O Festival Atlántica celebra o Día Internacional da Narración Oral con espectáculos e lectura do Manifesto

O Festival Atlántica celebra o Día Internacional da Narración Oral con espectáculos e lectura do Manifesto

·       As actividades desenvolveranse ao redor do 20 de marzo e nela colaboran Sete Falares, Falando a Boca Chea e integrantes do Colectivo NOGA

·       Unha vintena de artistas espallaranse por varias cidades e vilas do país para celebrar a arte máis antiga do mundo

A X edición do Festival Atlántica vaise celebrar durante o verán, máis o encontro non quere deixar de festexar unha das súas citas máis emblemáticas: o Día Internacional da Narración Oral. Daquela, o 20 de marzo, unha trintena de espectáculos vanse desenvolver en múltiples puntos de Galicia grazas á colaboración cos festivais Sete Falares de Pontevedra e Falando a Boca Chea da Coruña e mais os integrantes do colectivo NOGA.

As historias en estado puro percorrerán os barrios, bibliotecas, teatros e auditorios de Santiago de Compostela, Pontevedra, A Coruña, Marín, A Laracha, Narón, Culleredo, Portonovo, Cangas, Alfoz, Soutomaior, Oleiros, Fene, Brión, Ribeira e Ourense. Será un día de festa e tamén de reivindicación.

Entre os artistas participantes figuran Vero Rilo e Penadique, José Luis Gutierrez ‘Guti’, Erica González, Raquel Queizás, Dani Blanco, Cristina Collazo, Charo Pita, Pablo Díaz, Atenea García, Celso F. Sanmartín, Anxo Moure, Servando Barreiro, Ramiro Neira, Larraitz Urruzola, Mirari Urruzola, Cris de Caldas, Iseo a Moura, Candido Pazó, Quico Cadaval, Sole Felloza, Paula Carballeira, Tarabelos, Pavís Pavós, Baobab, Migallas e Polo Correo do Vento.

Ademais, nesta edición o escritor, investigador e creador da web Galicia Encantada Antonio Reigosa é o autor do Manifesto, un texto que dende hoxe chegará aos centros de ensino, bibliotecas e concellos para lembrar nestes tempos tan especiais a importancia e a necesidade das historias a viva voz, o encontro cos outros para celebrar a memoria, a identidade e a lingua.

A información sobre as diferentes actividades vaise difundir a través das redes sociais das entidades participantes.

Unha arte de sempre e moi viva

A narración oral é unha arte escénica de pequeno formato que está presente en todas as programacións de xeito diario en Galicia. Programacións que o colectivo de narradores e narradoras galegas insta a ser retomadas, principalmente naqueles concellos e espazos que permanecen pechados dende o comezo da pandemia.

Para os eventos culturais e para os artistas en particular estes dous anos foron moi duros, de reinventarse e adaptarse a mil situacións diferentes e conmemoran o seu día coa alegría e coa ilusión de tempos novos ubicando a Galicia e a súa lingua no mapa universal das historias.

No Día Internacional da Narración Oral conmemórase a arte de narrar de viva voz, manifestación artística tamén denominada contacontos. Celébrase cada 20 de marzo, coincidindo co equinoccio de primavera. A festividade tivo a súa orixe en Suecia no ano 1991 e, aos poucos, fóronse engadindo outros países.

CRÉDITOS | Manifesto: Antonio Reigosa | Deseño do cartel do 20M: Ekinocio.

IMAXES EN ALTA | bit.ly/NarracionOral2022

Festival Atlántica.- Outes acolle o espectáculo ‘O retorno dos homes mariños’, de Xurxo Souto

Outes acolle o espectáculo ‘O retorno dos homes mariños’ de Xurxo Souto

  • A sesión será este venres, 13 de agosto, na terraza do Naútico do Freixo a partir das 21 horas
  • A entrada é gratuíta pero para asistir cómpre reservar por adiantado en cultura@outes.gal

Este venres, 13 de agosto, os amantes das historias teñen unha cita con Xurxo Souto e ‘O retorno dos homes mariños’ en Outes. A función, dirixida ao público adulto, será na terraza do Náutico do Freixo a partir das 21 horas. O espectáculo é gratuíto pero para asistir cómpre reservar por adiantado no correo cutura@outes.gal. A actividade, organizada polo Festival Atlántica, é posible grazas á Deputación da Coruña, a Xunta de Galicia e mais o Concello de Outes.

Neste sesión de contos Souto rescata un mito coruñés esquecido: o dos homes mariños. E quen sabe máis ca ninguén sobre eles? A señora Laura, a sabia do mar, e mais Mercedes, a heavy que traballa nun téxtil e soña con marchar polo mundo co seu grupo de música.

Xurxo Souto autodefínese como “terrícolo redondo”. É escritor, cantante, acordeonista, actor, director e locutor galego. Entre 1990 e 2001 foi o líder e vocalista da banda de rock en galego Os Diplomáticos de Monte Alto. Entre as súas novelas figuran ‘Contos do mar de Irlanda’ (Xerais, 2014) e a novela ‘A gran travesía de Chiruca Macallás’ (Xerais, 2018). ‘O retorno dos homes mariños’ (Xerais, 1999, 2020) foi a súa primeira novela e vén de ser reeditada no 2020 coincidindo cos vinte anos da súa publicación.

O Festival Atlántica supera con nota unha novena edición marcada polos desafíos da pandemia

O festival Atlántica supera con nota unha novena edición marcada polos desafíos da pandemia

·       Boa parte das 80 funcións programadas colgaron o cartel de entradas esgotadas

·       A celebración no verán permitiu o uso cultural seguro de espazos de gran valor natural e patrimonial

·       A organización planea xa a edición do 2022 como unha gran festa para celebrar os dez anos de vida de Atlántica

A novena edición do festival Atlántica pechou as súas portas o pasado domingo 11 de xullo logo dunha intensa programación desenvolvida por todo o país. O festival superou os esixentes desafíos loxísticos e técnicos da pandemia e da cambiante climatoloxía e foi quen de levar os contos ata unhas cinco mil persoas. Unha cifra considerable tendo en conta as restricións de aforo impostas pola situación sanitaria.

Segundo Soledad Felloza, directora do festival, “o pequeno formato dos espectáculos de narración oral e a súa capacidade de adaptación demostran que é posible facer cultura segura tomando as medidas apropiadas” e que “ese é o camiño polo que Atlántica vai seguir apostando”.

Foi unha edición marcada polas novidades: nova estación, novos espazos e novas propostas. O festival trasladouse ao verán por mor das restricións sanitarias e aproveitou para ocupar lugares onde nunca estivera antes. Unha elección de espazos que estivo marcada polo desexo de vincular o patrimonio material co patrimonio inmaterial da tradición oral. Esta busca tivo como resultado, en palabras de Felloza, “o redescubrimento de lugares singulares como espazos culturais, unha oportunidade de poñelos en valor e probar a súa idoneidade para espectáculos”.

Felloza salienta “a rede de colaboración tecida con asociacións, colectivos, fundacións, bibliotecas, concellos… que permitiron que o festival estivera por todo o país cunha organización impecable”. Tampouco esquece a alegría amosada polo público pola celebración do festival, un sentimento constatado “in situ nos propios espectáculos e tamén a través das redes sociais”.

Con ese sentimento de ledicia a organización do festival xa está a traballar no encontro de 2022, unha cita que planean como unha gran festa para celebrar os dez anos de vida de Atlántica.

Velaquí unha galería gráfica da presente edición do Festival Atlántica

O Festival Atlántica despídese de Santiago coa sesión de peche de ‘Contos no camiño’

O Festival Atlántica despídese de Santiago coa sesión de peche de ‘Contos no camiño’

·       Pep Bruno e Avelino González rematan os camiños francés e portugués cunha función dobre na Colexiata do Sar este sábado titulada ‘Historias de andantes’

·       No concello de Teo está programado un espectáculo con Pakolas e unha sesión de contos con Celso F. Sanmartín

O festival Atlántica afronta a súa última fin de semana con espectáculos en Alfoz, Folgoso do Courel, A Pobra do Caramiñal, Outero de Rei, Dodro, Outes, Cuntis, Teo e Santiago. No caso de Compostela, o sábado está prevista unha última función na Colexiata do Sar con Pep Bruno e Avelino González que servirá tamén para pechar ‘Contos no camiño’.

A función conxunta de ambos os dous narradores leva o título de ‘Historias de andantes’ e nela Pep Bruno e Avelino González compartirán co público as súas aventuras ao longo do camiño. As entradas para asistir levan varios días esgotadas pero está aberta unha lista de agarda nesta web por se hai cancelacións.

Pep Bruno comezou o camiño francés o pasado 4 de xullo mentres que Avelino González está a realizar o portugués en bicicleta desde o día 6. Ao longo dos seus respectivos traxectos, os dous artistas brindaron funcións de contos en varios puntos e tamén compartiron polas súas redes sociais as súas vivencias sobre a experiencia co cancelo #contosnocamiño. Con ‘Historias de andantes’ darán por rematada esta singular peregrinación de contos.

Últimas actividades en Teo

Atlántica tamén remata a súa actividade en Teo este sábado con dúas funcións gratuítas pero para as que cómpre reservar con antelación no correo entradascultura@teo.gal. Así, está prevista unha función concibida para público infantil e familiar de Pakolas co espectáculo musical ‘Ramona Órbita, a dona do tempo’ na Burga de Xermeade ás 20:30 horas.

Á mesma hora pero no Teleclube de Luou estará Celso F. Sanmartín quen debullará as historias que se agochan baixo o suxestivo título de ‘Cando viaxou unha lingua de lume nun carro de herba seca?’, un espectáculo dirixido ao público adulto. Serán 75 minutos na compaña duns dos narradores galegos máis recoñecidos, apaixonado da tradición oral e fervoroso transmisor dela.

SOBRE OS ARTISTAS

Pep Bruno, barcelonés afincado en Guadalaxara, é licenciado en Filoloxía Hispánica, Teoría da Literatura Comparada e diplomado en Traballo Social. Comezou a contar contos en 1994 e desde aquela xa percorreu numerosos festivais de todo o mundo compartindo historias para nenos e adultos. Compaxina a súa actividade como narrador coa súa faceta de blogueiro e coa impartición de cursos, conferencias e obradoiros literarios e de creación. Tamén organiza actividades de animación á lectura, escribe artigos de reflexión en revistas especializadas e colabora decote cos medios de comunicación. No ano 2010, coa obra ‘La familia C’, ganou o III Premio Internacional Compostela de Álbum Ilustrado outorgado pola Editorial Kalandraka en colaboración co Concello de Santiago. Os seus libros están traducidos a máis de dez linguas.

Avelino González é actor, contador, tradutor e director. Traballou en teatro, televisión, cine e bares, en compañías como Ollomoltranvía, en espectáculos como ‘Commedia’, en películas como ‘Heroína’ ou ‘Gallego’, en series de televisión como ‘Padre Casares’, ‘Cuéntame’, ‘Hopital Central’… e o seu labor teatral foi recoñecido con varios Premios María Casares. Cos contos xa andou por toda a península, percorreu Europa (Polonia, Alemaña, Suíza…) e saltou o Atlántico (Cuba). Fixo dous espectáculos de contos para teatros. Un deles, ‘Vento mareiro’, foi o espectáculo máis representado en Galicia no 2005 e recibiu o Premio María Casares á Mellor Música Orixinal.

Paco Cerdeira, alias Pakolas, é músico, compositor e produtor. Leva dedicándose ao público infantil dende hai case quince anos, cando entrou a formar parte de Mamá Cabra. No 2014 fundou a súa propia banda de música infantil, A Gramola Gominola, coa que publicou os discos ‘Cancións para Desafinar’ e ‘Bravas. O rexurdir da Luz’. No 2018 ganou na categoría Música Infantil dos Premios Galegos da Música Martín Códax. No ano 2015 comeza co seu proxecto en solitario, Pakolas, do que xa foron publicados dous libros-CD: ‘Pakolas’ é ‘Ramona Órbita. A dona do tempo’, ambos editados por Galaxia (Sonárbore).

Celso Fernández Sanmartín é un poeta e contacontos galego. É licenciado en Filosofía pola Universidade de Santiago de Compostela e tamén promotor de FoCuCu (Foro de Cultivos Culturais). Como contacontos, caracterízase polo seu labor como recolledor e reinventor de historias e contos. O seu repertorio está composto por historias e memorias vencelladas á tradición oral galega e tamén á europea, que presenta como un verdadeiro tesouro nos seus espectáculos, cheos de coidado, sentido e paixón pola oralidade, a comunicación e a lingua.

O Festival Atlántica programa este venres sendas funcións en Santiago e Brión

O Festival Atlántica programa este venres sendas funcións en Santiago e Brión

·       Ramiro Neira estará con ‘Animaliños’na carballeira do banquete de Conxo ás 12 horas

·       Santi Prego levará ‘O teatro máis pequeno do mundo’ ás Torres de Altamira de Brión a partir das 20:30 horas

O Festival Atlántica programa mañá, venres 9, unha función en Santiago e mais outra no veciño concello de Brión cos artistas Ramiro neira e Santi Prego, respectivamente. Estas actividades son posibles grazas á Deputación da Coruña, a Xunta de Galicia e os concellos de Santiago e Brión.

O espectáculo de Ramiro Neira titúlase ‘Animaliños’, que está concibido para público infantil, comezará a partir das 12 horas na carballeira do banquete de Conxo Trátase dunha escolma de contos da tradición oral de diferentes países que poñen o valor a sabedoría popular e a eterna e imprescindible transmisión da experiencia de xeración en xeración. esta actividade está concertada cos campamentos dos centros socioculturais de Santiago, pero estará aberta ao público ata completar o aforo.

Xa pola tardiña, ás 20:30 horas, Santi Prego levará ‘O teatro máis pequeno do mundo’ ás Torres de Altamira do concello de Brión. En este espectáculo para adultos collen todo tipo de contos: os participativos, os improvisados, os da tradición oral galega e tamén as historias con bonecos. O xeito de contar de Prego é moi visual e aliméntase principalmente de fontes literarias. Nas súas historias sempre hai maxia e poesía e nunca falta un elemento de comicidade sutil.

Sobre os artistas

Ramiro Neira conta con experiencia como actor, director, docente, produtor e distribuidor teatral. Como actor traballou e traballa con diferentes compañías: Artestudio Teatro, Sardiña, Tea, Estragón, Grupo Institucional da Universidade da Coruña, Teatro da Bufarda, Espello Cóncavo, Teatro da Lúa, Casa Hamlet, Patatín e Patatán, entre outras.

Como docente e director coordinou grupos en diferentes espazos. Na súa faciana de produtor e distribuidor traballou con Teatro da Bufarda, Hac Luce Universidade da Coruña, Teatro da Lúa, UVG Teatro, Galileo Teatro, Ballet Studio, Paparota Teatro. Actualmente compaxina o seu labor como docente, actor e director coa coordinación de diferentes proxectos do Concello da Coruña e do Forum Metropolitano, como son o programa Horas Punta, Mostra de Teatro Escolar e os Encontros de Teatro Independente da Coruña.

Santi Prego é actor de teatro, cine e TV, monicrequeiro e narrador oral. Comezou a contar a mediados dos anos 90 en institutos e as súas historias xa pasaron por teatros, casas da cultura, bibliotecas e mesmo por programas da televisión como ‘Apaga a lus’ e pola Radio Galega.

Clausura fóra de Santiago

O festival entra xa na súa recta final, cun último espectáculo en Santiago este sábado e o resto das funcións noutros lugares como Teo, A Pobra do Caramiñal, Cuntis, Ribeira, Alfoz, Mondoñedo, Outes e Folgoso do Courel. O programa completo do festival e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.