O FIOT despide esta fin de semana a súa 31ª edición coas voces de Juan Mayorga, Blanca Portillo, Patricia de Lorenzo, Pablo Messiez e Tito Asorey
As grandes figuras das escenas galega e estatal serán o ramo da última fin de semana de programación do Festival Internacional Outono de Teatro de Carballo
O FIOT ofrecerá o sábado 29 a estrea en Galicia do último éxito da tempada madrileña, ‘La voluntad de creer’, dirixida por Pablo Messiez, e do monólogo ‘Mundo para lelos’, do humorista vasco Óscar Terol; ademais doutras dúas estreas absolutas no marco do Certame Metro Cadrado: ‘Viaxar é un pracer’, de Assircópatas, e ‘Actriz, chora’, de Cacharela Teatro
O Salón social do Pazo da Cultura acollerá tamén o sábado, a partir das 13.15 horas, a derradeira sesión da primeira tempada do Escola do espectador nas ondas, na que a xornalista cultural Paloma Cortina (Dramedias) conversará con Pablo Messiez e o elenco de ‘La voluntad de creer’
O Festival Internacional Outono de Teatro de Carballo, o FIOT, despedirá esta fin de semana a súa 31ª edición por todo o alto. As grandes voces das escenas galega e estatal daranse cita en Carballo: Juan Mayorga, Blanca Portillo, Grupo Chévere e Patricia de Lorenzo, Pablo Messiez, Tito Asorey e Xosé A. Touriñán, os pratos fortes deste #FIOT31, terán un especial protagonismo estes días, nos que o público poderá gozar de ata tres espectáculos do Programa de Sala. O sábado 29 será a xornada central co certame ao acoller representacións de catro montaxes, todas elas estreas galegas ou absolutas; ademais da derradeira sesión ao vivo da Escola do espectador nas ondas.
A primeira das citas terá lugar o venres 28. A Xograresa de Outono 2019, Patricia de Lorenzo,presentará en Carballo -no marco co ciclo OTNI- a súa conferencia performativa ‘Pequenas mentiras para contar grandes verdades’, un traballo no que aborda, a partir do proceso de construción dos distintos papeis que interpretou co Grupo Chévere, como é a representación de personaxes que, na meirande parte das ocasións, actúan como subalternas e reproducen os imaxinarios do poder. De Lorenzo expón como o traballo de actriz pode ser, ás veces, un modelo de resistencia e testemuño real da xente anónima que nunca é protagonista.
Ao día seguinte será a quenda do máis recente éxito da tempada escénica madrileña: ‘La voluntad de creer’, unha coprodución de Buxman Producciones e do Teatro Español escrita e dirixida por Pablo Messiez. A obra iniciará este sábado 29 a súa xira estatal e a primeira parada será en Carballo, dando pé á celebración da estrea en Galicia desta montaxe, que indaga na relación entre vontade, fe e suxestión a partir da historia dunha familia, cuxo irmán menor sostén ser Xesús de Nazareth. A peza inspírase na película ‘Ordet’, de Carl Theodor Dreyer, quen á vez adaptou a obra ‘La palabra’, de Kaj Munk. A estrea galega de ‘La voluntad de creer’ terá lugar o sábado 29 no Auditorio do Pazo da Cultura contra ás 20.30 horas.
Outra das citas máis esperadas deste #FIOT31 chegará o domingo 30. Será o regreso de Blanca Portillo ás táboas do Pazo da Cultura logo da súa aclamada interpretación no 2015 de ‘El Testamento de María’, a coprodución do Centro Dramático Nacional, Festival Grec e Avance Producciones Artísticas, que resultou gañadora do Premio do Público do FIOT daquel ano. Desta quenda, a actriz volve coa aclamada ‘Silencio’, do recoñecido dramaturgo Juan Mayorga, un dos autores vivos máis representados e a quen se lle outorgou estes días, precisamente, o Premio Princesa de Asturias das Letras; galardón que se suma aos xa recibidos Premio Nacional de Teatro (2007), Premio Nacional de Literatura Dramática (2013), e numerosos Max como Mellor Autor ou Mellor Adaptación.
‘Silencio’ toma como referencia, precisamente, o discurso de ingreso de Mayorga na Real Academia Española, un texto que o dramaturgo converteu en teatro e no que pon de manifesto o valor do tempo e do silencio. Blanca Portillo é a responsable de levar á escena a peza, na que o autor tamén viaxa polos silencios teatrais que aínda soan na súa memoria e no seu corpo.
A última función do Programa de Sala deste 2022 será o 31 de outubro. Chegará, coma no 2019 (edición que se pechou con ‘Fariña’), da man de Tito Asorey, Xosé A. Touriñán e Ainé Producións, desta quenda en coprodución co Centro Dramático Galego. ‘Recortes, caneos e outras formas de driblar’, que parte dun texto do xornalista Nacho Carretero e que conta con dramaturxia de José L. Prieto, fará a primeira parada da súa xira en Carballo cunha función que porá o broche dourado á 31ª edición do FIOT.
Xornada de estreas e despedidas o sábado 29
Este mesmo sábado 29 o público do FIOT tamén poderá gozar coas dúas últimas montaxes do VI Certame de Micro-Escenas Metro Cadrado, a liña de programación que promove a creación de pezas escénicas experimentais en espazos non teatrais e singulares de Carballo. Ao igual que na fin de semana pasada, terán lugar dúas estreas absolutas: ‘Viaxar é un pracer’, de Assircópatas, unha comedia do absurdo que reflexiona sobre o noso papel coma turistas e que se poderá ver no despacho do alcalde; e ‘Actriz, chora’, a peza de Cacharela Teatro que critica, desde a comedia, os estereotipos e os desafíos do sector artístico, en especial das mulleres novas. Ambas obras contarán con catro pases (13.00, 13.30, 19.00 e 19.30 horas) e, coma sempre, recoméndase reservar previamente a praza en fiot.microteatroentrada@gmail.com.
De xeito paralelo, no salón social do Pazo da Cultura celebrarase a derradeira sesión da primeira tempada da Escola do espectador nas ondas, os encontros nos que artistas, xornalistas especializadas en artes escénicas e público comparten conversa e facilitan a comprensión e análise dos espectáculos que conforman a programación do festival. Desta quenda, a xornalista cultural de RTVE Paloma Cortina (Dramedias) manterá unha conversa aberta ao público co elenco de ‘La voluntad de creer’ e co seu director e creador, Pablo Messiez, quen participará vía telemática na gravación do podcast.
Xa pola noite o Mercado municipal acollerá a última función da XXIII edición do ciclo de narración oral Rúa dos Contos: será coa estrea en Galicia de ‘Mundo para lelos’, a última creación do humorista, actor e director vasco Óscar Terol, quen porá en evidencia un mundo que se asoma incomprensible para todas as persoas e do que sempre tentamos ocultar o noso “eu parvo”.
A ‘Escola do espectador nas ondas’ do FIOT acolle este sábado unha conversa aberta ao público entre Chévere e Pont Flotant
O Salón social do Pazo da Cultura acollerá a partir das 13.00 horas o encontro, que conducirá a xornalista cultural Machús Osinaga
O VI Certame Metro Cadrado ofrecere as estreas absolutas de ‘Xeografía dos corpos’ baixo a ponte do Parque do Anllóns e de ‘Homeless’ no escaparate dunha tenda deportiva
O FIOT avanza no seu compromiso coa accesibilidade e programa esta fin de semana, no marco da Rúa dos Contos, a peza ‘Contando polos dedos’, con Quico Cadaval e Chusa Pérez, unha obra inclusiva que se representará en galego e lingua de signos
O Festival Internacional Outono de Teatro de Carballo celebrará esta fin de semana unha nova sesión da Escola do espectador nas ondas, os encontros promovidos polo FIOT entre público, artistas e xornalistas especializadas en artes escénicas para promover a comprensión e o análise dos espectáculos que conforman a programación do festival. O Salón social do Pazo da Cultura de Carballo acollerá este sábado 22, ás 13.00 horas, unha conversa aberta ao público que conducirá a xornalista cultural de RTVE Machús Osinaga (La Mandrágora, Atención Obras, Cine de Barrio) e que contará coa participación da compañía valenciá Pont Flotant e da galega Chévere.
O encontro, aberto ao público, contará con petiscos e grolos para as e os asistentes, e permitirá ao público coñecer de primeira man ‘Eclipse total’, o novo traballo de Pont Flotant que se estrea este sábado en Galicia no marco do programa de Sala do FIOT, ou ‘Pequenas mentiras para contar grandes verdades’, a conferencia performativa que Patricia de Lorenzo (Xograresa de Outono 2019) presentará o vindeiro venres 28 no OTNI e no que aborda o proceso de reación dalgunhas das personaxes que interpretou en Chévere.
Este mesmo sábado 22 o público do FIOT tamén poderá gozar con novas propostas do VI Certame de Micro-Escenas Metro Cadrado, a liña de programación que promove a creación de pezas escénicas experimentais en espazos non teatrais e singulares de Carballo. Desta quenda serán dúas estreas absolutas: ‘Xeografía dos corpos’, da Compañía Ánxela Blanco, un espectáculo de danza-circo creado por Ánxela Blanco e Simone Romanò que se poderá ver baixo a ponte do Parque do Anllóns; e ‘Homeless’, peza qde Mónica Paradela que emprega o texto e as habilidades circenses para presentar o auxe e caída dunha deportista de élite, e que se poderá ver no escaparate da tenda Zocas. Ambas obras contarán con catro pases (13.00, 13.30, 19.00 e 19.30 horas).
Xa pola noite o Mercado municipal acollerá unha nova función do ciclo de Narración Oral Rúa dos Contos, que este ano rende homenaxe a Pedro Brandariz. Será a quenda de ‘Contando polos dedos’, un espectáculo accesible para persoas ouvintes, xordas, interesadas na lingua de signos e ou nas capacidades expresivas desta fala en Galicia. Unha creación de palabras e sinlencios, na que Quico Cadaval e Chusa Pérez Vallejo retoman unha colaboración dos anos 90 e voltan con estas dúas maneiras de contar: pola boca e polos dedos.
A programación da fin de semana pecharase cunha das xoias da escena teatral alternativa: ‘Freak’, de Amor Producciones, baseada no texto da dramaturga Anna Jordan. Baixo a dirección de Paula Amor, a proposta -enmarcada no ciclo OTNI- é unha peza de teatro social sobre a feminidade que se converteu en toda unha referencia internacional pola súa maneira de abordar a sexualidade.
Os espectáculos que triunfan na escena ‘off’ estatal chegan a Carballo da man do FIOT
Historias de mulleres e a posta en valor da creación feminina a través de diferentes xeracións marcan o fío da programación desta fin de semana no FIOT31
O Pazo da Cultura acolle, no marco do Programa de Sala, a estrea en Galicia de ‘Impalpable’, da compañía arxentina Sambuseck (venres 21), e ‘Eclipse total’, de Pont Flotant (sábado 22)
‘Freak’, a adaptación que Paula Amor fai do texto de Anna Jordan -unha das dramaturgas europeas máis relevantes das últimas décadas- chega ao OTNI o domingo 23
‘Amantis’, escrita e dirixida por Tamara Canosa, trasladará mañá ao público adolescente, no marco do FIOTeen, unha ollada optimista, aceda e sen prexuízos sobre as linguaxes dixitais e novas formas de relacionarnos; mentres que a creadora e intérprete Natalia Fernandes presentará o xoves 20 o work in progress de ‘¿Podemos hablar de Caetano?’
Historias de mulleres e a posta en valor da creación feminina a través de diferentes xeracións marcan o relato que conforma a programación da cuarta fin de semana da 31ª edición do Festival Internacional Outono de Teatro, o FIOT. Pezas que están a triunfar na escena ‘off’ madrileña, como ‘Impalpable’, da compañía arxentina Sambuseck, ou ‘Freak’, a adaptación que Amor Producciones realiza sobre a obra de Anna Jordan, chegan a Carballo da man do FIOT, nun momento no que tamén regresará ao certame Pont Flotant coa súa nova montaxe: ‘Eclipse total’. Ademais, o público adolescente terá ocasión de gozar dunha función de ‘Amantis’, a última creación de Rebordelos; e a Natalia Fernandes avanzará no OTNI o estado da súa nova creación, ‘¿Podemos hablar de Caetano?’, sobre o universo poético de Caetano Veloso.
O FIOT propón para esta fin de semana, no marco do Programa de Sala dúas estreas en Galicia. A primeira das funcións chegará o venres 21 da man de Sambuseck, que trae a Carballo unha peza ambientada na Arxentina dos anos 50 que combina a complexidade das personaxes cunha coidada estética cinematográfica, na que as mulleres reivindican o seu espazo e territorio social. ‘Impalpable’ é unha creación colectiva fermosa, evocadora e agridoce que se inspira en textos, entrevistas e na biografía do escritor arxentino Manuel Puig (autor, entre outras, de ‘El beso de la mujer araña’). Nunha localidade na que o silencio e a mentiras son as premisas sobre as que se sustenta a vida cotiá, as mulleres protagonistas vense obrigadas a ocultar a realidade coa ficción.
A segunda das citas do Programa de Sala co público do FIOT chegará o sábado 22 e será con outra compañía querida no certame: Pont Flotant. Os valenciáns presentan o seu ‘Eclipse total’, unha fermosa montaxe sobre o legado e a memoria, na que empregan o eclipse como metáfora para abordar como vivir sabendo que, un día, deixaremos de estar vivos. A compañía vólvese enredar nos fíos da memoria para cuestionar como nos preparamos ante un feito inevitable e irreversible como é a morte. Coa sinxeleza, naturalidade e delicadeza que caracteriza o universo da compañía, Pont Flotant presenta un exercicio escénico no que parten do humor e da beleza para mesturar o cotián co trascendental, e o o íntimo e persoal adquire unha dimensión o social.
Xa na xornada do domingo, será a quenda doutra das xoias da carteleira estatal e cita imprescindible para as máis fioteiras e fioteiros: ‘Freak’, de Amor Producciones, o texto de Anna Jordan, unha das dramaturgas máis relevantes da escena europea dos últimos anos, e no que aborda o lugar que ocupa a muller dentro da sociedade. Freak, adaptada e dirixida por Paula Amor, é unha peza de teatro social que se converteu nunha referencia internacional polo seu xeito de abordar a sexualidade, entre a despesoeranza e o humor. A obra, na que as personaxes interpretadas por Lorena López e Lara Serrano se abren completamente ao público, fala de como loitar contra o que xa está establecido; do baleiro e de non recoñecerse a unha mesma fronte ao exterior e, ao cabo, de como o teatro pode dar resposta a os nosos problemas actuais.
Novas citas do FIOTeen e OTNI
A programación escénica desta semana do FIOT no Pazo da Cultura -pois nos institutos a compañía Galeatro segue a achegar a súa particular visión sobre o certame- comezará mañá mesmo, martes 18, cunha función de ‘Amantis’, de Rebordelos, dirixida por Tamara Canosa e escrita pola propia directora e Xacio Baño. A produción, na que o actor Roque Ruiz interpreta o protagonista, explora a fenda xeracional entre nativos e non nativos dixitais, tentando comprender como inclúen as redes sociais, os selfies, o sexting, a igualdade ou as novas masculinidades na formación da identidade propia e nas relacións interpersoais. A cita será ás 11.00 horas no auditorio do Pazo.
O xoves 20 ás 20.30 horas, en paralelo á función do OTNI programada para este domingo -‘Freak’-, o ciclo achegará o work in progress de ‘¿Podemos hablar de Caetano?’, a nova creación da performer, bailarina e coreógrafa brasileira Natalia Fernandes, un proxecto a cabalo entre un álbum de música, unha conversa e unha coreografía que achegará ao centro do escenario o universo poético do cantante Caetano Veloso. A peza, aínda en proceso, é resultado da residencia que a artista levou a cabo no mes de agosto no Pazo da Cultura no marco das Residencias Paraíso, impulsado polo Colectivo RPM e que conta co apoio da Agadic e do Concello de Carballo.
A ‘Escola do espectador nas ondas’ propón esta fin de semana dúas conversas abertas ao público con Titzina Teatro e Leo Bassi
O Salón social do Pazo da Cultura acollerá as conversas o sábado 15 e o domingo 16, guiadas polo xornalista Daniel Galindo, cos intérpretes e creadores destes dous espectáculos, cuxa estrea en Galicia terá lugar no marco do FIOT31
A Escola do espectador nas ondas, de acceso libre, terá continuidade dúas fins de semana máis, e contará con Patricia de Lorenzo, Xesús Ron e Pont Flotant (sábado 22) e Pablo Messiez, Rebeca Hernando e José Juan Rodríguez (sábado 29).
As estreas galegas de ‘Conferencia espectacular’, ‘Búho’ e ’70 años: Leo Bassi’ marcan a programación dunha fin de semana na que dá comezo o VI Certame Metro Cadrado
O Festival Internacional Outono de Teatro de Carballo celebrará esta fin de semana dúas sesións da nova Escola do espectador nas ondas, os encontros promovidos polo FIOT entre público, artistas e xornalistas especializadas en artes escénicas para promover a comprensión e o análise dos espectáculos que conforman a programación do festival. A primeira sesión, na que participaron Mofa e Befa (‘Pirolíticos), Tito Asorey e Xosé A. Touriñán (‘Recortes, caneos e outras formas de driblar’, e que conduciu o xornalista e crítico teatral Camilo Franco, xa se pode escoitar desde o web https://fiot.gal/ondafiot/.
Así, o Salón social do Pazo da Cultura de Carballo acollerá este sábado 15, ás 13.00 horas, a primeira das dúas sesións desta fin de semana. O xornalista Daniel Galindo (presentador de La Sala, programa especializado en artes escénicas de RNE) conversará cos intérpretes e creadores de Titzina Teatro co gallo da estrea en Galicia de ‘Búho’ (sábado 15, ás 20.30 horas, no Auditorio, no marco do Programa de Sala do FIOT31). Precisamente o recinto carballés será o primeiro escenario que o espectáculo visite en xira logo da súa estrea absoluta esta mesma semana. O encontro, aberto ao público,contará con petiscos e grolos para as e os asistentes.
Ao día seguinte, o domingo 16 a partir das 18.00 horas, terá lugar a segunda sesión da Escola do espectador das ondas desta semana e será con Leo Bassi. O clown e axistador de emocións regresa a Carballo 25 anos despois da súa primeira visita a Galicia e ao FIOT para estrear, no país, o seu último espectáculo: ’70 años: Leo Bassi’. Antes desta función, Galindo falará co bufón italiano sobre a súa traxectoria escénica e esta nova creación, na que esixe, a través da memoria e do humor, que se respecte tanto a súa vellez como os anos de experiencias acumulados.
De cara á semana seguinte, o sábado 22, celebrarase a seguinte sesión da Escola, que desta quenda dirixirá a xornalista Machús Osinaga (La Mandrágora, Atención Obras ou Cine de Barrio). A cita, que comezará ás 13.00 horas, contará con Patricia de Lorenzo e Xesús Ron, de Chévere -Premio Nacional de Teatro 2014-, e Pont Flotant. No primeiro caso, Patricia de Lorenzo (Xograresa de Outono 2019), presentará o venres 28, no marco do ciclo OTNI, a súa conferencia performativa ‘Pequenas mentiras para contar grandes verdades’, na que aborda o proceso de creación dalgúns dos personaxes que interpretou con Chévere. Pola súa banda, a veterana compañía valenciana Pont Flotant estreará o sábado 22 de outubro en Galicia, no marco do FIOT31, a súa nova creación: ‘Eclipse total’, peza que se enreda nos fíos da memoria para reflexionar sobre a morte, o legado e o misterio desde o característico universo artístico do colectivo. O encontro, aberto ao público, porá en relación o traballo das compañías e dos seus procesos de investigación e documentación.
Esta nova Escola do espectador nas ondas pecharase o sábado 29 de outubro co protagonismo absoluto de ‘La voluntad de creer’, a nova creación de Pablo Messiez, unha das propostas máis recoñecidas da tempada escénica e que, ao igual que Titzina, fará a primeira parada da súa xira no FIOT. O encontro, que conducirá Paloma Cortina (Dramedias, de RNE) terá lugar o 29 de outubro, a partir das 14.00 horas, no Salón social do Pazo da Cultura e contará coa participación cds intérpretes Rebeca Hernando, José Juan Rodríguez e do propio Messiez, neste último caso a través de videochamada. Axenda da fin de semana
Este venres dá comezo a terceira fin de semana de programación do FIOT, que conta con tres estreas en Galicia (‘Conferencia espectacular’, ‘Búho’ e ’70 años: Leo Bassi’) e as primeiras funcións do VI Certame de Micro-Escenas Metro Cadrado, a liña de programación que promove a creación de pezas escénicas experimentais en espazos non teatrais e singulares de Carballo
Ás 19.30, horas, na praza do Concello, Fran Boza presentará ‘Malabarabilidades’, unha proposta ateigada de humor, malabares e mazas, ante o público carballés. De seguido, ás 21.00 horas, haberá unha nova función do XII Ciclo OTNI (Obxecto Teatral Non Identificado), na que terá lugar a estrea en Galicia de ‘Conferencia espectacular’, do recoñecido David Espinosa, un singular parladoiro -no que combina a palabra con obxectos, maquetas e sombras- sobre o xurdimento doas novas escenas ou dos formatos teatrais máis innovadores, e na que non faltarán referencia a creacións de Peter Brook, Fura dels Baus, Mal Pelo, Needcompany ou Els Joglars, entre outras voces singulares.
O sábado 15 dará comezo a sexta edición do Metro Cadrado. En horario de mañá e tarde, poderanse ver ata catro funcións de dous espectáculos de breve duración: ‘Menú-do día’, do Colectivo #ChamizoBelloVila, que pon o foco nas violencias continuadas que vive o colectivo LGTBQI+; e ‘Cinecleta, cinema doméstico a pedais’, de Sr. Lili, un proxecto de recuperación e exhibición de películas de cinema doméstico en formato 8mm, Super8 e 16mm. O acceso será libre e gratuíto ata completar o número de prazas e recoméndase facer reserva previa a través de fiot.microteatroentrada@gmail.com, indicando o nome do espectáculo, horario no que se queira asistir, nome e apelidos das ou dos asistentes e teléfono de contacto.
Pola tarde, no marco do Programa de Sala, chegará a estrea en Galicia de ‘Búho’, da catalá Titzina,un espectáculo visualmente suxerente, onírico e cunha linguaxe trepidante que combina diversas artes escénicas. A través da música, da interpretación e da escenografía, ‘Búho’ constrúe un relato dirixido a todo tipo de públicos que se mergulla na busca interior da memoria do protagonista á fin de recuperar os seus recordos e a súa identidade logo de sufrir un ictus que lle provoca amnesia severa. Xa pola noite, a partir das 23.30 horas, será a quenda do humor máis novo e viral con Pablo Meixe e Adrián do Regenco. Ambos presentarán na Rúa dos Contos os seus espectáculos ‘Quen aguanta isto?’ e ‘Así son’ no Mercado municipal.
Como peche da fin de semana, e tamén no marco do Programa de Sala, o domingo 16 ás 20.30 horas terá lugar a estrea galega de ’70 años: Leo Bassi’, peza na que o bufón italiano fai balance sobre os seus máis de 60 anos sobre as táboas. As últimas entradas dispoñibles para este espectáculo están á venda no web www.ataquilla.com.
Ademais da programación escénica, o Pazo da Cultura acolle dúas exhibicións que o público pode visitar no horario de apertura habitual do recinto: Zoom FIOT 2021 (situada no andar 0) e ‘Trinta anos de Mofa e Befa’ (situada na sala de exhibicións do andar -1, fronte ao auditorio). Toda a programación do FIOT31 pódese consultar a través do espazo web www.fiot.gal.
As estreas en Galicia dos novos espectáculos de Leo Bassi, Titzina Teatro e David Espinosa, e o arranque da nova edición do Certame Metro Cadrado, pratos fortes no ecuador do FIOT31
O auditorio do Pazo da Cultura acolle esta fin de semana, no marco do Programa de Sala, as primeiras funcións en teatros galegos de ‘Búho’ (sábado 15) e ’70 años: Leo Bassi’ (domingo 16); ambas compañías participarán na ‘Escola do espectador nas ondas’, que guiará Daniel Galindo.
Comeza a sexta edición do Certame de Micro-Escenas Metro Cadrado con catro funcións, en horario de mañá e tarde, das creacións ‘Menú-do día’, do Colectivo #ChamizoBelloVila, e ‘Cinecleta, cinema doméstico a pedais’ de Sr. Lili.
O Teatro de Rúa despídese este venres 14 coas ‘Malabarabilidades’ con, Fran Boza; mentres que o ciclo OTNI acolle a estrea en Galicia de ‘Conferencia espectacular,’ de David Espinosa.
Unha ‘regueifa’ entre creadores dixitais que se unen por vez primeira nun escenario será a cita nocturna desta fin de semana da Rúa dos Contos: o coñecido Pablo Meixe e o bergantiñán Adrián do Regenco actuarán no Mercado municipal o sábado 15 a partir das 23.00 horas.
O FIOT en ruta pecha o seu programa o mércores 12 con ‘Esas cousas marabillosas’, a adaptación da obra de Duncan Macmillan que presentará Empatía Teatro no Centro Social de Ardaña.
O Festival Internacional Outono de Teatro prepara a súa terceira fin de semana de programación ateigada de humor, creación emerxente e ‘VocesFIOT’ de marcado carácter. As estreas en Galicia de ‘Búho’, de Titzina Teatro, e ’70 años: Leo Bassi’, do mítico clown italiano, centran a programación do Programa de Sala e da Escola do espectador nas ondas; mais non serán os únicos pratos fortes da fin de semana: este sábado 15 comeza a sexta edición do Certame de Micro-Escenas Metro Cadrado. Ademais, os humoristas Pablo Meixe e Adrián do Regenco serán protagonistas dunha noite da Rúa dos Contos no Mercado municipal. O programa completarase coa última función do Teatro de Rúa na praza do Concello da man do malabarista Fran Boza e unha segunda cita co ciclo OTNI, que acollerá a estrea galega de ‘Conferencia espectacular’, de David Espinosa.
As VocesFIOT falarán alto e claro esta fin de semana en Carballo. No ecuador do certame chega aestrea en Galicia de ‘Búho’, da compañía catalá Titzina, unha das máis destacadas do teatro contemporáneo en España grazas as súas propostas afinadas, fondas e poéticas. Titzina Teatro crea as súas obras a partir dun longo traballo de investigación antropolóxica, de entrevistas e convivencias, explorando con gran sensibilidade as relacións e os conflitos cotiáns, que elevan a unha dimensión cómica e tráxica. Desta quenda presenta en primicia en Galicia un espectáculo visualmente suxerente, onírico e cunha linguaxe trepidante que combina diversas artes escénicas. A través da música, da interpretación e da escenografía, ‘Búho’ constrúe un relato dirixido a todo tipo de públicos que se mergulla na busca interior da memoria do protagonista á fin de recuperar os seus recordos e a súa identidade logo de sufrir un ictus que lle provoca amnesia severa.
Outra das VocesFIOT será a de Leo Bassi, quen regresa a Carballo 25 anos despois da súa primeira actuación en Galicia e que, precisamente, tivo lugar no FIOT. Pallaso, bufón e axitador de emocións, Bassi reinvindica a risa como a raíz existencial do seu desexo de provocar. O seu instinto creativo e o seu carácter transgresor foron os que, precisamente, marcaron un fito na traxectoria do FIOT hai 25 anos. Cando aínda era un gran descoñecido para a meirande parte do público, o festival convidou ao cómico a participar na súa programación: naquela función, na que as e os asistentes saíron á rúa guiados polo artista, agromou o compromiso do FIOT coa sorpresa e a innovación. Agora volve para estrear ’70 años: Leo Bassi’, peza na que fai balance sobre os seus máis de 60 anos sobre as táboas, á vez que esixe que se respecte tanto a súa vellez como os anos de experiencias acumuladas. A través da súa memoria e do humor, descubrirá ao público do Pazo da Cultura a relevancia de volver ao humanismo e aos instintos.
Precisamente tanto Titzina coma Leo Bassi participarán na nova edición da Escola do Espectador nas ondas, que esta fin de semana celebrarase os días 15 e 16 de outubro da man do xornalista de RNE especializado en artes escénicas Daniel Galindo (presentador e director de La Sala en RNE). A conversa, que se gravará ao vivo, estará dispoñible á semana seguinte no espazo Onda FIOT da web oficial www.fiot.gal.
Comeza o Metro Cadrado
Outro dos fitos máis significativos desta fin de semana do FIOT chegará o sábado 15, pois dará comezo a sexta edición do Certame de Micro-Escenas Metro Cadrado, a liña de programación que promove a creación de pezas escénicas experimentais en espazos non teatrais e singulares de Carballo. O sábado poderanse ver ata catro funcións de dous espectáculos de breve duración: ‘Menú-do día’, do Colectivo #ChamizoBelloVila, e ‘Cinecleta, cinema doméstico a pedais’, de Sr. Lili.
O primeiro deles, que se poderá ver no Mercado municipal, pon o foco nas violencias continuadas que vive o colectivo LGTBQI+. O colectivo creado por Alberte Bello e Diego Chamizo tece unha historia que confronta odio e disidencia, escuridade e luz, tristura e aceptación. #ChamizoBelloVila busca amosar unha realidade posible capaz de romper a norma e xerar unha sociedade máis avanzada e inclusiva. Pola súa banda, Fernando Pujalte levará até o Estudio de fotografía Criss Becerra a súa singular ‘Cinecleta’, un proxecto de recuperación e exhibición de películas de cinema doméstico en formato 8mm, Super8 e 16mm. Con humor, Sr. Lili presentará nun formato didáctico e entretido algúns destes documentos cinematográficos recuperados.
Tal e como é habitual no Certame Metro Cadrado, o acceso será libre e gratuíto ata completar o número de prazas de cada función, mais recoméndase facer reserva previa a través de fiot.microteatroentrada@gmail.com, indicando o nome do espectáculo, horario no que se queira asistir, nome e apelidos das ou dos asistentes e teléfono de contacto.
Despedida do FIOT en ruta e Teatro de Rúa
A programación do FIOT desta semana comezará o mércores 12 no Centro Social de Ardaña, coa segunda e última cita do FIOT en ruta, a liña de programación que expande as artes escénicas pola comarca bergantiñá. A compañía Empatía Teatro presentará ‘Esas cousas marabillosas’, unha divertida e conmovedora comedia sobre a depresión, o suicidio e todo o que unha persoa está a disposta a facer polas persoas que quere. A cita con esta obra, unha adaptación de Avelino González a partir do fenómeno teatral mundial escrito por Duncan Macmillan, será ás 19.00 horas.
Na tarde do venres 14 chegará a quenda do rei galego dos malabares: Fran Boza. A mocidade do artista, que xirou internacionalmente con distintos circos, sorprenderá ao público carballés: humor, malabares con bolas ou mazas serán algúns dos ingredientes do espectáculo ‘Malabarabilidades’, dirixido por Fran Rei, e que pechará o ciclo Teatro de Rúa do FIOT a partir das 19.30 horas na Praza do Concello. Xa en horario nocturno, contra ás 21.00 horas, terá lugar a estrea en Galicia de ‘Conferencia espectacular’, de David Espinosa, na que o artista -con longo percorrido a nivel internacional coas súas montaxes, nas que achega a escena experimental ao público- combina a palabra con obxectos, maquetas e sombras nun parladoiro sobre o xurdimento doas novas escenas ou dos formatos teatrais máis innovadores. O XII Ciclo OTNI (Obxecto Teatral Non Identificado) acolle así unha divertida clase maxistral sobre a vangarda teatral, na que non faltarán referencia a creacións de Peter Brook, Fura dels Baus, Mal Pelo, Needcompany ou Els Joglars, entre outras voces singulares.
Pola noite a creación emerxente seguirá tendo especial protagonismo, coa participación na Rúa dos Contos de dúas das voces novas máis virais do momento en Galicia: os humoristas Pablo Meixe e Adrián do Regenco. Ambos presentarán os seus espectáculos ‘Quen aguanta isto?’ e ‘Así son’ no Mercado municipal, contra as 23.00 horas, nunha noite na que ambos cómicos darán boa conta do porque do seu éxito no eido virtual.
