Presentación do libro Somos un pobo de artistas. O método Luísa Villalta, de Xurxo Souto, libro que inclúe un capítulo dedicado a Manuel María e a súa relación coa música galega.
A presentación realizarase este sábado, 16 de novembro, ás 19 horas, na Casa-Museo Manuel María. Côa Entrada libre. Aínda que cómpre reservar en contacto@casamuseomanuelmaria.gal ou no whatsapp 698177621.
Este sábado, 26 de outubro, ás 17.30 horas, levarase a cabo no auditorio da Casa-Museo Manuel María a gala-concerto da fase final do III Concurso Manuel María de Composicións Musicais.
A gala comezará coa interpretación das cinco pezas finalistas a cargo da pianista Noemí Salomón e da mezzosoprano Nuria Lorenzo (concretamente interpretarán O carro, Galiza, Neno, Mito e Galicia, pezas compostas por María Mendoza, Saúl Aguado de Aza, Luis Serrapio Fernández e Francisco José Carbonell Matarredona). Unha vez finalizada esta primeira parte, mentres o xurado realiza a súa deliberación, a mesma pianista e mezzosoprano presentarán en concerto unha serie de cancións dos compositores galegos José Baldomir, Juan Durán e Carlos Cambeiro baseadas en poemas de Curros Enríquez, Rosalía de Castro e Manoel Cambeiro.
Para asistir é preciso facer a reserva correspondente, ben dirixíndose ao seguinte enderezo electrónico contacto@casamuseomanuelmaria.gal ou ao whatsapp 698177621.
O Instituto de Estudos Chairegos (IESCHA), en colaboración coa FUNDACIÓN MANUEL MARÍA, organiza a PALESTRA “UNHA VIAXE POLA POESÍA ÍNTIMA DE MANUEL MARÍA“, a cargo de ALBERTE ANSEDE, presidente da Fundación Manuel María.
O acto terá lugar na Casa de Cultura de Vilalba, o VENRES 25 DE OUTUBRO DE 2024, ás 20:00 horas.
No mesmo evento, levarase a cabo a inauguración da EXPOSICIÓN “MANUEL MARÍA: BELEZA, AMOR E COMPROMISO”, que permanecerá aberta ao público ata o día 15 de novembro de 2024.
NOTA-INFORMATIVA-PALESTRA-EXPO-MANUEL-MARIA
Este domingo, 29 de setembro, organizan desde a Casa-Museo Manuel María unha camiñada pola parroquia de Bonxe, terra de cacharreiros e cacharreiras. Seguindo o patrimonio do barro, Orlando Viveiro (divulgador e estudoso da olaría), descubriranos, ao longo de case cinco quilómetros polos distintos lugares da parroquia, ese mundo (os seus fornos, obradoiros…)…, e todo, acompañado por pequenos textos de artigos de Manuel María e algún que outro dos seus poemas.
Sairán da Casa-Museo Manuel María, en automóbeis, ás 10 horas, para nos desprazar ao punto de inicio (o obradoiro de Pepa Lombao). A camiñada comezará contra as 10:20 horas.
A actividade é gratuíta mais é necesario anotarse en contacto@casamuseomanuelmaria.gal ou no whatsapp 698177621
O próximo 18 de setembro, mércores, ás 20.30, celebrarase no Teatro Rosalía de Castro unha nova edición de Lúas de Outono para homenaxear a obra e a vida de Manuel María.
Para isto contarase coa presenza d’Os Carunchos, grupo de música tradicional que cantará trece poemas de Manuel María, pezas estas que integran o seu último traballo dedicado integramente ao noso escritor, Unha gorxa chea de paxaros. E tamén poderase desfrutar da voz da poeta Eva Veiga que recitará unha serie de poemas do propio Manuel María.
Para reservar a entrada (é gratuíta) pódese escribir a contacto@casamuseomanuelmaria.gal ou a través do whatsapp 698177621.
As entradas reservadas poden recollerse o venres, día 13 de setembro, de 17.30 a 19 h, e o luns, día 16 de setembro, de 11 a 12.30 e de 17.30 a 19 h no local da A.C. Alexandre Bóveda (na rúa Santo André, 36, 1º, no edificio do Circo de Artesáns). Ou ben diante da billeteira do teatro Rosalía de Castro, o mesmo día 18 de setembro, a partir das 19.15 h (a reserva deixa de ser efectiva a partir das 20.15 horas do día 18 de setembro).
A reserva non é de butaca numerada e por tanto débese ter isto previsto por se alguén quixer ter unha boa localización para ver o espectáculo. As portas do teatro abrirán ás 20 horas.