por Pilar Maseda | Nov 28, 2017 | Autores/as, Creación, Literaria, Xeral
GUNTINA
Guntina de ollos cansados
mans aterecidas polas xeadas
Guntina pel labrega corazón nobre
fortes entrañas.
Criaches seis fillos como antes
ao carón da estrume e das pallas.
Ulías a aldea recendo de esperanza
no San Martiño a matanza,
no San Xosé festa e xuntanza,
no San Xoán lume e milincrocas,
polo Carmio arume de herba seca.
Guntina de ollos cansados
fuches a nai da terra.
Agora só hai toxos e codesos,
xestas e carqueixas.
A fraga inzada de acebos,
sotos de nombres bidueiras,
carballeiras enchoupadas
anegadas coa folla seca.
Terra, terra e máis terra…
A casa nova, a casa vella
o forno e mais a adega.
Eras avoa a nai da terra
que a pariches co suor
carregando na cabeza
a auga da fonte do Espiño
na sella.
Espigando o millo
agardando a sega
e mallar o trigo na aira,
que gran festa!
Que grandes palleiras
e tantas as fanegas,
do pan sementado e suado.
Unhas eran para pagar traballos,
outras para pagar as rendas,
outras ías moer o avó Xosé
no muíño do Queimado,
para amasar o pan do xantar
na artesa vella.
Eras a nai da miña nai,
da miña terra
Marchaches un día, dende entón,
ela sempre me lembra
a túa ausencia.
por Pilar Maseda | Nov 28, 2017 | Autores/as, Creación, Literaria, Xeral
Nesta nova etapa do camiño
controvertida e serena.
Atormentada pola dor
adormentada en rebeldía
coa curiosidadde esperta
nos sentidos, nos instintos,
na procura de emocións perdidas
inconexa a palabra liberada
no seguinte capítulo omnisciente
da existencia.
Busco in itínere a lúa de Méliès
un lugar sen atmosfera
un agasallo sen medo
una viaxe sen retorno
á cara oculta de Selene.
PILAR MASEDA.
por martinho | Nov 26, 2017 | Autores/as, Novas, Xeral
Presentación do libro de Carlos Callón “Galegocalantes e galegofalantes” que organiza o IESCHA, prevista para o vindeiro venres, 1 de decembro de 2017, ás 20:30 horas, na Casa da Cultura de Villalba.
Velaquí información do evento.
*Datos achegodos polo IESCHA.
por martinho | Nov 25, 2017 | Autores/as, Creación, Literaria, Outras Artes, Publicacións, Xeral
- Para conmemorar o Día contra a Violencia de Xénero o grupo poético NPG Nova Poesía Guitirica levou a cabo a iniciativa de pendurar nas farolas poemas cuxa temática estaba relacionada con esta lacra social, que atenta contra a esencia fundamental da muller como ser humano.
E agora ditos poemas pasan a formato dixital para que poida gozar coa súa lectura todo o mundo.
Velaí o enlace para descargar os Poemas contra a Violencia Machista da NPG Nova Poesía Guitirica e que formaran parte na súa maioría da iniciativa citada de comezos de ano de #PoemasPenduradosDeFarolas e #EnNegroContraAViolenciaMachista. Ademais dos poetas escritos polos integrantes da NPG, tamén aparecen doutros autores coma Emilia Martínez Fuentes, Toño Núñez, o vilalbés Martiño Maseda, o gañador da primeira edición do Premio de Poesía Xosé María Díaz Castro, Raúl Gómez Pato e, por suposto, o vilarego universal Xosé María Díaz Castro.
por martinho | Nov 24, 2017 | Autores/as, Literaria, Novas, Xeral
Será o vindeiro sábado 2 de decembro ás 18:30 da tarde na igrexa dos Vilares (Guitiriz), cando:
-Andréa Araújo Alonso, A Guarda, estudante de artes escénicas.
-Pedro Rielo Lamela, Pontevedra, xornalista da TVG.
-Toño Núñez, Navia, mestre.
Recibirán os Prémios do 1° Certame VILARIÑAS de micropoemas da man de Sandra Tenreiro, mestra de música e cantautora, Luz Campello (NPG), traballadora social e poeta e Marica Campo, mestra e escritora.
Os gañadores recibirán unhas “Vilariñas” deseñadas pola artista da Costa da Morte Viki Rivadulla e un exemplar coa recompilación das Vilariñas presentadas (máis de 150).
Intervirán neste acto, ademáis dos premiados e as persoas que farán entrega, o poeta vilalbés Martiño Maseda (Culturalia GZ), Fátima Fernández (NPG) e o presidente de Xermolos, Alfonso Blanco, depositario do legado do poeta Díaz Castro.
En Galiza, os Haikus, tomado nome de Müller, <VILARIÑAS> En homenaxe ao nóso poeta, Xosé María Díaz Castro, nado no Vilariño, Os Vilares. Pepe do Vilariño, como se lle coñecia na parróquia chairega de Guitiriz, foi o poeta das cousas pequenas, das herbas pequerrechiñas da Chaira que enchem de perfume o mundo é desa admiración polas pequenas coisas inspirouse o Certame VILARIÑAS e o próprio nome dos micropoemas deste concurso.
Nacen así as <VILARIÑAS>, as micro poesías galegas con nome próprio que verán publicadas as bases da segunda convocatória no mês de xaneiro de 2018.
As entidades organizadoras, A Asociación Sócio-Cultural Lareira de soños, a NPG Nova Poesia Guitirica e o soporte dixital www.culturaliagz.com teñen organizado após do acto unha “Cea Vilariña” en Guitiriz.
Longa vida ás <Vilariñas> e que Medre a Poesía!!
Os Vilares, lareira de soños
dosvilares@gmail.com
+34 662 183 149
www.dosvilares.com
www.facebook.com/osvilares
twitter@dosvilares1
