GALICIA DESIGN WEEK inicia este venres 16 a súa sexta edición, marcada pola extensión do festival cara á cidade da Coruña e ao seu tecido creativo
A #GDW25 ten como obxectivo inspirar e por en valor un sector profesional e cultural de enorme relevancia social e empresarial para o país
Este venres, entre as 17.00 horas e as 21.00 horas, celebrarase USUAL PLACES, unha serie de eventos singulares que terán lugar en espazos de barrio vinculados á cultura, á imaxe e ao deseño; e que inclúen concertos, exposicións, obradoiros e até a inauguración dunha librería
GALICIA DESIGN WEEK, o festival de deseño de referencia do noroeste peninsular e membro da prestixiosa organización World Design Weeks, inicia este venres, 16 de maio, a súa sexta edición. Até o sábado 24 de maio, #GDW25 reunirá na cidade da Coruña o mellor do deseño galego xunto con referentes internacionais.
GALICIA DESIGN WEEK, co-dirixido por Marta González Rivas e Álex Rico Caraméns, é a gran cita cultural que aúna á comunidade do deseño galego. Durante nove días ofrecerá unha ampla programación gratuíta con 21 actividades, como obradoiros, parladoiros, exposicións a ceo aberto ou sesións musicais. Todas elas forman parte dunha proposta que pretende poñer en valor un sector profesional e cultural fundamental para o país pola súa relevancia social e empresarial, ademais de abrir o deseño galego ao exterior.
Na súa sexta edición, #GDW25 pon o foco especificamente na relación co tecido creativo coruñés, a quen dedica toda a liña de programación OFF, actividades que se realizarán a partir de mañá, venres 16, de man de diferentes axentes creativos da cidade. A intención non é outra que estender o festival cara o propio sector á vez que visualiza, de cara á veciñanza, o papel dos seus profesionais.
A primeira das citas será USUAL PLACES, unha actividade organizada da man do proxecto coruñés USUAL. Desde as 17.00 e até as 21.00 horas, sucederanse as actividades en seis espazos de barrio vinculados á cultura, a imaxe e ao deseño, como son Austrohúngara, Casa Cecu, Rare Books for Rare People (Restory), The Future Fan Club, Two of Hearts, e Varaston. Estes locais acollerán exposicións, concertos, mercadiños, obraodoiros e proxeccións abertos á cidadanía ao longo da tarde. Ao remate, celebrarase unha quedada xeral no bar La Barra.
Ao día seguinte, o 17 de maio, entre as 12.00 e as 14.00 horas, a liña OFF celebrará ORIXES, un encontro de arte, artesanía e deseño impulsado polas ceramistas Verónica Moar e Risco no estudio deste último. A cita contará cunha convidada moi especial, como é a artista sonora Paula Pintos. A entrada é gratuíta, mais como espazo é limitado, recoméndase facer unha reserva previa reserva de praza a través da conta de Instagram de @orixes_encontros.
A programación OFF retomarase o mércores 21 co lanzamento da Burguer GDW ás 20.00 horas en Rosmon, local que acollerá unha exposición de pósters do deseñador gráfico galego Miguel Quiroga. Finalmente, o xoves 22, Malte Atochas será sede de USUAL SUMMIT, unha conversa entre mulleres creadoras sobre a capacidade do deseño como axitador cultural comisariada e moderada por Daniela Arias, responsable de USUAL.
Nesta conversa, que comezará ás 20.00 horas, e que xirará sobre os procesos creativos, as inspiracións ou a difusión dos mesmos, participarán Aldara Pardo e Laura Calvo, do colectivo Lengua de Fuego; Iria do Castelo, responsable de Castelo Studio; Leti Cabana, de Casita Salvaje; Victoria Blanco, de MASGALICIA e Raso Estudio; e Xulia Lago, da Grelería. A entrada será libre ata completar capacidade e poderase gozar, durante a conversa, da Burguer GDW.
PROGRAMACIÓN #GDW25
A programación da GALICIA DESIGN WEEK divídese en catro eixes: PRO, con 13 conferencias e 2 obradoiros no novo Espacio Avenida de Abanca situado no Cantón Grande; SHOW, con 2 exposicións e un showroom; SESSIONS, a parte máis festiva do evento; e OFF, as actividades realizadas en colaboración con axentes creativos da cidade e que comezan este venres 16.
A liña SHOW arrancou o venres 9 de maio con dúas exhibicións: a Praza de Lugo acolle DESIGNED IN GALICIA, unha mostra sobre unha instalación deseñada polo Grupo Malasa arredor do mellor deseño do país do último ano; e a avenida da Mariña é o punto no que se atopa #NOVODESEÑOGALEGO, con base nunha instalación do estudio coruñés Flu-or que presenta o máis salientable talento emerxente da comunidade. Ambas mostras poderanse visitar até o 24 de maio. SHOW complétase cun showroom, un escaparate dixital de creacións e espazos de artistas de Galicia que tamén dispón dun punto físico destinado a amosar e vender traballos dalgunhas das protagonistas deste ano.
Un dos pratos fortes será a liña da programación profesional PRO -que o sábado 24 de maio será 100% feminina. Contará con parladoiros da prestixiosa produtora catalana Canada, da gran tipógrafa catalana Marta Cerdà ou mesmo da escenógrafa pontevedresa Marta Pazos. Nesta parte PRO, tamén haberá espazo para unha das axencias de referencia no ámbito do deseño editorial, como son os galegos Desescribir -e a súa editorial Fabulatorio-, da creativa internacional Isabelita Virtual, do estudio de arquitectura madrileño Burr, da axencia de branding Novagarda, da marca de moda Rígido e as súas creativas Carta et Stik; ademais dun taller de deseño de mobiliario impartido polo Grupo Malasa e outro de branding con Vagrant, que mostrará a nova identidade do festival de música Sónar de da propia GDW.
Ao peche das xornadas PRO, celebraranse as SESSIONS, que correrán da conta co DJ Certain People -quen festexará o décimo aniversario do seu selo Certain Music– e a DJ Gulya, tamén ilustradora, quen estará acompañada das visuais de Héctor de la Puente.
#GDW25
GALICIA DESING WEEK agroma do traballo común entre a asociación GALICIA DESIGN e a axencia creativa FOLLOW. O festival conta nesta sexta edición co apoio da Xunta de Galicia, da Deputación da Coruña, do Grupo Malasa, de Abanca, de Checkpoint e da delegación da Coruña do Colexio Oficial de Arquitectos de Galicia (COAG). Ademais, conta coa colaboración de Cervezas Alhambra, Autoenfoque, Certain Music, Fundación Dida, Goloso Coffee Counters, Gràffica, Malte, News&Coffee, Rosmon, Studio Follow e Usual.
A #GDW25 ten como obxectivo inspirar e por en valor un sector profesional e cultural de enorme relevancia social e empresarial; ademais de xerar comunidade, amosar boas prácticas, fomentar colaboracións, xerar proxectos, formar novas xeracións e abrir o deseño galego ao exterior.
PROGRAMACIÓN GALICIA DESIGN WEEK \ OFF
16 de maio, 17.00 a 21.00 horas \ varias localizacións USUAL PLACES
17.00h a 21.00h \ Two of Hearts Tattoo Flashday e mercadiño con pezas de Garm BL, Fandi, El Diego, El Puma, Rachel Who!? e Little Tony
17.00h a 21.00h \ Casa Cecu Obradoiros de pintar cerámica Birras & cerámica
17.30h \ Varaston Fugaz x Mark Zlick; exposición de cerámica de Risco Estudio, Verónica Moar e Rípula; e DJ set
18.00 -21.00h \ Rare Books for Rare People (Restory) Inauguración en Marqués de Pontejos, 9.
19.00h \ The Future Fan Club Proxección Hope!
19.30h a 21.00h \ Austrohúngara Sombrerería Expo de Milicia Gráfica e concerto de David L.H.
21.00h \ La Barra Bar Peche da xornada
17 de maio, 12.00 horas \ Risco Estudio ORIXES. Con Verónica Moar, Risco Estudio e Paula Pintos
21 de maio, 20.00 horas\ Rosmon Presentación Burguer GDW + exposición Miguel Quiroga
22 de maio, 20.00 horas \ Malte Atochas USUAL SUMMIT Con Aldara Pardo, Laura Calvo, Iria do Castelo, Leti Cabana, Xulia Lago e Victoria Blanco. Modera: Daniela Arias
O Colectivo Glovo fan pública a resolución do programa de residencias artísticas e de investigación Atopémonos Bailando 2025, cunha marcada proxección internacional
O programa Atopémonos Bailando, impulsado por Colectivo Glovo e a Área de Cultura, Turismo, e Promoción da Lingua Concello de Lugo, coa colaboración da Xunta de Galicia a través da Agadic, dá a coñecer os nomes das e dos artistas seleccionados para a súa edición 2025. Trátase dunha iniciativa que consolida a Lugo como un punto de encontro para a investigación e creación en danza contemporánea, e que nesta edición reforza a súa vocación internacional e colaborativa.
Na súa cuarta edición, o programa Atopémonos Bailando crece tanto no número de proxectos seleccionados como no abano xeográfico dos seus intercambios, sumando novos aliados institucionais a nivel nacional e internacional. Esta convocatoria pública, dirixida a artistas e compañías das artes do movemento, recibiu propostas procedentes de toda España e Portugal, e culmina cun total de 11 proxectos seleccionados que se desenvolverán entre abril e novembro de 2025.
Entre as novidades desta edición, destaca a incorporación do Festival LABO XL (Donostia / San Sebastián) como novo espazo de intercambio dentro do Estado, sumándose aos xa consolidados Taller Nacional de Danza de Costa Rica, teatromosca (Sintra, Portugal), Teatro Experimental Flaviense (Chaves, Portugal) e Quinzena de Dança de Almada.
O programa estrutúrase arredor de catro grandes eixos: – Impulso á creación contemporánea: apoiando artistas emerxentes e consolidados cun espazo e tempo de investigación. – Fomento da cooperación internacional: a través de residencias compartidas e itinerarios de intercambio. – Proximidade coa cidadanía: mediante actividades de mediación cultural e apertura de procesos ao público. – Dinamización local e territorial: conectando Lugo cunha rede de centros culturais de referencia dentro e fóra de Galicia.
Os 11 proxectos seleccionados abranguen unha ampla diversidade de perfís, estéticas e procedencias. Desenvolveranse entre o Museo Interactivo da Historia de Lugo – MIHL e os espazos internacionais colaboradores. Todas as residencias inclúen, ademais, accións de mediación cultural abertas á cidadanía lucense como parte do compromiso de retorno social do investimento público.
Relación de artistas e espazos de residencia: – Ana Caetano · Portugal – Museo MIHL, Lugo – María de Vicente · Galicia – teatromosca (Portugal) – La Basal · Madrid – Museo MIHL, Lugo – Ana Lola Cosín & Lucas García · Asturias – Teatro Experimental Flaviense, Chaves (Portugal) – Xián Martínez · Galicia – Museo MIHL, Lugo – Natalia Navarro · Madrid – Museo MIHL, Lugo – Fran Sieira · Galicia – Festival LABO XL, Donostia – Tania González · Asturias – Museo MIHL, Lugo – María Ganzaráin & Teresa Magallón · Aragón – Taller Nacional de Danza, Costa Rica – Jesús Benzal · Madrid – Quinzena de Dança de Almada, Portugal – Jessica Castellón & Boris Orihuela · Cádiz – Museo MIHL, Lugo
A selección foi realizada por unha comisión profesional formada por representantes das entidades colaboradoras internacionais: – Alexandrina Martins · Teatro Experimental Flaviense, Chaves (Portugal) – Pedro Alves · teatromosca, Sintra (Portugal) – Carlota Machado · Quinzena de Dança de Almada (Portugal) – Manfred Rivera · Taller Nacional de Danza (Costa Rica) – Ana Barrantes e Ion Estala · Festival LABO XL (Donostia) – Erick Jiménez e Maruxa Salas · Plataforma SóLODOS (Costa Rica) – Esther Latorre e Hugo Pereira · Colectivo Glovo e dirección do programa Atopémonos Bailando
Atopémonos Bailando naceu como un espazo para apoiar os procesos iniciais de creación na danza, conectando os procesos de investigación coa cidadanía e favorecendo o traballo sostido das compañías.
O Noia Harp Fest e a Asociación Española de Arpistas amplían a súa colaboración e ofrecen dous concertos con destacadas intérpretes do instrumento
O primeiro deles, con Noelia Cotuna como solista, renderá homenaxe á intérprete e compositora francesa Henriette Renié no 150º aniversario do seu nacemento
‘El concierto secreto’, o proxecto artístico da arpista Juliette Commeaux e da cantante e flautista Laia Blasco, presentarase por primeira vez en Galicia logo de visitar numerosos escenarios por toda a península
O Festival Internacional de Arpa Vila de Noia consolida na 12ª edición a súa aposta pola visualización do talento arpístico, a través de múltiples estilos, da man da Asociación Española de Arpistas (AEDA). Un ano máis, ambas entidades revalidan o seu compromiso coa visualización de intérpretes sobranceiras de arpa para que teñan presenza no único evento cultural do noroeste peninsular dedicado exclusivamente a este instrumento.
Desta volta, no lugar de realizar un único concerto -liña habitual nas anteriores edicións-, NHF e AEDA ampliarán a súa colaboración para ofrecer dous directos que contarán con algunhas das figuras máis representativas da escena arpística da música clásica ou culta e antiga, como son a valenciana Noelia Cotuna e El concierto secreto, o proxecto artístico conformado por Juliette Commeaux e Laia Blasco.
A primeira das citas terá lugar o 1 de agosto. A solista e músico de cámara Noelia Cotuna, galardoada tanto a nivel nacional como internacional pola súa técnica e calidade interpretativa, será a responsable de ofrecer en Noia un repertorio que renderá homenaxe á mítica arpista e compositora francesa Henriette Renié no 150ª aniversario do seu nacemento. Cotuna, quen ten actuado baixo a batuta de figuras recoñecidas como Kill Petrenko, Zubin Mehta, Daniel Barenboim, será un dos pratos fortes deste NHF 2025.
A segunda cita que o Noia Harp Fest programará da man de AEDA será ao día seguinte. O sábado 2 de agosto presentarase en Galicia El concierto secreto, unha proposta fiada polas polivalentes Juliette Commeaux (arpa) e Laia Blasco (voz e frauta) e no que buscan recrear pezas virtuosísticas da antigüidade con redución para voz e para arpa, inspirándose na execución dalgunhas das cortes italianas que interpretaban estas músicas na intimidade ou para un grupo selecto de intelectuais. O dúo estréase en Galicia logo de visitar numerosos ciclos de concertos e escenarios como o Museo Nacional de Arte Romano de Mérida, o Auditorio de León ou mesmo o Museo Marqués de dos Aguas de Valencia, entre outros.
Con este anuncio, a tríade conformada por Cotuna, Commeaux e Blasco súmase a nomes xa avanzados polo festival, como son a arpista flamenca Ana Crismán, a escocesa Rebecca Hill e a nova formación galega D’Súpeto. Nas vindeiras semanas daranse a coñecer novos nomes e actividades que serán parte do único festival do noroeste de España cuxo fío condutor é a interpretación musical a través da arpa.
Noia Harp Fest
O Festival Internacional de Arpa Vila de Noia (Noia Harp Fest) celebrará a súa duodécima edición os días 30 e 31 de xullo, e 1 e 2 de agosto. Organizado por Nalgures Producións e baixo a dirección artística da Asociación Noia Harp Fest, o evento conta co apoio do Concello de Noia e da Xunta de Galicia a través de Turismo de Galicia, ademais da colaboración da Deputación da Coruña. Trátase dunha cita imprescindible do calendario musical para todas aquelas amantes da arpa así como da diversidade artística; pois o evento reúne cada tempada numerosas bandas e solistas, tanto galegas coma internacionais, de diferentes estilos e orixes.
Así, o fío condutor do Noia Harp Fest é a interpretación a través da arpa, polo que durante unhas xornadas o público pode descubrir, de balde, desde músicas ancestrais até creacións contemporáneas de vangarda de diferentes países. Ademais, o evento acolle, desde 2023, o Encontro de Escolas de Arpa de Galicia, que reúne ao alumnado dos centros galegos para tecer comunidade, convivir e interpretar, xuntas, unha composición.
Apple Music vén de escoller ao dúo vigués Fillas de Cassandra como a nova aposta dun programa de talento do que tamén formaron parte Billie Eilish, Bad Bunny, María José Llergo ou Alcalá Norte, entre outros nomes
Fillas de Cassandra suma, paseniño, un novo fito á súa carreira musical. Apple Music vén de anunciar publicamente que o dúo conformado por Sara Faro e María SOA é a súa nova aposta no marco do programa Up Next, unha iniciativa que pretende visualizar proxectos musicais de interese da escena local e internacional.
“É unha ledicia inmensa saber que a nosa música chega a novos lugares”, aseveran María e Sara, que veñen de publicar Hibernarse, un proxecto multidisciplinar no que abordan a construción social do tempo. Con Hibernarse, que se abre a distintas disciplinas artísticas -un EP, un fanzine, un videofilme e unha colección de xoias, polo de agora-, Fillas de Cassandra fai un chamado á pausa e respectar os tempos necesarios para deixar fluír a creatividade.
A través de Up Next, Apple Music destaca a artistas, coidadosamente identificados por expertos de todos os xéneros, co fin de apoiar e fomentar as súas incipientes carreiras e descubrir novas apostas musicais de interese que irrompen con forza na escena local e mundial. O programa Up Next España convive e complementa ao programa Up Next Global.
A nivel mundial, Apple Music leva apoiando a artistas desde os seus inicios, como Billie Eilish, Bad Bunny, Khalid, Megan Thee Stallion, Jhay Cortez ou Elo Armado, entre moitos outros; mais tamén brinda aos artistas locais a oportunidade de obter apoio temperán no seu camiño cara a un recoñecemento mundial. Nomes da escena estatal como Dora Postigo, Guitarricadelafuente, Maria José Llergo, Judeline ou Alcalá Norte foron algunhas das apostas máis notorias do programa de Apple Music, que agora conta con Fillas de Cassandra como novo referente.
Concerto de Faia no Teatro Principal de Santiago de Compostela Rocío Cibes 24/04/25
A conversa entre Faia e a etnomusicóloga Beatriz Busto será este xoves, 15 de maio, ás 20 horas, con entrada libre ata completar capacidade
‘Alvela. Do arquivo ao disco’ forma parte da programación paralela da exposición ‘Cantareiras. Oralidade, creación, transmisión’ do Museo do Pobo Galego
FAIA e a etnomusicóloga Beatriz Busto manterán este xoves, 15 de maio, a conversa ‘Alvela. Do arquivo ao disco’, unha oportunidade única para coñecer de primeira man a estreita vinculación do novo disco da artista co Arquivo do Patrimonio Oral da Identidade (APOI) do Museo do Pobo Galego. A actividade, que forma parte da programación paralela da exposición ‘Cantareiras. Oralidade, creación, transmisión’ producida polo museo co gallo das Letras Galegas 2025, comezará ás 20.00 horas e terá entrada libre ata completar capacidade.
Alvela é un traballo complexo e sutil, con dez temas que transitan pola experiencia da maternidade, a memoria do corpo e as violencias que o atravesan, mais tamén sobre a forza que reside no íntimo, no desexo e no pracer. FAIA revisita arrolos, romances e outras cantigas tradicionais acompañada unicamente por instrumentos de corda e gravacións de campo manipuladas, unha constrición creativa que lle confire a Alvela unha coherencia sónica e unha organicidade singular.
O disco está producido por Hevi (Malandrómeda, Fluzo) e conta coas colaboracións de Bleuenn Le Friec, Antía Ameixeiras, Antía Muíño, De Vacas ou Suelen Estar Quartet. O concepto visual foi elaborado xunto con Melania Freire e as acuarelas e as animacións que acompañan as cancións son obra da artista plástica Blanca Gracia. A poeta Antía Otero acompañou na conceptualización xeral e no seguimento do proceso do disco.
Sobre FAIA FAIA Díaz Novo é cantante, creadora e historiadora da arte. Compaxina a súa carreira musical en solitario coa participación en grupos como De Vacas, o Coro Encaixe e o trío Nacho.Faia.Lar. No 2018 publicou o seu primeiro disco en solitario, Ao cabo leirín, unha autoedición en vinilo centrada no cancioneiro tradicional e reinterpretado en clave feminista e contemporánea. Este abril presentou Alvela, o seu segundo traballo.
CONVERSA CON FAIA Alvela. Do arquivo ao disco | Coa etnomusicóloga Beatriz Bustos Xoves 15 maio | 20.00 h | Museo do Pobo Galego (Santiago de Compostela) Entrada libre ata completar capacidade
