A banda máis emblemática do hip hop do país actuará na sala viguesa Masterclub e as entradas para a cita están dispoñibles a través do portal www.enterticket.es
O directo desta fin de semana é o punto de partida dunha xira especial coa que celebrarán dúas décadas na escena musical
Dios Ke Te Crew, a banda máis emblemática do hip hop galego, arrinca este venres 3 de marzo en Vigo a nova xira do grupo, nomeada “Tremendos Anos 20”, coa que celebrará o seu vixésimo aniversario sobre os escenarios revisando os grandes éxitos da súa traxectoria e presentando as súas últimas creacións. A sala viguesa Masterclub acollerá esta fin de semana o primeiro dos directos do grupo, que estará acompañado pola singjay (cantante e MC) viguesa High Paw e polo trapeiro Sibran Yiyi, membro de Boyanka Kostova. As entradas para a cita, que comezará ás 23.00 horas, xa están á venda na plataforma www.enterticket.es
Dios Ke Te Crew é historia do rap en galego. Desde a súa formación no 2003, a banda conformada por Mou, Sokram, Jamas e Dj Murdock destacou polo seu enxeño, habilidade narrativa e humor próximo á actualidade. Logo da publicación de tres LP e percorrer ducias de festivais e salas de concertos por toda Europa, DKTC publicou o pasado 2022 ‘En que ano estamos?!’, un EP con cinco temas nos que os seus membros demostran por que é considerada como a banda máis mítica do hip hop do país. Entre os novos tracks, acompañados por pezas audiovisuais de Xaime Miranda, destaca un dos himnos dos últimos tempos: ‘OG’, con Boyanka Kostova.
Este mes de marzo DKTC regresa ás salas ca xira ‘Tremendos Anos 20’, na que presenta unha potente posta en escena audiovisual: as imaxes creadas polo artista de renome internacional e precursor do Gif Art, A.L. Crego, arroupan e interactúan co contido das cancións de DKTC, aumentando de maneira exponencial ás xa de por si enérxicas actuacións que caracterizan á banda. Logo da súa visita viguesa, Dios Ke Te Crew visitará o Playa Club da Coruña o vindeiro sábado 18 de marzo.
A banda de rock galega avanza en exclusiva na súa plataforma de YouTubeo corte número catro do seu traballo ‘Unha noite no interior dunha faísca’ (Lobicán Records 2023), que verá a luz o vindeiro 18 de marzo
‘Vaia onde vaia’ é un ska clásico que invita ao bo rollo e ao baile e no que salienta a voz da baixista Xulia Fuentes como cantante
A banda de rock galega Ruxe Ruxe vén de estrear este luns, 27 de febrero, novo tema e novo videoclip. ‘Vaia onde vaia’, que se pode escoitar en exclusiva no perfil de YouTube do grupo, é un novo avance do seu disco ‘Unha noite no interior dunha faísca’ (Lobicán Records, 2023), que verá a luz en todas as plataformas o vindeiro 18 de marzo.
‘Vaia onde vaia’ é un novo aperitivo do que o público poderá escoitar ao vivo na Sala Capitol o sábado 25 de marzo, no concerto de presentación do novo traballo discográfico de Ruxe Ruxe. Trátase dun ska clásico que invita ao bo rollo e ao baile, e no que a banda sorprende ao público cun xiro de de guión: desta quenda, a voz é a da súa baixista, Xulia Fuentes. Gravado na Unitaria de Santiago de Compostela por Alberto Lora (Galunk Producións), a nova pista conta coa dirección de Marcos PTT e os bailes de Smara, Hugo, Sandra Camalea, Ruth, Cris e Alexis.
‘VAIA ONDE VAIA’
Hoxe espertei con ganas de escapar.
Botarme a correr e non mirar atrás.
Largarme de aquí e non volver nunca máis.
Pero o mundo está tan derruído
vaia a onde vaia.
Todo é igual de deprimente
vaia a onde vaia.
Así que eu voume pra a taberna
ata que me caia.
Entrei, sentei ao fondo da barra.
Soaban os Clash e a xente toda bailaba.
Risas e cheiro a marihuana.
Pero o mundo está tan derruído
vaia a onde vaia.
Todo é igual de deprimente
vaia a onde vaia.
Así que eu voume pra a taberna
ata que me caia.
RUXE RUXE
Ruxe Ruxe é un grupo de música galego nacido en Aríns (Santiago de Compostela) en 1996, da man de catro amigos do instituto, tres dos cales (Xan Pericán, Xaco Barona e Vituco Neira) conforman agora o núcleo veterano da banda. A baixista Xulia Fuentes incorporouse á banda no ano 2019. A súa música é rock combinada con sons tradicionais galegos, empregando ás veces instrumentos como a gaita e o saxofón, e sempre con actitude punk. Nas súas letras, en galego e de temática moi variada, predominan os textos costumistas, os de carácter social e o realismo máxico.
En 1999 sacaron o seu primeiro disco, de título homónimo. Ademais de 13 LP’s, teñen varios EP’s, unha banda sonora, unha curtametraxe, un documentario sobre o grupo e incontábeis colaboracións, sumando concertos durante máis de dúas décadas por toda España, Portugal e Italia. O seu 25 aniversario celebrouse no ano 2021 cunha exposición que recolleu o universo gráfico do grupo, protagonizada por algúns dos deseñadores máis influentes da nosa historia recente. Ao mesmo tempo, 32 bandas galegas rendéronlles homenaxe coa gravación do disco tributo ‘25 anos ruxindo’.
Tras 26 anos de carreira, Ruxe Ruxe ven de pechar un 2022 cheo de concertos e festivais con tanta sona coma o Resurrection Fest, o Surfing the Lérez ou o Festival de la Luz, entre moitos outros. E iso foi porque, como todos saben xa, a banda de Aríns está a facer os mellores directos da súa dilatada historia.
Este 2023, o grupo presenta o seu esperado novo disco, ‘Unha noite no interior dunha faísca’ (Lobicán Records, 2023), que verá a luz en todas as plataformas o vindeiro 18 de marzo e que promete unha evolución, un cambio significativo no son da banda e moitas sorpresas.
Ruxe Ruxe é, sen dúbida, un referente do rock galego, movéndose á marxe dos grandes poderes da cultura, das modas e do politicamente correcto. “Co espírito de loita por bandeira, do rock do país, do rock libre e de combate, do realismo máxico e do corpo a corpo sincero, directo e emocional”, a esencia do ADN dos Ruxe Ruxe queda patente en cada disco editado e en cada concerto que deron dende os seus inicios no ano 96. “Ser de aquí e dun tempo”, que diría Celso Emilio Ferreiro; “rapaces da aldea máis non uns ninguéns”, que diría Xosé Neira Vilas.
O mércores 1 de marzo, ás 20:15 horas na Librería Biblos, celebrarase a presentación do libro Nós / Álbums de guerra, de Alfonso Rodríguez Castelao, editado en Ediciones Akal. e contará coa intervención de Claudio Rodríguez Fer e Carmen Blanco García, que ofrecerán a súa visión sobre esta obra literaria e o seu autor.
As autoras participantes son: Eilún Del Pazo Moa, Beatriz Dourado, Cecilia Fernández Santomé, Míriam Ferradáns, Rochi Nóvoa Vázquez, Patricia Torrado Queiruga, Lupe Bao Reixa e Tamara Andrés.
As Irmás reinvidicadas son: Amalia Álvarez, Olimpia Valencia, María Luz Morales, María Miramontes, Elvira Bao, Jacinta Landa, Amparo López Jean e Teruca Bouza.
O sábado 11 de marzo temos unha cita ineludible coa nosa música, o baile tradicional e coa festa arredor do noso.
Como é tradición, non hai festa foliadeira en Castiñeiro, sen que haxa un momento dedicado á aprendizaxe. Desta volta propoñemos un obradoiro cun deses instrumentos galegos tan propio da montaña como é a trompa ou birimbao. Daniel do Pando, recoñecido tocador da trompa, impartirá un obradoiro de iniciación a este instrumento. O obradoiro, de nivel iniciación, ten unha duración aproximada de catro horas e consta dunha parte teórica para tratar temas como a historia, afinación, limpeza… e outra práctica como o agarre, ritmos básicos, melodía, etcétera. A cada participante deixaráselle un instrumento para o obradoiro. O inicio está programado para as cinco de tarde. O prezo é de 15€ para as persoas asociadas de Castiñeiro e de 20€ para o público en xeral. É aconsellable anotarse se queres asistir enviando un correo a castineiromilenario@hotmail.com ou por calquera das nosas redes sociais.
Despois do tempo de formación, pasaremos aos petiscos para repoñer forzas e dar paso aos momentos festeiros coa foliada propiamente dita, que empezará a partir das 22:00, aproximadamente. O grupo local d@s Foliadeir@s do Castro, serán os encargados de romper o xeo e comezar a foliada. Seguidamente Xaora será o grupo encargado de continuar a festa. Ao remate dos grupos, comezará a foliada aberta.
Gipsy jazz, swing americano ou be-pop conflúen en ‘Perfect Match!’, o novo álbum do guitarrista David Regueiro que se publica este venres 24
O músico ourensán, autor de todos os temas, inclúe pezas dedicadas á Casa das Crechas ou mesmo o pulpo á feira, un dos platos estrela da gastronomía galega
O disco conta coa colaboración do violinista belga Alexandre Cavaliere, un dos intérpretes máis prestixiosos a nivel internacional do jazz manouche
Na canle de Youtube de David Regueiro xa está dispoñible un novo vídeo da grabación do disco, no que o cuarteto interpreta ‘The Seagull and the Frog’
OLYMPUS DIGITAL CAMERA
O guitarrista de gipsy jazz David Regueiro vén de publicar nas principais plataformas dixitais ‘Perfect Match!’, o seu novo traballo discográfico. Un álbum con sete cortes, compostos polo propio Regueiro, nos que o guitarrista dá liberdade e deixa fluír as distintas influencias da súa traxectoria acompañado polo seu trío, no que participan Juyma Estévez e Gonçalo Mendoça, e polo violinista belga Alexandre Cavaliere, unha das figuras máis relevantes, a nivel internacional, do jazz manouche, e con quen Regueiro coincidiu na última edición do festival Jazz de Ría, celebrado en agosto de 2022 na Costa Ártabra.
“En ‘Perfect Macht!’ hai temas que son 100% gipsy jazz, pero outros escapan máis deste estilo”, expón o guitarrista. Así, no álbum conviven as influencias do jazz manouche, o swing, o jazz americano, o be-pop, o rock ou a música clásica, mais tamén as vivencias deste ourensán afincado en Santiago, e que se deixan entrever en temas como ‘Crechas Swing’, unha peza “100% manouche” inspirada no mítíco local compostelán Casa das Crechas, na que Regueiro organiza unha jam session mensual; ou ‘Octopus Blues’, unha peza “máis gamberra”, tal e como apunta Regueiro, e que toma como referencia un dos pratos estrela da gastronomía galega: o pulpo á feira.
Entre as novas composicións de Regueiro, atópanse ‘Elsa’, peza que dedica á súa nai e que conta “cun aire pouco escoitado neste ámbito estilístico”; ‘Tone it down turn it up!’, un swing inspirado na música de big band americana dos anos 30; ’Lisboa Rhythm’, dedicado á escena portuguesa na que se introduciu da man do seu compañeiro guitarrista Gonçalo Mendoça; e ‘The Seagull and the Frog’, tema do que xusto estrea este mesmo venres 24, na súa canle de Youtube, unha peza audiovisual. Finalmente, entre as sete pistas de ‘Perfect Match!’ hai unha que o público recoñecerá de ‘Areal’, o seu anterior traballo discográfico: trátase do ‘Bolero desesperado’ que se recupera desta quenda, con arranxos do propio Regueiro, para incorporar precisamente o violín de Cavaliere.
DAVID REGUEIRO
David Regueiro leva toda a vida dedicado ao jazz. A día de hoxe, é un dos intérpretes e compositores con maior proxección a nivel ibérico da escena do gipsy jazz, tamén coñecido como jazz manouche, o estilo que agromou da guitarra de Django Reinhardt e no que Regueiro desenvolve a súa voz propia ao incorporar influencias do swing americano ou do be-pop. Na súa traxectoria conviven máis dunha ducia de traballos discográficos de proxectos propios (‘Areal’, ‘O Camiño’) e colaboracións; así como numerosas participacións en festivais de toda Europa.
David Regueiro lidera un trío no que se acompaña de de Juyma Estévez no contrabaixo e de Gonçalo Mendoça á guitarra rítmica. Nesta ocasión, a formación transfórmase nun cuarteto para acoller, coas composicións propias de Regueiro, a un dos máis virtuosos violinistas do mundo deste estilo: o belga Alexandre Cavaliere. Para máis información sobre David Regueiro e a súa discografía pódese visitar a súa páxina web oficial, www.davidregueiro.gal.
