REBOIRAS, ACCIÓN E CORAZÓN, proxéctase este sábado na Casa-Museo MANUEL MARÍA

A Casa-Museo Manuel María acolle este sábado, ás 19 h, a proxección de Reboiras, acción e corazón, unha longametraxe documental escrita e dirixida por Alberte Mera e producida pola Fundación Terra e Tempo que leva á pantalla un retrato fiel de Moncho Reboiras desde a vertente humana e política. Moncho Reboiras foi asasinado na madrugada do 12 de agosto de 1975 cando contaba con 25 anos, resultando ser, ao fin, a última vítima mortal en Galiza da ditadura franquista.

O filme combina o documental coa ficción para recrear a súa vida e pensamento valéndose, por unha parte, das testemuñas que con el partillaron diversas etapas da vida, asi como dos familiares e, pola outra, revive a través de secuencias de ficción as últimas horas de Xosé Ramón Reboiras Noia, incluíndo filmacións históricas.

Após a proxección haberá un coloquio con algúns dos compañeiros de Reboiras. A entrada para esta actividade é libre mais é imprescindíbel facer reserva previa a través do correo electrónico contacto@casamuseomanuelmaria.gal ou a través do whatsapp 698177621.

BEBENC@NTAS con Pablo Díaz este sábado na Casa-Museo Manuel María

BEBENC@NTAS CON PABLO DÍAZ

Este sábado,17 de outubro, ás 18 h, na Casa-Museo Manuel María, BEBENC@NTAS, co músico galego Pablo Díaz, que fará unha viaxe a través dos contos coa música como fío condutor, tratando temas e rutinas adaptadas para as máis pequenas e pequenos, de 0 a 3 anos. Para o conseguir, axudarase de instrumentos como frautas, guitarra, harmónica, e interpretará algún dos seus temas máis populares. Unha sesión relaxada onde a fantasía e a ilusión sexan as protagonistas, e en que grandes e miúdos axuden a cantar e a entoar as melodías e retrousos dos contos e cancións. Moitos dos contos serán cantados de principio a fin.

A actividade é gratuíta mais é imprescindíbel facer reserva en contacto@casamuseomanuelmaria.gal ou a través do whatsapp 698177621.

Para quen non coñeza a Pablo Díaz:

Pablo Díaz debutou co seu primeiro traballo discográfico TIC TAC (ed. Kalandraka), en decembro de 2009, co que acadou un éxito espectacular no país, xa que a primeira edición do traballo esgotouse en 3 meses, e vai xa pola 5ª edición con máis de 7000 exemplares vendidos. Con este traballo resultou un dos 3 finalistas nos premios galegos da música Martín Códax e foi o gañador do premio “Anisia Miranda á creatividade infantil” en 2011.

En novembro de 2013, ve a luz o segundo traballo, TOC TOC, da editorial Galaxia. Con este traballo conseguiu o recoñecemento do mundo musical acadando o premio ao mellor traballo de música infantil nos premios Martín Códax 2014, e tocando por máis de 50 concellos de Galiza.

En decembro de 2014, presenta o seu novo traballo máis íntimo e dedicado ao público de menor idade: “Xente Miúda, moita fartura”, apostando nesta ocasión pola autoprodución e contou coa colaboración de Tito Calviño e Carmen Rey.
A finais de 2016, publícase o traballo, “TIC TAC TOC” (ed. Galaxia) ilustrado por Almudena Aparicio. Con este espectáculo fixo unha xira por 60 concellos galegos.
O último traballo de Pablo Díaz é “COAS MIÑAS MANS” (ed. Galaxia) que saíu ao mercado en xuño de 2018 con moi boa acollida por parte do público familiar.

Como contacontos infantil leva feitas centos de sesións desde 2005, formando parte do equipo de animación á lectura da editorial Kalandraka, e posteriormente de xeito individual. Leva dedicada unha boa parte da súa obra como narrador oral ás crianzas de entre 0 e 3 anos.

Presentación do poemario REMOL, de Manuel María, e espectáculo de narración oral para público adulto de Soledad Felloza na Casa-Museo Manuel María

A CASA-MUSEO MANUEL MARÍA PRESENTA ESTE SÁBADO, ÁS 18 HRS, UNHA NOVA EDICIÓN DO LIBRO DE MANUEL MARÍA “REMOL

No acto estará presente MARGARITA LEDO ANDIÓN, que escribe o prefacio da nova edición dun poemario que veu a lume hai 50 anos en Bos Aires

 Despois da presentación, ás 19 hrs, a narradora oral, SOLEDAD FELLOZA, levará a cabo un espectáculo, dirixido para público adulto, baseado en textos narrativos de Manuel María

Remol é un libro publicado por primeira vez o 25 de xullo de 1970, na cidade de Bos Aires, a través de Edicións Nós. O libro contén 43 poemas (líricos e intimistas, biográficos, de denuncia e compromiso, e de homenaxe e solidariedade coas persoas que se significaron na defensa dos pobos asoballados polo imperialismo).

A entrada para estas actividades é libre, mais con reserva previa que haberá que realizar a través do correo electrónico contacto@casamuseomanuelmaria.gal ou no tel. 698177621, xa que para manter as medidas preventivas da COVID-19 o número de prazas é reducido.

Maxia e roteiro esta fin de semana na Casa-Museo Manuel María

Este sábado, día 3 de outubro, ás 18 hrs, chega á Casa-Museo Manuel María o mago Martín Camiña co seu espectáculo “Feitizos e ilusións”, unha enchente de maxia, humor e participación…iso si, desde as cadeiras.
 Dirixido para un público familiar, a partir de 6 anos, as persoas que asistan terán como condicións de obrigado cumprimento:
-o uso de máscara (excepto as persoas exentas pola lexislación vixente)
-lavar as mans con xel hidroalcólico á entrada e á saída do auditorio
-manter a distancia de seguranza, sobre todo á entrada e á saída para evitar amontoamentos
-non mudarse das cadeiras asignadas
-seguir as indicacións do persoal da Casa-Museo Manuel María
Recoméndase, tamén, limitar o máximo posíbel o uso dos baños
O aforo do auditorio da Casa-Museo Manuel María verase reducido polas indicacións sanitarias motivadas pola COVID-19 e por tanto toda persoa que asista a este espectáculo ten que ter reservada previamente a entrada a través do correo electrónico contacto@casamuseomanuelmaria.gal O prezo do billete é de dous euros.

O domingo, día 4 de outubro, ás 10 hrs, e se o tempo acompaña, faremos unha camiñada por algúns dos lugares de Outeiro de Rei máis íntimos de Manuel María. O roteiro, “Polos camiños da tribo”, partirá desde a Casa-Museo e ten unha dificultade baixa, un percurso de aproximadamente seis quilómetros, e cunha duración sobre as tres horas.

Orlando Viveiro, divulgador cultural, será a persoa que fará de guía e con quen descubriremos o medio e o patrimonio da localidade. Durante o camiño faranse lecturas de poemas e textos de Manuel María vinculados aos espazos.

Para participar (é gratuíta) hai que se inscribir previamente en contacto@casamuseomanuelmaria.gal e a actividade vai dirixida para público adulto.Área de anexos

7º Convivio da Cultura Galega. Quico Cadaval este sábado, ás 16 hrs, con “O complexo de Edipo”, na Casa-Museo Manuel María

A Federación Galiza Cultura e a Casa-Museo Manuel María organizan para este sábado, 26 de setembro, unha nova edición, a sétima, do Convivio da Cultura Galega, en Outeiro de Rei da Terra Chá.

Dentro da xornada, ás 16 hrs, está programada, en principio na horta da Casa-Museo, unha actuación de Quico Cadaval que levará a cabo a narración oral “O complexo de Edipo”. Un espectáculo que comezou como un comentario de texto escolar para acabar convertido nun diálogo imaxinario do narrador coa sua nai sobre o mito de Edipo e o triste destino da familia real de Tebas (Grecia). Gastronomía! Épica! Alta Cultura! Mexericos! Psicanálise! Noticias sorprendentes sobre a monarquía española! Todo en 71 trepidantes minutos, nun monólogo traxi-ridículo.

Esta actividade, dirixida para público adulto, é de entrada libre mais é necesario facer previamente reserva que se poderá realizar a través do correo electrónico contacto@casamuseomanuelmaria.gal ou no tel. 698177621, xa que para manter as medidas  preventivas da COVID-19 o número de prazas para presenciar o espectáculo é menor.