Ataque Escampe dialoga co pasado en Cabalgata, o novo álbum que publica este martes 18 nas principais plataformas dixitais
Cabalgata está producido polo Hevi (Ortiga, Novedades Carminha) e conta coa colaboración como vocalista de Antía Ameixeiras (do dúo de música de raíz Caamaño&Ameixeiras) e o deseño e vídeos de David Silva
A presentación ao vivo terá lugar o sábado 29 de abril na Sala Capitol e as entradas xa están á venda na plataforma www.ataquilla.com
Cabalgata, o oitavo disco de Ataque Escampe, estará dispoñible desde as 00.00 horas deste martes, 18 de abril, nas principais plataformas dixitais. Trátase do primeiro LP que publica a banda compostelá en seis anos. Nesta ocasión, o grupo volve amosarnos o seu universo creativo, mantendo os seus trazos de identidade (como o coidado dunhas letras apoiadas no humor e a vulnerabilidade e o achegamento a estilos diversos) e achegando tamén numerosas novidades tanto na instrumentación -como a presenza de sintetizadores e, ocasionalmente, de saxo e bases electrónicas- como a nivel lírico.
O fío principal do disco é o diálogo co pasado, non como obxecto de nostalxia senón, en palabras do grupo, “como espazo inesgotable que nos interpela”. De aí sae o intento de explorar estilos musicais doutras épocas, pero tamén temáticas que atravesan o álbum, como a infancia, os amores diferentes ou as amizades conservadas ou perdidas, simbolizadas nas letras polas diferentes imaxes de cabalos ás que fai referencia o título: a tenrura dos cabaliños de carrusel das festas, a ameaza dos policías montados, a emotividade da relación cos animais á que podería apuntar Cabaliño lento, o terceiro adianto do LP -estreado o 31 de marzo- e tema que pecha o álbum.
O peso das colaboracións
A cociña práctica, un dos dez temas que conforma o disco, conta cunha das colaboracións clave do mesmo: Antía Ameixeiras, do dúo de música de raíz Caamaño&Ameixeiras, participa no tema como vocalista, achegándose así a un rexistro máis pop, e suma tamén voces en Supermartes. A maiores, Cabalgata está marcado tamén pola participación de dous colaboradores habituais: o Hevi e David Silva. Hevi, responsable tamén de gravacións de Ortiga, Novedades Carminha ou Faia, entre outras creadoras, repite na produción despois de A alma e, como sucedía naquel EP, o resultado destaca pola procura da naturalidade nas interpretacións e o imaxinativo dos arranxos no achegamento aos diferentes estilos. Pola súa banda, David Silva, que vén de realizar con Ataque Escampe o espectáculo audiovisual Na noite brillan, encárgase dos videoclips de Cabalgata e do deseño, onde afonda na iconografía ecuestre presente no título.
Presentación na Sala Capitol
Ataque Escampe presentará Cabalgata na Sala Capitol o sábado 29 de abril, nun evento que abrirá un combinado de membros da Banda de Lalín. Así, péchase en certa maneira o círculo aberto pola mención á Banda dentro do disco ou a presenza de parte da súa formación no videoclip do adianto Lamborghini.As entradas xa están á venda, a partir de 10 euros, na web de www.ataquilla.com; mentres na billeteira costarán 15 euros.
Seis anos despois do seu último LP, o grupo compostelán lanza un disco no que se achega a novos estilos (synth-funk, hi-NRG, hip hop, no wave), mais sen abandonar o pop
A nivel lírico, o fío do disco pasa por un diálogo co pasado que non cae na nostalxia, abordando temas como as amizades conservadas ou perdidas (Lamborghini, Amigo, Cabaliño lento) ou a infancia (Fuck the Police), entre outros
A presentación ao vivo terá lugar o sábado 29 de abril na Sala Capitol e as entradas xa están á venda na plataforma www.ataquilla.com
A banda Ataque Escampe publicará Cabalgata, o seu oitavo álbum, o vindeiro martes 18 de abril nas principais plataformas dixitais. O novo LP do grupo compostelán, do que xa se coñecen Lamborghini, Viaxamos a Miami e Cabaliño lento, está conformado por 10 temas e conta coa produción do Hevi (Ortiga, Novedades Carminha). A reserva de Cabalgata xa está dispoñibile a través do enlace https://ffm.to/cabalgata. Cabalgata séntese como unha sorte de retorno. Non é que nos últimos anos o grupo estivese inactivo, nin moito menos: Ataque Escampe publicou o EP A alma ou as compilacións de rarezas Ídolos adolescentese A vida dos animais, e versionou a Ana Kiro no sinxelo Por última vez. Pero, con todo, pasaron xa seis anos desde o anterior disco longo (Primeiros bicos, 2017). Neste novo traballo discográfico, o grupo compostelán volve amosarnos o seu universo creativo, mantendo señas de identidade(como o coidado dunhas letras apoiadas no humor e a vulnerabilidade e o achegamento a estilos diversos) e achegando tamén numerosas novidades. Esas novidades fíltranse en diferentes aspectos de Cabalgata. Na instrumentación, por exemplo, destaca a presenza dos sintetizadores e, ocasionalmente, do saxo e as bases electrónicas, cos que aparecen influencias pouco vistas no grupo como a música disco e hi-NRG (presente no primeiro adianto,Lamborghini), o hip hop da vella escola (Fuck the Police) ou a no wave (Amigo). No aspecto lírico, o fío principal do disco podería ser o diálogo co pasado, non como obxecto de nostalxia senón, en palabras do grupo, “como espazo inesgotable que nos interpela”. De aí sae o intento de explorar estilos musicais doutras épocas, pero tamén temáticas que atravesan o álbum, como a infancia, os amores diferentes ou as amizades conservadas ou perdidas, simbolizadas nas letras polas diferentes imaxes de cabalos ás que fai referencia o título: a tenrura dos cabaliños de carrusel das festas, a ameaza dos policías montados, a emotividade da relación cos animais á que podería apuntar Cabaliño lento, o terceiro adianto do LP e tema que pecha o álbum. Ao mesmo tempo, como vén sendo habitual nos discos de Ataque Escampe, as letras e as músicas poñen tamén en relación o traballo do grupo co contexto político, histórico e artístico que o marca. Deste xeito, en Cabalgata asoma un conxunto ben variado de figuras e referencias que van do presente ao pasado: Bad Bunny, Nina Simone, Roberto Carlos, Bruce Lee, Wallace Stevens, Luz Pozo Garza… Entre todas elas pode observarse tamén unha vontade por achegarse ao popular, visible na presenza da Banda de Lalín na letra de Terras raras ou na inclusión dunha receita de filloas, explicada por Delfina Sánchez (avoa do batería Cibrán Tenreiro), en A cociña práctica.
Presentación ao vivo na Sala Capitol O retorno que supón Cabalgata levará tamén de volta ao grupo aos escenarios de Santiago de Compostela: Ataque Escampe estará na Sala Capitol o sábado 29 de abril para presentar o disco, nun evento que abrirá un combinado de membros da Banda de Lalín. Así, péchase en certa maneira o círculo aberto pola mención á Banda dentro do disco ou a presenza de parte da súa formación no videoclip do adianto Lamborghini. As entradas xa están á venda, a partir de 10 euros, na web de www.ataquilla.com; mentres na billeteira costarán 15 euros.
Neste terceiro avance, a banda traballa coas texturas electrónicas e os sintetizadores nunha evocadora letra que mestura imaxes medievais e contemporáneas
O vídeo da canción, a cargo de David Silva, xoga coa idea dos retratos filmados situando ao grupo na estrañeza dun recinto ecuestre
Con este sinxelo, Ataque Escampe revela tamén información sobre o LP Cabalgata, con cancións producidas polo Hevi e que estará dispoñible a finais de abril
O Ataque Escampe publicará mañá, venres 31 de marzo, Cabaliño lento, novo adianto do seu álbum Cabalgata, o que será o oitavo traballo de estudio de Ataque Escampe e que estará dispoñible a finais de abril. O tema, producido polo Hevi, acompañarase dun vídeo dirixido por David Silva.
O imaxinario dos cabalos é rico e variado ao longo da historia da arte. Cadros, filmes e cancións teñen xogado con el, levándonos da épica dos westerns ou os retratos ecuestres á realidade do traballo agrario ou a maxia festiva que na infancia nos traen os carruseis e as cabalgatas de Reis. No seu novo sinxelo,Cabaliño lento, Ataque Escampe entra nesta tradición á súa maneira, presentando unha canción delicada, construída sobre texturas electrónicas, na que o cabalo é parte do relato dunha despedida incerta. En troques de épica ou maxia, amosa unha vulnerabilidade tranquila que aparece (igual que as imaxes de cabalos) a miúdo en Cabalgata, o álbum da banda para o que Cabaliño lento serve de terceiro adianto.
Despois do achegamento á música disco de Lamborghini e o synth-funk de Viaxamos a Miami, con este tema Ataque Escampe continúa achegándose a diferentes estilos sen abandonar unha perspectiva pop. EnCabaliño lento a voz achégase ao estilo da canción melódica pero o dominio dos sintetizadores pode levar a banda a un terreo próximo ao dream pop de Beach House, tamén pola repetición minimalista dunha base de caixa de ritmos e baixo que remite tanto a Gorillaz como, na súa estrutura, a algunhas danzas do barroco. A letra, con todo, vai nunha liña diferente á das referencias musicais (e novidosa para Ataque Escampe), utilizando o imaxinario medieval dunha maneira ambigua para afondar con tenrura e serenidade nos momentos, cousas e persoas queridas que quizais quedaron xa atrás no tempo.
Ao igual que nos últimos sinxelos da banda, Cabaliño Lento acompáñase dun vídeo dirixido por David Silva, que nesta ocasión entra tamén no imaxinario hípico desde unha perspectiva pouco común. Ao estilo dos retratos dos ‘screen tests’ de Andy Warhol, o director ralentiza a imaxe nun sutil zoom cara atrás para chamar a atención sobre os mínimos xestos do grupo e de Cacique, o cabalo que os acompaña. Desde a premisa sinxela dun único plano frontal, o clip combina a estrañeza de presentar a Ataque Escampe nun retrato ecuestre coa naturalidade que se impón a través dos pequenos azares incontrolables que a cámara rexistra. O vídeo estará dispoñible desde as 00.00 horas deste venres 31 na súa canle de Youtube.
