Agosto préstase para a calma, para o pracer de lecturas incendiarias que non poden ser interrompidas polo dioivo da présa. Ou iso penso mentres saboreo opouso do mel que deixa O cuarto de Jane, escrito por Charo Pita e ilustrado por Pilar Cancio.
“Se os meus labios fosen
as páxinas do libro que les na bocanoite,
pronunciarían o teu nome con puntos suspensivos
para seducirte coa sinuosa silueta
do inesperado”.
Galardoado no XV Certame de Poesía Erótica Illas Sisargas, preséntase coma un poliedro de voces femininas, no que dependendo da óptica, ás veces intervén un Nosoutras, Ela ou Eu. A obra afástase, acertadamente, de calquera estereotipo ou prexuízo de índole sexual. Por iso, entre as súas follas aparece a anana, as cegas ou mulleres menopáusicas, para encher de poesía o baleiro destoutras realidades.
De ritmo vibrante, amosásenos a escrita coma actividade ligada ao desexo, onde unha Jane, aberta de pernas ao mundo, vai danzando palabras.Sedúcenos o bambán do que se di, mais tamén do que se intúe, do que experimenta o corpo ao deixarse caer no seguinte verso. Sen valados mentais, acompañado pola arte da insinuación, este é un libro para devorar lentamentee alongar o éxtase do seu final.
Eu non perdería a oportunidade de lelo e, se a ocasión o merece, lelo en alto para gozo doutros ouvidos.
A primeira xornada do Festival Atlántica trae a Santiago catro espectáculos
· Neste día actúan a salmantina Eugenia Manzanera e as galegas Charo Pita e Marta Ortiz
· Vai haber espectáculos para bebés, nenos e adultos, todos eles gratuítos
· O xoves tamén arrinca o festival en Ferrol, Mondoñedo e mais na Pobra do Caramiñal
Este xoves, 1 de xullo, comeza oficialmente a novena edición do Festival Atlántica, que se prolongará ata o día 11 deste mes e que programa máis de 80 funcións gratuítas en 27 concellos de toda Galicia. Ao longo destes días vanse xuntar en Galicia unha trintena de contadores procedentes de Guinea Ecuatorial, Brasil ou Portugal, Zamora, Salamanca, Guadalaxara e, por suposto, Galicia. Unha novidade deste ano son os espectáculos en espazos de gran valor patrimonial. Haberá contos en lugares como as Torres de Altamira, en Brión, ou no curro de Sabucedo, ou no Castelo de Castrodouro, en Alfoz, por citar algúns. A historias de Atlántica tamén chegarán a zonas naturais como carballeiras ou fragas autóctonas con xacementos arqueolóxicos, castros, petróglifos, alvarizas e mesmo navegarán en barcas no Miño e na Guarda. O programa completo do festival e mais a información sobre os artistas, espectáculos e a reserva de entradas pódese consultar na web do festival.
Atlántica en Compostela
No tocante a Santiago, a primeira xornada estará protagonizada por tres espectáculos para nenos e un para adultos, das artistas Eugenia Manzanera, Charo Pita e Marta Ortiz. Todas as actividades son gratuítas pero para asistir cómpre reservar o convite a través da web festivalatlantica.gal. O festival está presente na cidade compostelá grazas á Deputación da Coruña, a Xunta de Galicia e o Concello de Santiago.
O programa comezará ás 11 horas coa ‘Galicia máxica’ de Marta Ortiz no Monte Viso, un espectáculo concibido para nenos maiores de catro anos. Trátase dunha viaxe pola Galicia máis abraiante, chea de seres máxicos, cancións, xogos e tradicións que gardan a canda elas costumes e sentires dun pobo. Unha mestura de narración oral, música e manipulación de obxectos para poñer en valor e achegarlles aos cativos o noso patrimonio cultural de maneira divertida. Os convites pódense reservar aquí.
Un chisco máis tarde, ás 12 horas, Eugenia Manzanera levará os seus ‘Contos galiñáceos’ ata o xardín de Fontiñas, xusto detrás do Centro Sociocultural. Nesta sesión haberá múltiples personaxes con peteiro: galiñas, parrulos, curuxas, rulas… E virán cheos de historias aladas para despegar e ser felices. A función, para nenos maiores de tres anos, está concertada cos campamentos dos CSC, pero de quedaren prazas libre, pode entrar público ata completar o aforo.
Xa pola tarde, ás 19 horas, o quiosco da música da Alameda vai acoller unha sesión para bebés de entre cero e 3 anos titulada ‘Fábulas no berce’, de Charo Pita. Unha escolma de pequenas narracións acompañadas de sons, monicreques e libros moi visuais para captar a atención deste público tan especial. Relatos sinxelos, ritmos e cancións para introducir os máis cativos no universo das palabras. Este espectáculo ten esgotados os convites pero está habilitada unha lista de reserva por se hai cancelacións de última hora.
A quenda dos adultos chegará ás 21:30 horas con ‘Un, dous o(u)varios contos’ de Eugenia Manzanera. A cita será no parque de Bonaval onde a narradora salmantina preparará un cóctel de historias femininas, feministas, felinas e fellinianas aderezadas cun chisco de picante e pingas de humor. Unha refrescante combinación para o verán que cómpre degustar con palla retranqueira. Os convites pódense reservar aquí.
Sobre as artistas
Marta Ortiz é catalá, de orixe andaluza e vive e conta en Galicia desde o 2007, así que tamén é galega de adopción e corazón. Viviu en varias cidades ata que chegou a Santiago de Compostela, onde namorou dos contos. Conta soa e acompañada, para persoas de calquera idade, con obxectos, co xesto, coa rima e coa música. O seu repertorio nace de contos tradicionais, de historias de vida, de lembranzas incompletas, onde realidade e ficción se encerellan ata que non se sabe onde remata unha e comeza a outra. Tamén forma parte da compañía Tropa de Trapo co músico e narrador Brais das Hortas e é socia fundadora de Charlatana Cooperativa Galega de Artistas.
Eugenia Manzanera, en 1992, logo de traballar con Achiperre e Comediants na Expo de Sevilla, creou a súa propia compañía compaxinando a narración oral co teatro. Especializouse en commedia dell’arte en Italia con Antonio Fava e entrou no teatro para bebés da man de Carlos Laredo. Aínda que non leve nariz, a Manzanera sáelle o clown polos catro costados. Encántalle provocar sorrisos, risos e gargalladas.
Nos seus espectáculos a palabra adquire unha gran forza combinada con xogos rítmicos sonoros, onde os obxectos sempre propoñen outra maneira de estar no mundo. En activo dende hai 30 anos, foi directora, produtora, dramaturga, actriz e, sobre todo, pallasa.
Manzanera colleitou varios galardóns na súa longa traxectoria, como o premio Moretti co teatro infantil Cuéntame un cuento, ou o Premio do Público 2016 ao mellor espectáculo infantil na Feira de Teatro de Castela e León en Ciudad Rodrigo ou o Premio Fetén 2017 ao mellor espectáculo de pequeno formato para nenos, ambos por Retahilando. Dende o 2017 coordina o Encontro de Pallasas de Salamanca, no que se lle dá visibilidade á muller artista pallasa. Como contadora participou nunha morea de festivais e encontros nacionais e internacionais de narración oral.
Charo Pita naceu á idade de seis anos cando acabou de ler o seu primeiro libro. Leva contando historias de viva voz e impartindo obradoiros de narración oral e lectura en voz alta desde o ano 94, como narradora en solitario, dentro de espectáculos bilingües inglés-galego, ou en sesións nas que se combinan os contos e a música. Como escritora ten máis dunha ducia de libros publicados. Recibiu algúns galardóns literarios, como o premio Espiral Maior de poesía no ano 2001 ou o Manuel Murguía de narracións breves para adultos no 2018. Recentemente, o seu poemario ‘O cuarto de Jane’ gañou o primeiro premio do XV Certame de Poesía Erótica Illas Sisargas. Unha das súas facetas máis persoais é a de mesturar contos e música, de aí a súa participación en proxectos como ‘A nena e o grilo no país das apertas’ xunto a Magín Blanco, en ‘Estamos no verán’ xunto a Xoán Curiel ou en ‘No país do vento’ da man de María Faltri e Jorge Juncal.
Atlántica segue
As actividades de Atlántica continuarán ata o vindeiro 11 de xullo e vanse desenvolver por toda Galicia. O programa completo do festival e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.
Charo Pita e a Banda Municipal de Santiago musican ‘O gato con botas’
· O espectáculo forma parte da programación do Festival Atlántica e será este domingo, 6 de decembro, ás 12 horas, no Museo Centro Gaiás da Cidade da Cultura
· Charo Pita tamén estará o sábado na Biblioteca Pública Miguel González Garcés da Coruña co espectáculo infantil ‘Menú de contos’
BANDA MUNICIPAL DE SANTIAGO
OSCAR CORRAL
08/10/17
O Museo Centro Gaiás da Cidade da Cultura acolle este domingo, 6 de decembro, a partir das 12 horas, o espectáculo ‘Unha aventura singular: o gato con botas’, unha versión musicada do conto clásico na que participa a narradora Charo Pita e a Banda Municipal de Música de Santiago de Compostela coa dirección de Casiano Mouriño. O espectáculo, concibido ex profeso para a ocasión, esgotou os seus convites ás poucas horas de abrir as reservas e a lista de espera está tamén completa.
Charo Pita únese así ao grupo de contadores do Festival Atlántica que actuaron acompañados pola veterana banda picheleira, nun formato que se inaugurou na edición do 2018 con Nono Granero e que vai camiño de se converter nun clásico deste encontro de narración oral. A artista galega, que posúe unha ampla experiencia na combinación de música e contos, afronta neste espectáculo un dobre desafío: a adaptación dun clásico da tradición europea e facelo na compaña dos case 40 integrantes da banda.
‘O gato con botas’ é un conto popular europeo recompilado a finais do século XVII polo escritor Charles Perrault no seu libro ‘Contos de mamá ganso’, aínda que existen versións anteriores. Nel nárranse as argucias dun espelido gato para axudar o seu amo na procura de fortuna.
Cita cos contos na Coruña
Charo Pita vai actuar tamén este sábado dentro da programación do Festival Atlántica na Coruña. Os pequechos con idades entre 3 e 8 anos están convidados á Biblioteca Pública Miguel González Garcés, a partir das 12 horas, para gozaren con ‘Menú de contos’. A entrada é gratuíta, mais cómpre reservala no 881 960 378 ou na biblioteca.
Neste espectáculo haberá historias con princesas, sapos, bruxos, bonecos, trens, fabas, reis, lúas ou camelos. Contos tan variados coma un menú de restaurante: historias salgadas coma as patacas fritas, outras tristeiras coma os botes de espárragos e mesmo tenras coma os toriños de pescada. Dependerá do menú do día, de como veña a contadora e, sobre todo, de como sexa a fame dos que escoitan.
Artista polifacética
A galega Charo Pita naceu á idade de seis anos cando acabou de ler o seu primeiro libro. Leva contando historias de viva voz e impartindo obradoiros de narración oral e lectura en voz alta desde o ano 94, como narradora en solitario, dentro de espectáculos bilingües inglés-galego, ou en sesións nas que se combinan os contos e a música. Como escritora ten máis dunha ducia de libros publicados. Recibiu algúns galardóns literarios, como o premio Espiral Maior de poesía no ano 2001 ou o Manuel Murguía de narracións breves para adultos no 2018. Recentemente, o seu poemario ‘O cuarto de Jane’ gañou o primeiro premio do XV Certame de Poesía Erótica Illas Sisargas. Unha das súas facetas máis persoais é a de mesturar contos e música, de aí a súa participación en proxectos como ‘A nena e o grilo no país das apertas’ xunto a Magín Blanco, en ‘Estamos no verán’ xunto a Xoán Curiel ou en ‘No país do vento’ da man de María Faltri e Jorge Juncal.
No tocante á Banda Municipal de Santiago de Compostela, é unha das máis antigas de Galicia, xa que naceu en 1848. Ao primeiro tiña carácter afeccionado, ata que en 1876 o Concello decidiu facerse cargo dela e comezou a se profesionalizar. Na actualidade conta con 37 compoñentes e desenvolve unha intensa actividade de concertos ao longo de todo o ano. O seu director é o pontevedrés Casiano Mouriño Maquieira.
· Ás 10.30 horas, Charo Pita levará ‘Menú de contos’ ao Centro Sociocultural de Vite, unha función para cativos
· A partir das 18 horas, Noelia Carioca estará no Centro Sociocultural de Santa Marta cun espectáculo para nenos titulado ‘Contos e papaventos’
· O público adulto ten unha cita con Rubén Martínez e ‘Dous ventos’ a partir das 21 horas no Centro Xove da Almáciga
Charo Pita
O Festival Atlántica comezará a xornada do sábado cunha sesión de Charo Pita no Centro Sociocultural de Vite para cativos con idades entre os 3 e 8 anos. A función, prevista para as 10.30 horas, levará por título ‘Menú de contos’ e para asistir cómpre reservar previamente a entrada no teléfono 981 542 490.
Neste espectáculo haberá historias con princesas, sapos, bruxos, bonecos, trens, fabas, reis, lúas ou camelos. Contos tan variados coma un menú de restaurante: historias salgadas á maneira das patacas fritas, outras tristeiras coma os botes de espárragos e mesmo tenras coma os toriños de pescada. Dependerá do menú do día. De como veña a contadora. De como sexa a fame dos que escoitan. Pero todas dun xeito ou doutro axudan a medrar porque teñen vitamina I de imaxinativas.
Noelia Carioca
Xa pola tarde, ás 18 horas, Noelia Carioca estará co seu espectáculo ‘Contos e papaventos’ no Centro Sociocultural de Santa Marta. Esta narradora salmantina, co apoio de bonecos, obxectos e instrumentos musicais, vai ser quen de lles dar vida ás historias que brindará ao público para facelo voar alto coma os papaventos. Un espectáculo cheo de animais, poesía e ritmo para rir, soñar e gozar pensado para nenos de entre 3 e 8 anos. Aínda que a entrada é gratuíta, para asistir cómpre reservar por adiantado no teléfono 981 543 017.
Rubén Martínez
Pola noitiña, a partir das 21 horas, o público adulto vai ter a oportunidade de gozar coas historias de Rubén Martínez nunha función titulada ‘Dous ventos’ no Centro Xove da Almáciga (entrada gratuíta, reservas na web festivalatlantica.gal). Os ventos que sopran desde a Venezuela natal deste contador mestúranse cos que zoan os contos do Mediterráneo, onde Martínez leva a vivir vinte anos. O resultado é unha amálgama de vivencias que se reflicten na cadencia e na voz de alguén que é de acá e de acolá, como os contos de ‘Dous ventos’.
Sobre os artistas
A galega Charo Pita naceu á idade de seis anos cando rematou de ler o seu primeiro libro. Leva contando historias de viva voz e impartindo obradoiros de narración oral e lectura en voz alta desde o ano 94, como narradora en solitario, dentro de espectáculos bilingües inglés-galego, ou en sesións nas que se combinan os contos e a música. Como escritora ten máis dunha ducia de libros publicados. Recibiu algúns premios literarios, o premio Espiral Maior de poesía no ano 2001 e no 2018, ou o Manuel Murguía de narracións breves para adultos, entre outros. Participou tamén en proxectos musicais e teatrais como na Nena e o grilo no país das apertas xunto a Magín Blanco, en Estamos no verán xunto a Xoán Curiel ou en No país do vento da man de María Faltri e Jorge Juncal.
Noelia González, alias ‘Carioca’, é licenciada en Pedagoxía, pero dende que descubriu o poder da palabra dedícase á narración oral. Leva os seus contos a escolas, bibliotecas, prazas e garderías, sempre coa maleta chea de obxectos que toman vida nos seus espectáculos. Compaxina os contos coa docencia nunha escola de circo e coa interpretación.
Rubén Martínez é xornalista, músico, escritor, actor, contacontos e director do Festival de Narración Oral de Barcelona ‘Munt de mots’. Atesoura trinta e cinco anos de profesión, cheos de creatividade, traballo e moita imaxinación. Foi pioneiro da narración oral en Venezuela, Chile e Cataluña. Formador de narradores e narradoras orais no Programa Atrapa la Paraula, do Consorci de Biblioteques de Barcelona dende o ano 2002.
Máis Atlántica, máis contos
O Festival proseguirá durante os días 10 e 13 de novembro e o 5 e 6 de decembro con máis actuacións noutros concellos galegos. A información sobre os artistas pódese consultar na web do festival (http://festivalatlantica.gal/). Tamén están dispoñibles o programa das actuacións e mais os detalles sobre o proceso de reserva de convites. Dada a cambiante situación sanitaria, esta programación está suxeita a modificacións, pero calquera alteración será anunciada a través das canles do Festival Atlántica.
· A partir das 18.30 horas, Noelia Carioca estará na Biblioteca Anxel Casal cun espectáculo para nenos titulado ‘Contos e papaventos’
· Ás 20.30 horas, Rubén Martínez estará con ‘Cuenterías’ no local Dospasos de Bertamiráns
· Tamén ás 20.30 horas Charo Pita actuará na Igrexa da Universidade de Santiago de Compostela
As restricións que entran en vigor este venres non van impedir que os contos do Festival Atlántica tomen de novo a cidade picheleira. Tres narradores ben dispares, Noelia Carioca, Rubén Martínez e Charo Pita, protagonizarán tres sesións de historias para todos os gustos e públicos.
Noelia Carioca
A primeira cita será con Noelia Carioca e co seu espectáculo ‘Contos e papaventos’ na Biblioteca Pública Anxel Casal a partir das 18.30 horas. Esta narradora salmantina, co apoio de bonecos, obxectos e instrumentos musicais, vai ser quen de lles dar vida ás historias que brindará ao público para facelo voar alto coma os papaventos. Un espectáculo cheo de animais, poesía e ritmo para rir, soñar e gozar pensado para nenos de entre 3 e 8 anos. Aínda que a entrada é gratuíta, para asistir cómpre recoller o convite no mostrador de información 30 minutos antes do comezo da actividade.
Noelia González, alias ‘Carioca’, é licenciada en Pedagoxía, pero dende que descubriu o poder da palabra dedícase á narración oral. Leva os seus contos a escolas, bibliotecas, prazas e garderías, sempre coa a maleta chea de obxectos que toman vida nos seus espectáculos. Compaxina os contos coa docencia nunha escola de circo e coa interpretación.
Cuentería venezolana
Rubén Martínez
Algo máis tarde, ás 20.30 horas, e no local Dospasos de Bertamiráns estará Rubén Martínez cunha sesión de ‘Cuentería’. Un espectáculo para adultos que consiste nunha selección de historias de seu no que este narrador venezolano amosa a súa visión absurda, máxica e extravagante do mundo. [Dospasos | rúa Pesqueiras 6, local 10, Bertamiráns | prezo 7,5 € | reserva de entradas por WhatsApp en 660619071]
Rubén Martínez é xornalista, músico, escritor, actor, contacontos e director do Festival de Narración Oral de Barcelona ‘Munt de mots’. Atesoura trinta e cinco anos de profesión, cheos de creatividade, traballo e moita imaxinación. Foi pioneiro da narración oral en Venezuela, Chile e Cataluña. Formador de narradores e narradoras orais no Programa Atrapa la Paraula, do Consorci de Biblioteques de Barcelona dende o ano 2002.
Contos na igrexa
Charo Pita
Tamén ás 20.30 horas, pero na Igrexa da Universidade de Santiago de Compostela, os amantes dos contos teñen unha cita con Charo Pita e co espectáculo ‘Baixo a lúa ás 20.30’, unha escolma de historias sobre os corpos que se abalan nas sombras, nas alegrías, nos medos e nos soños que nos desvelan. A ollada, o silencio e, como non, a palabra son os protagonistas destes relatos. Algúns deles proceden da tradición oral de lugares remotos e outros, da propia narradora, pero todos foron concibidos para gozar das noites de luar.
A galega Charo Pita naceu á idade de seis anos cando rematou de ler o seu primeiro libro. Leva contando historias de viva voz e impartindo obradoiros de narración oral e lectura en voz alta desde o ano 94, como narradora en solitario, dentro de espectáculos bilingües inglés-galego, ou en sesións nas que se combinan os contos e a música. Como escritora ten máis dunha ducia de libros publicados. Recibiu algúns premios literarios, o premio Espiral Maior de poesía no ano 2001 e no 2018, ou o Manuel Murguía de narracións breves para adultos, entre outros. Participou tamén en proxectos musicais e teatrais como na Nena e o grilo no país das apertas xunto a Magín Blanco, en Estamos no verán xunto a Xoán Curiel ou en No país do vento da man de María Faltri e Jorge Juncal.
Máis Atlántica, máis contos
O Festival proseguirá durante os días 7 e 13 de novembro e o 5 e 6 de decembro con máis actuacións noutros concellos galegos. A información sobre os artistas pódese consultar na web do festival (http://festivalatlantica.gal/). Tamén están dispoñibles o programa das actuacións e mais os detalles sobre o proceso de reserva de convites.
Agás no caso de Ferrol e Teo, a maioría das funcións son, polo de agora, presenciais, pero dada a cambiante situación sanitaria, esta previsión está suxeita a modificacións. En todo caso, calquera alteración será anunciada a través das canles do Festival Atlántica.
