O álbum conta coa colaboración do violinista belga Alexandre Cavaliere, un dos intérpretes máis prestixiosos a nivel internacional do jazz manouche
O lanzamento acompañarase da publicación dun novo tema inédito, nomeado ‘The Seagull and the Frog’, escrito tamén por Regueiro
O guitarrista de gipsy jazz David Regueiro publicará o seu novo disco o vindeiro venres 24 de febreiro. ‘Perfect Match!’ é, ademais do título do álbum de estudio do trío liderado polo guitarrista ourensán, o resultado da colaboración xurdida entre o propio Regueiro e o recoñecido violinista belga Alexandre Cavaliere, unha das figuras máis relevantes, a nivel internacional, do jazz manouche. O álbum, gravado en agosto de 2022, poderase escoitar a partir da semana que vén nas principais plataformas dixitais.
David Regueiro é un dos intérpretes e compositores con maior proxección a nivel ibérico da escena do gipsy jazz, tamén coñecido como jazz manouche, o estilo que agromou da guitarra de Django Reinhardt e no que Regueiro desenvolve a súa voz propia ao incorporar influencias do swing americano ou do be-pop. Máis dunha ducia de traballos discográficos entre proxectos propios (‘Areal’, ‘O Camiño’) e colaboracións, numerosas participacións en festivais de toda Europa ou mesmo a organización das jam session mensuais de swing e jazz na Casa das Crechas compostelá dan boa conta da prolífica traxectoria do músico galego.
David Regueiro lidera un trío no que se acompaña de de Juyma Estévez no contrabaixo e de Gonçalo Mendoça á guitarra rítmica. Nesta ocasión, a formación transfórmase nun cuarteto para acoller a un dos máis virtuosos violinistas do mundo deste estilo, o belga Alexandre Cavaliere, con quen Regueiro compartiu escenario na última edición do festival Jazz de Ría celebrada na Costa Ártabra.
Deste ‘Perfect Match!’ xa se coñecen tres avances (‘Tone it down, turn it up!’, ‘Elsa’ e ‘Octopus Blues’), que contan con videos gravados no estudio de Diego Bea Besada. Coincidindo co lanzamento do disco, o venres 24 estrearase en Youtube a peza audiovisual que acompaña o tema inédito ‘The Seagull and the Frog’. Para máis información sobre David Regueiro e a súa discografía pódese visitar a súa páxina web oficial, www.davidregueiro.gal.
Teatro: LIBRE COMA OS PAXAROS, con María Barcala no papel de Rosalía de Castro, este sábado, ás 20 horas, na Casa-Museo Manuel María
Fío argumental: Unha muller toma a palabra e proclámase posuidora da súa liberdade. Declara, desafiante, non someterse ás regras da arte no exercicio da súa actividade creativa, nin acatar mandatos dos seus iguais.
Declara o seu amor pola literatura, a poesía e a lingua do seu país; o seu respecto e admiración polas escravizadas mulleres do seu pobo; e expresa a súa solidariedade e a súa dor polas miserábeis condicións de vida que aquelas teñen que soportar.
Denuncia o espolio do patrimonio forestal, a traxedia da emigración á que se ven obrigados centos de miles de compatriotas para poder sobrevivir, eles e as súas familias, á fame e á miseria. E clama contra o silencio que todo o envolve.
Muller.
Filla de nai solteira. E de pai cura. Escritora. E poeta. Galega de pensamento libre. Libre coma os paxaros.
Chámase María Rosalía Rita de Castro.
Actriz: María Barcala Dirección e dramaturxia: Xúlio Lago Textos: Rosalía de Castro
Xa sei que ocorre. Xaora. Que vén así definido e que non queda máis que aceptalo. Que chega o contratempo violento e que nos queda unha expresión adusta de baleiro e incomprensión. Que ficamos perdidos, dándolle voltas a un nobelo que nos fere. Xa sei que si, que prontas están sempre as navallas, afiadas na súa expresión devoradora. Ben sei de que falas. Todo iso que chamas vida e comparas coa batalla. Que veñen, ás veces, mal dadas. Capear o temporal e todo iso. Obrigado erguerse trala lostregada. Sei que é o que hai e corenta mil caralladas. A vida, seica. Coas súas trapalladas.
O dúo conformado por María Soa e Sara Faro recupera as heroínas dos textos clásicos gregos para achegar unha visión feminista e contemporánea da súa contorna nun LP producido por Berto
A presentación en directo de ‘Acrópole’ terá lugar o 4 de marzo na Sala Capitol e as entradas sairán á venda a través da páxina web do recinto compostelán
Fillas de Cassandra, que bebe da tradición e das músicas contemporáneas, é un dos proxectos máis prometedores do panorama musical galego emerxente
O primeiro álbum de estudio de Fillas de Cassandra publicarase este mes de febreiro. ‘Acrópole’, que así se chama o LP, verá a luz nas distintas plataformas dixitais o vindeiro venres 24. O debut discográfico do dúo conformado polas viguesas María Soa e Sara Faro, que toma como inspiración fundamental o nome das heroínas da mitoloxía e dos textos clásicos gregos, chega da man de Tremendo Audiovisual e coa produción de Berto. Neste traballo, Fillas de Cassandra viaxa pola historia para poñer en relación as personaxes co mundo actual, ao que devolven unha ollada feminista e contemporánea.
Fillas de Cassandra é un dos proxectos musicais máis prometedores do panorama galego emerxente. As voces e as líricas de María Soa e Sara Faro son protagonistas dunha proposta rotunda, marcada por unha potente sonoridade capaz de chegar e conectar con todos os públicos, como así demostraron nos seus directos ao longo de 2022 e nos tres primeiros cortes que xa se coñecen de ‘Acrópole’: ‘Antígona’, ‘Moiras’ e ‘Lisístrata’. Todos eles publicáronse acompañados de videoclips autoproducidos e dirixidos por elas mesmas apoiadas por Santi Iglesias na cámara.
A voz, as percusións, o piano e os sintetizadores son os fíos cos que Fillas de Cassandra tece as súas composicións, que beben tanto da música e das coplas tradicionais coma da clásica ou o pop, e que agroman dun xeito natural acompañadas dunhas contundentes bases electrónicas. O resultado deste último ano de traballo poderase escoitar nas plataformas dixitais desde o 24 de febreiro, mais o primeiro directo de presentación de ‘Acrópole’ terá lugar o 4 de marzo na Sala Capitol. As entradas para o evento en Santiago, no que tamén se presentará a nova cooperativa cultural Nave de Lata, conformada polas promotoras Luneda Producións e Tremendo Audiovisual, estarán dispoñibles nos vindeiros días a través do espazo web www.salacapitol.com.
O IESCHA organiza a conferencia de CARLOS MÉIXOME, escritor e historiador galego, que leva por título “Unha cata na nova lei de memoria democrática”, e que terá lugar o venres 17 de febreiro de 2023, ás 20:30 horas, na casa da Cultura de Vilalba.
