● A estrea en Irlanda do documental de Sabela Iglesias e Adriana P. Villanueva será este xoves, 23 de xuño, no Trinity College Dublin
● O Galician Film Forum, que adoita programar regularmente cinema galego en Londres, da o salto así á veciña Irlanda
O Galician Film Forum (GFF) amplía as súa área xeográfica de actividade coa estrea en Irlanda do documental Negro púrpura de Sabela Iglesias e Adriana P. Villanueva. A proxección será no Trinity College Dublin e vai ser posible grazas á colaboración entre o GFF e o Department of Hispanic Studies da School of Languages, Literatures and Cultural Studies da institución dublinesa.
A actividade terá lugar este xoves, 23 de xuño, no Arts Building do campus universitario e o filme proxectarase en versión orixinal con subtítulos en inglés. Durante o evento vaise proxectar tamén un vídeo gravado expresamente por Sabela Iglesias e Adriana P. Villanueva, directoras de Negro púrpura, para a ocasión. A entrada do evento é gratuíta pero cómpre reservala con antelación nesta ligazón.
O documental Negro púrpura retrata a Galiza do século XX a través do Cláviceps purpúrea, un fungo alucinóxeno que agroma nos cereais e que agocha historia tan descoñecida como importante no devir da cultura e da economía galega dunha época. Coñecido por nomes como caruncho, cornecelo, dentón, cornello ou grao de corvo, por citar algúns, o Cláviceps purpúrea é o vínculo inesperado entre as historias da casa, as multinacionais farmacéuticas, a CIA, as pragas medievais, a medicina popular e o LSD.
Galician Film Forum
O GFF naceu no 2015 no seo dun grupo de galegos emigrados a Londres co obxectivo de crear un espazo para a difusión do cinema galego na capital británica. A súa actividade articúlase en tres eixes: como plataforma de exhibición, como observatorio da nova diáspora creativa audiovisual no Reino Unido e como espazo de reflexión sobre o cinema e a cultura galega en termos universais.
A MICE e o Galician Film Forum proxectan Negro púrpura no King´s College de Londres
● A estrea no Reino Unido do documental de Sabela Iglesias e Adriana P. Villanueva será este venres, 1 de abril, no King´s College London
● Completará o programa a curta Stockroom de Sol Mussa, autora tamén do clip promocional deste ano da MICE
● A cita será este venres 1 de abril, a partir das 19 horas, no King´s College London
O Galician Film Forum (GFF) retoma a súa actividade presencial en Londres coa estrea no Reino Unido do documental Negro púrpura de Sabela Iglesias e Adriana P. Villanueva. A proxección será no King´s College London e vai ser posible grazas á colaboración entre o GFF e a MICE do Museo do Pobo Galego que se está a desenvolver estes días en Santiago de Compostela. O programa do evento tamén inclúe a proxección da curta Stockroom da directora Sol Mussa, autora do clip promocional desta 17 edición da MICE.
A actividade terá lugar este venres, un de abril, e logo das proxeccións o público terá a oportunidade de manter un coloquio por videoconferencia coas directoras de Negro púrpura no que tamén vai participar de xeito presencial Sol Mussa.
Como é habitual, todos os filmes proxectaranse en versión orixinal con subtítulos en inglés e o encontro celebrarase en inglés e galego. A entrada do evento é gratuíta pero cómpre reservala con antelación nesta ligazón. Esta nova edición do GFF conta, ademais da colaboración da MICE, co apoio do King´s College London.
O documental Negro púrpura retrata a Galiza do século XX a través do Cláviceps purpúrea, un fungo alucinóxeno que agroma nos cereais e que agocha historia tan descoñecida como importante no devir da cultura e da economía galega dunha época. Coñecido por nomes como caruncho, cornecelo, dentón, cornello ou grao de corvo, por citar algúns, o Cláviceps purpúrea é o vínculo inesperado entre as historias da casa, as multinacionais farmacéuticas, a CIA, as pragas medievais, a medicina popular e o LSD.
Pola súa banda, Stockroom é unha curtametraxe de xénero documental dirixida por Sol Mussa que mestura imaxes dun almacén de traballo con exteriores de Londres. Retrátanse as dificultades da cidade a través dos traballadores do almacén, os propios pensamentos de alguén que está vivindo o cambio ao novo lugar ou do Brexit. As imaxes están tratadas de forma experimental e permiten falar da memoria e dos cambios.
Galician Film Forum
O GFF naceu no 2015 no seo dun grupo de galegos emigrados a Londres co obxectivo de crear un espazo para a difusión do cinema galego na capital británica. A súa actividade articúlase en tres eixes: como plataforma de exhibición, como observatorio da nova diáspora creativa audiovisual no Reino Unido e como espazo de reflexión sobre o cinema e a cultura galega en termos universais.
O Galician Film Forum celebra o Día das Letras Galegas coa estrea de ‘Nación’ no Reino Unido
● A organización londiniense prosegue coa súa actividade malia a pandemia coa proxección en liña do último filme de Margarita Ledo
● O mércores 19 está previsto un encontro en directo por vía telemática coa directora
● A película estará dispoñible entre os días 15 e 23 de maio na plataforma Vimeo On Demand e só no Reino Unido
O Galician Film Forum (GFF) de Londres vai celebrar este ano o Día das Letras Galegas coa estrea no Reino Unido de ‘Nación’, o último filme de Margarita Ledo. Así, entre os días 15 e 23 de maio, a película vai estar dispoñible na plataforma Vimeo On Demand en exclusiva para o Reino Unido. Alén diso, está previsto un encontro en liña coa directora o mércores 19 de maio, ás 7 da tarde (horario británico), que se retransmitirá en directo a través das redes sociais do GFF. Esta actividade é posible grazas ao patrocinio da Oficina para Asuntos Culturais e Científicos da Embaixada de España en Londres.
O filme vaise exhibir en versión orixinal con subtítulos en inglés e o alugueiro por 48 horas terá un custo de 3,95 libras; ademais, o número de entradas estará limitado. Esta proxección no Reino Unido ten lugar sete semanas logo da súa estrea nas salas comerciais en España, onde aínda se pode atopar. ‘Nación’ estreouse no 17 Festival de Sevilla, onde acadou o premio á Mellor Dirección de Filme Español, e recibiu o Mestre Mateo 2021 ao Mellor Documental.
Unha loita inconclusa
Neste filme de non ficción, Margarita Ledo aborda o moito que tardaron as mulleres en ter dereitos, “non soamente en votar, senón en acadar un traballo asalariado e a posibilidade de ser independentes. En resumo, o moito que nos levou ser Nación”. O eixo é o peche da fábrica de louza Pontesa no 2001 e como, vinte anos despois, á agardada sentencia sobre a reclamación de débeda pendente, un grupo de traballadoras lembra o símbolo da súa liberdade individual, a súa emancipación económica e a súa loita sindical.
Esas traballadoras manteñen viva a reivindicación dos dereitos da muller na España do século XX. A historia das súas vidas desenvólvese en presenza da esfinxe, encarnada por Eva Veiga, que reclama a memoria das operarias do téxtil, a louza e a conserva e anuncia voces e arquivos que engarzan tempos e corpos diferentes.
En ‘Nación’ altérnanse as imaxes de arquivo e as interpretacións de Mónica Camaño, Mónica de Nut, Laura Martínez Iglesias e Xoana Pintos coa participación das extraballadoras de Pontesa: Nieves Pérez Lusquiños, Manuela Nóvoa Pérez, Ester García Lorenzo, Carmen Portela Lusquiños e Carmen Álvarez Seoane.
Margarita Ledo Andión (1951, Castro de Rei, Lugo) é unha relevante figura da cultura coñecida polas súas facetas de cineasta e escritora. Alén diso, é catedrática de Comunicación Audiovisual na Universidade de Santiago de Compostela, onde tamén exerceu como decana. Publicou o seu primeiro libro, o poemario ‘Parolar cun eu,cun intre,cun inseuto’, en 1970, e co tempo verían a luz outros títulos de poesía, narrativa, ensaio e investigación.
Ao longo da súa traxectoria vital fundou e dirixiu diversas publicacións con especial foco na reivindicación da lingua galega e espírito militante. A súa filmografía consta das longametraxes ‘Santa Liberdade’ (2004), ‘Liste, pronunciado Líster’ (2007) e a ficción ‘A cicatriz branca’ (2012), baseada na súa novela ‘Porta Blindada’. Tamén dirixiu varias pezas curtas experimentais e documentais. No 2017 o festival internacional Documenta Madrid dedicoulle unha retrospectiva. Foi Premio Nacional da Cultura Galega 2008 en Cinema e Audiovisual e Premio Otero Pedrayo 2017 e é numeraria da Real Academia Galega.
O Galician Film Forum e IberoDocs estrean ‘Os corpos’ de Eloy Domínguez Serén en Escocia
A curta forma parte da sección ‘A Spiritual Journey’, centrada no audiovisual lusófono
‘Os corpos estará dispoñible durante 48 horas a partir do xoves 22 de abril nos territorios de Reino Unido e Irlanda
O Galician Film Forum (GFF) de Londres colabora este ano na oitava edición de IberoDocs, o Ibero-American Documentary Film Festival de Edimburgo. Froito desta sinerxia, o veterano encontro audiovisual e o GFF estrean en Escocia a curtametraxe documental ‘Os corpos’ de Eloy Domínguez Serén. A proxección, que será en liña, terá lugar este xoves, 22 de abril, dentro da sección ‘A Spiritual Journey’.
Este apartado aglutina outras tres curtas alén da devandita ‘Os corpos’: ‘O que se não vê’ de Paulo Abreu, ‘Misericórdia’ de Xavier Marrades Orga e ‘Os mortos’ de Gonçalo Robalo. En palabras dos responsables de IberoDocs, ‘A Spiritual Journey’ é un convite para viaxar pola lusofonía e gozar “dunha experiencia cinematográfica, sensorial, espiritual e doutro mundo que vai máis aló da nosa realidade física, na procura do que non se ve e que se está a perder na era da dixitalización”.
Como complemento á proxección, a partir das 19:20 horas (horario do Reino Unido), haberá un coloquio cos directores das curtas que estará coordinado polo programador Mon Rivas e que se retransmitirá en aberto pola canle de YouTube e pola páxina de Facebook de IberoDocs.
Por mor da pandemia, o IberoDocs deste ano estase a celebrar integramente en liña e os seus contidos só serán accesibles dentro do Reino Unido e Irlanda. O festival comezou a súa programación o pasado 19 de abril e vaina prolongar ata o 2 de maio. Toda a información sobre o programa de IberoDocs así como sobre a merca de entradas atópase na web www.iberodocs.org.
De Ourense ao mundo
‘Os corpos’ é unha vibrante curta sobre o entroido de Ourense rodada a finais de febreiro do 2020, dez días antes do primeiro caso confirmado de Covid-19 en Galicia. Con esta estrea escocesa, ‘Os corpos’ engade unha nova parada ao seu percorrido internacional. A curta de Eloy Domínguez xa pasou por Holanda (IDFA), Francia (Clermont-Ferrand), Arxentina (Bafici), Corea do Sur (Jenjou IFF), Estados Unidos (True / False), Suecia (Tempo) e mais varios festivais de España (Huesca IFF, D’A Film e FIC Xixón).
Eloy Domínguez Serén naceu en Simes (Pontevedra) no ano 1985 e estudou en Salamanca, Milán e Barcelona. Na súa filmografía figuran Pettring, I den nya himlen (No novo céio), Jet Lag, Ingen ko på isen (No cow on the ice), Den gula tegelvägen (Yellow brick road), Hamada e Distancia de seguridade. Na actualidade prepara a curtametraxe Rompente.
O Galician Film Forum de Londres estrea en liña ‘Eroski Paraíso’ para todo o mundo
● A organización londiniense estrea formato en liña por mor da pandemia coa proxección de ‘Eroski Paraíso’, dirixida por Jorge Coira e Xesús Ron
● A película estará dispoñible os días 27, 28 e 29 de novembro para todos os países agás España, onde Filmin ten a exclusividade
O Galician Film Forum (GFF) de Londres segue a promocionar o audiovisual galego malia as restricións impostas pola pandemia. Xa que logo, a organización vai retomar as súas proxeccións pero desta volta na modalidade en liña e vaino facer coa estrea internacional de ‘Eroski Paraíso’ na plataforma Vimeo On Demand. Así, os días 27, 28 e 29 de novembro a película de Jorge Coira e Xesús Ron vai estar dispoñible para todo o mundo na devandita web agás no caso de España, onde se pode atopar en Filmin. No que respecta ao percorrido internacional de ‘Eroski Paraíso’, a película só foi proxectada na sección oficial do Festival Cinespaña de Toulouse alén de en España.
O filme vai estar en versión orixinal con subtítulos en galego e o aluguer por 48 horas terá un custo de 3,95 €. Toda a recadación vai ir destinada aos creadores da película. Con esta actividade o GFF retoma a súa actividade, interrompida polo lockdowm imposto no Reino Unido, que impediu a proxección desta película o pasado abril nun evento que ía contar coa presenza in situ da actriz protagonista, Patricia de Lorenzo.
Precisamente, tanto de Lorenzo como Jorge Coira vanlles dar continuidade ás habituais conversas que se establecían logo das proxeccións físicas coa preparación dun vídeo onde responderán as preguntas e os comentarios que o público envíe durante estes días a través das redes do Galician Film Forum.
‘Eroski Paraíso’ está baseada na obra teatral homónima da compañía Chévere (Premio Nacional de Teatro 2014). Logo dunha xira por España e de máis de 30.000 espectadores, os directores Jorge Coira e Xesús Ron convertérona nunha longametraxe. Nela nárrase a rodaxe dun documental que Álex (Cris Iglesias) está filmando nun decorado onde se superpoñen a antiga discoteca Paraíso, na que se coñeceron os seus pais, Eva (Patricia de Lorenzo) e Antonio (Miguel de Lira), e mais o actual supermercado Eroski. O filme é unha comedia que explora a memoria colectiva, as voltas que dá a vida e a transformación das relacións nunha comunidade pequena. Na última edición dos Mestre Mateo a película acadou o premios á Mellor Actriz e Mellor Actor para de Lorenzo e de Lira. Tamén gañou o Premio á Mellor Longametraxe Galega no Festival Primavera de Cine de Vigo.
Galician Film Forum
O GFF naceu no 2015 no seo dun grupo de galegos emigrados a Londres co obxectivo de crear un espazo para a difusión do cinema galego na capital británica. A súa actividade articúlase en tres eixes: como plataforma de exhibición, como observatorio da nova diáspora creativa audiovisual no Reino Unido e como espazo de reflexión sobre o cinema e a cultura galega en termos universais.
