A compañía galega de distribución alimentaria e a entidade Camino Escena Norte AIE ratificaron hoxe o acordo de colaboración
A sexta edición do proxecto de intercambio de artes escénicas celebrarase do 13 de setembro ao 27 de outubro en Galicia, Asturias, Cantabria, Euskadi e Navarra
Por cuarto ano consecutivo, a compañía galega de distribución alimentaria Vegalsa-Eroski apoia o proxecto de intercambio de artes escénicas Camiño Escena Norte. Faino como patrocinador oficial desta sexta edición, afianzando así o seu compromiso por esta iniciativa que promove o intercambio cultural entre Galicia, Asturias, Cantabria, Euskadi e Navarra.
Na sinatura do acordo estiveron presentes a directora de Sostibilidade e Comunicación Corporativa de Vegalsa-Eroski, Gabriela González; e por parte de Camiño Escena Norte o seu coordinador, Diego V. Meizoso. O acto contou tamén con parte do elenco da compañía Píscore-Culturactiva, unha das 3 compañías galegas que participará este ano o programa coa súa montaxe Molto Barroco.
“Desde Vegalsa-Eroski estamos moi contentos de renovar este acordo de colaboración, que nos permite consolidar o noso compromiso co ámbito das artes escénicas en Galicia e nas demais comunidades veciñas. Con esta firma, pretendemos contribuír á promoción da nosa cultura, que constitúe un dos atributos patrimoniais máis importantes e que nos representan como territorio e nos conectan coas sociedade”, destacou Gabriela González.
“Para Camiño Escena Norte é unha satisfacción que Vegalsa-Eroski forme parte do proxecto como o noso patrocinador oficial por cuarto ano consecutivo. A aposta da marca polo noso proxecto cultural e o seu apoio e compromiso foron fundamentais para o desenvolvemento e estabilidade do mesmo, nunha alianza entre o sector cultural e creativo e o mundo da empresa que nos parece fundamental e que posibilita que este ano vaiamos ter actividades en case 30 sedes de Galicia e o Principado de Asturias”, indicou Diego V. Meizoso.
Expansión de Constelacións
Camiño Escena Norte continúa co seu compromiso de promover o intercambio escénico, artístico e profesional entre compañías de Galicia, Asturias, Cantabria, Euskadi e Navarra. A edición de 2024 contará cunha programación especial que se celebrará do 13 de setembro ao 27 de outubro, na que participarán 15 compañías de teatro, danza e artes do movemento e novo circo mostrando os seus espectáculos en máis de 60 localidades dos cinco territorios.
A sexta edición de CEN mantén o número de compañías participantes (un total de 15) no ciclo de representacións, nomeado Constelacións. Galicia exportará talento aos demais territorios grazas á representación das compañías Ibuprofeno Teatro con Deadpan Karaoke; Píscore-Culturactiva con Molto Barroco e Colectivo Glovo con Tabú. Pola súa banda, Asturias intervirá neste intercambio cultural con La Westia Producciones e Ada Byron: A tecedora de números; Adrián Conde Espectáculos e Check out, e Teatro Plus, que representará Geometría del alma.
Cruzamentos, intercambio artístico
O programa Cruzamentos, deseñado para promover o intercambio escénico, artístico e profesional entre compañías, é unha das pedras angulares de camiño Escena Norte. Nesta sexta edición, esta rede de estancias acollerá dous proxectos, un deles da compañía galega Furia Sotelo, escollido entre os 18 presentados en 2024, e nos que estaban implicadas máis de 30 compañías das cinco Comunidades CEN. Na comisión de avaliación participaron profesionais de prestixio como a dramaturga e directora adxunta do Centro Dramático Nacional, Fefa Noia, e a bailarina e responsable de desenvolvemento de proxectos de Dantzaz Centro de Creación Coreográfica Internacional, Bertha Bermúdez.
El vacío que llena, da galega Furia Sotelo en colaboración cos cántabros Babirusa Danza, desenvolverase entre o 14 e o 22 de outubro na Casa Vella (Amiadoso, Ourense), un espazo de creación artística, encontro, mediación e dinamización do contexto rural.
Espectáculo Recomendado, marca de calidade
En 2024, CEN editou a segunda edición do Catálogo de Espectáculos Recomendados Camiño Escena Norte, unha publicación que serve de promoción das trinta producións seleccionadas e apoio á súa distribución fóra do ámbito do proxecto. O obxectivo deste segundo catálogo é que sirva como outra ferramenta máis para a visibilización, difusión e distribución das artes escénicas profesionais galegas, asturianas, cántabras, vascas e navarras fóra das súas fronteiras. A programación do programa Constelacións de 2024 saíu desta selección.
Oficina CEN de Cooperación Escénica
Unha das novidades da edición de 2024 é a Oficina CEN de Cooperación Escénica. Esta nova proposta, que conta co apoio do Ministerio de Cultura, funcionará de maneira permanente como entidade independente de apoio ás compañías e proxectos, dando continuidade durante todo o ano aos obxectivos do proxecto, máis aló das datas da súa programación oficial.
Sobre Vegalsa-Eroski
Vegalsa-Eroski conta en Galicia, Asturias e Castela e León con 285 establecementos entre propios e franquiados baixo as marcas comerciais hipermercados e gasolineiras Eroski, supermercados Eroski Center, Autoservizos Familia, Cash Record, Eroski City, Aliprox e Eroski Rapid. A súa estrutura comercial en Galicia esténdese polas 4 provincias galegas e conta cunha moderna plataforma de mercadorías xerais, situada en Sigüeiro, A Coruña, dotada con tecnoloxías loxísticas de última xeración, ademais das plataformas de produtos frescos da Coruña e centros de redistribución en Vigo e Ourense.
Sobre Camiño Escena Norte
CEN naceu co obxectivo de promover o intercambio cultural a través das artes escénicas, tomando como referencia e fío condutor os camiños que transitan polo norte da Península Ibérica e que teñen, como destino final, Santiago de Compostela. Desde a súa primeira edición, celebrada en 2019, CEN levou o teatro, a danza, as artes do movemento e o novo circo a escenarios afastados, en moitos casos, dos circuítos habituais de programación, favorecendo así o acceso a este tipo de propostas á veciñanza de diferentes municipios e localidades.
CEN é unha iniciativa promovida polas propias asociacións profesionais de produtoras de artes escénicas Escena Galega (Galicia), EscenAsturias (Asturias), ACEPAE (Cantabria), Eskena (Euskadi) e ESNA (Navarra). Todas elas únense na supraentidade Camino Escena Norte Agrupación de Interese Económico, creada especificamente para o desenvolvemento, xestión e produción deste proxecto.
Desde este luns, día 1, e até o sábado 20 de xullo, no marco das Residencias Paraíso 2024, impulsadas polo Colectivo RPM, os creadores desenvolverán o seu proxecto de investigación escénica ‘Do outro lado’, sobre o ecoloxismo, a comunidade e a súa descomposición no rural
Unha vez finalizada a súa residencia, Fran Rodríguez & Brais Pombo ofrecerán unha mostra aberta do seu traballo en proceso, que terá lugar no Salón Teatro do Centro Dramático Galego o venres, 19 de xullo, ás 20.00h, con acceso libre
Paralelamente, o tándem artístico participará, xunto ao resto de ‘Artistas Paraíso 2024’, nun encontro anual promovido polo Colectivo RPM que terá lugar os días 20, 21 e 22 de setembro na Illa de San Simón
Residencias Paraíso é un proxecto impulsado polo colectivo RPM que conta co financiamento da Xunta de Galicia, a través da Axencia Galega das Industrias Culturais, e das distintas institucións coprodutoras do programa: Área de Cultura, Turismo e Promoción da Lingua do Concello de Lugo, Concello de Pontevedra, Concello de Vimianzo, Concello de Carballo, Concello de Ribadavia e Fundación Cidade da Cultura de Galicia
Os artistas Fran Rodríguez & Brais Pombo inician a súa andaina na oitava edición das Residencias Paraíso 2024 este luns, 1 de xullo, en Santiago de Compostela. As Residencias Paraíso son un programa anual de residencias artísticas para a danza e as artes vivas pioneiro no noso territorio, promovido polo Colectivo RPM. A Cidade da Cultura e o Salón Teatrodo Centro Dramático Galego acollen, desde hoxe e até o sábado 20 de xullo, a terceira destas residencias artísticas de 2024, en torno á proposta do tándem creativo que ten por título Do outro lado, un proxecto de investigación escénica sobre o ecoloxismo, a comunidade e a súa descomposición no rural, que conta coa colaboración do colectivo Memoria e Cinema e da compañía de teatro Mevadeus.
Unha vez finalizada a súa residencia artística, Fran Rodríguez & Brais Pombo ofrecerán unha mostra aberta do seu traballo en proceso, que terá lugar no Salón Teatro do CDG de Santiago de Compostela, o venres, 19 de xullo, ás 20.00h, con acceso libre ata completar a capacidade da sala.
Paralelamente, os creadores participarán, xunto ao resto de ‘Artistas Paraíso 2024’, nun encontro anual promovido polo Colectivo RPM que terá lugar os días 20, 21 e 22 de setembrona Illa de San Simón.
SOBRE O PROXECTO
Do outro lado é un proxecto de investigación escénica sobre o ecoloxismo, a comunidade e a súa descomposición no rural, que conta coa colaboración do colectivo Memoria e Cinema e coa compañía de teatro Mevadeus.
A canteira que abriu o monte de Traspielas é o símbolo do que parten para afondar nas consecuencias que esta ferida ten desde o máis persoal ata o máis global, reflexionando sobre o concepto de habitar nun sentido amplo, poñendo o corpo e o audiovisual como ferramentas de traballo.
Do outro lado indaga en como o capitalismo introdúcese na clase campesiña, desfacendo a comunidade e a súa capacidade de autosuficiencia, para converter a esas persoas en entes individuais que entran a ser produtores e consumidores no mercado, invitándonos a reflexionar sobre a nosa forma de habitar o mundo na actualidade.
SOBRE OS ARTISTAS
O traballo de Fran Rodríguez céntrase na interacción entre o corpo e o entorno, usando como soportes o cine, a fotografía e o son. Móvese nas fronteiras dos xéneros artísticos, cunha noción dun campo expandido das prácticas artísticas nas súas intervencións, que empregan desde material de arquivo ata a súa propia metraxe. Actualmente, está a realizar a súa primeira longametraxe, Da túa man para a miña, xunto a Coral Piñeiro, coa produtora Miramemira.
As súas obras puidéronse ver en diversos eventos e festivais como os Encontros da Imaxe; o Festival Internacional de Fotografía e Artes Visuais de Braga (Portugal); a mostra Paisaxe_0, de Poligonal Colectivo, na Galería Metro; o XIII Premio de Artistas Novos do Auditorio de Galicia, en Santiago de Compostela; ou o Festival Ffoco da Coruña.
Rodríguez participa no X Encontro de Novos Artistas da Cidade da Cultura de Galicia e, no ano 2022, recibe unha residencia artística nas Illas Aran, en Irlanda, para realizar un proxecto fotográfico no arquipélago BirdSong, da man de Stills&Motion.
Brais Pombo nace en Fornelos de Montes (Pontevedra) en 1999. É actor, performer e músico, formado en interpretación xestual na ESAD de Galicia e na Janácek Academy of Music and Performing Arts de Brno (República Checa).
O seu proxecto musical Faíscas gaña o Primeiro Premio no Xuventude Crea de Música 2022. Forma parte da compañía de teatro físico Mevadeus, gañadora do Primeiro Premio Xuventude Crea de Teatro 2021 coa peza Agro 5G. Con Outrora Nós, a formación álzase, tamén, co terceiro premio ao espectáculo mellor valorado polo público da programación VigoCultura 2022.
Pombo realizou prácticas como performer na prestixiosa compañía belga de teatro físico Troubleyn Jan Fabre e formou parte do elenco do espectáculo When are we? no Buran Teatr daa República Checa. Asimesmo, participou no espectáculo de danza contemporánea Masks, dirixido pola coreógrafa Ursula Terzan.
MÁIS INFORMACIÓN SOBRE AS RESIDENCIAS PARAÍSO
Promovido polo Colectivo RPM –entidade independente dedicada ao impulso da danza e a creación contemporánea en Galicia–, o programa Residencias Paraíso 2024 diríxese a artistas de Galicia, España e Portugal, con maior ou menor traxectoria, que precisen recollerse de forma intensiva arredor dun proxecto de investigación ou creación durante dúas ou tres semanas. A iniciativa conta cun importe total de 22.000€ e, neste 2024, acollerá 9 propostas en residencia- cunha dotación económica de entre 1.500 e 3.000€ (impostos incluídos) cada unha– para favorecer as distintas fases do proxecto artístico seleccionado, desde a investigación, a escritura, o traballo dramatúrxico, a creación coreográfica ou, tamén, as residencias de carácter técnico.
Neste 2024, as residencias artísticas desenvolvense entre abril e outubro no Pazo da Cultura de Narón, o Pazo da Cultura de Carballo, a Casa da Cultura de Vimianzo, o Vello Cárcere de Lugo, a Cidade da Cultura de Santiago de Compostela, o Salón Teatro do Centro Dramático Galego, o Pazo da Cultura de Pontevedra e a Igrexa da Madalena de Ribadavia. Paralelamente, as e os artistas residentes seleccionadas e seleccionados participarán nun encontro anual promovido polo Colectivo RPM que terá lugar os días 20, 21 e 22 de setembro na Illa de San Simón.
Entre os 203 proxectos recibidos na actual convocatoria das residencias, o Colectivo RPM seleccionou a Sergio Marey, Fran Rodríguez & Brais Pombo, Ana Cotoré, Desgarradura, Noela Covelo Velasco & Élise Moreau, Cris Balboa, Lucas Damiani, José Ramón Hernández / Osikán – vivero de creación e Furia Sotelo como ‘Artistas Paraíso 2024’.
Residencias Paraíso vai na procura de artistas de danza e artes vivas preocupadas e ocupadas polas derivas do seu tempo. Pretende fomentar a aparición de novos proxectos de investigación e creación arredor das novas linguaxes contemporáneas, alimentando o campo de acción da comunidade artística do noso territorio, tanto a que xa existe como a que está por chegar. Normalizar o concepto de residencia artística resulta fundamental para o presente e o futuro das políticas culturais en Galicia, porque significa atender e respectar o espazo e o tempo dedicado á investigación artística, o verdadeiro xerme de todo o que virá.
O maior valor de Residencias Paraíso é que sucede grazas a unha rede que atravesa de norte a sur o noso territorio a través da colaboración de espazos de distinta natureza, desde teatros ou centros culturais até espazos non convencionais. O exercicio de diálogo entre todas as partes (impulsores, coprodutores e espazos cómplices), dota dunha identidade singular ao programa. Ao longo da súa historia, nas Residencias Paraíso participaron artistas e colectivos como Brigitte Vasallo, Clara Pampyn, Luísa Saraiva, Fernando Epelde, Marcia Vázquez, Natalia Fernandes, Hermanas Gestring, Diego Anido, Compañía Elahood, Andrea Quintana, Alejandra Balboa, María Roja ou Laila Tafur, entre moitas outras.
Residencias Paraíso é un proxecto interinstitucional do Colectivo RPM en colaboración coa Xunta de Galicia, a través da Axencia Galega de Industrias Culturais. Está coproducido pola Área de Cultura, Turismo e Promoción da Lingua do Concello de Lugo, o Concello de Pontevedra, o Concello de Vimianzo, o Concello de Carballo, o Concello de Ribadavia e a Fundación Cidade da Cultura de Galicia. E conta cola colaboración do Centro Dramático Galego, O Vello Cárcere de Lugo, o FIOT – Festival Internacional Outono de Teatro de Carballo, o Pazo da Cultura de Narón e o Padroado da Cultura do Concello de Narón.
SOBRE O COLECTIVO RPM
Colectivo RPM é un colectivo de artistas vencellados á danza e ás artes vivas que imaxina, deseña e acompaña proxectos contextuais desde Galicia. Manteñe un claro compromiso polo diálogo interinstitucional e co impulso de iniciativas ao redor da creación contemporánea, a investigación e a visibilidade da comunidade artística da danza e as artes vivas.
Ademais do acompañamento de artistas e procesos, o colectivo tamén xera diálogos e accións coas comunidades locais para achegar a práctica artística á cidadanía. Dentro das liñas de acción do Colectivo RPM destaca o programa Residencias Paraíso -construído cunha rede de teatros e espazos cómplices en Galicia- que lanza unha convocatoria anual para acoller en residencia a distintos artistas ao longo do ano, despregando unha serie de programacións expandidas abertas ao público. Este programa esténdese fóra de Galicia na liña Cruceiros Paraíso que posibilita abrir liñas de colaboración con outros espazos estatais e internacionais.
Paula Carballeira, Jaime Santos e Iseo Agilda son os artistas que actuarán este martes en Santiago
O Teatro Principal acolle ‘Blancanieves’, de La Chana Teatro, gañador do premio Max 2023 ao mellor espectáculo infantil, xuvenil e familiar
Mentres, en Portugal, está programado un paseo histórico e unha sesión de contos a cargo de Estefânia Surreira
A programación completa pódese consultar na web festivalatlantica.gal
Os máis cativos serán os protagonistas da segunda xornada do Festival Atlántica este martes, 2 de xullo, que desenvolverá actividades en Santiago e Portugal. Así, ás 12 horas, os pequechos terán que decidir entre escoitar as historias de Iseo Agilda en A grandeza do pequeno (12 h, CSC Santa Marta) ou os Contos de sapos, bruxas e curuxas de Paula Carballeira (12 h, CSC Maruxa e Coralia). Xa pola tardiña e no Teatro Principal, ás 17 horas, será a representación de Blancanieves de La Chana Teatro, con entrada gratuíta pero para asistir cómpre retirar previamente o convite na Zona C.
Blancanieves foi a obra gañadora do premio Max ao mellor espectáculo infantil, xuvenil e familiar no 2023. Trátase dun espectáculo luminoso celebrado pola crítica e o público no que a historia de Blancanieves cóntase desde o verso e desde o humor que nace das situacións máis desgraciadas. Blancanieves, a luz máis refulxente, é odiada e envexada pola súa madrasta, unha fermosa lámpada cuxa beleza está baleira, pois nin sequera emite luz. E alí onde habita a luz, atópase a beleza que encandea de verdade ás almas nobres. E é que a beleza é invisible aos ollos.
Alén disto, os maiores tamén poderán gozar das historias de Paula Carballeira con Camiños de mar, terra e vento, pero algo máis tarde, ás 21 horas, e tamén no CSC Maruxa e Coralia. Completa la programación de Compostela unha andaina nocturna pola Portela de Villestro que será guiada polo Colectivo A Rula. Consistirá nunha visita aos principais petróglifos da área arqueolóxica da zona, conformada por unhas 15 estacións de arte rupestre nos enclaves do Agro do Campo, Os Valados, O Rexío, A Devesa da Rula e Os Cortellos.
Actividade en Portugal Atlántica tamén seguirá a se celebrar en Portugal este martes con dúas propostas: un paseo histórico a cargo de Jorge Leal e unha sesión de contos con Estefânia Surreira. Ao longo desta semana, outras sedes espalladas por Galicia iranse engadindo ao festival ata completar as máis de 90 funcións previstas nesta edición.
O XII Festival Atlántica é posible grazas ao patrocinio da Xunta de Galicia e da Deputación da Coruña e ao apoio dos concellos de Santiago de Compostela, Ferrol, Teo, Alfoz, Caldas de Reis, Dodro, Mugardos, Outes, A Pobra do Caramiñal, Ribeira, Sanxenxo e Vilalba. A programación actualizada pódese consultar na web festivalatlantica.gal.
Festival Atlántica Atlántica, Festival Internacional de Narración Oral, naceu no ano 2013 con sede en Santiago de Compostela cunha clara vocación de ser un encontro de voces e historias de perfil atlanticista. Mantén o seu obxectivo de indagar nas raíces comúns das historias do océano, na procura da identidade cultural do Atlántico. Traballa a prol da posta en valor dunha arte escénica vinculada ao territorio, antiga pero adaptada aos tempos, e ampara, xera e difunde unha narrativa integradora, igualitaria e sostible.
O festival bota a andar este luns con actividades en Santiago de Compostela e en Portugal e proseguirá ata o domingo 7
A función inaugural será ‘Pisando el llano’ de Jaime Santos, de La Chana Teatro, no CSC Maruxa e Coralia de Santiago ás 21 horas
A programación completa pódese consultar na web festivalatlantica.gal
O Festival Atlántica inaugura este luns, 1 de xullo, a súa duodécima edición con actividades en Santiago e Portugal. En Compostela a actividade da mañá estará dirixida aos máis cativos, que poderán gozar dos espectáculos Prende no colo de Luís Prego e Samuel Soto (11.00 horas) e A maleta da avoa de Raquel Queizás (12.00 horas), ambos os dous no CSC Maruxa e Coralia.
Alí mesmo, pero pola noite, ás 21 horas, terá lugar a función inaugural Pisando el llano, un espectáculo unipersoal de Jaime Santos, de La Chana Teatro, baseado na colección de contos El llano en llamas de Juan Rulfo. O actor salmantino consegue preservar nesta proposta escénica a calidade literaria das obras de Rulfo e ofrecer unha representación teatral que se axusta o máximo posible ao imaxinario descrito polo escritor mexicano.
Dun xeito honesto e sen artificios, Jaime Santos transmite a crueza e desolación que preside El llano en llamas e faino sen máis acompañamento ca unha cadeira. O único actor en escena tratará de reflectir a “escrita total” de Rulfo nestas historias ambientadas en paraxes áridas do México pre e postrevolucionario que narran as vivencias de campesiños solitarios en constante loita por sobrevivir ante os procesos de industrialización do país azteca.
Santos, grande admirador do escritor mexicano, quixo preservar a esencia dun dos principais representantes do realismo máxico, así que, amais de realizar a representación completa con acento mexicano, emprega a mesma linguaxe popular que caracteriza esta obra, considerada un clásico da literatura hispanoamericana.
Tamén Portugal
Atlántica tamén comezará este luns 1 de xullo a súa actividade en Portugal, onde programa un total de trece funcións en cinco sedes diferentes e durante sete días. Ao longo desta semana, outras sedes espalladas por Galicia iranse engadindo ao festival ata completar as máis de 90 funcións previstas nesta edición. O XII Festival Atlántica é posible grazas ao patrocinio da Xunta de Galicia e da Deputación da Coruña e ao apoio dos concellos de Santiago de Compostela, Ferrol, Teo, Alfoz, Caldas de Reis, Dodro, Mugardos, Outes, A Pobra do Caramiñal, Ribeira, Sanxenxo e Vilalba. A programación actualizada pódese consultar na web festivalatlantica.gal.
Festival Atlántica
Atlántica, Festival Internacional de Narración Oral, naceu no ano 2013 con sede en Santiago de Compostela cunha clara vocación de ser un encontro de voces e historias de perfil atlanticista. Mantén o seu obxectivo de indagar nas raíces comúns das historias do océano, na procura da identidade cultural do Atlántico. Traballa a prol da posta en valor dunha arte escénica vinculada ao territorio, antiga pero adaptada aos tempos, e ampara, xera e difunde unha narrativa integradora, igualitaria e sostible.
24 planes diferentes gratuítos que inclúen contos, música, andainas, unha ruta en bicicleta, un documental e un obradoiro
A función inaugural será ‘Pisando el llano’ de La Chana Teatro que tamén representará ‘Blancanieves’, premio Max 2023 ao mellor espectáculo infantil, xuvenil e familiar
Xunto á portuguesa Ana Sofia Paiva e o xaponés Yoshi Hioki estarán ‘clásicos’ de Atlántica como Paula Carballeira, Vero Rilo, Cris de Caldas, Paco Nogueiras ou Raquel Queizás, entre outros
Protagonismo de la fusión de música e contos cos espectáculos ‘Contos de revolución: entre Brassens e Neira Vilas’, de Dani Blanco e Zé Pumar, e ‘Patios de luz’de Su Garrido Pombo
A programación completa pódese consultar na web festivalatlantica.gal
O Festival Atlántica ultima os preparativos para desembarcar en Santiago de Compostela e a súa bisbarra cun intenso programa que desenvolverá 24 actividades gratuítas entre os días 1 e 6 de xullo. A descentralización é unha das marcas do veterano encontro en Compostela, con funcións urbanas que conviven coa aposta decidida por barrios, lugares e parroquias do extenso rural do concello. Boa parte das propostas son de narración oral, pero haberá tamén espectáculos que mesturen contos e música, e actividades mais diversas como andainas e mesmo a proxección dun documental e un obradoiro de memoria.
O espectáculo inaugural da edición deste ano vai ser o unipersoal Pisando el llano da compañía salmantina La Chana Teatro que tamén levará ata ao Teatro Principal Blancanieves, unha obra multipremiada que no 2023 acadou o Max ao mellor espectáculo infantil, xuvenil e familiar. Tamén de fóra de Galicia serán as historias da portuguesa Ana Sofia Paiva e do xaponés Yoshi Hioki, ambos os dous con propostas para público familiar e adulto.
Mais a gran maioría do programa recae sobre artistas da narración galega: Paula Carballeira, Raquel Queizás, Inacio Vilariño, Vero Rilo, Inma Soto, Iseo Agilda e Pablísimo. Haberá tamén funcións con música que chegarán da man de Luís Prego e Samuel Soto, Cris de Caldas e Xabi do Camiño e Paco Nogueiras. Mención aparte merecen a estrea o venres 5 de Contos de revolución: entre Brassens e Neira Vilas, de Dani Blanco e Zé Pumar, e a clausura en Compostela con Su Garrido Pombo e Patios de luz na explanada da Colexiata de Sar o sábado 6.
Propostas diversas O público máis activo terá este ano a posibilidade de gozar de dúas andainas, unha nocturna polos petróglifos da Devesa da Rula guiada polo Colectivo A Rula e que xa esgotou as súas prazas, e outra diúrna polo románico do rural da igrexa de Santa María de Figueiras. Outra proposta é coñecer os castros da bisbarra nunha ruta en bicicleta na que colabora a Gentalha do Pichel. Pechan o apartado de actividades diversas o obradoiro Memoria e relato dos obxectos a cargo de Alba Grande e a proxección do documental Caneliñas, de Paula Castiñeiras e María González, no Museo do Pobo Galego
No tocante ao veciño concello de Teo, poderá gozar tamén de Atlántica entre os días 3 e 6 de xullo cunha variada programación para a cativada con funcións de Yoshi Hioki e Vero Rilo. Ademais o público adulto terá a sorte de presenciar a estrea de Contar para vivilo de Cándido Pazó e os Contos e cantos da Baleanorte de Lidia Luna acompañada de Ugía Pedreira.
Toda Galicia… e Portugal Ademais, o 3 de xullo marcará o inicio do festival en boa parte das 25 sedes espalladas por toda Galicia. Este ano participan en Atlántica, alén de Santiago e Teo, os concellos de Ferrol, A Coruña, A Estrada, A Pobra do Caramiñal, Alfoz, Betanzos, Brión, Caldas de Reis, Chantada, Cuntis, Dodro, Lobios, Meaus, Mugardos, Ourense, Outes, Palas de Rei, Pazos de Borbén, Ribeira, Rois, Sanxenxo, Vigo e Vilalba. A esta extensa actividade cómpre engadir a programación de Portugal que levará trece propostas a cinco sedes diferentes, reafirmando o carácter transfronteirizo do encontro.
O XII Festival Atlántica é posible grazas ao patrocinio da Xunta de Cultura e da Deputación da Coruña e ao apoio dos concellos de Santiago de Compostela, Ferrol, Teo, Alfoz, Caldas de Reis, Dodro, Mugardos, Outes, A Pobra do Caramiñal, Ribeira, Sanxenxo e Vilalba. A programación actualizada pódese consultar na web festivalatlantica.gal.
Festival Atlántica Atlántica, Festival Internacional de Narración Oral, naceu no ano 2013 con sede en Santiago de Compostela cunha clara vocación de ser un encontro de voces e historias de perfil atlanticista. Mantén o seu obxectivo de indagar nas raíces comúns das historias do océano, na procura da identidade cultural do Atlántico. Traballa a prol da posta en valor dunha arte escénica vinculada ao territorio, antiga pero adaptada aos tempos, e ampara, xera e difunde unha narrativa integradora, igualitaria e sostible.
A nova creación de Mondra, un tema proLGBTIQA+ no que reivindica a creación cuir en galego e feita no país, quere dar voz á disidencia e á diversidade
O tema acompáñase dun videoclip no que o artista e o seu equipo bailan rodeados de froita de orixe galega, á vez que signan e visibilizan termos como “trans”, “lesbiana”, “cuir” ou “marica”
Mondra leva por bandeira “ser galego e maricón”. Por iso, no Día do Orgullo LGBTIQA+, o artista multidisciplinar lanza o seu novo sinxelo, MARIMONDRA, un canto á disidencia e no que reivindica a creación cuir en galego e desde Galicia. O tema está dispoñible desde hoxe nas principais plataformas dixitais.
“Ei, son MARIMONDRA / un ser ben dramático / Sempre di meu pai / que nacín fóra do armario” canta Mondra nunha peza na que tamén participa a intérprete Mónica de Nut, unha colaboración que xoga coa dualidade, tanto a nivel musical coma gráfico. “Enfrontamos a sofisticación, neste caso a través do canto lírico, co desenfado”, explica o creador, quen tamén apunta ao vídeo que acompaña o tema (e que codirixe con Adela Otero), un traballo ambientado nunha froitaría algo inusual e na súa diversidade de cores e formas.
Deste xeito, MARIMONDRA preséntase como un canto proLGBTIQA+ que reivindica, con orgullo, a creación cuir galega, disidente, diversa e inclusiva; feita no país e implicada no territorio. O tema abrangue un discurso tanto lúdico e festivo coma comprometido. En atención ás diversas realidades presentes no colectivo, Mondra e o seu equipo (Jandros Rodríguez e Sabela Domínguez) visibilizan múltiples identidades con orgullo. Así, coa coreografía de Daniel Rodríguez e co asesoramento do proxecto ‘En Lingua de Signos’, signan termos como “trans”, “lesbiana”, “cuir” ou “marica”.
“Queremos que MARIMONDRA sexa un canto de celebración, de liberación e de orgullo, que poida representar a calquera persoa do colectivo”, asevera Mondra, quen avanza que o tema se poderá escoitar nas súas vindeiras citas en directo.
MONDRA Artista, cantareiro e bailador, Mondra é un dos nomes máis frescos e prometedores da nova escena musical galega. O pasado outono publicou ARDĒN (Altafonte Music Spain, 2023) o seu primeiro traballo discográfico, unha proposta que celebra e reclama, que coida e berra, e abre a porta a unha terra diversa; e pola que foi recoñecido recentemente co Premio Martín Códax na categoría de Electrónica.
Desde a estrea de ARDĒN na Sala Capitol (setembro de 2023), Mondra ten participado coa súa FOLĪA das ARDENTES en numerosas citas musicais. Este verán será parte do cartel de festivais imprescindibles do noroeste peninsular. É o caso Portamérica, Atlantic Pride, 17º Ribeira Sacra, SonRías Baixas ou Osa do Mar, entre outros moitos.
