Presentación en liña da VIII Edición do FESTIVAL ATLÁNTICA DE NARRACIÓN ORAL

O Festival Atlántica, que se interrompeu en marzo por mor da declaración do estado de alarma, vai completar a súa oitava edición os días 5, 6, 7 e 13 de novembro e o 5 e 6 de decembro con actuacións en formato híbrido (presencial e en liña). Máis información na rolda de prensa que será emitida en directo por Internet:

DATA E HORA: xoves 29 de outubro do 2020 ás 12 h

WEB E CANLE DE YOUTUBE DO CONCELLO DE SANTIAGO DE COMPOSTELA:

·       www.santiagodecompostela.gal

·        https://www.youtube.com/channel/UCSrcC2UgDHIb80vVVRtvoDw

PARTICIPAN:

· Mercedes Rosón Ferreiro, Primeira Tenente de Alcalde e Concelleira Responsable de Urbanismo, Vivenda, Cidade Histórica e Acción Cultural do Concello de Santiago de Compostela.

· Soledad Felloza | Directora do Festival Atlántica.



Prensa Festival Atlántica

Beatriz Pérez | 604 070 409 | festivalatlantica.prensa@gmail.com

festivalatlantica.gal | Facebook | Twitter | Flickr

O Festival Atlántica de narración oral retoma a súaoitava edición tras a interrupción pola pandemia

O Festival Atlántica retoma a súa oitava edición tras a interrupción pola pandemia

·      Os contos atlánticos volven os días 5, 6 e 7 de novembro e o 5 e 6 de decembro

·      Dez contadores de Venezuela, Huesca, Salamanca, Zamora e Galicia protagonizarán as 24 actuacións deste outono que recalarán nos concellos de Santiago de Compostela, Ferrol, A Coruña, Ourense, Vigo, Lalín, Teo, Pazos de Borbén e Bertamiráns

·      A práctica totalidade da programación será gratuíta

O Festival Internacional de Narración Oral Atlántica completará este outono a programación da súa oitava edición que foi interrompida por mor da declaración do estado de alarma o pasado marzo. Grazas á complicidade das entidades colaboradoras, a organización do Festival vai ser quen de programar unha vintena de espectáculos que se repartirán nos concellos de Santiago de Compostela, Ferrol, A Coruña, Ourense, Vigo, Lalín, Teo, Pazos de Borbén e Bertamiráns.

Boa parte da programación vaise desenvolver entre o 5 e o 7 de novembro e, alén diso, para o 5 e o 6 de decembro están previstas outras dúas funcións que completarán a edición deste ano do Festival Atlántica. Serán en total 24 espectáculos nos que participarán os narradores Noelia Carioca (Salamanca), José Luis Gutiérrez ‘Guti’, (Zamora), Rubén Martínez Santana (Venezuela), Fernando Saldaña (Salamanca), Sandra Araguas (Huesca) e mais os galegos Ramiro Neira, Charo Pita, Pablo Díaz, Santi Prego e Sole Felloza.

Todas as actividades vanse desenvolver cumprindo coas medidas de seguridade anticoronavirus dispostas polas autoridades sanitarias. Para asistir ás funcións cómpre inscribirse por adiantado e confirmar a asistencia o día anterior. Deste xeito, de non poder acudir, poderán ocupar a praza as persoas en lista de espera. A organización do Festival Atlántica desexa facer fincapé neste punto e ao mesmo tempo que convida á participación apela tamén a facer un uso responsable das prazas dispoñibles, que por mor das medidas de seguridade son reducidas.

A información sobre os artistas participantes xa está publicada na web do festival (http://festivalatlantica.gal/), onde tamén está o programa das actuacións.

#culturasegura para tod@s       #culturasegura para tod@s       #culturasegura para todos

O Festival Atlántica comparte nas súas redes contos para a corentena

O Festival Atlántica comparte nas súas redes contos para a corentena

·      Xa están publicados os vídeos do venezolano Rubén Martínez e do galego Luís Prego baixo a etiqueta #ocontononpara

Trala cancelación do Festival Atlántica por mor das medidas tomadas para controlar a propagación do coronavirus, a organización do encontro está a publicar nas súas canles sociais unha colección de vídeos con contos gravados ex profeso polos artistas desta edición. Este material vaise difundir coa etiqueta propia #ocontononpara e outras vinculadas a esta situación excepcional como #ficonacasa ou #quedonacasa.

Xusto logo das medidas acordadas pola Xunta e polos concellos, produciuse unha cancelación masiva de actividades culturais na comunidade galega. A dirección do Festival centrou as súas forzas en garantir a volta dos artistas aos seus lugares de residencia antes do previsible peche dos desprazamentos, pero no medio desta actividade xurdiu a idea de agasallar o público con contos destes narradores.

Algúns deles chegaron a ter algunha función e mesmo a participar na gala inaugural do Atlántica, pero os máis deles marcharon coa metade dos espectáculos por facer. Estes vídeos son un xeito de paliar ese baleiro e tamén, unha contribución para alixeirar a corentena que se está a vivir no país. Por iso, haberá historias para todos os públicos: contos para nenos e tamén para maiores.

Xa está publicado un conto do venezolano Rubén Martínez e un punto de baile do galego Luís Prego, pero vanse engadir as historias de moitos máis artistas, como Sandra Araguas (Huesca), Fernando Saldaña (Salamanca), Aline Cântia e Chicó do Céu (Brasil), Carolina Rueda (Colombia), Noelia Carioca (Salamanca), José Luis Gutiérrez “Guti” (Zamora) ou Sofía Maul (Madeira, Portugal), por citarmos algúns. Tamén haberá historias de contadores galegos como Pablo Díaz, Raquel Queizás, Charo Pita, Celso Sanmartín, María da Pontragha, Cris de Caldas ou Dani Blanco.

Con esta acción, o Festival Atlántica únese á vaga de solidariedade que se está a desenvolver nas redes sociais, onde se está a brindar contido cultural para estes días de peche na casa. En palabras de Soledad Felloza, directora do festival, “Atlántica non apaga o seu faro de historias, que nunca choveu que non escampase e volveremos navegar; cando volva a primavera, como dicía Álvaro Cunqueiro, serán mil primaveras máis”.

Punto de Luís Prego: https://youtu.be/D7i_caDuhIk

Conto de Rubén Martínez: https://youtu.be/4HgYUm3h4PI

Os contos do Festival Atlántica visitan a Aula de Pediatría do hospital de Santiago

Os contos do Festival Atlántica visitan a Aula de Pediatría do hospital de Santiago

·      Os brasileiros Aline Cântia e Chicó do Céu levarán a música e as historias do seu espectáculo ‘Contos de lá nos cantos de cá’

Enlace á nota de prensa.

Á poucos días para a inauguración oficial do Festival Atlántica, chega unha das citas tradicionais deste encontro de narración oral: a función na Aula de Pediatría do Hospital Clínico Universitario de Santiago. Este ano visitarán o centro hospitalario os brasileiros Aline Cântia e Chicó do Céu e levarán ata aló o seu espectáculo ‘Contos de lá nos cantos de cá’ [17:30, Aula de Pediatría, en portugués].

Todas as historias desta obra acontecen nunha inmensa árbore baixo a cal un avó de Minas Gerais se detén para descansar. Alí, sentado nun tronco, comeza a contar contos: o da árbore xenerosa ou o dun par de zapatos namorados. Narra contos que viñeron de lonxe, contados por camiñantes que chegaban alí traendo historias do mundo: dunha princesa medorenta, dun neno que danzaba coas abellas ou dunha árbore de froita amarela, da orixe das estrelas ou do amor entre Godofredo e Estela. Contos que invitan ao espectador a silenciar os ruídos externos e entrar no tempo do ‘érase unha vez…’.

A contadora Aline Cântia e o músico e compositor Chicó do Céu traballan xuntos dende hai dez anos en investigacións, proxectos e camiños compartidos. En 2011 fundaron o Instituto Cultural Abrapalavra, que xa gañou quince premios por diferentes traballos ligados á tradición. O Instituto traballa na produción de traballos que dialogan con recollidas de tradición oral, estudos independentes, creación de grupos de narradores de historias e actividades de formación artístico-cultural. Co obxectivo de descentralizar e democratizar o traballo artístico, o Instituto adoita realizar accións nacionais e locais, de carácter continuo ou permanente. Todas estas accións, actividades e presentacións contan cun rexistro sonoro e audiovisual. O dúo define o propósito do Instituto Cultural Abrapalavra nunha frase: “Contar, cantar e escoitar historias foi o camiño que escollemos para un profundo e pracenteiro intercambio de experiencias, saberes e feitos”.

O programa completo do Atlántica así como a información sobre os artistas pódese consultar na web do Festival (http://festivalatlantica.gal).

Os contos de lobos das Bífidas quentan motores para o Festival Atlántica que se inaugura o mércores

Este luns temos unha sesión de contos a dúas voces coas Bífidas (Lidia Luna e Cris Caldas) que servirá de prólogo á oitava edición do Festival Atlántica. O espectáculo será no Modus Vivendi a partir das 21 horas.

Aproveitamos tamén para lembrarvos que xa se poden mercar as entradas para as galas inaugural e de clausura do festival.