Guadi Galego celebra a aceptación da vida e reivindica o dereito a seguir experimentando en O.D.A, o seu novo sinxelo
A creadora publicará este 29 de setembro, nas principais plataformas dixitais, o tema, producido por Iago Pico e que se acompañará dun videoclip dirixido por Inés Salvado
“Estou viva”, afirma Guadi Galego. Unha sentenza que a cantante declama e confirma no seu novo sinxelo, nomeadoO.D.A. A música e compositora publicará este venres, 29 de setembro, o seu novo tema. Unha declaración de intencións e unha chamada á ousadía que se poderá escoitar, desde as 00.00 horas, nas principais plataformas dixitais, A canción, a primeira que lanza desde a publicación do seu LP Roibén (2022), conta coa produción de Iago Pico (Pouland Studios). O.D.A, ademais, acompañarase dun videoclip dirixido por Inés Salvado e que se poderá ver tamén desde este venres 29 na canle de Youtube de Guadi Galego.
Guadi Galego define O.D.A como “unha declaración de intencións sobre o concepto da madurez e a aceptación da vida, de valorar o vivido como propio e reivindicar o dereito a seguir experimentando”. Precisamente iso é parte do que fai a artista nesta nova canción, na que mantendo as súas sinais de identidade clásicas, dá cabida a novos sons como parte dese dereito a continuar crecendo. O.D.A é, como expresa na súa letra, una reivindicación da ousadía e un abrazo á diferenza que nos recorda, ao cabo, que seguimos vivas. Todo, apunta a artista, “sen desmarcarnos nunca da nosa responsabilidade propia e colectiva” e sen olvidar que “a alegría segue dentro de nós”.
GUADI GALEGO
É unha das artistas máis relevantes da escena musical galega das últimas décadas. A súa andaina musical comezou sendo ela moi nova, un camiño fíado especialmente a Berrogüeto como vocalista, pianista e gaiteira, e que, co tempo, deu paso a outros proxectos máis persoais, como Espido ou Nordestin@s.
No 2009 inicia a súa carreira en solitario con Benzón. Logo chegarían os exitosos Lúas de Outubro e Agosto (con éxitos indiscutibles como Chea de vida ou Matriarcas), O mundo está parado, Inmersión, Costuras ou o máis recente Roibén, LP que presentou en diferentes puntos da xeografía peninsular. Este outono lanza o sinxelo O.D.A, toda unha declaración de intencións sobre a madurez e aceptación da vida, e na que reivindica o dereito a seguir experimentando, pois O.D.A non é só un punto de chegada: marca o inicio dunha nova etapa na carreira da artista.
Ás 10 hrs quedarán diante da Casa-Museo para achegarse todos xuntos, en automóbeis particulares, ao inicio do itinerario (se houber xente que queira ir xa directamente para o punto de inicio do percurso tan só terá que comunicalo cando se anote).
A distancia do itinerario é de seis quilómetros e medio e a dificultade é baixa. Suponse que en tres horas debería terse finalizada.
O guía será o divulgador cultural Orlando Viveiro.
Para a inscrición (a actividade é de balde) calquera persoa interesada deberá enviar un correo a contacto@casamuseomanuelmaria.gal ou no whatsapp 698177621.
No seguinte texto de Orlando Viveiro amósase unha idea do que se poderá desfrutar o próximo domingo.
As lendas do santuario dos Milagres de Saavedra permiten ás persoas viaxeiras mergullarse no seo de mundos que a día de hoxe fican case esquecidos. Tentaremos descubrilos nesta andaina polo Camiño Real que chega aquí despois de cruzar o Miño pola ponte medieval de Rábade e marcha de seguido en dirección ás terras de Vilalba.
A rota avanza pola Agra dos Castros en dirección a Fontefilloa para ollarmos as carballeiras de Covelas, onde sobrancea o seu fermoso exemplar centenario. Pasado o regato da Forcada do Lobo atopamos Altide, lugar de Santa María de Trobo, no cal visitaremos o extraordinario carballo da Casa do Roxo para continuar camiño de Martín logo de pasar o regato de Altide que descende cara ás Veigas de Baltar.
Desde este cruzamento de vías, sinalado por un fermoso cruceiro, ascenderemos até o Pertegueiro, parroquia de San Xiao de Gaibor, para marchar de seguido polos barrais de Vigo e A Vila onde se conservan interesantes construcións que certifican a antigüidade do roteiro que levamos. A paisaxe outoniza enrodelará de cores a nosa andaina mentres avanzamos demoradamente na procura do Barrazoso Vello, o punto onde remataremos a viaxe.
A posta de largo do álbum debut do cantareiro e bailador terá lugar este venres, 29 de setembro, a partir das 21.30 horas, e contará coa participación de Aida Tarrío, Berto, Coro Encaixe, Fillas de Cassandra e DJ Celulite
Santiago de Compostela prepárase para acoller este venres 29 a FOLĪA das ARDENTES, unha experiencia musical, visual e performativa na que Mondra dará a coñecer, publicamente, o seu álbum debut, ARDĒN. Na cita, que terá lugar na Sala Capitol a partir das 20.30 horas, o cantareiro e bailador estará acompañado de convidadas especiais, como Aida (Tanxugueiras), Fillas de Cassandra, Coro Encaixe e Berto, produtor do disco. Logo da finalización do espectáculo, no que Mondra revisará éxitos como PUNHETA! ou RUANDO, chegará a PosFOLĪA da man da DJ Celulite. As entradas para esta FOLĪA especial, de gran formato, xa están esgotadas.
ARDĒN, o álbum debut de Mondra, está dispoñible desde o pasado 20 de setembro nas principais plataformas dixitais e en formato CD de edición limitada e única. Trátase dunha proposta ambiciosa, luminosa e reflexiva ao tempo; que salienta pola súa marcada identidade así como pola rebordante dimensión electrónica dun proxecto que dialoga, desde a contemporaneidade, coa música tradicional galega.
Conceptualmente, ARDĒN é unha celebración, un apoderamento da liberdade. E este espazo libertario de Mondra alcanza a súa máxima expresión na FOLĪA, tal e como expresa o artista no Manifesto ARDENTE que acompaña o LP. “Fomos sepultadas, para furar dende o chan. Para, despois de todo, volver facer da FOLĪA un espazo onde troupelear. Onde rir as penas e chorar as alegrías. Porque hai en ARDĒN unha rosa seca e espiñada que, na FOLĪA, reverdece”.
Deste xeito, a Sala Capitol será testemuña dunha gran FOLĪA das ARDENTES. Será un espectáculo contemporáneo e performativo, cun estilismo e unha iluminación moi coidadas, no que a danza ocupará un papel central. Ás 20.30 horas terá lugar a apertura de portas é, ás 21.30 horas, o antareiro e compositor subirá o escenario. Durante máis dunha hora, Mondra porá de manifesto, coa súa música e ante un recinto ateigado, por que é unha das figuras máis destacadas do novo panorama creativo do país.
MONDRA Artista, cantareiro e bailador, Mondra é un dos nomes máis frescos e prometedores da nova escena musical galega. Tras actuar este verán nalgunhas das principais citas da música ao vivo en Galicia, como o Festival da Luz, o Agrocuir, o Festival Revenidas ou o Canteira Fest, este outono presenta ARDĒN (Altafonte Music Spain, 2023) o seu primeiro traballo discográfico.
ARDĒN é unha proposta que celebra e reclama, que coida e berra, e abre a porta a unha terra diversa ateigada de liberdade, afectos e apoderamento. Producido por Berto, conta coa colaboración de artistas como Aida, Brassica Rapa ou Fillas de Cassandra.
A sección denomínase ‘Letters from Galicia’ e materializouse grazas aos esforzos do Galician Film Forum (GFF) e da Mostra Internacional do Cinema Galego (MICE)
Este mércores, 27 de setembro, proxectaranse unha selección de curtas de Diana Toucedo e a longametraxe ‘Al otro lado del mar’, codirixida por Eloy Domínguez Serén
Tamén está previsto un coloquio in situ con Eloy Domínguez ao rematar a proxección que será moderado pola viguesa Adriana Páramo, cineasta e representante do GFF
Por primeira vez en 19 anos, o audiovisual galego ocupa unha sección específicano London Spanish Film Festival (LSFF) grazas ao esforzo conxunto do Galician Film Forum (GFF) e da Mostra Internacional do Cinema Etnográfico (MICE). Así, Letters from Galicia, como se chama a nova sección do festival londiniense, vai proxectar obras de Eloy Domínguez Serén e mais Diana Toucedo este vindeiro mércores 27 de setembro no Ciné Lumière da capital británica. Ademais, Eloy Domínguez desprazarase ata Londres como convidado polo festival para participar nun coloquio ao remate da proxección que vai ser moderado por Adriana Páramo, cineasta e representante do Galician Film Forum.
O LSFF, que xa alberga desde hai tempo seccións diferenciadas doutras comunidades, algunhas delas tan veteranas como a catalá e a vasca con 15 e 14 anos de vida, respectivamente, abre esta nova ventá co foco nas creacións galegas galardoadas na última edición da MICE. Estas proxeccións suporán a estrea no Reino Unido da longametraxe Al otro lado del mar de Eloy Domínguez, premio ao Mellor Filme Galego, e da curta de Diana Toucedo Tatuado nos ollos levamos o pouso, premio CREA. Alén diso, Letters from Galicia tamén acollerá outras catro obras de Toucedo: Prekasno, Borders, Homes e Imágenes secretas. Deste xeito, o audiovisual galego faise un oco con nome propio dentro desta cita do cinema español que leva case vinte anos celebrándose en Londres e amosando o mellor do cinema estatal.
Sobre as obras
Al otro lado del mar é unha longametraxe documental dirixida polo galego Eloy Domínguez Serén e polo colombiano Samuel Moreno Álvarez na que ambos os dous cineastas e amigos comparten aspectos das súas vidas e traballos nos seus respectivos países. A modo de vídeo correspondencia, as cartas filmadas que compoñen a obra “recollen historias persoais, memorias afectivas, unha viaxe por planos con diferentes épocas de rodaxe, diferentes culturas, contextos e épocas sociais, filmadas ademais nun momento histórico moi concreto”, que fan que sexa doado sentirse reflexado nas palabras, planos e sentimentos dos directores.
Pola súa banda, Diana Toucedo, que xa proxectou no LSFF de 2019 a súa obra Trinta lumes, regresa agora cunha sesión que reúne cinco mostras do seu talento e na que destaca Tatuado nos ollos levamos o pouso, unha curtametraxe multipremiada sobre as mariscadoras dunha vila do sur de Galicia rodada “cunha mirada coidadosa, sensible a todos os elementos e símbolos e fundindo os corpos na natureza”.
LETTERS FROM GALICIA
Mércores 27 de setembro | Ciné Lumière [17 Queensberry Place, South Kensington, London SW7 2DT]
16:50 h | Diana Toucedo’s Short Letters | £15
18:30 h | Al otro lado del mar | £15 | Coloquio posterior con Eloy Domínguez
A función será ao mesmo tempo unha homenaxe ao mestre de mestres e unha festa das boas historias
O público está convidado a preparar preguntas para Cadaval que vai respondelas durante o espectáculo
A cita será o martes 26 de setembro, ás 20:30 horas, e os convites poderán retirarse dúas antes do comezo do espectáculo
Quico Cadaval, referente internacional da narración oral, comeza a celebración dos seus trinta anos contando historias cun espectáculo especial o vindeiro martes, 26 de setembro, no Teatro Principal de Santiago ás 20:30 horas. A Asociación Memoria Atlántica, organizadora do Festival Atlántica, argalla coa colaboración da Agrupación Cultural O Galo e o patrocinio do Concello de Santiago unha función única que aspira a ser unha homenaxe, un agradecemento e unha celebración das boas historias. A entrada será gratuíta e os convites, que estarán limitados a dous por persoa, poderanse retirar dúas horas antes do comezo do espectáculo.
En 30 anos a contar historias. Notas de rodapé, alén de agasallar aos asistentes cun feixe dos seus mellores contos, Cadaval vai deixar aberta a porta á participación do público, que está convidado a depositar na entrada do Teatro as preguntas que desexen. No transcurso da noite, algunhas delas serán seleccionadas ao chou e respondidas sobre a marcha por Cadaval. Así pois, o que aconteza no escenario vai ser unha mestura da habilidade improvisadora do artista e das características da propia pregunta. Todo pode pasar nesta noite única e moito do que ocorra dependerá da capacidade creativa do público.
Mestre de mestres
Quico Cadaval é contador de historias, director de escena e dramaturgo. Comezou o seu traballo a mediados dos anos 80 baixo o mestrado de Xoán Cejudo, que estimulou o seu autodidactismo. Como contador de historias saíu do café Atlántico e dende aquela espallou a narrativa galega por festivais tan importantes como o Iberoamericano de Bogotá, o FILBA de Bos Aires e as Palavras Andarilhas de Beja.
Cadaval leva desenvolvendo desde os anos noventa un tipo de espectáculo unipersoal a medio camiño entre a narración tradicional, a épica escénica e o cabaré literario. Un espectáculo de narración oral que se foi transformando nos últimos quince anos para se ir acomodando ás circunstancias ambientais, ás inclemencias do clima, ás experiencias persoais do artista e aos terrores mais íntimos do público.
A Asociación Memoria Atlántica é a impulsora do Festival Atlántica e da celebración do Día Internacional da Narración Oral en Galicia. Con esta festa das historias pretende retomar os ciclos de contacontos que antes da pandemia tiñan lugar ao longo do ano e nos que participaban artistas non só galegos, senón tamén do resto da Península e da outra beira do mar. Fiel ao seu espírito colaborativo, nesta primeira función do Ciclo de Outono xunta esforzos coa Agrupación Cultural O Galo.
QUICO CADAVAL | 30 ANOS A CONTAR HISTORIAS. NOTAS DE RODAPÉ Martes 26 de setembro | 20:30 h Teatro Principal (Santiago de Compostela) | Entrada gratuíta (2 convites por persoa) Público adulto | Galego Convites: Retirada 2 horas antes do espectáculo na taquilla do Teatro Principal
Camiño Escena Norte achega esta fin de semana propostas de artes escénicas para públicos de todas as idades en Arzúa e Mondoñedo
Portamundos, da navarra Cia. Levelibular (Navarra), e Luna, da compañía asturiana Luz de Gas Teatro, son os espectáculos dos que o público poderá gozar, de xeito gratuíto, na xornada do domingo 24
Camiño Escena Norte, o proxecto de intercambio cultural a través das artes escénicas no que participan compañías teatro, danza e novo circo de Galicia, Asturias, Cantabria, Euskadi e Navarra, chega esta fin de semana a dúas novas localidades galegas. Concretamente, na xornada do domingo 24, CEN ofertará, no marco da súa programación, a posibilidade de gozar de dous espectáculos dixiridos a públicos de todas as idades, especialmente o familiar.
Por unha banda, ás 13:00 horas, a compañía de Navarra Cia. Levelibular presentará en Mondoñedo Portamundos, unha proposta de novo circo que fará sorrir e soñar a todos os membros da familia coas súas acrobacias e humor. En horario de tarde, ás 18:00 horas, a asturiana Luz de Gas Teatro presentará en Arzúa o seu espectáculo Luna, no que pon o foco, desde o escenario, sobre as diversidades a través do baile, dos monicreques e do teatro. A cita será na Capela da Madalena e o acceso será libre ata completar a capacidade do recinto.
Camiño Escena Norte (CEN), que conta co apoio da Xunta de Galicia a través da Axencia Galega das Industrias Culturais (Agadic), mantén esta semana a súa actividade na provincia de Lugo, logo da celebración, entre o martes 19 e xoves 21, da cuarta edición do encontro profesional Habitación Peregrina PRO. Nesta iniciativa, unha das actividades máis salientables da programación expandida do CEN, xuntáronse case 40 compañías de artes escénicas -das cinco comunidades participantes no proxecto- no centro cultural O Vello Cárcere. O encontro serviu tamén para outorgar, publicamente, o primeiro o recoñecemento ‘Julio Peña’aos valores de cooperación de Camiño Escena Norte, que este ano recaeu no dramaturgo e xestor cultural Carlos Troyano.
AXENDA CAMIÑO ESCENA NORTE | 24.09.2023
13:00 horas | Praza da Catedral, Mondoñedo [en caso de choiva: Auditorio Municipal Pascual Veiga. Praza Jaime Cabot, s/n] Portamundos, de Cia. Levelibular (Navarra)
Público infantil e familiar | Entrada libre e gratuíta ata completar capacidade Da nada, ao todo. Un escenario case baleiro é o cómplice dun artista que o dá todo para que o público goce de rir e tamén poida ver rir os que están ao seu redor. Sigimundo é clown, é acróbata e é poesía. Xunto co público, arma o elemento para tocar o ceo coas mans, aínda que non ten as instrucións de como se arma. A confianza existe! Iso permite cruzar todas as pontes…
18:00 horas | Capela da Madalena, Arzúa Luna, de Luz de Gas Teatro (Asturias) Luna
Público infantil e familiar | Entrada libre ata completar capacidade
Luna quérenos contar todo. Quere que saibamos como acadou os seus soños, como chegou a ser a muller que é hoxe en día. Luna naceu cun déficit severo de audición, o que lle puxo as cousas un chisquiño máis difíciles que ao resto, ou talvez non? Luna quere bailar, pero… pode bailar unha nena xorda? Luna é un espectáculo repleto de luz, de movemento, de palabras, de signos, de obxectos, de “capacidades diferentes”, de “intelixencias múltiples”. Porque non sempre ser diferente é unha desvantaxe.
