A gran celebración cinematográfica non competitiva de Galicia proxectará na Coruña as mellores producións cinematográficas con selo galego do último ano, seleccionadas como finalistas dos XXI Premios Mestre Mateo
Deste xeito, o programa da IV Semana do Cinema Galego estará conformado por un total de nove filme que suman 40 nominacións aos Mestre Mateo, entre eles, catro largos de ficción (Código Emperador, Live is Life, O corpo aberto e O home e o can), catro documentais (A Foreign Song, María Casares. A muller que viviu mil vidas, No somos nada e Onde máis doe) e a película de animación gañadora do Goya en 2022 Valentina
Os pases, que terán lugar no Teatro Colón do 14 ao 19 de marzo, contarán coa presenza dos equipos artísticos e técnicos das películas
O acceso as proxeccións será gratuíto, con entrada libre, por orde de chegada á sala, ata completar o aforo
A Coruña acollerá do 14 ao 19 de marzo a IV Semana do Cinema Galego, a gran celebración cinematográfica non competitiva do país, que exhibe o máis salientable da produción audiovisual galega do último ano. Un total de nove filmes -os seleccionados como finalistas dos XXI Premios Mestre Mateo, que xuntos suman 40 nominacións- vanse proxectar no Teatro Colón da cidade herculina ao longo destes seis días, en sesións nas que participarán os equipos responsables das obras.
Deste xeito, o programa contará cos largos de ficción Código Emperador, Live is Life, O corpo aberto e O home e o can; os documentais A Foreign Song, María Casares. A muller que viviu mil vidas, No somos nada e Onde máis doe; e a película de animación gañadora do Goya en 2022 Valentina. O acceso a todas as proxeccións do encontro será de balde, con entrada libre, por orde de chegada á sala, ata completar o aforo.
A presentación da programación tivo lugar esta mañá, xoves 24 de febreiro, no Café Copacabana, que operará como “Cantina da IV Semana do Cinema Galego” e espazo de encontro oficioso entre artistas e público durante todo o evento, para intercambio de impresións e conversas antes e despois dos pases.
No acto participaron Álvaro Pérez Becerra, presidente da Academia Galega do Audiovisual (AGA); Inés Rey, alcaldesa da Coruña; e Xosé Regueira Varela, vicepresidente da Deputación da Coruña.
Na súa intervención, Pérez Becerra salientou o carácter “selecto e diverso dunha programación que condensa o mellor do panorama galego actual”, que regresa á gran pantalla grande en aberto para todos os públicos e que vai estar articulada en “sesións nas que os equipos artísticos e técnicos das películas poderán compartir co público a súa visión persoal sobre os traballos e tamén as anécdotas que non saen na pantalla”.
Pola súa banda, Xosé Regueira Varela, recalcou que para “a Deputación da Coruña é un orgullo colaborar coa Academia e reivindicar o papel do audiovisual galego, un motor de emprego e talento que xera o 25 % do PIB cultural”. Insistindo en que “desde as institucións debemos apoialo como algo fundamental, poñelo en valor e lograr encher as salas”. Finalmente, a alcaldesa da Coruña, Inés Rey, tomou a palabra para recordar que “A Coruña é a cidade galega do cinema porque aquí foi onde naceu da man de José Sellier, pioneiro do cinema e autor da primeira película galega, e dende o Concello seguiremos apostando por que a cidade siga na vangarda do audiovisual”.
6 días, 9 filmes
A actividade da IV Semana do Cinema Galego botará a andar con Código Emperador, película dirixida por Jorge Coira, que se exhibirá o martes 14 de marzo ás 20.00 h, tras o acto oficial de inauguración. A película, estreada no último Festival de Málaga, é unha reflexión sobre as cloacas do Estado, e nela Luis Tosar encarna a Juan, un home afeito a lidar cos asuntos turbios dos poderosos.
O mércores 15, ás 20.00h, será a quenda do documental María Casares. A muller que viviu mil vidas, unha ollada íntima e profunda de Xavier Villaverdesobre a vida da grande actriz coruñesa que se estreou na Seminci de Valladolid.
No ecuador da Semana, o xoves 16 de marzo, comezarán as sesións dobres no Teatro Colón. Ás 20.00 h vaise proxectar Onde máis doe, un documental de Manane Rodríguez no que a cineasta uruguaia afincada en Galicia analiza un caso de violencia vicaria que aconteceu en Oza no que un pai asasinou o seu fillo para danar a nai. Un chisco máis tarde, ás 22.00 h, exhibirase O home e o can, dirixida por Ángel de la Cruz e protagonizada por un Manuel Manquiñanun rexistro inédito na súa carreira. O filme, que reflexiona sobre a soidade non elixida, a vellez e o abandono das aldeas, gañou seis galardóns na 31 edición do Festival de Cine de Madrid, incluído o Premio da Crítica.
O programa do venres 17 de marzo iniciarase coa proxección, ás 20.00 h, de A Foreign Song, de César Souto, filme inspirado na obra e biografía do poeta modernista estadounidense Wallace Stevens. O documental obtivo os galardóns á mellor película española e ao mellor director español do FICXixón, certame onde tivo lugar a súa estrea mundial. Algo máis tarde, ás 22.00 h, o público poderá gozar de No somos nada, de Javier Corcuera, un repaso aos corenta anos de La Polla Records, unha das bandas máis icónicas do punk nacional.
A sesión do sábado 18 estará composta por un programa dobre de longametraxes de ficción con estilos moi diferentes. De primeiro, ás 19.30 h, a cita é con Live is Life, unha incursión de Dani de la Torre na comedia cunha historia ambientada nun verán inesquecible dun grupo de mozos na Galicia de 1985. E de segundo, ás 22.00 h, será O corpo aberto, de Ángeles Huerta, quen tome a pantalla do Colón, con Tamar Novas e María Vázquez como protagonistas dun filme gótico inspirado na obra Arraianos de Méndez Ferrín.
A clausura da IV Semana do Cinema Galego será a mañá do domingo 19, ás 11.30h, e virá da man de Valentina, a película de Chelo Loureiro gañadora do Premio Goya á mellor longametraxe de animación no 2022. Grandes e pequechos están convidados a acompañar a Valentina, unha nena con síndrome de Down, na súa aventura para facer realidade o seu soño: ser trapecista.
Cita co talento
O programa desta cuarta edición da Semana do Cinema Galego inclúe nove traballos finalistas dos XXI Premios Mestre Mateo que concede a Academia Galega do Audiovisual nas categorías de mellor longametraxe, documental e longametraxe de animación. Os títulos da programación suman un total de 40 candidaturas aos máximos galardóns do audiovisual galego, e dous deles, O corpo aberto e Código Emperador, con 16 e 8, respectivamente, parten como favoritos dos premios que se concederán no vindeiro mes de marzo.
Con esta nova cita, a Semana do Cinema Galego consolídase como mostra consagrada ao talento máis próximo, co foco na complicidade co espectador e cristalizando sinerxías coa cidade herculina, escenario e catalizador dos diálogos entre o público e os artistas. A Semana do Cinema Galego está impulsada pola Academia Galega do Audiovisual (AGA) e conta co apoio do Concello da Coruña e da Deputación da Coruña e mais coa colaboración de Abanca.
Logo da boa acollida da súa pasada edición, con máis de 3.000 espectadoras e espectadores que encheron os pases dos dez filmes proxectados en 2022, a mostra repite fórmula neste 2023 e propón unha semana para celebrar a puxanza do audiovisual galego na compaña dos seus profesionais. Unha ocasión carismática, sedutora e máxica, con todo o glamour do mellor cinema, que se consolida na súa cuarta edición como unha das grandes citas cinematográficas da tempada. E que situará, de novo, á cidade da Coruña no eixe da Sétima Arte.
O EMHU, baixo a dirección artística de Luis Piedrahita, reunirá na cidade herculina ás figuras da comedia máis relevantes da escena galega e estatal
A programación ofrecerá espectáculos únicos como Fantastic Colofon ou Humoris Causa, incluirá algunhas das propostas máis vistas do momento e estreará novas producións
EMHU consolidouse no 2022 como o evento humorístico máis relevante de España ao xuntar na Coruña a máis de 19.000 espectadores
O humor, en maiúsculas, regresa á cidade da Coruña. O EMHU, o Encontro Mundial de Humorismo, celebrará a súa terceira edición do 28 de abril ao 7 de maio de 2023. A cidade herculina acollerá esta primavera, de novo, a gran cita coa comedia ao vivo, que reúne nun único evento ás figuras e espectáculos de humor máis relevantes do momento en España e que na súa última edición sumou máis de 19.000 asistentes.
Impulsado polas produtoras Etiqueta Negra e El Espectador, e baixo a dirección artística de Luis Piedrahita, EMHU regresará aos escenarios coruñeses durante dez días con espectáculos únicos, novos formatos que achegarán as propostas máis divertidas, estreas absolutas e, por suposto, as funcións que máis público teñen no patio de butacas na actualidade. Entre as sesións exclusivas que se poderán ver na Coruña, producidas polo propio festival, atópanse galas como Fantastic Colofon ou Humoris Causa, citas nas que EMHU reúne sobre o mesmo escenario a grandes figuras da comedia e para as que as e os asistentes esgotan, rapidamente, todas as entradas dispoñibles.
Con dúas edicións ás costas, EMHU consolídase como a cita coa comedia máis relevante e multitudinaria de España, ao xuntar na súa pasada edición a máis de 19.000 espectadores que asistiron a unha vintena de espectáculos. Figuras como Andreu Buenafuente, Sílvia Abril, David Broncano, Héctor de Miguel, Ignatius Farray, Carolina Iglesias, Victoria Martín, Inés Hernand, Nerea Pérez de las Heras, Eva Hache ou Javier del Pino, entre outras moitas, visitaron A Coruña no 2022 para participar no EMHU.
O Encontro Mundial de Humorismo dará a coñecer, proximamente, os nomes que conformarán o cartel da súa terceira edición, cuxa gráfica é obra de Riki Blanco e Rebeca Losada. A programación de espectáculos do EMHU 2023 completarase, tal e como é habitual, con diferentes actividades paralelas e de acceso libre, dirixidas a todos os públicos e que se desenvolverán en distintos recintos culturais da Coruña.
Este sábado, 25 de febreiro, ás 20 horas, De Ninghures, en concerto, presentarannos o seu traballo “Aquí” na Casa-Museo Manuel María. Oito mozos e mozas que nos marabillarán tocando as músicas de raíz e cunha grande variedade de instrumentos: viola caipira, bongos, frauta traveseira, violín, bombo, ukelele, acordeón, pandeireta, clarinete, gaita, guitarras, pandeiro, voces, cabás…
Velaí algunha mostra da traxectoria musical deste grupo…
A banda máis emblemática do hip hop do país actuará o venres 3 na sala viguesa Masterclub, mentres que o sábado 18 visitará o Playa Club da cidade herculina; e as entradas xa están dispoñibles a través do portal www.enterticket.es
Estes directos, punto de partida da nova xira coa que celebrarán as dúas décadas na escena musical, contarán coa enerxía rebordante que caracteriza á banda, que estará acompañada doutros destacados artistas galegos de reggae e trap
Dios Ke Te Crew, a banda máis emblemática do hip hop galego, regresa este mes de marzo aos escenarios para iniciar a celebración do seu vixésimo aniversario. As localidades de Vigo e A Coruña acollerán o venres 3 e o sábado 18 os dous primeiros concertos da nova xira do grupo, nomeada “Tremendos Anos 20”, na que revisarán as súas últimas creacións e, moi especialmente, os grandes éxitos da súa traxectoria. As entradas para as citas están dispoñibles a través da plataforma Enterticket.
Dios Ke Te Crew é historia do rap en galego. Desde a súa formación no 2003, a banda conformada por Mou, Sokram, Jamas e Dj Murdock destacou polo seu enxeño, habilidade narrativa e humor próximo á actualidade. Logo da publicación de tres LP e percorrer ducias de festivais e salas de concertos por toda Europa, DKTC publicou o pasado 2022 ‘En que ano estamos?’, un EP con cinco temas nos que os seus membros demostran por que é considerada como a banda máis mítica do hip hop do país. Entre os novos tracks, acompañados por pezas audiovisuais de Xaime Miranda, destaca un dos himnos dos últimos tempos: ‘OG’, con Boyanka Kostova.
Este mes de marzo, a banda de Ordes dará a coñecer os directos da súa nova xira acompañada, sobre o escenario, doutras figuras da escena musical galega vinculadas ao trap ou o reggae. O directo de “Tremendos Anos 20”, ademais, presenta unha potente posta en escena audiovisual: as imaxes creadas polo artista de renome internacional e precursor do Gif Art, A.L. Crego, arroupan e interactúan co contido das cancións de DKTC, aumentando de maneira exponencial ás xa de por si enérxicas actuacións que caracterizan á banda.
A primeira parada da xira ‘Tremendos Anos 20’ será na sala Masterclub de Vigo (rúa Urzáiz) o venres 3 de marzo. Dúas semanas despois, o sábado 18, DKTC chegará até o Playa Club da Coruña, cidade á que regresa logo dos seus exitosos directos no Festival Noroeste e nas festas veciñais do barrio de Monte Alto. As entradas xa se poden adquirir, de xeito anticipado e desde 15 euros, a través da plataforma www.enterticket.es, mentres que na billeteira, o día de concerto, os tickets terán un prezo de 18 euros.
O xurado do certame promovido polo Noia Harp Fest vén de fallar o premio, que conleva unha dotación económica de 2.000 euros e a estrea mundial da obra na vindeira edición do festival da man da Real Filharmonía de Galicia
O tribunal, conformado polas arpistas Christine Icart, Céline Landelle e Susana Cermeño, ademais do director galego Diego García Rodríguez, salienta a excelencia dunha peza “que mostra unha elevada técnica orquestral” e cuxa partitura amosa “a linguaxe compositiva persoal” de Civilotti
A primeira edición do Premio internacional de composición ‘Portus Apostoli’ xa ten obra gañadora. O xurado do certame, impulsado polo Noia Harp Fest e patrocinado polo Concello de Noia, vén de fallar o seu ditame: ‘Hibrys’, do compositor arxentino Alejandro Civilotti, foi escollida polo tribunal como a peza máis destacada das recibidas pola súa “alta calidade e interese”, á vez que mostra unha “elevada técnica orquestral, onde a arpa e a orquestra concertan á perfeccción”.
O xurado salientou a “linguaxe compositiva persoal” que reflexa a partitura de Civilotti, autor dunha ampla obra para orquestra e cámara, música escénica ou para cine; e gañador de galardóns como o Premio Reina Sofía de Composición Musical. Civiliotti, que reside en Cataluña desde os anos oitenta, é profesor de Composición, Harmonía e Historia da Música no Conservatorio Profesional de Badalona.
O Premio ‘Portus Apostoli’ nace impulsado polo Festival Internacional de Arpa Vila de Noia, dirixido por Rodrigo Romaní, como unha aposta por ampliar o repertorio de obras para arpa e orquestra. O galardón, dotado con 2.000 euros, conleva tamén un recoñecemento moi especial: a estrea mundial da obra da man da Real Filharmonía de Galicia, que estará acompañada para dita ocasión dun ou dunha intérprete solista. A composición poderase escoitar por vez primeira no marco da décima edición do Noia Harp Fest, da que se darán a coñecer os primeiros detalles nas próximas semanas.
Esta primeira convocatoria recibiu dezaséis obras orixinais de compositores procedentes de Arxentina, Brasil, Estados Unidos, España, Finlandia e Malta. O xurado que escolleu ‘Hibrys’ como obra gañadora estivo conformado por artistas internacionais de prestixio. É o caso das intérpretes francesas Christine Icart -profesora do Conservatorio Superior de Música do País Vasco ‘Musikene’ de San Sebastíán- e Céline Landelle -arpa principal da Sinfónica de Galicia-, así como da catedrática e solista na Orquestra Sinfónica de Madrid, Susana Cermeño, ou mesmo do director de orquestra galego Diego García Rodríguez. Actuou como secretaria do tribunal Alba Barreiro, membro da Asociación Noia Harp Fest.
Pola súa banda, Rodrigo Romaní pon en valor, alén da proxección que supón para o encontro musical, “a calidade” das obras presentadas, a variedade estilística e o perfil das e dos compositores, con curriculums “moi importantes”. “Sen dúbida esta primeira edición do ‘Portus Apostoli’ foi unha grata sorpresa, na que confluiu unha extraordinaria riqueza de visións diferentes da linguaxe musical para unha combinación complicada como é a de arpa solista con orquestra”, apunta o director.
NOIA HARP FEST
O Noia Harp Fest é o o único festival de Galicia e do noroeste da Península Ibérica que ten como absoluta protagonista a arpa. No seu cartel conflúen, desde hai nove anos, artistas de estilos moi diversos procedentes do ámbito galego, estatal e internacional, mais unidos pola interpretación musical a través da arpa. A súa décima edición terá lugar no verán de 2023.
Os concertos, de acceso libre e dunha notable calidade artística, celébranse tanto a ceo aberto coma no interior de recintos culturais da vila de Noia, cuxo Concello é patrocinador principal dun dos eventos máis singulares que se celebran na Ría da Estrela. Para máis información sobre o festival, pódese consultar o espazo web www.noiaharpfest.gal.
O IESCHA emite un comunicado co gallo do XX Aniversario da toma de posesión de Manuel María como membro da Real Academia Galega, e no que se insire unha nova solicitude remitida ao Concello de Vilalba para que a Casa da Cultura leve definitivamente o nome de MANUEL MARÍA.
