Nova convocatoria do III Certame de Poesía TORRE DE CALDALOBA

Cartaz do III Certame de Poesía TORRE DE CALDALOBA

Representantes da Asociación Cultural de Pino, do Concello de Cospeito e de Culturalia GZ

Despois de formalizar a anulación da convocatoria que estaba en curso a causa dun erro administrativo irresoluble consecuencia dun fallo informático previo durante o proceso de recepción de orixinais, o Concello de Cospeito e a Asociación Cultural de San Martiño de Pino, en colaboración con Culturalia GZ, convocan novamente a terceira edición do Certame de Poesía TORRE DE CALDALOBA. Esta especie de re-convocatoria, ademais de fornecer a intención de transparencia e rigor do certame, suporá unha modificación dos prazos establecidos e no proceso de envío de orixinais que figuraban na convocatoria anulada. Deste xeito, o remate de achega de orixinais queda fixado para o 15 de novembro, sendo o fallo o 12 de decembro e a entrega de premios o 19 de decembro deste 2020.

Calquera persoa que desexe participar poderá consultar as bases do premio no enlace certamepoesia.concellodecospeito.es, na web do Concello de Cospeito, en Culturalia GZ ou nas redes sociais de calquera das entidades organizadoras.

Precisamente desde a organización do Certame de Poesía TORRE DE CALDALOBA animan á participación neste premio poético que vai enraizando dentro da árbore literaria galega.

Descargar BASES

COMUNICADO ANULACIÓN PROVISORIA DO III PREMIO DE POESÍA “TORRE DE CALDALOBA”

COMUNICADO ANULACIÓN PROVISORIA DO III PREMIO POESÍA “TORRE DE CALDALOBA”

Enlace ao comunicado.

En xuntanza celebrada o 13 de outubro de 2020, o Concello de Cospeito, a Asociación Cultural de Pino e Culturalia GZ, despois dunha demorada deliberación acordan manifestar o seguinte:

Un fallo informático na recepción dos traballos presentados á 3ª edición do Premio de Poesía “Torre de Caldaloba” desencadeou un erro administrativo irresoluble que non dá as garantías necesarias para que na convocatoria en curso do certame se poida acadar un ditame legalmente atribuíble a un concurso literario destas características. Tendo en conta todo o anterior, resolven atallar calquera irregularidade sucesiva mediante a anulación da presente convocatoria nas condicións desfavorables nas que se podería desenvolver, provocadas polo mencionado erro administrativo derivado do fallo informático, tamén referido.

Unha vez realizada esta anulación provisoria do certame, abrirase inmediatamente un novo proceso de convocatoria que, aínda conservando a denominación ordinal de 3ª edición, forzará o establecemento duns novos prazos (entrega de traballos, resolución de gañadorxs e entrega de premios) e cunhas BASES axeitadas que proporcionen as garantías indispensables para a execución totalmente carente de calquera prexuízo aos fundamentos dun certame literario (imparcialidade, fiabilidade, transparencia, legalidade).

Ademais para dar maior solvencia a todo o fundamentado procederase á destrución dos traballos e plicas que chegaron ata a data de finalización de recepción dos mesmos.

Iso tamén leva a pedir desculpas a todas as persoas que se presentaran, por todas as molestias causadas, solicitándolles, a elas mesmas e a todas as que non se tivesen presentado, que continúen poñendo a súa confianza neste certame, porque esta decisión, que nos resultou difícil de tomar aínda que imprescindible, é unha boa mostra por parte da organización deste certame poético de primar a súa total integridade e transparencia.

Reiteramos as nosas desculpas e agardamos con maior entusiasmo e prestancia a chegada das obras para esta ‘nova’ do Premio de Poesía Torre de Caldaloba, co ánimo de que siga a medrar no panorama literario galego.

A organización do Premio de Poesía TORRE DE CALDALOBA

Fallo II Certame de Poesía TORRE DE CALDALOBA

Este venres, 29 de novembro, reuniuse na Casa do Concello de Cospeito o xurado deliberador do II Certame de Poesía TORRE DE CALDALOBA, que organiza o propio Concello de Cospeito e a Asociación Recreativa e Cultural de San Martiño de Pino, coa colaboración de Culturalia GZ.

O xurado, conformado por Ana Mar Fraga Rábade, Montse González Álvarez, Armando Requeixo, Xosé Otero Canto e Martiño Maseda, despois das súas valoracións decidiu emitir o seguinte fallo:

Categoría 1 (menores de 18 anos)

1º Premio para Unha fraga de laios, de Mariña Maceiras Segovia (Pontevedra), “pola delicada inxeleza dos seus versos, o realismo e a emotividade destes e a chamada ao espertar das conciencias que supoñen na súa aposta ecopoética”.

2º Premio para E sigo pensando en ti, de Sandra Rodríguez Macía (Monforte de Lemos), “polo acerto do seu marcado ton intimista, que poetiza un pasado doloroso e é quen de alumar con esperanza un futuro no que non se esquecen os lazos afectivos doutrora”.

Categoría 2 (de 18 anos en diante)

1º Premio para Hora de penumbra, de Xurxo Alonso (Vilagarcía de Arousa), “onde se estimou a solidez da arquitectura versal, as poderosas imaxes e símbolos que deitan os poemas e a forrza dos símbolos empregados nun discurso que visita os grandes temas do ser humano (o pasar do tempo, a morte, o amor, a orfandade, a procura da esperanza) con ollada renovada e amplo caudal de intertextualidades”.

2º Premio para De casa queimada, de Iria Collazo López (Pontevedra), no que “salienta a habelencia no manexo das lerias da infancia e as visitacións do amor e o desamor nunha estética que ancora no neosurreal e que pon a voz poética ao servizo da intención dos sentimentos”.

A entrega dos premios terá lugar o vindeiro 14 de decembro no local social de Pino, lugar xeográfico onde se sitúa a emblemática Torre de Caldaloba.

Antes, o 5 de decembro, a partir das 18 horas no Museo das Aves de Cospeito, celebrarase o acto de presentación dos poemarios gañadores na I edición deste Certame poético chairego: Caldaloba en Terras de Valverde, de Xesús Rábade Paredes e Na pel das árbores do vento, de Paulino Peña, publicados baixo o selo editorial de Alvarellos Editora.