Abdullah Miniawy, aya & MFO, Batu, Beatrice Dillon, BFlecha b2b Mwëslee, Carme López, Carrier, CCL, Djrum, Grand River & Abul Mogard, Heinali & Adriana-Yaroslava Saienko, Ivy Barkakati b2b Breixo Martínez, KAVARI, Klein, KUNTARI, Lord Spikeheart, Los Thuthanaka, Malandrómeda & Caamaño, Masayoshi Fujita, Nazar, Niecy Blues, Objekt, Purelink, Rainy Miller, Saint Abdullah, Eomac & Rebecca Salvadori, Sara Persico & Mika Oki, Simo Cell, Tarta Relena e ZULI conforman o line up de WOS 2025
A Sala Capitol e as naves da Fundación Laboral da Construción acollerán a programación musical nocturna do venres 12 e do sábado 13 respectivamente
A cidade de Santiago de Compostela será o escenario de 13 premieres de discos, directos ou concertos audiovisuais en España, incluíndo Los Thuthanaka a nivel europeo, e 10 estreas en territorio galego
WOS Festival X SON Estrella Galicia vén de activar a venda de entradas de día para a súa oitava edición, logo de esgotar os dous tipos de abonos dispoñibles para asistir á celebración do evento, que terá lugar do 11 ao 14 de setembro en Santiago de Compostela.
Así, desde esta maña, o público pode adquirir tanto na plataforma dice.fm coma Ataquilla.com os billetes individuais para asistir a calquera dos catro días de programación. Ademais, tanto o venres 12 coma o sábado 13 contarán con entradas exclusivas para acceder, a partir das 22:00 horas, ás sesións da programación musical nocturna que terán lugar na Sala Capitol e nas naves da Fundación Laboral da Construcción, antiga curtidoría que se estreou coma sede do WOS no 2023 e que volverá transformar o espazo nunha pista de baile, a partir das 22:00h.
Deste xeito, desde hoxe pódense adquirir ata seis tipos de entradas diferentes para asistir aos directos e performance dos case 30 artistas internacionais e nacionais que pasarán por Santiago de Compostela en setembro. O xoves 11 o concerto inaugural virá da man da galega Carme López e do dúo catalán Tarta Relena, que presentará por primeira vez en Galicia o seu novo álbum És Pregunta.
Para o venres 12, o público poderá mercar unha entrada de día (que inclúe todos os concertos da xornada) ou de noite (que inclúen os específicos da Sala Capitol, na que haberá 4 premieres en España dos novos shows de Carrier, Los Thuthanaka -na súa estrea europea-, Purelink e Rainy Miller). De cara ao día seguinte, o sábado 13, as e os asistentes terán a opcion de escoller entre unha entrada completa ou só de acceso nocturno ás naves da Fundación Laboral (na que actuarán aya & MFO, Batu, Beatrice Dillon, CCL, KAVARI, Klein, Lord Spikeheart, Nazar, Objekt e Simo Cell).
Finalmente, o WOS Festival x SON Estrella Galicia despedirase até a súa nova edición o domingo 14 co concerto de clausura, cuxa entrada inclúe o acceso aos directos de Grand River & Abul Mogard e de Masayoshi Fujita.
WOS Festival x SON Estrella Galicia é o festival referente no ámbito da música electrónica e de vangarda a nivel estatal e festexará a súa oitava edición en Santiago de Compostela do 11 ao 14 de setembro. Ao longo de catro xornadas, o evento promovido pola produtora compostelá WORK ON SUNDAY ofrecerá unha programación coidada, multidisciplinar e de notable calidade artística, na que participarán numerosas figuras recoñecidas internacionalmente en máis de dez espazos emblemáticos da cidade, desde teatros e igrexas ata clubes e lugares inesperados. O vindeiro mes de setembro, o WOS reactivará a cidade cunha perspectiva única sobre o son e a cultura contemporánea.
O evento, recoñecido como Mellor Festival Indoor de Europa 2018 nos European Festival Awards, e que nos Iberian Festival Awards obtivo Mellor Promoción Turistica 2018 e Mellor Festival Indoor Nacional 2023, conta co patrocinio principal de SON Estrella Galicia e co apoio institucional da Xunta de Galicia a través da Axencia Turismo de Galicia -no marco de Concertos do Xacobeo-, Deputación da Coruña, Concello de Santiago de Compostela, Goberno de España a través da INAEM e Acción Cultural Española (AC/E) a través do seu Programa para a Internacionalización da Cultura Española (PICE); ademais de Gadis e Fundación Japón, Madrid.
Entradas de día WOS Festival 2025 (xa á venda en dice.fm e ataquilla.com)
Friday: Abdullah Miniawy, Carrier, Djrum, Los Thuthanaka, Purelink, Rainy Miller, Sara Persico & Mika Oki.
Friday Night – Sala Capitol: Carrier, Djrum, Los Thuthanaka, Purelink, Rainy Miller.
Saturday: aya & MFO, Batu, Beatrice Dillon, BFlecha b2b Mwëslee, CCL, Heinali & Andriana-Yaroslava Saienko, Ivy Barkakati b2b Breixo Martínez, KAVARI, Klein, KUNTARI, Lord Spikeheart, Malandrómeda & Caamaño, Nazar, Niecy Blues, Objekt, Saint Abdullah with Eomac & Rebecca Salvadori, Simo Cell, ZULI.
Saturday Night – FLC: aya & MFO, Batu, Beatrice Dillon, CCL, KAVARI, Klein, Lord Spikeheart, Nazar, Objekt, Simo Cell.
Sunday – Closing concert: Grand River & Abul Mogard, Masayoshi Fujita.
Programación musical WOS Festival 2025
Abdullah Miniawy (estrea en España) aya & MFO present hexed! (estrea en España) Batu (estrea en Galicia) Beatrice Dillon (estrea en Galicia) BFlecha b2b Mwëslee Carme López Carrier presents Rhythm Immortal (estrea en España) CCL (estrea en Galicia) Djrum Grand River & Abul Mogard present In uno spazio immenso (estrea en Galicia) Heinali & Andriana-Yaroslava Saienko present Гільдеґарда (estrea en Galicia) Ivy Barkakati b2b Breixo Martínez KAVARI (estrea en España) Klein (estrea en España) KUNTARI (estrea en Galicia) Lord Spikeheart (estrea en Galicia) Los Thuthanaka (estrea en Europa) Malandrómeda & Caamaño Masayoshi Fujita (estrea en España) Nazar (estrea en España) Niecy Blues (estrea en Galicia) Objekt Purelink (estrea en España) Rainy Miller presents Josehp, What Have You Done? (estrea en España) Saint Abdullah, Eomac & Rebecca Salvadori present A Forbidden Distance (estrea en España) Sara Persico & Mika Oki present Sphaîra (estrea en España) Simo Cell (estrea en Galicia) Tarta Relena (estrea en Galicia) ZULI presents Lambda (estrea en España)
O Instituto de Estudos Chairegos (IESCHA), en colaboración coa Área de Cultura-Vicepresiencia da Deputacion de Lugo, Academia Galega do Audiovisual e o Concello de Vilalba, organiza a proxección da longametraxe +CUÑADOS, dirixida por LUIS AVILÉS, continuando así co CICLO MESTRE MATEO-2025 que durante os próximos meses brindaranos a oportunidade de poder disfrutar das películas finalistas (documentais, longametraxes e curtas) dos XXIII PREMIOS MESTRE MATEO.
Esta TERCEIRA proxección terá lugar no Auditorio Municipal de Vilalba o xoves 4 de setembro de 2025, ás 20:00 horas.
Imaxe da autora recollida do seu espazo na AELG. Autoría: Distrito Xermar (2022)
A obra da sonense Patricia Torrado Queiruga, que recibirá 7.000 euros e verá publicada a súa creación, foi a elixida polo xurado integrado por figuras de prestixio cultural e académico
O xurado do LI Certame Literario do Concello de Vilalba vén de facer público o seu ditame, proclamando como gañadora a obra Nakba, presentada baixo o lema “Coma quen lambe a ferida”, e cuxa autoría correspondeu á escritora e poeta Patricia Torrado Queiruga.
O certame, o máis antigo de Galicia e tamén un dos de mellor dotación económica, está recoñecido como unha das grandes citas da creación literaria no país. A gañadora desta edición recibirá un premio de 7.000 euros, ao que se suma a publicación da obra.
O xurado estivo composto por figuras de referencia do ámbito cultural e académico galego: Darío Villanueva, membro da Real Academia Española; Ramón Villares, catedrático de Historia; Xulio Xiz, xornalista; Fidel Fernán, director do Grupo de Radio Principal; Luz Airado, avogada e poeta; e Andrea Fernández Maneiro, poeta e gañadora da edición anterior.
A alcaldesa Marta Rouco destacou “a importancia de manter vivo un certame que forma parte da identidade cultural de Vilalba e que é, ademais, un referente en toda Galicia polo seu prestixio e pola súa aposta decidida pola creación literaria”. Engadiu que “detrás destas cinco décadas de historia hai un compromiso claro co talento, a cultura e a palabra escrita”.
Pola súa parte, a concelleira de Cultura Mónica González puxo en valor a calidade da obra gañadora e da propia convocatoria: “o Certame Literario de Vilalba demostra ano tras ano a súa capacidade de atraer voces potentes e diversas do panorama literario galego. Este premio non só promove a creación, senón que tamén proxecta o nome de Vilalba”.
A traxectoria da gañadora
Patricia Torrado Queiruga (Porto Son, A Coruña) é licenciada en Filosofía pola USC, museóloga e experta en conservación e restauración do patrimonio pola UAH, ademais de contar con mestrados en Xestión Cultural e en Relacións Públicas e Protocolo pola UPO.
A súa traxectoria literaria está avalada por numerosos recoñecementos, entre os que destacan:
Primeiro premio do Certame Manuel Murguía de narracións breves (2020).
Primeiro premio do III Certame de poesía Torre de Caldaloba (2020).
Primeiro premio no III Certame de Caligramas Constanza de Castro (2023).
Primeiro premio no XI Concurso de Poesía Albariza de Artes-Concello de Ribeira (2024).
Segundo premio no XXIX Certame Francisco Añón de Poesía (2025).
Ademais foi galardoada en varias ocasións nos Certames de Microrrelatos do Día do Libro de Vilalba, nos que acadou distintos premios entre 2019 e 2022, así como noutras citas literarias de relevancia.
Sen esquecer as súas colaboracións con artigos de opinión en espazos de información variados como La Voz de Galicia ou na súa sección DEMIURXIA en Culturalia GZ.
Imaxe das persoas integrantes do xurado no LI Certame Literario do Concello de Vilalba, acompañadas da alcaldesa Marta Rouco
*A información para realizar esta nova foi recompilada principalmente na web do Concello de Vilalba
En Albá, Santo Xusto e Coence (Palas de Rei), o 5 e 6 de setembro, o festival SON D´ALDEA. (Inscricións e programa en https://sondaldea.es/).
E non esquecer que a Fundación Eira da Xoana organiza o 23 de agosto unha Homenaxe ás vítimas da represión, sen Altri (https://eiradaxoana.gal/).
En cambio este ano non se poderá desfrutar dunha das citas fundamentais do verán da Ulloa, o FESTIULLOA. Agárdase que Quercus Sonora o retome para o ano próximo, salientando todo o que esta asociación de Antas de Ulla fai pola cultura e a conservación do patrimonio natural da Ulloa.
O domingo 24 de agosto ás 18,30 h presentarase, no salón de actos do Centro sociocultural de Monterroso, o libro ULLA, ULLOA, ULLOÁNS, editado pola Editorial Medulia e que abrangue 17 poemas de poemas do poeta monterrosino residente en Irlanda Marco García Vaquero. Na presentación intervirán o autor, Xosé Luis Santiso, Jesús Otero Calvo, Esperanza Díaz, Alba García e Francisco Pardo. Contarase coa actuación musical da Escola Infantil de Gaitas de Falcatrueiros.
O galardón, que pretende salientar a traxectoria de profesionais das artes escénicas galegas co recoñecemento de figuras imprescindibles do sector de xeito anual, entregarase en outubro durante a celebración da 34ª edición do Festival Internacional Outono de Teatro de Carballo
O xurado destacou a riqueza e a versatilidade dunha creadora que é actriz, dramaturga e directora, co desexo de visibilizar novas formas de xograres e novas xeracións no FIOT, con figuras como Areta, que abren renovados e estimulantes camiños para as artes escénicas galegas
O xurado remarcou, tamén, a solidez da traxectoria de Areta Bolado, tan querida pola súa linguaxe contemporánea irreverente e estimulante, cunha bagaxe recoñecida dentro e fóra de Galicia, e cun pulso creativo que compartevalores fundamentais para FIOT como a loita polo feminismo e a inclusión
Neste 2025, como unha mostra máis da aposta do FIOT pola raíz e o apoio ao talento local, a Asociación Telón e Aparte encargoulle o deseño do novo trofeo da Xograresa de Outono á artesá carballesa María Barca, impulsora da Olería CRÚA en Carballo, que será tamén a encargada do deseño do Premio do Público
O Festival Internacional Outono de Teatro de Carballo, o FIOT, outorgará este 2025 o premio Xograresa de Outono a Areta Bolado. Deste xeito, o encontro, unha cita de referencia en Galicia e no estado polo seu traballo a prol da creación de novos públicos e o fortalecemento da escena, mantén viva a chama da posta en valor e o recoñecemento de figuras imprescindibles do sector cultural galego, coa entrega anual dun galardón que quere salientar a traxectoria de profesionais das artes escénicas.
Nesta ocasión, as xograresas e xograreses do FIOT decidiron premiar á actriz, dramaturga e directora Areta Bolado, unha das fundadoras da compañía A Panadaría. No seu fallo, o xurado destacou á artista, ademais de pola súa relevante e valiosa traxectoria para as artes escénicas galegas, “pola riqueza e a versatilidade dunha creadora que é actriz, dramaturga e directora, co desexo de visibilizar novas formas de xograres e novas xeracións no FIOT, con figuras como Areta, que abren renovados e estimulantes camiños para as artes escénicas galegas”. O xurado remarcou, tamén, “a solidez da traxectoria de Areta Bolado, tan querida pola súa linguaxe contemporánea irreverente e estimulante, cunha bagaxe recoñecida dentro e fóra de Galicia, e cun pulso creativo que comparte valores fundamentais para FIOT como a loita polo feminismo e a inclusión”.
Areta Bolado –cuxos espectáculos xunto á compañía A Panadaría foron tan celebrados nas súas visitas ao Pazo da Cultura de Carballo– recollerá o seu galardón este outono en Carballo, durante a celebración da nova edición do FIOT, collendo o relevo do actor e narrador Avelino González, premiado en 2024.
SOBRE ARETA BOLADO
Areta Bolado (O Porriño, 1985) é actriz e creadora escénica. Foi unha das fundadoras da compañía A Panadaría, na que artellou un teatro hilarante, transgresor e profundamente político. Dentro desta formación, ademais de coordinar todos os proxectos pedagóxicos, foi cocreadora e actriz de PAN!PAN!, Panamericana, Elisa e Marcela e As que limpan.
O seu carácter irreverente e lúdico como intérprete enchoupa outros proxectos teatrais e audiovisuais, como Soño dunha noite de verán (Marta Pazos, Voadora), Neorretranca e Posmorriña (Centro Dramático Galego), 9 Fugas (Fon Cortizo), Descarrilados (Fer García Ruiz) ou Xan (Lucía Estévez e Miguel Canalejo). Como creadora, mantén desde hai anos unha vía de exploración entre a música e o teatro xunto con Ailén Kendelman, da que xurde o conxunto internacional Áureas, a conferencia-concerto Barba Inguinal e o máis recente Unha señora orquestra.
Na súa traxectoria recibe numerosos premios autonómicos e estatais como actriz, dramaturga e directora, mais tamén foi recoñecida por diversos colectivos polo seu compromiso feminista e polos dereitos do colectivo LGBTIQ+.
UN NOVO TROFEO PARA A XOGRARESA DE OUTONO DO FIOT 2025
Como unha mostra máis da aposta do FIOT pola raíz e o apoio ao talento local, neste 2025, a Asociación Telón e Aparte encargoulle o deseño do novo trofeo da Xograresa de Outono á artista e artesá carballesa María Barca, impulsora do espazo CRÚA en Carballo. A creadora será tamén a encargada do deseño do Premio do Público do FIOT a partir desta 34ª edición da cita.
María Barca é carballesa de nacemento, pero, sobre todo, de corazón. Fala pouco, mais ten mans creadoras. Ela di que non é fotógrafa, oleira ou ceramista, senón que desfruta de afrontar novos retos coas mans sen etiquetas. Estudou Belas Artes na Universidade de Vigo, tratando de combinar traballos plásticos e fotográficos. Sinte predilección polos proxectos sociais, solidarios e educativos, a produción artesanal, a cerámica e a fotografía documental. Despois de ter pasado por Madrid, Perú, Bilbao ou Berlín, regresou a casa, onde continúa ampliando a súa formación tanto artística como persoal. En agosto de 2022 publicou o seu primeiro libro, Buño de seu, un traballo documental e fotográfico sobre os oleiros e oleiras desta vila, que supuxo o seu achegamento definitivo ao mundo da cerámica. En novembro do 2022 abriu as portas dun espazo que materializa as súas aspiracións creativas: CRÚA, un obradoiro de cerámica en Carballo.
Esta nova colaboración do FIOT con María Barca amosa o desexo do festival de abrirse a novas disciplinas e poñer en valor outras ricas manifestacións artísticas, entre elas, a olería, que ten un peso tan importante na comarca bergantiñá. Con este deseño dos trofeos da Xograresa de Outono e do Premio do Público por parte da artesá carballesa, o FIOT cristaliza unha vez máis a súa aposta pola transversalidade e a converxencia entre as diferentes artes, o feminismo, o apoio ao talento emerxente e o impulso da creación local, poñendo tamén en valor a nosa raíz, o traballo manual e a tradición baixo un prisma contemporáneo.
SOBRE O FESTIVAL INTERNACIONAL OUTONO DE TEATRO (FIOT)
Máis de tres décadas creando teatro
O Festival Internacional Outono de Teatro (FIOT) é un festival que ofrece un programa comprometido coas artes escénicas e cos proxectos máis prestixiosos do teatro actual. Está organizado pola Asociación Cultural Telón e Aparte e conta coa colaboración do Concello de Carballo. Pola súa traxectoria, a calidade da programación, a variedade das propostas de intermediación cultural que ofrece e pola súa proxección, o FIOT sitúase como un dos festivais máis importantes de Galicia e referente cultural durante o outono: un mes completo de programación, con preto de 40 espectáculos e ducias de actividades paralelas, converten a Carballo na capital das artes escénicas da comunidade galega.
Desde hai 34 anos, o FIOT dá a coñecer en Carballo o traballo de compañías de referencia e de creadoras emerxentes. Mais, especialmente, busca atraer novos públicos ao teatro. O festival nace en 1992 como espazo para ofrecer unha programación de teatro de calidade na comarca de Bergantiños e impulsar unha estrutura creativa arredor das artes escénicas na zona. Desde entón, FIOT é o lugar de encontro entre artistas, compañías e programadoras, e aposta por estimular a creación e o traballo en rede tanto a través da oferta de espazos para residencias artísticas como da implicación, do propio festival, na produción e novos espectáculos, fundamentalmente de compañías galegas.
Nas súas pasadas 33 edicións, FIOT contou coa participación das compañías máis relevantes de Galicia e España, ademais do ámbito internacional, outorgando así espazo a numerosas disciplinas, novas linguaxes, xéneros e formatos; ademais de ofrecer estreas absolutas ou no territorio galego. Desde xeito, máis de 350 formacións e artistas presentaron os seus traballos no FIOT, con nomes tan salientables no marco do panorama escénico galego, nacional e internacional coma Blanca Portillo, Pablo Messiez, Rafael Álvarez ‘El Brujo’, Yllana, Ron Lalá, Pont Flotant, Titzina, Kamikaze Producciones, Compañía do Chapitô, Leo Bassi, Grupo Chévere, Timbre 4, Mofa e Befa, Xosé A. Touriñán, Quico Cadaval…
Ao longo da súa traxectoria, diversos recoñecementos acreditaron o intenso traballo do FIOT para achegar as artes escénicas do século XXI á cidadanía e recoñeceron o festival como unha das iniciativas teatrais do noroeste peninsular máis relevantes na actualidade. Entre outras distincións cítanse, ademais da ‘Insignia Cultural’ do ‘Observatorio de la Cultura’ da Fundación Contemporánea como mellor proxecto cultural de Galicia en 2022, o Premio da Cultura Galega 2018 no ámbito das artes escénicas outorgado pola Xunta de Galicia ou o Premio Galego do Ano 2018, entre outros.
