiro, Celso Emilio Ferreiro, Manuel Rivas e, por suposto, do propio Manuel María. Da súa palabra beberon a eito Os Diplomáticos. Alén de mestre da literatura, Manuel María foi ilustre veciño do barrio coruñés de Monte Alto. Agora volve convocalos -na súa casa natal- como anfitrión desta sesión inédita de música e de poesía.
Se queredes achegarvos á Casa-Museo para cantar versos cos Diplomáticos de Monte-Alto, debedes reservar a entrada (billete 5 euros), quer escribindo a contacto@casamuseomanuelmaria.gal, quer chamando ao 698177621.
A sesión culminará cunha dose condensada dos clásicos todos deste conxunto bravú.
*Información achegada dende a Casa-Museo Manuel María
por Adolfina Mesa | Feb 25, 2018 | Autores/as, Creación, Literaria, Xeral
A NOSA AMADA ROSALÍA.
Trobadora da nosa patria.
Labrega da nosa fala.
Es ríos, regatos e montes
Es árbores e montañas.
Es o ar nos verdes vales
Es a estrela que brilla,
Es o vento que zoa.
No laio fúnebre das badaladas
No fondo pesar das entrañas.
Quixeron borrar e esquecer a túa labranza
E enterrar o teu labor pola lingua.
Tamén esqueceron o dano que fixeron
¡Aos teus fillos!… ¡teus anxos!… que tanto querías,
morreron todos, coa fame que tiñan.
Se o pobo canta, es ti que cantas,
se o pobo chora, es ti que choras.
No útero do chan quedan sementadas a fala e a lingua…
E nos corazóns dos galegos cos teus cantares e poesías.
Non morre o sol nin morre o día
Se a loita que non se esgota persevera,
E ata a noite a converte en día.
¡E cantar, cantarei!… sementando o teu recordo…
NAI da Matria, lingua e a fala
Nunca morres nin morrerás a nosa amada Rosalía.
©Adolfina Mesa – 2018
Obra: ROSALÍA DE CASTRO.
AUTOR: Adolfina Mesa
TÉCNICA: ARTE DIXITAL.
Nota:
As persoas interesadas nunha reprodución impresa da miña obra Rosalía de Castro, contactar comigo polo privado para a súa adquisición asinada en orixinal polo autor (A miña persoa) custos da obra e envío. Os prezos varían segundo formato de impresión… Grazas polo voso interese na adquisición da mesma.
Contacto:
adolfina.mesa@gmail.com
info@culturaliagz.com
por martinho | Feb 23, 2018 | Autores/as, Novas, Xeral
Non faltedes!
#AbrideAFiestra
Medre a Poesía!
por martinho | Feb 20, 2018 | Autores/as, Literaria, Novas, Xeral
Acto de presentación de «Poder e política na Galiza vilega 1790-1833» en Mondoñedo
Este venres, 23 de febreiro preséntase en Mondoñedo «Poder e política na Galiza vilega 1790-1833. Provincias de Lugo e Mondoñedo», un libro de Editorial Bolanda, con autoría do profesor de Vilaronte (Foz), Xosé Ramón Veiga Alonso.
O acto terá lugar no Centro Comarcal (antigo cuartel), a partir das 20:30 h., e nel intervirá, xunto co autor do libro, o cronista oficial de Mondoñedo, Antonio Reigosa.
Xosé Ramón Veiga é doutor en Historia e profesor do departamento de Historia Contemporánea e de América da USC. Ademais é un reputado investigador, cunha longa experiencia, autor en solitario ou en coautoría dunha ducia de volumes sobre historia política e historia agraria, ademais de moitas ducias de artigos que foron vendo a luz en revistas especializadas.
Resume do libro
Entre 1790 e 1833 vívense en Galiza, e no resto do Estado, tempos convulsos, cun mundo antigorreximental decadente mais con forzas dabondo para resistir, e unha alternativa liberal e constitucional aínda en cueiros que turra por ocupar o espazo político. No libro repásase a concreción desta liorta a partires, no fundamental, da análise en clave política e de poder de varias vilas situadas nas daquela provincias de Lugo e Mondoñedo. Os bambeos no poder local e provincial, e a súa concreción en suxeitos históricos con nomes e apelidos, responden á dinámica dun período marcado polo choque entre absolutismo e constitucionalismo, mais en absoluto poden entenderse apelando en exclusiva a factores de carácter xeral que, pola contra, vense obrigados a pasar pola peneira duns microcosmos vilegos que condicionan dun xeito moi importante o resultado e a concreción final das pulsións xeradas no centro.
*Información facilitada por Antonio Reigosa
por martinho | Feb 20, 2018 | Autores/as, Literaria, Novas, Xeral
Velaí a información (arquivo adxunto en PDF) do acto organizado polo Iesha en colaboración con Sermos Galiza para presentar o libro “Os nomes do terror. Os verdugos que nunca existiron” (Represores e represión franquista na Terra Chá), que terá ligar na Casa da Cultura de Vilalba, o vindeiro venres, día 23 de febreiro de 2018, ás 20:30 horas.
Intervirán: Xoán Costa, presidente do consello de administración de Sermos Galiza Xosé Ramón Ermida Meilán, coordinador e coautor do volume e Carlos Nuevo Cal, cronista oficial de Viveiro, coautor do volume e autor do traballo de estudo sobre a represión no norte de Lugo; pesentará o acto Manuel Roca Cendán, directivo do IESCHA.