O Festival Atlántica despídese de Santiago coa sesión de peche de ‘Contos no camiño’
· Pep Bruno e Avelino González rematan os camiños francés e portugués cunha función dobre na Colexiata do Sar este sábado titulada ‘Historias de andantes’
· No concello de Teo está programado un espectáculo con Pakolas e unha sesión de contos con Celso F. Sanmartín
O festival Atlántica afronta a súa última fin de semana con espectáculos en Alfoz, Folgoso do Courel, A Pobra do Caramiñal, Outero de Rei, Dodro, Outes, Cuntis, Teo e Santiago. No caso de Compostela, o sábado está prevista unha última función na Colexiata do Sar con Pep Bruno e Avelino González que servirá tamén para pechar ‘Contos no camiño’.
A función conxunta de ambos os dous narradores leva o título de ‘Historias de andantes’ e nela Pep Bruno e Avelino González compartirán co público as súas aventuras ao longo do camiño. As entradas para asistir levan varios días esgotadas pero está aberta unha lista de agarda nesta web por se hai cancelacións.
Pep Bruno comezou o camiño francés o pasado 4 de xullo mentres que Avelino González está a realizar o portugués en bicicleta desde o día 6. Ao longo dos seus respectivos traxectos, os dous artistas brindaron funcións de contos en varios puntos e tamén compartiron polas súas redes sociais as súas vivencias sobre a experiencia co cancelo #contosnocamiño. Con ‘Historias de andantes’ darán por rematada esta singular peregrinación de contos.
Últimas actividades en Teo
Atlántica tamén remata a súa actividade en Teo este sábado con dúas funcións gratuítas pero para as que cómpre reservar con antelación no correo entradascultura@teo.gal. Así, está prevista unha función concibida para público infantil e familiar de Pakolas co espectáculo musical ‘Ramona Órbita, a dona do tempo’ na Burga de Xermeade ás 20:30 horas.
Á mesma hora pero no Teleclube de Luou estará Celso F. Sanmartín quen debullará as historias que se agochan baixo o suxestivo título de ‘Cando viaxou unha lingua de lume nun carro de herba seca?’, un espectáculo dirixido ao público adulto. Serán 75 minutos na compaña duns dos narradores galegos máis recoñecidos, apaixonado da tradición oral e fervoroso transmisor dela.
SOBRE OS ARTISTAS
Pep Bruno, barcelonés afincado en Guadalaxara, é licenciado en Filoloxía Hispánica, Teoría da Literatura Comparada e diplomado en Traballo Social. Comezou a contar contos en 1994 e desde aquela xa percorreu numerosos festivais de todo o mundo compartindo historias para nenos e adultos. Compaxina a súa actividade como narrador coa súa faceta de blogueiro e coa impartición de cursos, conferencias e obradoiros literarios e de creación. Tamén organiza actividades de animación á lectura, escribe artigos de reflexión en revistas especializadas e colabora decote cos medios de comunicación. No ano 2010, coa obra ‘La familia C’, ganou o III Premio Internacional Compostela de Álbum Ilustrado outorgado pola Editorial Kalandraka en colaboración co Concello de Santiago. Os seus libros están traducidos a máis de dez linguas.
Avelino González é actor, contador, tradutor e director. Traballou en teatro, televisión, cine e bares, en compañías como Ollomoltranvía, en espectáculos como ‘Commedia’, en películas como ‘Heroína’ ou ‘Gallego’, en series de televisión como ‘Padre Casares’, ‘Cuéntame’, ‘Hopital Central’… e o seu labor teatral foi recoñecido con varios Premios María Casares. Cos contos xa andou por toda a península, percorreu Europa (Polonia, Alemaña, Suíza…) e saltou o Atlántico (Cuba). Fixo dous espectáculos de contos para teatros. Un deles, ‘Vento mareiro’, foi o espectáculo máis representado en Galicia no 2005 e recibiu o Premio María Casares á Mellor Música Orixinal.
Paco Cerdeira, alias Pakolas, é músico, compositor e produtor. Leva dedicándose ao público infantil dende hai case quince anos, cando entrou a formar parte de Mamá Cabra. No 2014 fundou a súa propia banda de música infantil, A Gramola Gominola, coa que publicou os discos ‘Cancións para Desafinar’ e ‘Bravas. O rexurdir da Luz’. No 2018 ganou na categoría Música Infantil dos Premios Galegos da Música Martín Códax. No ano 2015 comeza co seu proxecto en solitario, Pakolas, do que xa foron publicados dous libros-CD: ‘Pakolas’ é ‘Ramona Órbita. A dona do tempo’, ambos editados por Galaxia (Sonárbore).
Celso Fernández Sanmartín é un poeta e contacontos galego. É licenciado en Filosofía pola Universidade de Santiago de Compostela e tamén promotor de FoCuCu (Foro de Cultivos Culturais). Como contacontos, caracterízase polo seu labor como recolledor e reinventor de historias e contos. O seu repertorio está composto por historias e memorias vencelladas á tradición oral galega e tamén á europea, que presenta como un verdadeiro tesouro nos seus espectáculos, cheos de coidado, sentido e paixón pola oralidade, a comunicación e a lingua.
O Festival Atlántica programa este venres sendas funcións en Santiago e Brión
· Ramiro Neira estará con ‘Animaliños’na carballeira do banquete de Conxo ás 12 horas
· Santi Prego levará ‘O teatro máis pequeno do mundo’ ás Torres de Altamira de Brión a partir das 20:30 horas
O Festival Atlántica programa mañá, venres 9, unha función en Santiago e mais outra no veciño concello de Brión cos artistas Ramiro neira e Santi Prego, respectivamente. Estas actividades son posibles grazas á Deputación da Coruña, a Xunta de Galicia e os concellos de Santiago e Brión.
O espectáculo de Ramiro Neira titúlase ‘Animaliños’, que está concibido para público infantil, comezará a partir das 12 horas na carballeira do banquete de Conxo Trátase dunha escolma de contos da tradición oral de diferentes países que poñen o valor a sabedoría popular e a eterna e imprescindible transmisión da experiencia de xeración en xeración. esta actividade está concertada cos campamentos dos centros socioculturais de Santiago, pero estará aberta ao público ata completar o aforo.
Xa pola tardiña, ás 20:30 horas, Santi Prego levará ‘O teatro máis pequeno do mundo’ ás Torres de Altamira do concello de Brión. En este espectáculo para adultos collen todo tipo de contos: os participativos, os improvisados, os da tradición oral galega e tamén as historias con bonecos. O xeito de contar de Prego é moi visual e aliméntase principalmente de fontes literarias. Nas súas historias sempre hai maxia e poesía e nunca falta un elemento de comicidade sutil.
Sobre os artistas
Ramiro Neira conta con experiencia como actor, director, docente, produtor e distribuidor teatral. Como actor traballou e traballa con diferentes compañías: Artestudio Teatro, Sardiña, Tea, Estragón, Grupo Institucional da Universidade da Coruña, Teatro da Bufarda, Espello Cóncavo, Teatro da Lúa, Casa Hamlet, Patatín e Patatán, entre outras.
Como docente e director coordinou grupos en diferentes espazos. Na súa faciana de produtor e distribuidor traballou con Teatro da Bufarda, Hac Luce Universidade da Coruña, Teatro da Lúa, UVG Teatro, Galileo Teatro, Ballet Studio, Paparota Teatro. Actualmente compaxina o seu labor como docente, actor e director coa coordinación de diferentes proxectos do Concello da Coruña e do Forum Metropolitano, como son o programa Horas Punta, Mostra de Teatro Escolar e os Encontros de Teatro Independente da Coruña.
Santi Prego é actor de teatro, cine e TV, monicrequeiro e narrador oral. Comezou a contar a mediados dos anos 90 en institutos e as súas historias xa pasaron por teatros, casas da cultura, bibliotecas e mesmo por programas da televisión como ‘Apaga a lus’ e pola Radio Galega.
Clausura fóra de Santiago
O festival entra xa na súa recta final, cun último espectáculo en Santiago este sábado e o resto das funcións noutros lugares como Teo, A Pobra do Caramiñal, Cuntis, Ribeira, Alfoz, Mondoñedo, Outes e Folgoso do Courel. O programa completo do festival e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.
Atlántica diversifica este xoves a súa programación con cine, literatura e arte
· A función para bebés de Pavís Pavós, adiada por mor da chuvia, vaise celebrar no xardín do claustro do Museo do Pobo Galego
· O Museo tamén acolle a estrea do documental ‘Manoliño Nguema’ e un coloquio posterior co protagonista, Marcelino Ndong, e mais a guionista, Rocío Cadahía
· En Teo, a carballeira de Francos será o escenario do espectáculo ‘Caderno doutras voces’, unha mestura de narración oral e pintura a cargo de José Luis Gutiérrez ‘Guti’ e da acuarelista Leticia Ruifernández
Este xoves, 8 de xullo, o festival Atlántica aposta por novas actividades culturais como o cine e a literatura, sen esquecer os contos para os máis pequechos. Todas as actividades son gratuítas, pero cómpre reservar o convite a través da web festivalatlantica.gal. O festival está presente na cidade compostelá grazas á Deputación da Coruña, a Xunta de Galicia e o Concello de Santiago.
A primeira actividade da xornada comezará ás 7 da tarde no xardín do claustro do Museo do Pobo Galego. Alí, os bebés de entre 0 e 3 anos poderán gozar co espectáculo ‘Cando chove e vai sol’ de Pavís Pavós, que tivo que ser adiado por mor da chuvia. Trátase dunha sesión na que os participantes escoitarán pequenas historias apropiadas para as primeiras idades que falan das cousas cotiás enlazadas con ditos e cancións tradicionais e algunha composta adrede para a función. Os convites para a función pódense reservar nesta web.
Unha vida de cine
Un chisco máis tarde, ás 19:30 horas, e tamén no Museo do Pobo Galego, no seu auditorio, vaise proxectar o documental ‘Manoliño Nguema’, dirixido por Antonio Grunfeld. Esta cinta recolle a viaxe persoal e creativa de Marcelo Ndong, un artista de Guinea Ecuatorial formado na mítica ‘Cidade dos Muchachos’ de Ourense. O eixe argumental de ‘Manoliño Nguema’ é a inesperada proposta que recibe Ndong: montar unha obra de teatro que relate a súa propia vida e que será representada en Santiago de Compostela.
Logo da proxección, haberá un coloquio con Ndong e coa guionista Rocío Cadahía, moderado por Adriana Páramo, cineasta e membro do Galician Film Forum (GFF) de Londres. Esta actividade é posible grazas á colaboración da Mostra Internacional de Cinema Etnográfico (MICE), do Festival Atlántica e do devandito GFF.
No palmarés de ‘Manoliño Nguema’ figuran galardóns como o Mestre Mateo 2020 á Mellor Longametraxe Documental, o Premio ao Mellor Documental no Festival de Cine e Televisión Reino de León, o Premio do Público e unha Mención de Honra no MiradasDoc de Tenerife e o Premio do Público e o Premio CREA no Festival Primavera Do Cine.
Contos e arte en Teo
No veciño concello de Teo, a partir das 21 horas, o narrador José Luis Gutiérrez ‘Guti’ e a acuarelista Leticia Ruifernández brindarán unha sesión de ‘Caderno de últimas voces’, un espectáculo baseado no libro homónimo de ambos os artistas. Do mesmo xeito que o libro mestura acuarelas e historias da Raia e do Poñente zamorano, esta función convida a viaxar coa voz de Guti e os pinceis de Ruifernández ao mundo das historias deste lugar cruzamento de linguas e culturas. A sesión será na carballeira de Francos e para asistir cómpre reservar por adiantado en entradascultura@teo.gal.
Atlántica segue
As actividades de Atlántica continuarán ata o vindeiro 11 de xullo e están a se desenvolver por toda Galicia. O programa completo do festival e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.
SOBRE OS ARTISTAS
Pavís Pavós formouse como grupo de contacontos para público infantil no ano 1996 en Pontevedra. Traballa principalmente en Galicia con contos en galego e tratando de recuperar cantos, contos, adiviñas, refráns, fraseoloxía e xogos propios da nosa tradición. Tamén inclúen nos seus espectáculos contos de nova creación e formatos contemporáneos.
Por outra banda, a compañía dedícase ao labor da conservación da oralidade e entre as súas tarefas está tamén a de recuperar as versións orixinais dos contos clásicos para que non esmorezan. Pavís Pavós está formado por Tareixa Alonso e Xacobe Rodríguez.
José Luis Gutiérrez ‘Guti’ é gaiteiro, cantador, bailador e, sobre todo, contador de historias. Realizou un inmenso labor de compilación etnográfica en longos seráns de cociña e serano, en vilas de Zamora, León e Salamanca. O seu traballo céntrase no uso de materiais recollidos directamente de narradores tradicionais, os máis deles anciás e anciáns do mundo rural. Traballou principalmente no contorno rural intentando dalgunha maneira restablecer a cadea de comunicación-transmisión da cultura oral rota pola condena dos anciáns ao silencio nunha sociedade dominada polo que se repite dende o televisor.
É habitual dos festivais de narración e colaborador en traballos discográficos de grupos como Mayalde, Bajo Duero ou La Ronda de Motilleja. Dirixiu numerosos espectáculos sobre a tradición, publicou artigos relacionados coa etnografía en revistas como ‘El Filandar’ e colaborou en moitas publicacións especializadas. Polo seu espectáculo ‘A pelo’ recibiu no 2015 o Premio de Interpretación Masculina na XII Edición dos Premios Moretti de Teatro.
Leticia Ruifernández naceu en Madrid, onde estudou a carreira de arquitectura. É ilustradora e escritora. Leva publicados máis de corenta libros e recibiu premios tanto nacionais como internacionais. Compaxina este labor con obradoiros de creatividade. Recentemente comezou un proxecto editorial que se chama Papel Continuo para poder sacar adiante libros propios.
O Festival Atlántica volve encher de contos Santiago e a súa contorna este mércores
· Haberá contos en Compostela e tamén en Teo e mais en Palas de Rei
· As actividades son gratuítas pero nalgunhas cómpre reservar por teléfono ou a través da web festivalatlantica.gal
· A función de Cris de Caldas e o paseo narrado con Marga Alborés teñen esgotadas as súas entradas
Tras un breve descanso, o Festival Atlántica retoma a súa actividade en Santiago con catro espectáculos aos que se engaden funcións nas proximidades: Teo e Melide. Novamente as propostas abranguerán todas as idades, con espectáculos para cativos, mozos e adultos. Todas as actividades son gratuítas, pero algunhas xa esgotaron as súas prazas e para outras cómpre reservar o convite a través da web festivalatlantica.gal. O festival está presente na cidade compostelá grazas á Deputación da Coruña, a Xunta de Galicia e o Concello de Santiago.
A programación de Santiago comezará ás 18 horas cunha sesión de ‘Contos de aquí e de acolá’ de Fátima Fernández no CSC do Romaño. Trátase dunha escolma de contos recollidos en distintos lugares de Galicia e concibida para nenos con idades de entre 3 e 8 anos. Son contos alegres e tristes, curtos e longos, de mulleres e de homes, de animais e de plantas… un xeito, en definitiva, de mergullarse nos nosos costumes e pensamentos. Para asistir a esta sesión pódese reservar no teléfono para garantir a entrada 981 543 005 ou ben ir directamente ao lugar do evento o mesmo día da función.
Un chisco máis tarde, ás 19 horas, comezará o itinerario narrado con Marga Alborés titulado ‘Litorrelatos de Compostela’ un convite para descubrir as historias que agochan as pedras da zona da Almáciga. Esta actividade esgotou axiña as súas entradas e tamén ten completa a lista de agarda.
Ás 20:30 horas Cris de Caldas ocupará o xardín do claustro do Museo do Pobo Galego para compartir co público adulto ‘Un feixe de contos’, unha recompilación das historias que máis emocionaron á narradora ao longo da súa vida. Os convites para este espectáculo tamén están esgotados, pero está aberta unha lista de agarda por se hai cancelacións.
Xa pola noitiña, ás 21:30 horas, os ‘Contos de arrepío’ de Sofia Maul poderan ocupar o cemiterio de Bonaval tras o adiamento do domingo pola chuvia. Esta sesión está dirixida ao público adolescente, que terá a oportunidade de se achegar á tradición oral lusófona da man dunha das súas contadoras máis reputadas. Maul adoita incluír no seu repertorio historias de Madeira, a súa illa natal, que reflicten a idiosincrasia deste cachiño de terra no medio do océano. As entradas para este espectáculo pódense reservar aquí.
Sesión a dúas voces en Teo
O veciño concello de Teo acolle, ás 11 horas, unha sesión dobre para público infantil e xuvenil na que participarán a galega Raquel Queizás e o guipuscoano May Gorostiaga. O espectáculo de Queizás titúlase ‘Onda min’ e é un convite para ir á busca das historias de noso, da nosa memoria, para alimentar as novas xeracións. Tamén recorre aos libros para ir na procura de historias alleas doutras terras. Pola súa banda, Gorostiaga brindará unha sesión de ‘No meu mundo’, unha viaxe para indagar os mundos que cada un de nós albergamos no noso interior.
‘Contos no camiño’ en Melide
O narrador Pep Bruno vai celebrar en Melide a súa terceira sesión de contos prevista en ‘Contos no camiño’. Logo das súas contadas en Sarria e en Palas de Rei, Bruno recalará na praza do Convento para ofrecer unha sesión de contos para o público familiar ás 20 horas. Para asistir hai que reservar por adiantado en culturais@concellodemelide.gal ou ben no 981 505 003 (ext 2122).
Atlántica segue
As actividades de Atlántica continuarán ata o vindeiro 11 de xullo e están a se desenvolver por toda Galicia. O programa completo do festival e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.
Os narradores Avelino González e Pep Bruno xa peregrinan con ‘Contos no camiño’
· Pep Bruno está a realizar o camiño francés a pé e ten funcións programadas en Sarria, Palas de Rei e Melide
· Pola súa banda, Avelino González comezará mañá, 6 de xullo, o camiño portugués en bicicleta e ten previstos espectáculos na Guarda, Soutomaior e Cuntis
· Logo de rematar o camiño, ambos os dous artistas contarán xuntos na Colexiata de Sar o sábado 10 de xullo
O Festival Atlántica achégase ao ecuador da súa programación co inicio dunha actividade concibida ex profeso para este ano xacobeo: ‘Contos no camiño’. Nesta iniciativa dous narradores, Avelino González e Pep Bruno, van realizar o camiño de Santiago seguindo o itinerario portugués e francés, respectivamente. Ao longo das súas andainas, ambos os dous realizarán funcións de contos programadas e espontáneas e tamén compartirán as súas experiencias a través das súas redes sociais co cancelo #contosnocamiño
No tocante a Pep Bruno, o narrador comezou a súa peregrinaxe o pasado sábado 4 de xullo coa realización da etapa entre O Cebreiro e Triacastela e xa tivo a súa primeira contada en Sarria o domingo. As vindeiras funcións programadas serán en Palas de Rei e mais Melide os días 6 e 8 de xullo, respectivamente. Bruno, moi activo nas redes sociais, está a compartir abundante material e é posible seguilo en Facebook (@pep.bruno), Twitter (@pep_bruno) e Instagram (@pepbruno).
Pola súa banda, Avelino González comeza mañá, martes 6 de xullo, o camiño portugués, que ten previsto percorrer en bicicleta. A súa primeira función será ese mesmo día no peirao alto da Guarda, onde estará a ‘botar’ contos desde a embarcación ‘Piueiro’. Os seguintes espectáculos serán o xoves 8 en Arcade, Soutomaior, na antiga fábrica de carburos Laforet, e no Castro de Castrolandín, Cuntis, o venres 9 de xullo. Alén de publicar as súas reflexións nos seus perfís sociais (Twitter @avelinogonzalez e Instagram @xavelino), o narrador galego prevé facer transmisións diarias de contos polo seu Twitch dende lugares senlleiros ás 12 e ás 18 horas (https://m.twitch.tv/xavelino).
Fin do camiño na Colexiata do Sar
Ao chegaren a Santiago, ambos os dous artistas participarán nun espectáculo conxunto na Colexiata do Sar, o sábado 10 de xullo a partir das 21 horas. Baixo o título de ‘Historias de andantes’ desenvolverase unha función que ha de servir de peche a esta singular peregrinación de contos, e nela Pep Bruno e Avelino González compartirán co público as súas aventuras ao longo do camiño. A entrada é gratuíta pero para asistir cómpre reservar a entrada nesta web.
Sobre os peregrinos
Pep Bruno, barcelonés afincado en Guadalaxara, é licenciado en Filoloxía Hispánica, Teoría da Literatura Comparada e diplomado en Traballo Social. Comezou a contar contos en 1994 e desde aquela xa percorreu numerosos festivais de todo o mundo compartindo historias para nenos e adultos. Compaxina a súa actividade como narrador coa súa faceta de blogueiro e coa impartición de cursos, conferencias e obradoiros literarios e de creación. Tamén organiza actividades de animación á lectura, escribe artigos de reflexión en revistas especializadas e colabora decote cos medios de comunicación. No ano 2010, coa obra ‘La familia C’, ganou o III Premio Internacional Compostela de Álbum Ilustrado outorgado pola Editorial Kalandraka en colaboración co Concello de Santiago. Os seus libros están traducidos a máis de dez linguas.
Avelino González é actor, contador, tradutor e director. Traballou en teatro, televisión, cine e bares, en compañías como Ollomoltranvía, en espectáculos como ‘Commedia’, en películas como ‘Heroína’ ou ‘Gallego’, en series de televisión como ‘Padre Casares’, ‘Cuéntame’, ‘Hopital Central’… e o seu labor teatral foi recoñecido con varios Premios María Casares.
Cos contos xa andou por toda a península, percorreu Europa (Polonia, Alemaña, Suíza…) e saltou o Atlántico (Cuba). Fixo dous espectáculos de contos para teatros. Un deles, ‘Vento mareiro’, foi o espectáculo máis representado en Galicia no 2005 e recibiu o Premio María Casares á Mellor Música Orixinal.
Avelino González pódese atopar en teatros ou bares, na gran pantalla e na pequena (a da tele, e tamén a do ordenador). Pode parecer moita cousa e moi distinta pero en realidade é a mesma cousa: contar historias de seu ou axudar a contar as doutros en distintos formatos.
Ecuador de Atlántica
As actividades de Atlántica continuarán ata o vindeiro 11 de xullo e vanse desenvolver en lugares como Friol, Teo, Ourense, Ribeira, Sabucedo, Sanxenxo, Dodro, Folgoso do Courel, Mondoñedo, Outeiro de Rei, Outes, Alfoz e Santiago de Compostela. O programa completo do festival e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.
