As entradas para asistir á cita, que contará con artistas convidadas, estarán dispoñibles a partir das 12.00 horas do xoves 30 en www.salacapitol.com
De Ninghures vai de Feira, e de foliada, á Sala Capitol. O vindeiro 13 de marzo, a banda convidará ao público a sacar puntos raros e todos os que lle presten para presentar no mítico recinto compostelán o seu novo traballo discográfico, Feira, que verá a luz nas vindeiras semanas. As entradas para asistir á cita, na que a formación subirá ao escenario a diversas artistas convidadas, sairán á venda o xoves 30, ás 12.00 horas, na páxina web www.salacapitol.com. O prezo a través desta plataforma será de 15 euros (más gastos de xestión), mentres que na billeteira será 18 euros.
Logo de presentar nas últimas semanas Corazón Alionado, A BurriñaeO Último Baile -os primeiros adiantos do seu novo LP, producido polo recoñecido Juan De Dios-, De Ninghures prepara o traxe e os allos para celebrar unha festa que, a ollos da banda, será irrepetible, pois estará ateigada de sorpresas. O día 13 de marzo o público asistente poderá bailar e descubrir ao vivo os temas que conforman unha Feira que, ademais de nomear o traballo, impregna o universo simbólico do álbum.
Porén, antes da presentación en Santiago de Compostela, De Ninghures contará con outras dúas citas sobre os escenarios. Primeiro visitará Narón o sábado 1 de febreiro para participar na gala Youtubeiras+ e, vinte días despois, o grupo aterrará en Bruxelas, xa que a formación será parte do cartel do festival Emigrason canda Fillas de Cassandra, Tanxugueiras e Terbutalina.
De Ninghures
De Ninghures fan música cos pés na terra e os brazos abertos. Son unha das bandas referentes da potente e rica escena actual en Galicia. Un grupo que mestura mestría musical e actitude desenfadada, que sorprende en cada canción coas súas diferentes voces e a súa actualización das coplas e melodías populares, e que nos fai tanto bailar como emocionarnos coa súa particular fusión da música tradicional galega con ritmos e inspiracións doutras culturas como a latinoamericana ou a magrebí.
En 2022 publicaron Aquí, o seu primeiro álbum, e máis de medio cento de concertos e algúns sinxelos despois – coma o exitoso Morena, galardoado como Mellor Música do Ano en Galicia nos Premios Ari(t)mar, ou a enérxica muiñeira de montaña Poço-, nos primeiros meses de 2025 presentarán traballo novo, do que xa se coñecen Corazón Alionado, A BurriñaeO Último Baile.
O Noia Harp Fest é o único evento dedicado integramente ao instrumento de todo o noroeste peninsular; no que se dan cita artistas de diversos estilos e orixes e promove o encontro entre o alumnado de arpa das distintas escolas de Galicia
A terceira edición do Premio de Composición Portus Apostoli, organizado polo Noia Harp Fest coa colaboración do Concello de Noia,recibiu unha ducia de propostas de Alemaña, Arxentina, Austria, Colombia, España, Estados Unidos, Finlandia, Israel e Italia
O Festival Internacional de Arpa Vila de Noia, coñecido como Noia Harp Fest, celebrará a súa duodécima edición este verán. Os días 30 e 31 de xullo, e 1 e 2 de agosto, a programación do único evento no noroeste peninsular dedicado a este instrumento regresará os espazos máis emblemáticos da localidade coruñesa.
O Noia Harp Fest, dirixido por Rodrigo Romaní, Beatriz Martínez e Alba Barreiro, -e que conta co apoio do Concello de Noia e da Xunta de Galicia a través de Turismo de Galicia, ademais da colaboración da Deputación da Coruña-, é unha cita impresincible do calendario musical do verán para todas aquelas amantes da arpa así como da diversidade artística; pois o evento reúne cada tempada numerosas bandas e solistas, tanto galegas coma internacionais, de diferentes estilos e orixes. O fío condutor do festival é a interpretación a través da arpa, polo que durante unhas xornadas o público pode descubrir desde músicas ancestrais até creacións contemporáneas de vangarda, chegadas de países como Francia, Irlanda, Lituania, Paraguai, Polonia, Senegal ou Ucraína, e por suposto desde o territorio galego: precisamente o Noia Harp Fest é o evento que acolle, desde 2023, o Encontro de Escolas de Arpa de Galicia, que reúne ao alumnado dos centros galegos para tecer comunidade, convivir e interpretar, xuntas, unha composición.
Outra iniciativa tamén promovida polo Noia Harp Fest, e que neste caso conta co apoio específico do Concello de Noia, é a convocatoria do Premio Internacional de Composición Portus Apostoli, un certame innovador que pretende ampliar o repertorio actual de obras para arpa e orquestra. A súa terceira edición, aberta até o pasado 23 de decembro a creadoras e creadores de calquera nacionalidade, recibiu un total de 11 propostas orixinais chegadas de Alemaña, Arxentina, Austria, Colombia, España, Estados Unidos, Finlandia, Israel e Italia.
O galardón, que conleva unha achega económica de 2.500 euros, suporá tamén a estrea da propia obra da man do NHF. Un xurado especializado, conformado por arpistas e directores de orquestra de recoñecido prestixio, será o responsable de valorar e premiar as creacións, nas que se terán en conta, entre outros aspectos, a proposta creativa; o tratamento da técnica e da escritura para arpa -así como da orquestración-; a coherencia, proporción e equilibrio no traballo técnico; ou o equilibrio entre dificultade e resultado musical. Por último, o tribunal valorará de forma positiva aquelas obras con referencias á música ou á cultura galega. O fallo do xurado terá lugar o 13 de febreiro.
O Instituto de Estudos Chairegos (IESCHA), coa colaboración do Concello de Vilalba, organiza a presentación do libro “SPEECHWRITER”, de PAULO NASEIRO, que terá lugar na Casa da Cultura de Vilalba, o xoves 30 de xaneiro de 2025, ás 20:00 horas, e contará coas intervencións de Paulo Naseiro, Marisa Barreiro e Chema Felpeto.
Pé com Pé, o novo tema de OMIRI, o artista portugués que está revolucionando a música tradicional portuguesa, está xa dispoñible en todas as plataformas. Esta nova canción combina a riqueza atemporal da música de raíz lusa coa innovación dos sons máis contemporáneos, como xa é tónica habitual nel. A base electrónica constrúese integramente a partir da manipulación de sons captados en recollidas de audio e vídeo realizadas por OMIRI durante os últimos oito anos de norte a sur de Portugal. Este tema exerce como terceiro sinxelo do seu próximo álbum de longa duración, Modas Novas e Algumas Velhas, que ten previsto o seu lanzamento o próximo 7 de febreiro.
Pé com Pé conta coa voz de Beatriz Melo e instrumentos como o bombo ou o triángulo, así como sons de louza rachando, que empastan á perfección coa viola braguesa de OMIRI, a veces distorsionada, amosando de novo a máxima do proxecto do artista portugués, o diálogo entre tradición e innovación. A letra, rica en poesía popular, celebra o amor e a memoria, mentres o ritmo invita á danza e a festa.
Data de lanzamento do seu próximo álbum
OMIRI está xa ante o inminente lanzamento do seu próximo álbum de longa duración. Este último tema exerce como terceiro e último sinxelo do xa nomeado Modas Novas e Algumas Velhas, con data de lanzamento xa anunciada para o próximo venres7 de febreiro.
Presentación do disco cun concerto en Galicia
O seu primeiro concerto de presentación do novo disco será en Galicia. O sábado 15 de febreiro estará na sala Rebullón de Mos a partir das 22:00h. As entradas están xa á venda en salarebullón.com por 10€ + gastos de xestión.
RICHI CASÁS ESTARÁ ESTE SÁBADO NA CASA-MUSEO MANUEL MARÍA PARA FALAR DO CANTAR DE ROSA E ADOLFINA, A SÚA AVOA E MADRIÑA, CANTAREIRAS EN QUE SE PERSONIFICA, ENTRE OUTRAS, O DÍA DAS LETRAS GALEGAS DE 2025
O músico e estudoso da música tradicional interpretará algunhas das pezas cantadas por Rosa e Adolfina
Richi Casás, músico, profesor, estudoso da música tradicional e saxofonista da Banda Xangai, estará este sábado, día 25 de xaneiro, ás 19 horas, na Casa-Museo Manuel María (Outeiro de Rei) para falar do cantar de Rosa e Adolfina, a súa avoa e madriña respectivas, cantareiras en que se personifica, entre outras, o Día das Letras Galegas de 2025, dedicado este ano á poesía popular oral.
Richi interpretará algunhas das pezas cantadas por Rosa e Adolfina, e que recolle no libro-cd Fuliada na vila (2020), editado por aCentral Folque. Quen quixer, pode traer a súa pandeireta este sábado, para o acompañar nestas composicións.
Rosa e Adolfina foron dúas labregas do concello de Cerceda (A Coruña), que naceron e viviron na Vila da Igrexa. Tiveron sona na contorna por ser boas cantadoras e pandereteira. As súas letras e melodías foron recollidas pola musicóloga Dorothé Schubarth.
A actividade deste sábado, que conta coa colaboración de Vicepresidencia da Deputación de Lugo, é de acceso libre até encher o aforo, mais é necesario facer reserva en contacto@casamuseomanuelmaria.gal ou no whatsapp 698177621.
