O concerto de estrea de ‘Alvela’ será o vindeiro 23 de abril no Teatro Principal de Santiago, ás 20.30 horas
FAIA estará arroupada no escenario pola arpista bretoa Bleuenn Le Friec e mais polo cuarteto vigués de cordas Suelen Estar Quartet
As entradas estarán á venda a partir das 11:00 horas deste martes 25 de marzo na web compostelacultura.gal e mais na Zona C
Na estrea pública de Alvela, FAIA estará acompañada da arpista bretoa Bleuenn Le Friec e mais do cuarteto vigués de cordas Suelen Estar Quartet, integrado por Elena Vázquez (violín), María José Pámpano, (violín/ viola), Macarena Montesinos (violonchelo) e Saúl Puga (contrabaixo). A proposta musical completarase co vestiario de Melania Freire e co deseño de luz a cargo de Nonon Lab.
FAIA vai presentar o seu novo traballo, Alvela, nun concerto o vindeiro 23 de abril, ás 20.30 horas, no Teatro Principal de Santiago. As entradas para este evento, encadrado na programación musical de Compostela Cultura, estarán á venda a partir das 11.00 horas deste martes, 25 de marzo, e poderanse adquirir en liña na web de compostelacultura.gal ou ben presencialmente na Zona C ou na billeteira do teatro unha hora antes do comezo do concerto.
Alvela é un traballo complexo e sutil, con dez temas que transitan pola experiencia da maternidade, a memoria do corpo e as violencias que o atravesan, mais tamén sobre a forza que reside no íntimo, no desexo e no pracer. FAIA revisita arrolos, romances e outras cantigas tradicionais acompañada unicamente por instrumentos de corda e gravacións de campo manipuladas, unha constrición creativa que lle confire a Alvela unha coherencia sónica e unha organicidade singular. Polo de agora, coñécese un primeiro adianto do disco titulado E se queres, dispoñible nas principais plataformas dixitais e acompañado dun vídeo dirixido por Sara Traba.
O disco está producido por Hevi (Malandrómeda, Fluzo) e conta coas colaboracións de Bleuenn Le Friec, Antía Ameixeiras, Antía Muíño, De Vacas ou Suelen Estar Quartet. O concepto visual foi elaborado xunto con Melania Freire e as acuarelas e as animacións que acompañarán as cancións foron obra da artista plástica Blanca Gracia. A poeta Antía Otero acompañou na conceptualización xeral e no seguimento do proceso do disco.
Sobre FAIA
FAIA Díaz Novo é cantante, creadora e historiadora da arte. Compaxina a súa carreira musical en solitario coa participación en grupos como De Vacas, o Coro Encaixe e o trío Nacho.Faia.Lar. No 2018 publicou o seu primeiro disco en solitario, Ao cabo leirín, unha autoedición en vinilo centrada no cancioneiro tradicional e reinterpretado en clave feminista e contemporánea. Este abril presentará Alvela, o seu segundo traballo.
CONCERTO DE PRESENTACIÓN DE ‘ALVELA’
23 de abril | 20.30 h | Teatro Principal (Santiago de Compostela)
Entradas [venda activa a partir do 25 de marzo ás 11.00 h]:
O Instituto de Estudos Chairegos (IESCHA) foi admitido para participar no Programa “Coñece a túa Provincia’2025”, convocado pola Deputación de Lugo, co seguinte CONTIDO (sempre suxeito a algún cambio):
A viaxe terá lugar o mércores 9 de abril de 2025, con saída dende a Casa da Cultura de Vilalba ás 9,00 horas.
Ás 10:00 terá lugar unha visita ao Paza de San Marcos.
A continuación levarase a cabo o Programa da Ruta concedida:
RUTA 22 (RIBAS DO SIL E QUIROGA): Visita á abadía de San Clodio e ao centro de interpretación da minería aurífera en Ribas de Sil. Visita ao Xeomiradoiro de Campodola. Visita a unha adega.
Servizos incluídos:A excursión será de balde e incluirá transporte, guía acompañante, xantar (menú pechado cun primeiro prato, segundo prato, sobremesa, café ou infusión e as bebidas indicadas o propio día da excursión), entradas aos lugares de visita e seguro de viaxeiros.*Recoméndase a todas as persoas participantes levar roupa e calzado cómodo/deportivo para a xornada de excursión.
PROCEDEMENTO DE INSCRICIÓN
PRAZAS CONCEDIDAS: 23
PRAZAS QUE SE POÑEN A DISPOSICIÓN DE SOCI@S E NON SOCI@S: 20
Nº DE PRAZAS RESERVADAS: 3 (PARA A ORGANIZACIÓN)
PRAZO DE INSCRICIÓN: DO 22 DE MARZO AO 1 DE ABRIL DE 2025 (ata as 18:00 horas)
DATOS OBRIGATORIOS DE CADA PERSOA SOLICITANTE: NOME, APELIDOS, DNI E TELÉFONO (SE HAI ALGÚN MENOR DE IDADE HAI QUE FACELO CONSTAR) (TAMÉN SE PODE FACER CONSTAR ALGUNHA NECESIDADE ESPECIAL -alerxia alimentaria, etc-)PROCEDEMENTO DE ADMISIÓN
AS 20 PRAZAS SERÁN ADXUDICADAS MEDIANTE SORTEO PÚBLICO ENTRE AS SOLICITUDES PRESENTADAS (sempre que se sobrepase dita cantidade)
LEVARASE A CABO NO LOCAL DO IESCHA (NA CASA DA CULTURA) O MARTES 1 DE ABRIL DE 2025, A PARTIRES DAS 18:15 H.
TERÁN ABSOLUTA PREFERENCIA NO SORTEO OSSOCIOS E AS SOCIAS DO IESCHA.
O RESULTADO DO SORTEO SERÁ COMUNICADO A CADA SOLICITANTE MEDIANTE UNHA MENSAXE AO CORREO ELECTRÓNICO USADO NA INSCRICIÓN.
A banda Vimbio segue publicando nova música, desta vez cun EP titulado Ao vivo Rock in Río Tea 2024, no que o grupo presenta a interpretación en directo de Perseidas, Epicuro e Mayday durante a súa actuación no festival ponteareá. Coa presentación da versión en vivo dun dos seus temas máis recoñecidos, Mayday, de Perseidas, e do ata agora inédito Epicuro, o grupo pon enriba da mesa a carta de presentación ao seu enérxico e contundente directo.
Tras o lanzamento do seu máis recente éxito, Eu non quero traballar, Vimbio asenta neste 2025 as bases da súa carreira presentando a súa nova música e un directo co que espera marcar o ritmo da fusión entre o rap e o metal na escena galega. Con este EP a banda resalta a súa aposta por trasladar unha presentación en vivo demoledora dos seus temas, cunha posta en escena á altura do seu son. A banda presentará as seguintes datas da súa xira en 2025 proximamente.
MÁIS SOBRE VIMBIO
Vimbio é a nova cara da escena metal. Comandados por Álex Arnoso, coñecido polo seu protagonismo en SonDaRúa, o grupo xorde para conxugar o rap coa esencia do metal da década dos 90 e do 00. Baixo un gran eclecticismo musical, o grupo propón letras e ritmos moi contundentes, combinando os flows tan característicos de Álex coa potencia dunha banda composta por grandes veteranos da escena metal galega. Vimbio nace para reflotar e rexuvenecer xéneros que viviron o seu mellor momento nos anos 2000, aportando un aire renovador e diferenciador que busca volver a poñer no foco estes estilos de música. Co lanzamento dos seus primeiros sinxelos a finais de 2024 e comezos de 2025, o grupo pon enriba da mesa a súa carta de presentación, co claro obxectivo de facer deste un ano no que brillen as guitarras e os flows contundentes.
Vimbio é o aire fresco que precisaba a escena metal. Cun potente directo no que o grupo mestura os dous grandes xéneros que o caracterizan, o rap e o metal, Vimbio levará a súa contundencia e diversión por salas e festivais neste 2025.
Fillas de Cassandra publica Hibernarse, unha chamada á pausa fronte ao desenfreo do capital, e no que o dúo reclama espazo para levar o seu propio compás e compoñer desde a súa verdade
O primeiro avance do seu EP multiformato evidencia tamén a evolución da identidade das artistas, tanto a nivel sonoro como discursivo
María SOA e Sara Faro reclaman neste tema tempo para a “confección dun novo traxe”, que exemplifican a través de novos rexistros para as súas voces ou na experimentación coas texturas
Hibernarse, o primeiro “fascículo” do universo homónimo, é un chamado á pausa fronte á velocidade imposta polo “frenesí da industria e do fast-todo do capital”, o que vén sendo a esixencia de facer, con urxencia, todo dun xeito rápido. “Rápido e mal feito, dúas veces mal”, canta Fillas de Cassandra nesta peza, a primeira das catro que as artistas darán a coñecer desde hoxe e, semanalmente, até o 10 de abril.
Fronte ao ritmo desenfreado e á velocidade dos acontecementos vividos ao longo destes dous últimos anos (cando publicaron Acrópole), Sara Faro e María SOA avogan porque cadaquén poida tomar o tempo necesario para levar o seu propio compás e construír algo auténtico e duradeiro desde a súa verdade, como queren facer elas mesmas. É, ao cabo, o punto de partida do sinxelo: ás veces chegar tarde é mellor que non chegar.
Na construción desta reivindicación do dereito á espera, de que unha sexa tardeira para atopar o seu propio ritmo, Fillas de Cassandra emprega versos que evocan a sabedoría popular (ese “ti chega tarde que é mellor que non chegar”) ou a incerteza da elección (“como elixir entre a savia e o veleno se ainda non coñecemos a forma de todas as voces que teremos?”), coa intención de poñer sobre a mesa que os procesos de exploración son lentos e complexos e que supoñen que, para avanzar un paso, ás veces cómpre desandar outros catro.
É así como elas tamén cantan no retrouso ao “billete dourado”, unha figura que pode suxerir o porvir soñado, unha promesa de futuro que aínda está por chegar; mais que xa está presente no pensamento e na vontade das artistas. Así, neste Hibernarse, Fillas de Cassandra evidencia a evolución da súa identidade, unha transformación que manifesta no desexo “de mudar a voz e a pelaxe” coa finalidade de “achar as medidas para un novo traxe”, unha metáfora do proceso de busca de novas formas sonoras, musicais e discursivas sobre as que María SOA e Sara Faro xa están a traballar.
Neste Hibernarse, o público poderá escoitar novos rexistros das súas voces (evidenciado no retrouso do tema) e os xogos que estabelecen consonoridades e texturas; mais todo sen abandonar as súas sobranceiras harmonías vocais, os instrumentos orgánicos e a electrónica intensa que caracteriza ao dúo.
Hibernarse, o universo multiformato de Fillas de Cassandra
Hibernarse é o novo proxecto híbrido, multiformato e singular no que Fillas de Cassandra reflexiona sobre o concepto do tempoa través de diferentes prismas e disciplinas artísticas. O núcleo desta proposta componse dun EP de catro temas que o dúo dará a coñecer, desde hoxe e, cada sete días, ata o xoves 10 de abril. Nese momento, o público poderá descubrir todo o que se agocha baixo o paraugas deste novo traballo, que se publicará da man de Tremendo Audiovisual e Altafonte, e que se poderá reservar, proximamente, a través da páxina web www.altafonte.com.
Hibernarse é o resultado dun proceso de maduración musical e discursiva fiado paseniño e con esmero por María SOA e Sara Faro. Logo de dous anos de crecemento como grupo, Fillas de Cassandra pecha unha etapa reflexionando sobre a construción social do tempo e cun chamado á pausa necesaria que esixen os procesos creativos e artesanais.
A través deste proxecto, Fillas de Cassandra inicia a busca dun novo traxe e lanza un convite ao público: construír a man e fiar peza a peza, semanalmente, o universoHibernarse, un traballo conceptual no que o dúo fai reflexivos verbos que non o son para se observaren desde ángulos non explorados até o de agora.
