Debate Eleccións Municipais 2023 na Casa da Cultura de Vilalba
O IESCHA organiza para o venres 19 de maio, ás 20:30 horas, na Casa da Cultura de Vilalba. o DEBATE DAS ELECCIÓNS MUNICIPAIS 2023.
NOTA_INFORMATIVA_debate23Fallo do V Certame de Microrrelatos DÍA DO LIBRO 2023
Onte 11 de maio, ás 12:30 h., celebrouse a xuntanza do xurado deliberacdor do V Certame de Microrrelatos DÍA DO LIBRO 2023, que convoca o Concello de Vilalba, en colaboración con Culturalia GZ. O xurado estivo formado por Cecilia Fernández Santomé, doutora en Teoría Literaria e escritora galega, Ánxela Gracián, tradutora e escritora, e Armando Requeixo, profesor, escritor e crítico literario, coa presidencia de Antía Rama Rivas, concelleira de Educación, Infancia e Mocidade, en substitución de Vanesa Ruth Siso Calvo, concelleira de Cultura, Comunicación e Igualdade, e como secretaría, a técnica de Cultura Sonia García Paredes.
Na súa deliberación decidiu o seguinte:
Descargar ACTA DO XURADO
Caldo publica este venres 12 ‘Lugar A Ponte’, o seu álbum máis íntimo
O novo traballo discográfico do trío é unha proposta moderna e potente, ateigada de honestidade e de responsabilidade tanto coa tradición coma con elas mesmas
Producido da man de Alberto Cernadas (crnds), ‘Lugar A Ponte’ mantén a esencia do Caldo orixinal, mais incorpora novas texturas e atmósferas á súa sonoridade
O disco, que leva o nome do lugar no que agromou o proxecto musical e que procura á vez esbozar a idea de fogar, acompañarase dunha coidada edición física que incluirá dez láminas ilustradas por Marte Martinka e textos de Petra Porter
Lugar A Ponte, o novo traballo discográfico de Caldo, verá a luz ás 00.00 horas deste venres 12 de maio nas principais plataformas dixitais. O segundo álbum do trío conformado por Anaïs Barbier, María Jorge e Pedro Fariñas é unha proposta íntima, moderna e potente, ateigada de honestidade e de responsabilidade tanto coa tradición coma con elas mesmas. Con Lugar A Ponte, producido e gravado man a man con Alberto Cernadas (crnds), Caldo abre paso e reinvidica o seu espazo no panorama actual coma unha das agrupacións imprescindibles á hora de entender a renovación e posta en valor da música tradicional a través da experimentación sonora.
Lugar A Ponte é un disco profundo e persoal no que o trío comezou a traballar desde o confinamento para perfilar, durante tres anos, o traballo que mañá verá a luz e que leva por nome o fogar onde o propio Caldo agromou: o Lugar A Ponte, na comarca do Val Miñor. Neste álbum, dos que cinco temas son instrumentais, Caldo déixase levar a través doutras estéticas para que os seus temas tomen camiños imprevistos. O trío incorpora novas texturas e atmósferas á súa sonoridade, mais sen renunciar á súa identidade, que agroma e bebe da tradición-e inclúe no LP gravacións ao vivo coma nos seus inicios, nos temas – 36388, nomeada así en referencia ao código postal de Lugar A Ponte, ou Arroz, ovos e solís-.
Alberto Cernadas acompañou ás creadoras nun longo proceso no que integraron novas capas, á vez que procuraban estéticas marcadas para definir esta etapa, máis madura, honesta e cavilada. Entre as novidades deste traballo, salienta a escasa presenza da percusión, que só aparece a través da pandeireta en temas como Cáncaro d’abril -peza que abre o disco, e na que tocan o sacho- ou 36388.
Alén do salto na produción en comparación co primeiro álbum, Caldo –gravado en directo-, outra das principais novidades con respecto daquel disco homónimo é que, alén da intervención ou adaptación de letras tradicionais, Caldo incorpora lírica propia en Lugar A Ponte. Son textos coidados que asina Anaïs Barbier, notas que se xuntan a outras que o trío reinterpreta para narrar as historias que falan dun momento de cambio, dun vínculo, dunha perda ou dunha relación. Son, ao cabo, episodios vitais que conforman un álbum que fala, dalgún xeito, das sensacións dentro do fogar, da procura dese lugar ou núcleo que se constrúe paseniño, da man da contorna máis próxima e querida.
Colaboracións
Ao igual que as melodías e as letras, Caldo tamén terma da presentación desde segundo LP ao contar coa colaboración doutras artistas. Alén da produción, gravación e mestura de Alberto Cernadas, que tamén é instrumentista (guitarras ou sintetizador) en Xuntas ou Outro lugar, o trío suma as colaboracións de German Díaz (zanfona en Arroz, ovos e solís), Luís Peixoto (mandolina en Chulinha das Cacharelas), Diego Alonso (saxo soprano en 36388) e Claudia Abril, Flor Díez e Marta Collazo (pandeiretas en 36388). Ademais, na coidada edición física do álbum, que verá a luz nas vindeiras semanas, Caldo conta co traballo da escritora e artista Petra Porter, responsable dos textos que contextualizan cada tema, e o da ilustradora Marte Martinka, quen é a autora tanto da portada como das ilustracións que acompañarán, en forma de lámina, todas e cada unha das dez pezas que forman parte deste Lugar A Ponte.
Caldo
María Jorge (violín), Anaïs Barbier (voz e pandeireta) e Pedro Fariñas (guitarra e gaita) son Caldo, o trío que achega a música tradicional a contextos sonoros contemporáneos a través da experimentación cos propios instrumentos. Premiadas co galardón ao Mellor proxecto de música folk nos Premios Martín Códax da Música (2020) e gañadoras do concurso Fran Pérez ‘Narf’ da Deputación da Coruña (2020), as creadoras de Caldo integran melodías tradicionais galegas e composicións propias con influencias das músicas europeas e atlánticas, unha fusión natural que vai directa ao sentir do público.
20230511-Caldo-publica-este-venres-12-o-seu-album-mais-intimoO FIOT abre a inscrición para participar na sétima edición do Certame Metro Cadrado
O Festival Internacional Outono de Teatro de Carballo publica a nova convocatoria desta iniciativa de teatro de proximidade, a primeira creada en Galicia, e que ten como obxectivo visualizar novos formatos e experiencias escénicas
O prazo de presentación de solicitudes, que se pode facer a través do correo electrónico fiot.microteatro@gmail.com, rematará o 15 de xuño e as pezas seleccionadas polo xurado, unha vez representadas, recibirán unha compensación económica de 450 euros
Ademais, as obras exhibidas serán valoradas polo público asistente mediante un sistema de votacións e optarán a premios de 150€ á Mellor Interpretación e ao Mellor Espectáculo
As representacións das pezas seleccionadas neste Certame Metro Cadrado do FIOT de Carballo desenvolveranse no mes de outubro en localizacións singulares da localidade bergantiñá, como un taller de olería, unha pista de skate, unha fábrica de chocolate artesanal, unha habitación dunha pensión, uns probadores dunha tenda de moda ou mesmo unha sala común dun balneario
O Festival Internacional Outono de Teatro de Carballo, recentemente escollido como Mellor Iniciativa Cultural de Galicia pola Fundación Contemporánea, abre a convocatoria para participar na nova edición do Certame de Micro-Escenas Metro Cadrado, unha das súas principais liñas de programación e que ofrece ao público a posiblidade de gozar de creacións escénicas experimentais en espazos non teatrais e singulares da localidade.
O Micro-Escenas Metro Cadrado, o primeiro certame de microteatro que se realiza en Galicia, naceu ao abeiro do FIOT a pasada década como unha proposta específica de apoio á creación escénica de novos formatos e de compañías ou creadoras e creadores emerxentes. As e os artistas son quen de xerar, no marco dun gran festival, novas experiencias teatrais, de pequeno formato, en contextos non habituais para a representación escénica, que contextualizan e serven de escenografía natural da obra, nos que un número moi limitado de asistentes se sitúa a curta distancia dos intérpretes. Así, á vez que difunde e visualiza o traballo das creadoras, Metro Cadrado ofrece cada ano ao público da comarca unha nova experiencia escénica, diferente ás habituais nos recintos: sen barreiras, sen artificios e desde a proximidade, que posibilita a captación de novos públicos e a implica á veciñanza en proxectos escénicos.
Neste mes de maio, o FIOT abre a inscrición da sétima edición do certame, no que convida ás compañías ou artistas emerxentes a crear ou deseñar un espectáculo (de teatro físico, música, clown, performance, danza, manipulación de obxectos…) de entre 10 e 20 minutos, que se poida poñer en escena, especificamente, nun espazo non teatral entre o 7 e o 29 de outubro de 2023.
Este ano os espazos ofertados serán unha pista de skate, un balcón do Concello de Carballo, un parque-ximnasio para maiores, unha tenda-fábrica de chocolate artesanal, un taller de olería, un espazo cultural, unha tenda especializada en produtos gourmet e venda de viños, uns probadores dunha tenda de moda, unha habitación nunha pensión e unha sala común do Balneario.
As propostas poderán ser tanto pezas orixinais coma xa estreadas, aínda que o xurado do certame (composto por diferentes persoas relacionadas coas artes escénicas) terá en conta a nova creación e, especialmente, a adecuación e a interacción cos espazos ofertados e a autoría propia. Ademais, atendendo ao interese do FIOT nos proxectos e experiencias teatrais singulares que fan un uso innovador de cultura dixital e a tecnoloxía, procurarase seleccionar, polo menos, unha proposta que se desenvolva ou na que teñan un peso moi claro os medios en liña ou virtuais.
As pezas seleccionadas polo xurado, unha vez representadas, recibirán unha compensación económica de 450€. Ademais, todas as obras exhibidas serán valoradas polo público asistente mediante un sistema de votacións e optarán a premios de 150€ á Mellor nterpretación e ao Mellor Espectáculo. O prazo de presentación de solicitudes, que se pode facer a través do correo electrónico fiot.microteatro@gmail.com, rematará o 15 de xuño.
216 propostas experimentais recibidas en seis anos
Ao longo dos seus primeiros seis anos de traxectoria, o Certame de Micro-Escenas Metro Cadrado acadou un importante éxito en canto ás propostas recibidas, tanto polo seu número (216) como pola calidade e diversidade das pezas; sendo quen de suscitar o interese tanto de creadores individuais coma de equipos (integrados por 3-5 persoas), da veciñanza ou mesmo dos axentes económicos, comerciais ou cidadáns de Carballo que colaboraron coa cesión de espazos. Nesta primeira media ducia de anos de actividade, Metro Cadrado contou con funcións, entre outros puntos, nun lavadoiro municipal, no despacho do alcalde, nunha barbería, nunha perruquerría, nas fiestras da Ludoteca Municipal ou mesmo no Salón de Plenos.
No 2022 o FIOT recibiu un total de 36 propostas para participar no Metro Cadrado, tanto de profesionais destacados da escena galega como de colectivos ou agrupacións de afeccionados. As pezas que participaron foron Xeografía dos corpos, presentada pola Compañía Anxela Blanco; Viaxar é un pracer, presentada por Dani Blanco e Antón Coucheiro, Actriz, chora, presentada por Cacharela Teatro (obra pola que Alba Nogueira recibiu galardón do público á Mellor Interpretación), Cinecleta, cinema doméstico a pedais, presentada por Sr.Lili, Menú-do día, presentada por Colectivo #ChamizoBelloVila (e gañadora do premio do público ao Mellor Espectáculo) e Homeless, presentada por Mónica Paradela Cuñarro.
| Bases VII Certame de Micro-Escenas M2 https://fiot.gal/wp-content/uploads/2023/05/BasesME2023.pdf Folla inscrición VII Certame de Micro-Escenas M2 https://fiot.gal/wp-content/uploads/2023/05/InscricionME2023.pdf |
Coloquio-Concerto de fado na Casa-Museo Manuel María
Este sábado, día 13 de maio, ás 20 horas, na Casa-Museo Manuel María haberá un COLOQUIO-CONCERTO de FADO. A actividade será introducida polo guitarrista bracarense Artur Caldeira (licenciado e mestre en Guitarra Clásica e Interpretación Artística e profesor na Escola Superior de Música de Artes do Espectáculo do Porto), que achegará ás persoas que asistan unha introdución deste estilo musical portugués. Na mesa tamén estará acompañado por Daniel Paredes (guitarrista. Licenciado e mestre en Guitarra Clásica e Interpretación Artística) e Iria Estévez (cantora galega de fado e músicas de raíz).
Logo do coloquio, Artur, Daniel e Iria darán un recital musical de Fado.
A entrada é libre mais é necesario reservar en contacto@casamuseomanuelmaria.gal ou no whatsapp 698177621
A Feira do Libro de Bos Aires acolle a presentación da ‘Guía ninja do ilustrador’
Alberto Guitián, coordinador da obra e un dos seus ilustradores, presentará o manual este martes, 9 de de maio, no stand da Xunta de Galicia
Este manual para combater as prácticas abusivas nos eidos creativos está promovido pola Asociación Galega de Profesionais da Ilustración (AGPI)
A versión dixital en galego e castelán pódese descargar gratuitamente no micrositio www.guianinjadoilustrador.org
A Asociación Galega de Profesionais da Ilustración (AGPI) vai presentar este martes, 9 de maio, na Feira do Libro de Bos Aires, a segunda edición, revisada e ampliada, da súa Guía ninja do ilustrador. O acto vaise desenvolver no stand da Xunta de Galicia ás 17.30 horas (12.30 hora española) e o responsable da presentación vai ser Alberto Guitián, un dos ilustradores da guía e o seu coordinador. Este manual “ninja” de apoio a profesionais creativos freelance está dispoñible gratuitamente en formato dixital na web www.guianinjadoilustrador.org e axiña comezará a súa distribución en papel.
A maioría dos profesionais da ilustración son autónomos, o que na práctica se traduce en que operan como miniempresas. Non só teñen que crear, senón que deben afrontar cuestións máis prosaicas como a elaboración de plans de empresa, o negocio de proxectos, a estimación de orzamentos ou a redacción de contratos e facturas. Tamén deben coñecer a fondo os dereitos e deberes da súa creación artística para protexela e poder explotala. E, por se non abondase, han de se manexar nun mercado complexo e protexerse de prácticas abusivas. Para sortearen con éxito estas dificultades, os ilustradores freelance precisan adestramento e habilidades ninja.
En 2016, a primeira edición da Guía ninja do ilustrador veu encher o baleiro sobre estas cuestións dun xeito áxil, con abundantes ilustracións, infografías e enlaces a recursos útiles para os creativos freelance. A nova edición mantén a estrutura de decálogo da súa predecesora pero ve a luz con novidades relativas tanto ao continente como ao contido. Así, desta volta incorpóranse dez viñetas ilustradas por José Domingo e Alberto Guitián que xogan coa estética e o imaxinario xaponés. A versión animada destas viñetas estase a difundir nas redes sociais da AGPI como minicápsulas de vídeo.
No que respecta aos contidos, trátanse temas como os concursos especulativos, isto é, os certames abusivos ou non- éticos, ou cuestións de actualidade como o novo sistema de cotas de autónomo, máis equitativo pero ao mesmo tempo máis embrollado ca o anterior. Non falta na Guía ninja do ilustrador unha parte dedicada ás intelixencias artificiais gráficas, sistemas cun desenvolvemento exponencial que poñen en serio perigo a subsistencia de moitos creadores.
O lanzamento da primeira edición da guía estivo marcado por unha extraordinaria acollida, da que dan conta as cifras acadadas: superáronse máis de 25 000 descargas da versión dixital e o milleiro de exemplares impresos esgotouse en poucos meses. Ademais, foi moi ben acollida por outras asociacións europeas e mesmo traducida ao italiano e ao turco. O seu lanzamento complementouse con exposicións e charlas en escolas de arte e deseño galegas. As claves do seu éxito vertebráronse nunha comunicación áxil, onde o humor e o tratamento visual se aliaban para tratar problemáticas globais comúns a case todos os creadores freelance.
Agora, sete anos máis tarde, chega esta nova edición, que baixo o lema ‘Máis ninja, my friend’ segue a combater os principais perigos e problemas que rodean a profesión e proporciona ideas sobre como facerlles fronte. A Guía ninja do ilustrador tamén vai dirixida a estudantes de arte, creativos freelance, clientes, amigos da ilustración e, sobre todo, ás persoas que comezan ou queren comezar na profesión. O proxecto está editado coa axuda da Deputación da Coruña e conta co apoio da Consellería de Cultura, Educación e Ordenación Universitaria da Xunta de Galicia.
As versións en PDF da guía en galego e en castelán están dispoñibles para a súa descarga gratuíta no micrositio www.guianinjadoilustrador.org. A versión impresa, editada en galego, estará á venda a un prezo simbólico de un euro (1 €) en librarías e espazos culturais, e distribuirase de xeito gratuíto nas escolas de arte de Galicia. A lista completa de puntos de venda publicarase a partir da segunda quincena de maio. Alén diso, a páxina actualizarase coas novidades relacionadas cos temas da guía, que tamén se van difundir a través da web da AGPI e as súas redes sociais.
PRESENTACIÓN FEIRA DO LIBRO DE BOS AIRES
Martes 9 de maio ás 17.30 h (12.30 hora española)
Stand da Xunta de Galicia (nº 1601)