Exposición A MÉTRICA DO ILUSIONISMO. CAXIGUEIRO no Museo Provincial de Lugo

Este vindeiro xoves, 19 de decembro, ás 20:00h, celebrarase a inauguración da EXPOSICIÓN: A métrica do ilusionismo. Caxigueiro, na Sala de Exposicións do Museo Provincial de Lugo. E permanecerá aberta ao público desde o 19 de decembro ao 25 de febreiro de 2020.

A MÉTRICA DO ILUSIONISMO é unha proposta que revisa as series máis representativas de Caxigueiro dende o 2005 -última exposición individual en Lugo- ate a actualidade. Pódese dicir que A MÉTRICA DO ILUSIONISMO é unha viaxe introspectiva do autor, pero tamén un empeño por compartir as súas paisaxes e un xeito de entender o mundo.

Enlaces de interese:
Folleto: a métrica do ilusionismo (Caxigueiro)
Convite inauguración: a métrica do ilusionismo (Caxigueiro)

*Información facilitada desde a Rede Museística Provincial de Lugo.


Acto de entrega de premios II Certame de Poesía TORRE DE CALDALOBA

Este sábado, 14 de decembro, o edificio social da Asociación Recreativa e Cultural de San Martiño de Pino acolleu o acto de entrega dos premios do II Certame de Poesía TORRE DE CALDALOBA.

Nun acto moi concorrido, a palabra e as emocións foron as protagonistas. Esa primeira das emocións xurdiu cando o alcalde do Concello de Cospeito, Armando Castosa, descubriu un cadro no que aparecía debuxado o rostro do anterior presidente da Asociación Cultural de Pino, Moisés Paz Carral, que falecera en datas recentes, o que supuña un feito de homenaxe colectiva á súa persoa.

Despois da lectura da acta do fallo elaborada polo xurado, procedeuse á entrega de premios, comezando polas gañadoras da Categoría 1 (menores de 18 anos).

A primeira en recoller o seu galardón foi Sandra Rodríguez Macía, de Monforte de Lemos, da man de Ana Mar Fraga Rábade, integrante do xurado.

Despois a Mariña Maceiras Segovia, de Pontevedra, entregoulle o galardón do 1º Premio Inés Lozano Carral, actual presidenta da Asociación Recreativa e Cultural de San Martiño de Pino.

Deseguido, veu a entrega dos galardóns ás persoas gañadoras da Categoría 2 (de 18 anos en diante).

E comezou recibindo o seu 2º premio Iria Collazo López, de Moaña, que llo entregou Martiño Maseda, en representación de Culturalia GZ.

Rematou a entrega de premios na persoa de Xurxo Alonso, de Vilagarcía de Arousa, que recolleu o agasallo de ser o gañador na súa categoría da man de Armando Castosa, alcalde do Concello de Cospeito.

Despois das pertinentes fotografías realizadas entre as persoas premiadas, xurado, entidades convocantes e familiares, pasouse a un momento máis distendido compartindo todos un pequeno ágape, ofrecido polo Concello de Cospeito.

Galería fotográfica do acto de entrega de premios do II Certame de Poesía TORRE DE CALDALOBA, realizadas polo veciño de Pino, José Manuel Pena Regueiro.

Medre a Poesía! Medre Caldaloba!

Inauguración da Exposición colectiva a favor de A CREBA

Este venres 13 de decembro, ás 20 horas na Casa da Cultura de Outes, inaugurouse a Exposición colectiva a favor da Asociación A`CREBA.

Trátase dunha exposición comisariada por Cristina Carballedo a través de SUMARTE. Proxecto expositivo, e na que participan case unha trintena de artistas (Antonio Abad, Óscar Aldonza, Isabel Blanco, Abel Barandela, Carlos Barcón, Xavier Blanco, Tino Canicoba, Xavier Carrasco, Nacho Carnota, Corin Cervera, Luis de la Cuevas, Jorge ESpiral, Pedro Gª Losada, Lomartí, Miguel Anxo Macía, Emilio Mariño, Adolfina Mesa, Novais, Adrián Pandolfo, Manolo Rivera, Peña Romay, Noa Persán, Antón Sobral, Antonio Souto, Veiras Manteiga, Laureano Vidal, Mila Vázquez e Xoán Vila). E cuxa finalidade será recadar beneficios a favor de A CREBA, unha asociación para a saúde mental, concretamente, o 40% do diñeiro que se reúna durante a mostra expositiva.

Os artistas participantes amosarán e venderán as súas obras desde o 13 de decembro ata o 7 de xaneiro de 2020 na citada Casa da Cultura de Outes.

Velaquí unha pequena galería de imaxes, xentileza de A CREBA e SUMARTE, que reflicten momentos da inauguración.

*Información e imaxes recollidas da Asociación A CREBA e de SUMARTE. Proxecto expositivo.

BERLAI en concerto este sábado na Casa-Museo Manuel María

O grupo de música BERLAI estará este sábado, días 14 de decembro, ás 20 hrs na Casa-Museo Manuel María nun concerto que é de entrada libre (até encher a capacidade do auditorio).

BERLAI vai presentar o seu traballo DesconhecidoEste é o resultado de unir música con banda deseñada, de feito durante o concerto proxectaranse ilustracións deste traballo que elaborou o debuxante Ernesto Torterolo.

Deixámosvos aquí algunhas ligazóns de youtube por se queredes saber como soan e lembrade que podedes reservar en  contacto@casamuseomanuelmaria.gal

Cruzei mares: https://www.youtube.com/watch?v=itAeIQeli8s

Um livro estranho: https://www.youtube.com/watch?v=itAeIQeli8s

Com os melhores desejos: https://www.youtube.com/watch?v=Njn48YjD6dg

*Información facilitada desde a Casa-Museo Manuel María.