Unha xornada de encontro entre o alumnado das escolas de arpa de Galicia, que inclúe unha actuación conxunta na que interpretarán ‘O vals do Mencer’, do pioneiro Emilio Cao, abrirá a décima edición do festival
As arpistas Elisabeth Cerra e Claudia Besné únense ao cartel deste ano, que conta con Laoise Kelly, The Pozzies, Müsgo, SondeSeu, Dilles Chabenat, Daniela Heiderich, Beatriz Cortesão e a Real Filharmonía de Galicia
A arpa volverá ser protagonista dos seráns de Noia. O vindeiro mes de agosto celebrarase a décima edición do Festival Internacional de Arpa Vila de Noia, o Noia Harp Fest. O seu director, Rodrigo Romaní, e o concelleiro de Cultura e Turismo da localidade, José Pérez, presentaron esta mañá o programa completo da iniciativa, que suma dúas novas arpistas ao seu cartel, Elisabeth Cerra e Claudia Besné, e afianza o seu compromiso coa proxección e divulgación do instrumento a través dunha xornada de encontro entre o alumnado das escolas de arpa de Galicia na que se recoñecerá ao pioneiro en introducir o instrumento na música do país: Emilio Cao.
O Noia Harp Fest é o único festival de Galicia e do noroeste da Península Ibérica que pon o foco na arpa, situándoa como única protagonista. No seu cartel, dunha notable calidade artística, conflúen desde hai unha década agrupacións e solistas de estilos moi diversos, procedentes tanto do ámbito galego ou estatal coma do internacional, mais todas elas unidas por un fío común: a interpretación musical a través da arpa. Esta diversidade explicítase tamén na vertente cultural, social e divulgativa do evento, pois no festival -alén do acceso gratuíto para o público- teñen cabida tanto as persoas amadoras ou que se están a iniciar na práctica do instrumento, como é o caso do alumnado de arpa das escolas de Galicia, como aquelas cunha ampla ou recoñecida traxectoria. É o caso da irlandesa Laoise Kelly, ou mesmo doutras voces que experimentan co instrumento desde unha vertente máis experimental, como a catalá Müsgo.
“A riqueza do Noia Harp Fest reside precisamente na pluralidade da práctica artística, que permite que todo o mundo poida gozar da interpretación dun instrumento que ofrece múltiples posibilidades e que é menos habitual sobre os escenarios dun evento estival”, apuntou Romaní, quen destacou que nesta edición do festival, renderase precisamente homenaxe, na xornada inaugural, ao pioneiro que introduciu por vez primeira a arpa na música feita en Galicia: Emilio Cao. “Farémolo dun xeito especialmente emotivo, como é a interpretación d’O vals do mencer, arranxado especificamente para a ocasión e que sairá das cordas das e dos estudantes de arpa no país, que abrirán o festival o xoves 3 de agosto”, aseverou o director. Precisamete o alumnado gozará durante ese día dunha xornada de encontro e convivencia, “a fin de estreitar vínculos arredor do instrumento”, e nas que participarán en actividades vinculadas ao mar.
Outra das novidades presentadas esta mañá é a incorporación ao cartel do Noia Harp Fest de dúas arpistas integrantes da Joven Orquesta Nacional de España (JONDE): Elisabeht Cerra e a vasca Claudia Besné, membro tamén da Neue Philharmonie Munchen. Ambas participarán no concerto-homenaxe a Nicanor Zabaleta (sábado 5 de agosto) organizado coa colaboración da Asociación Española de Arpistas (AEDA). A cita, que terá lugar a partir das 19.00 horas no Teatro Coliseo Noela, estará guiada pola arpista galega Alba Barreiro, que guiará ao público pola vida e obra de Zabaleta.
Ao fío desta incorporación, Romaní salientou a calidade e técnica das e dos participantes deste edición: “A programación deste Noia Harp Fest suma a excelencia tanto de intérpretes de recoñecida traxectoria musical, como poden ser Laoise Kelly ou Gilles Chabenat, como das novas músicas que están a destacar nas mellores orquestras europeas, como Claudia Besné ou Beatriz Cortesão”, apuntou o director. Precisamente esta última será a solista da estrea mundial de Hibrys, a gañadora da primeira convocatoria do Premio Portus Apostoli e que interpretará a Real Filharmonía de Galicia o sábado 5, ás 21:30 horas, na Praza do Tapal.
Ademais desta estrea, o Noia Harp Fest tamén acollerá a presentación pública das suites Micelio, de Anxo Pintos, e que contará coa violinista Begoña Riobó, e Escumas Atlánticas, de Rodrigo Romaní, na que participarán Laoise Kelly, Mary Macmaster e Beatriz Martínez. Ambas pezas, interpretadas por SonDeSeu, poderanse escoitar o domingo 6 de agosto, a partir das 21:30 horas, na Praza do Tapal.
PROGRAMACIÓN 10º NOIA HARP FEST
O 10º Noia Harp Fest dará comezo o xoves 3 de agosto cunha sesión festiva e que porá en valor o talento local e de proximidade. O alumnado das escolas de arpa de Galicia participará, por segundo ano consecutivo, nun encontro aberto ao público. Trátase dunha proposta moi singular ao por en relación a todas e todos os estudantes do instrumento no país.
O venres 4 estará fiado polo virtuosismo de mulleres arpistas do ámbito do folk. A irlandesa Laoise Kelly, considerada a máis relevante da súa xeración, abrirá a xornada da igrexa de Santa María a Nova. Pioneira nun novo estilo de conducción da arpa instrumental e recoñecida pola crítica polos seus traballos en solitario, participou na gravación de máis de 70 álbums con artistas como Seamus Heaney, The Chieftains ou Sharon Shannon. Ás 21.00 horas, na praza do Tapal, será a quenda do dúo franco-alemán conformado por Gilles Chabenat e Daniela Heiderich. Evocarán melodías de baile conmovedoras e cancións emotivas cun repertorio que incluirá tanto composicións propias modernas como músicas tradicionais francesas e alemás. A noite pecharase cunha das bandas que irromperon na escena folk nos 90, The Poozies, e que será unha das grandes sensacións do festival pola súa gran colección de temas e melodías groovy.
O sábado 5, o Noia Harp Fest e a AEDA renderán no Coliseo Noela unha homenaxe especial a Nicanor Zabaleta –considerado o mellor intérprete do instrumento -no trixésimo aniversario da súa morte. Na cita participarán as arpistas Elisabeht Cerra e Claudia Besné. De seguido, contra ás 21.30 horas, será a estrea mundial de Hibrys, coa Real Filharmonía de Galicia -dirixida polo galego Maximino Zumalave e coa portuguesa Beatriz Cortesão como solista-. O repertorio da cita tamén contará con obras de Johann Sebastian Bach e Ludwig van Beethoven.
A última xornada da décima edición do Noia Harp Fest comezará ás 19.00 horas do domingo 6 de agosto cun concerto da arpista, cantante e artista multidisciplinar Musgö, especialista en looping ao vivo e arpa eléctrica. O seu traballo é unha mestura de contemporáneo e vintage, cunha posta en escena atrevida e elegante que se poderá ver no Teatro Coliseo Noela. Finalmente, o broche dourado do evento chegará da man da orquestra de folk de Galicia. SonDeSeu estreará na praza do Tapal dúas novas composicións creadas especificamente para este concerto: serán as suites Micelio, de Anxo Pintos, e Escumas Atlánticas, de Rodrigo Romaní.
Todos os concertos do 10ª Festival Internacional de Arpa Vila de Noia serán de entrada libre e celebraranse en horario de tarde en espazos emblemáticos da localidade. É o caso da Praza do Tapal, da igrexa Santa María A Nova ou do Teatro Coliseo Noela. Para máis información sobre as sedes e programación, pódese visitar o espazo web www.noiaharpfest.gal. O Noia Harp Fest, organizado pola asociación homónima, conta co patrocinio da Xunta de Galicia a través da Axencia Turismo de Galicia, do Concello de Noia e da distribuidora musical Altafonte. Tamén colaboran nesta edición o Liceo de Noia e a Asociación de Española de Arpistas.
Xoves 3 de agosto Liceo de Noia, 19:00 horas no Liceo de Noia – II Encontro de Escolas de Arpa de Galicia Liceo de Noia, 20:30 horas no Liceo de Noia – Foliada de benvida ao X Noia Harp Fest
Venres, 4 de agosto 19:00 horas na igrexa Santa María A Nova – Laoise Kelly 21:00 horas na Praza do Tapal – Gilles Chabenat & Daniela Heiderich 22:00 horas na Praza do Tapal The Pozzies Sábado 5 de agosto 19:00 horas no Teatro Coliseo Noela – Homenaxe a Nicanor Zabaleta: Elisabeth Cerra e Clauda Besné. En colaboración coa AEDE. 21:30 horas na Praza do Tapal – Real Filharmonía de Galicia. Estrea absoluta de Hibrys, gañadora do premio Portus Apostoli
Domingo 6 de agosto 19:00 horas no Teatro Coliseo Noela – Müsgo 21:30 horas na Praza do Tapal – SonDeSeu + convidadas. Estrea absoluta das suites Micelio e Escumas Atlánticas
O 10 º Noia Harp Fest celebrarase do 3 ao 6 de agosto de 2023
O Noia Harp Fest convoca a II edición do Premio Internacional de Composición Portus Apostoli, que este ano buscará ampliar o repertorio de obras para arpa e banda
O certame promovido polo Festival Internacional de Arpa e o Concello Noia publica as bases do certame, que aumentará a contía dogalardón e concederá unha Mención de Honra á peza que quede en segundo lugar
‘Hibrys’, a composición gañadora da primeira edición do Portus Apostoli, estrearase o 5 de agosto da man da Real Filharmonía de Galicia, dirixida por Maximino Zumalave e coa portuguesa Beatriz Cortesão como solista
A segunda edición do premio internacional de composición Portus Apostoli xa está en marcha. O Noia Harp Fest (NHF) vén de publicar na súa web oficial, www.noiaharpfest.gal, as bases na da nova convocatoria do galardón, patrocinado polo Concello de Noia, e que nesta ocasión recoñecerá as creacións escritas para arpa e banda.
O Premio Portus Apostoli naceu en 2022 como unha aposta por ampliar o repertorio de obras para arpa e orquestra. Desta quenda, o certame afondará nesa mesma idea, mais dirixida a favorecer o aumento de obras nas que o instrumento protagonista do Noia Harp Fest, a arpa,poida combinar cunha banda O galardón, cuxo recoñecemento económico aumenta até os 2.500 euros, conlevará tamén a estrea absoluta da obra no marco dun concerto especial, vinculado ao NHF, a cargo da Banda Municipal de Santiago coa colaboración da Banda de Música de Noia, e coa interpretación de solistas do ámbito internacional. Ademais, como novidade, outorgarase unha Mención de Honra, sen achega económica, para a obra que quede en segunda posición no certame.
A convocatoria do Premio Portus Apostoli, que conta coa colaboración de Turismo de Noia, está aberta desde hoxe e até o vindeiro 23 de decembro de 2022 a todas as compositoras e compositores de calquera nacionalidade e sen límite de idade. Un xurado de recoñecido prestixio será o responsable de valorar e premiar as creacións, nas que se terán en conta, entre outros aspectos, a proposta creativa; o tratamento da técnica e da escritura para arpa; a coherencia, a proporción e o equilibrio no traballo técnico; ou o equilibrio entre dificultade e resultado musical. Ademais, o tribunal valorará positivamente aquelas obras con referencias á música ou á cultura galegas.
Cada compositora ou compositor poderá presentar unha única obra, que deberá ser orixinal e inédita, de xeito que non poderán participar no certame pezas creadas froito dun encargo remunerado, premiadas noutro concurso ou que fosen interpretadas anteriormente en concertos ou actos públicos. A nova composición será de tema libre, deberá estar escrita para arpa e banda (sen medios electroacústicos) e deberá ter unha duración de entre 10 e 15 minutos.
Para máis información sobre as bases do II Premio Internacional de Composición Portus Apostoli e a documentación que se debe remitir para poder participar, o NHF recomenda visitar o espazo web www.noiaharpfest.gal, no que se atopará o formulario de solicitude pertinente. O fallo do xurado darase a coñecer antes do 15 de febreiro de 2024.
Beatriz Cortesão e Maximino Zumalave, coa RFG na estrea mundial de ‘Hibrys’
No marco da décima edición do Noia Harp Fest, que se celebrará do 3 ao 6 de agosto, terá lugar a estrea da peza gañadora da primeira edición do Portus Apostoli: Hibrys, do compositor hispano-arxentino Alejandro Civilotti. A Praza do Tapal acollerá na noite do 5 de agosto, a partir das 21:30 horas, a primeira interpretación que se faga da obra. Chegará da man da Real Filharmonía de Galicia, baixo a dirección do galego Maximino Zumalave (Santiago de Compostela, 1956), e contará coa arpista portuguesa Beatriz Cortesão (Coimbra, 1998), membro da European Union Youth Orchestra (EUYO), como solista.
Ademais da estrea absoluta de Hibrys, o público asistente ao Noia Harp Fest poderá gozar dun concerto extraordinario no que a Real Filharmonía de Galicia interpreterá outras dúas composicións: oOratorio de Pascua (1º, 2º e 3º movemento) de Johann Sebastian Bach, e a Sinfonía no.5 en do menor, op.67,de Ludwig van Beethoven.
10º Noia Harp Fest
O Festival Internacional de Arpa Vila de Noia, coñecido como Noia Harp Fest, é o o único festival de Galicia e do noroeste da Península Ibérica que ten como absoluta protagonista a arpa. No seu cartel conflúen artistas de estilos moi diversos procedentes do ámbito galego, estatal e internacional, mais unidos pola interpretación musical a través da arpa. Bandas e solistas como Laoise Kelly, The Pozzies, Müsgo, SondeSeu ou Dilles Chabenat e Daniela Heiderich, entre outras, participarán na décima edición do NHF, que terá lugar do 3 ao 6 de agosto de 2023. Todos os concertos serán de entrada libre e celebraranse en espazos emblemáticos da vila de Noia, como é o caso da Praza do Tapal, da igrexa Santa María A Nova ou do Teatro Coliseo Noela.
O Festival Internacional de Arpa Vila de Noia presenta estes días a programación da súa décima edición en conservatorios e espazos culturais das localidades de Pamplona, Xixón, Valladolid e Salamanca da man da arpista Beatriz Martínez
O Festival Internacional de Arpa Vila de Noia, o único certame de Galicia e do noroeste da Península Ibérica que ten como absoluta protagonista a arpa, preséntase estes días nas comunidades de Asturias, Castela e León e Navarra. O dúo conformado pola arpista Beatriz Martínez e o guitarrista Diego Langarika está a realizar este mes de maio unha pequena xira de recitais nos conservatorios ou espazos culturais das cidades de Pamplona, Salamanca, Valladorlid e Xixón coa colaboración do Xeodestino Ría Muros-Noia, á fin de dar a coñecer tanto a décima edición do certame galego coma o valor patrimonial do territorio no que se desenvolve.
Logo de visitar o Conservatorio Pablo Sarasate (Pamplona) e a Biblioteca Pública Jovellanos (Xixón), esta semana o 10º Noia Harp Fest presentarase no Conservatorio Profesional de Música de Valladolid (25 de maio, 19:15 horas) e no Conservatorio Profesional de Música de Salamanca (26 de maio, 20:00horas).
NOIA HARP FEST
A décima edición do Noia Harp Fest (NHF), dirixido por Rodrigo Romaní, celebrarase do 3 ao 6 de agosto na vila coruñesa. No seu cartel conflúen, desde hai dez anos, solistas e grupos de estilos moi diversos procedentes do ámbito galego, estatal e internacional, mais todos eles unidos pola interpretación musical a través da arpa. Este verán NHF reunirá en Noia a diferentes bandas e solistas de Alemania, Escocia, España, Francia e Irlanda, ademais dunha mostra representativa do talento máis próximo a través da orquestra folk SonDeSeu e do alumnado das escolas de arpa de Galicia.
Os concertos, de acceso libre e dunha notable calidade artística, celébranse en horario de tarde tanto a ceo aberto coma no interior de recintos culturais da vila de Noia, cuxo Concello é patrocinador do evento, coa intención de favorecer o achegamento ao instrumento por parte de públicos de todas as idades.
Unha das principais novidades deste 10º Noia Harp Fest será a estrea absoluta de tres creacións. Entre elas está Hibrys, do hispano-arxentino Alejandro Civilotti, a obra gañadora da primeira edición do premio internacional de composición Portus Apostoli, patrocinado polo Concello de Noia. A Real Filharmonía de Galicia será a responsable de interpretar unha peza que se poderá escoitar, por vez primeira, o sábado 5 de agosto na praza do Tapal de Noia.
O director do Festival Internacional de Arpa Vila de Noia, Rodrigo Romaní, presentou esta mañá en Santiago de Compostela a programación do evento, que contará con artistas de Alemania, Chile, Escocia, España, Francia e Irlanda
‘Hibrys’, a obra do compositor arxentino Alejandro Civilotti gañadora do I Premio Portus Apostoli, estrearase o sábado 5 de agosto na Praza do Tapal da man da Real Filharmonía de Galicia
Noia Harp Fest, en colaboración co Instituto de Investigacións Sanitarias de Santiago de Compostela, levará esta primavera a música da arpa ás consultas do CHUS co proxecto ‘Boas vibras. Arpistas pola saúde’
A décima edición do Festival Internacional de Arpa Vila de Noia, coñecido como Noia Harp Fest, celebrarase do 3 ao 6 de agosto. O director do certame, Rodrigo Romaní, presentou esta mañá un avance da programación do evento, que festexará os seus primeiros dez anos de vida poñendo en valor a creatividade e a extensión social da arpa. Así, o festival acollerá, entre outras propostas, a estrea absoluta de tres obras, concertos de recoñecidas arpistas internacionais ou un novo encontro do alumnado das escolas de arpa de Galicia; ademais de ampliar a súa actividade achegando o instrumento aos centros hospitalarios co programa piloto Boas vibras. Arpistas pola saúde.
Rodrigo Romaní, acompañado polo concelleiro de Cultura de Noia, José Pérez, e da directora técnica da Real Filharmonía de Galicia, Sabela García, presentou hoxe no Auditorio de Galicia a programación de concertos que terán lugar no marco desta décima edición do Noia Harp Fest, o único festival de Galicia e do noroeste da Península Ibérica que ten como absoluta protagonista a arpa. No seu cartel conflúen, desde hai dez anos, solistas e grupos de estilos moi diversos procedentes do ámbito galego, estatal e internacional, mais todos eles unidos pola interpretación musical a través da arpa. Os concertos, de acceso libre e dunha notable calidade artística, celébranse en horario de tarde tanto a ceo aberto coma no interior de recintos culturais da vila de Noia, cuxo Concello é patrocinador do evento, coa intención de favorecer o achegamento ao instrumento por parte de públicos de todas as idades. A este respecto, Rodrigo Romaní avanzou que o festival dará a coñecer, nas vindeiras semanas, o programa de actividades paralelas, que inclúe as habituais clases maxistrais ou mesmo obradoiros familiares.
Unha das principais novidades deste 10º Noia Harp Fest é a estrea mundial de Hibrys, do hispano-arxentino Alejandro Civilotti. Trátase da obra gañadora da primeira edición do premio internacional de composición Portus Apostoli, patrocinado polo Concello de Noia. A Real Filhamonía de Galicia será a responsable de interpretar unha peza que, segundo o tribunal do certame, foi a máis destacada das 16 composicións recibidas pola súa “alta calidade e interese”, á vez que mostra unha “elevada técnica orquestral, onde a arpa e a orquestra concertan á perfección”. A estrea terá lugar na noite do sábado 5 de agosto na praza do Tapal de Noia.
Programación de concertos do 10º Noia Harp Fest
A décima edición do Noia Harp Fest dará comezo o xoves 3 de agosto cunha sesión festiva e que porá en valor o talento local e de proximidade. O alumnado das escolas de arpa de Galicia participará, por segundo ano consecutivo, nun encontro aberto ao público. Trátase da proposta máis singular deste eido no país, ao por en relación a todas e todos os estudantes do instrumento. O obxectivo do NHF é que este Encontro sexa unha referencia para o alumnado e que elas e eles sexan sempre as protagonistas da apertura do festival. Logo deste concerto, terá lugar unha foliada de benvida e, de seguido, un concerto do chileno Crístian Rodríguez Cuarteto será o ramo desta xornada inaugural.
O venres 4 estará fiado polo virtuosismo de mulleres arpistas do ámbito do folk. A irlandesa Laoise Kelly, considerada a máis relevante da súa xeración, abrirá a segunda xornada de concertos na igrexa de Santa María a Nova. Pioneira nun novo estilo de conducción da arpa instrumental e recoñecida pola crítica polos seus traballos en solitario, ao longo da súa carreira -na que fundou grupos como Bumblebees ou Fiddletree- participou na gravación de máis de 70 álbums con artistas como Seamus Heaney, The Chieftains ou Sharon Shannon.
Ás 21.00 horas, na praza do Tapal, será a quenda do dúo franco-alemán conformado por Gilles Chabenat e Daniela Heiderich. Cunha arpa de levas bohemia, zanfona, voz e gaita francesa, os dous músicos evocarán melodías de baile conmovedoras e cancións profundamente emotivas, no marco dun repertorio que incluirá tanto composicións propias modernas como músicas tradicionais francesas e alemás, ou mesmo melodías de manuscritos antigos. A noite pecharase cunha das bandas que irromperon na escena folk dos anos 90 para mudala: The Poozies. Esta agrupación totalmente feminina fíxose moi coñecida polas súas xiras mundiais, nas que amosaban os seus arranxos inusuais e emocionantes, ademais de harmonías vocais conmovedoras. Cunha formación renovada, The Poozies será unha das grandes sensacións do festival pola súa gran colección de temas e melodías groovy.
O sábado 5, o Noia Harp Fest e a Asociación Española de Arpistas renderán unha homenaxe especial ao músico e virtuoso Nicanor Zabaleta, considerado o mellor intérprete do instrumento, no trixésimo aniversario da súa morte. Será cun concerto, que terá lugar no Teatro Coliseo Noelia, no que intervirán solistas de prestixio internacional para interpretar obras adicadas á súa figura. De seguido, contra ás 21.30 horas, será a estrea mundial de Hibrys, coa Real Filharmonía de Galicia, na praza do Tapal. Nas vindeiras semanas darase a coñecer a ou o intérprete solista.
A última xornada da décima edición do Noia Harp Fest comezará ás 19.00 horas do domingo 6 de agosto cun concerto da arpista, cantante e artista multidisciplinar Musgö, especialista en looping ao vivo e arpa eléctrica. O seu traballo é unha mestura de contemporáneo e vintage, cunha posta en escena atrevida e elegante que se poderá ver no Teatro Coliseo Noela. Finalmente, o broche dourado do evento chegará da man da orquestra de folk de Galicia. SonDeSeu estreará na praza do Tapal dúas novas composicións creadas especificamente para este concerto: serán a Suite Micelio, de Anxo Pintos, para arpa e orquestra folk, que contará con Begoña Riobó como solista; e a Suite Escumas Atlánticas, de Rodrigo Romaní, na que serán solistas Laoise Kelly, Mary Macmaster e Beatriz Martínez.Programa piloto ‘Boas vibras. Arpistas pola saúde’
A presentación tamén serviu dar a coñecer a posta en marcha deBoas vibras. Arpistas pola saúde, un programa piloto que porán en marcha a Asociación Noia Harp Fest e a Fundación Instituto de Investigacións Sanitarias de Santiago de Compostela para favorecer a presenza da música de arpa en centros hospitalarios. A intención é acompañar a mellorar da humanización na asistencia aos pacientes así como o aproveitamento dos beneficios que supón esta práctica para a saúde, estudados e analizados noutras experiencias similares realizadas en diversas partes do mundo.
A experiencia piloto desenvolverase con pacientes de Pediatría do Complexo Hospitalario Universitario de Santiago de Compostela e estará controlada polo persoal sanitario. Cinco arpistas visitarán nas vindeiras semanas aos pacientes, establecendo unha comunicación sonora baseada na personalización da música que se interpreta, centrada na adaptación ás características e á situación de cada persoa, primando tamén a improvisación musical para chegar a provocar cambios positivos e observables na súa evolución.
A primeira convocatoria do Premio de composición para arpa e orquestra Portus Apostoli, impulsado polo Noia Harp Fest, recibe 16 obras orixinais
O director do Festival Internacional de Arpa Vila de Noia, Rodrigo Romaní, cualifica como “moi exitosa” a iniciativa, patrocinada polo Concello de Noia, e que recibiu creacións de compositores de EEUU, España, Finlandia, Malta, Arxentina e Brasil
O xurado do certame fallará o premio o 15 de febreiro e a gañadora terá a súa estrea mundial no X Noia Harp Fest da man da Real Filharmonía de Galicia
O Festival Internacional de Arpa Vila de Noia dará a coñecer nas vindeiras semanas a obra gañadora da primeira edición do Premio Internacional de Composición Portus Apostoli. O xurado, conformado por artistas internacionais de recoñecido prestixio, fallará o premio o 15 de febreiro.
O director do Noia Harp Fest, Rodrigo Romaní, cualifica como “moi exitosa” a convocatoria do certame, patrocinado polo Concello de Noia, pois o festival recibiu un total de 16 propostas, “algo pouco usual neste tipo de concursos, nos que o habitual é recibir 5 ou 6 composicións”. “Estamos moi felices pola acollida que tivo o Portus Apostol entre o sector e pola proxección internacional que este certame abre ao noso encontro musical”, salienta Romaní, ao sinalar a diversidade da orixe xeográfica das e dos participantes desta primera convocatoria, á que se presentaron compositores procedentes de Arxentina, Brasil, Estados Unidos, España, Finlandia e Malta.
O Premio Internacional de Composición Portus Apostoli naceu como unha aposta innovadora por ampliar o repertorio das obras para arpa e orquestra. O galardón, que conlevará unha achega económica de 2.000 euros para o creador da peza gañadora, suporá tamén a estrea mundial da mesma na vindeira edición do Noia Harp Fest. A Real Filharmonía de Galicia, acompañada dun ou dunha intérprete solista, executará a obra no marco da décima edición do festival, do que se darán a coñecer os primeiros detalles nas próximas semanas.
NOIA HARP FEST
O Noia Harp Fest, que celebrou a súa última edición o pasado mes de agosto, é o o único festival de Galicia e do noroeste da Península Ibérica que ten como absoluta protagonista a arpa. No seu cartel conflúen, desde hai nove anos, artistas de estilos moi diversos procedentes do ámbito galego, estatal e internacional, mais unidos pola interpretación musical a través da arpa.
Os concertos, de acceso libre e dunha notable calidade artística, celébranse tanto a ceo aberto coma no interior de recintos culturais da vila de Noia, cuxo Concello é patrocinador principal dun dos eventos máis singulares que se celebran na Ría da Estrela. Para máis información sobre o festival, pódese consultar o espazo web www.noiaharpfest.gal.
