Á venda as entradas para a estrea na Coruña de ‘A velada de Londres’, a homenaxe a Manuel Lourenzo de ButacaZero
O Teatro Rosalía Castro acollerá o 4 de setembro o lanzamento desta revisión do mito de Drácula, que xa ten as súas entradas dispoñibles en Ataquilla.com
O espectáculo combina estética vitoriana, música en directo e unha exposición inédita sobre a figura de Lourenzo no vestíbulo do teatro
ButacaZero contará cun novo espectáculo na carteleira galega a partir do mes de setembro: A velada de Londres, de Manuel Lourenzo. A peza, dirixida por Xavier Castiñeira e coa que a compañía quere rendir homenaxe ao dramaturgo, estrearase o 4 de setembro no Teatro Rosalía Castro da Coruña. As entradas para a estrea da montaxe están dispoñibles a través da plataforma Ataquilla.com.
Tras sorprender ao mundo da escena con IRIBARNE, ButacaZero adéntrase por vez primeira na obra de Manuel Lourenzo. Faino, concretamente, cun texto que forma parte de Veladas Indecentes —obra coa que Lourenzo se converteu no 1997 no primeiro autor galego en gañar o Premio Nacional de Literatura Dramática—, garda unha fonda pegada emocional para Castiñeira, pois traballou como axudante de dirección do propio Lourenzo nesta mesma peza no inicio da súa carreira.
En A velada de Londres, Lourenzo propón unha orixinal fantasía arredor do Drácula de Bram Stoker. Lonxe do terror convencional, o texto explora a tensión entre os instintos e a razón, entendendo a “vampirización” como un acto de amor, liberación e aceptación do desexo. Para esta montaxe, ButacaZero propón unha estética vitoriana e música en directo grazas á presenza no escenario da soprano e violonchelista Esperanza Mara, quen canta e interpreta a banda sonora orixinal (creada por Iago Hermo).
O elenco d’A velada de Londres conta con actores de ampla traxectoria como Xurxo Cortázar (Iribarne, Shakespeare en Roma, O Premio) e con novas promesas emerxentes da escena (Sophia Rodal e Teo Piñeiro), mantendo viva a idea de Lourenzo de apostar polo talento mozo. A proposta de ButacaZero complétase, ademais, cunha exposición inédita sobre a obra e o legado do gran mestre do teatro galego que se poderá ver no vestíbulo do Rosalía Castro o mesmo día da función.
A Velada de Londres. Equipo: Xurxo Cortázar, Xavier Castiñeira, Beatriz de Vega, Carlos Pinilla (arriba), Esperanza Mara e Sophia Rodal sentadas
SINOPSIS A VELADA DE LONDRES
A nova estrea de ButacaZero nace como fonda homenaxe a Manuel Lourenzo, finado o pasado ano. Mestre e mentor de Xavier Castiñeira (e de tantas outras persoas que conforman o teatro galego profesional na actualidade), a súa palabra, a súa mirada e o seu compromiso coa escena seguen vivos en cada unha das nosas creacións e continúan así iluminando o camiño de novas xeracións.
A Velada de Londres mergúllanos na súa visión sobre o universo de Drácula, unha das súas obsesións creativas. Nela imaxina unha escena tras o primeiro capítulo da novela de Bram Stoker, cando Jonathan Harker coñece ao Conde en Transilvania. No retorno a Londres xunto á súa muller Mina, Jonathan revive obsesivamente aquela experiencia, e a súa relación esborrállase entre o desexo, o medo e a fascinación.
A presenza en escena de Esperanza Mara, chelista e soprano, farán que o público poida disfrutar dunha velada teatral, pero tamén musical.
A representación completarase cunha pequena exposición dedicada á vida, obra e legado de Manuel Lourenzo. Un convite a descubrir e celebrar a memoria dun creador que deixou unha pegada imborrable no teatro galego.
ButacaZero
ButacaZero é a plataforma creativa de Esther F. Carrodeguas e Xavier Castiñeira coa que propoñen un teatro que dialoga coa actualidade dende unha mirada crítica e irónica, e no que a tradición teatral se mestura con linguaxes contemporáneas. A compañía, creadora e produtora de propostas como IRIBARNE (con 9 Premios María Casares, entre eles o de mellor espectáculo), O único que verdadeiramente quixen toda a vida é ser delgada, Papagena, 32m2, Despois das ondas ou Voaxa e Carmín, sitúase como un referente do teatro contemporáneo no panorama escénico galego.
SOBRE A VELADA DE LONDRES, DE BUTACAZERO
Estrea absoluta: 4 de setembro, ás 20:30 horas, no Teatro Rosalía Castro (A Coruña).
Dirección: Xavier Castiñeira.
Reparto: Xurxo Cortázar, Sophia Rodal, Teo Piñeiro, Esperanza Mara (soprano e chelista).
Banda sonora orixinal: Iago Hermo.
Deseño de luz: Violeta Martínez.
Espazo escénico: Beatriz de Vega.
Figurinista: Carlos Pinilla.
Produción e distribución: ButacaZero.
Produción en xira: Rubén Capelán.
Deseño gráfico e prensa: Coma Comunicación Creativa.
O Festival terá lugar dentro da XI Xornada da Sección de Literatura Dramática 2026, o domingo 25 de outubro de 2026, no Teatro Rosalía de Castro da cidade da Coruña, entre as 10:00 e as 21:00 h., aproximadamente.
Convocatoria aberta a 7 proxectos de artes escénicas que utilicen textos en galego ou portugués, individuais ou colectivos, para un espectáculo en calquera das modalidades e xéneros das artes escénicas. Debe tratarse dunha peza ou proposta escénica que estea en proceso de creación/realización.
Un comité de selección, formado por Afonso Becerra, Vogal de Literatura Dramática da AELG, Xosé Paulo Rodríguez, director do Teatro Rosalía de Castro (TRC) da Coruña e Célia Guido Mendes, en representación do Camões–Centro Cultural Português em Vigo (Camões–CCP em Vigo), baseándose en criterios artísticos, escollerá 4 propostas de Galiza e 3 propostas de Portugal, para seren (re)presentadas no IX Festival Pezas dun Teatro do Porvir 2026: Galiza + Portugal.
Unha vez (re)presentadas, as/os creadoras/es de cada proxecto deberán emitir un voto secreto polo proxecto que consideren mellor, excluíndo na papeleta de votación o seu propio. Estes votos e os do comité organizador e, se así o considerar, o da persoa convidada de honra, concederán o V PREMIO do IX FESTIVAL PEZAS DUN TEATRO DO PORVIR 2026, que consistirá na estrea da peza. É importante sinalar que, unha vez (re)presentados os proxectos, o xurado pode considerar que ningún deles reúne as características ou condicións necesarias e, por tanto, deixar o premio deserto.
O funcionamento deste festival consta dunha exposición ou mostra dun fragmento da peza ou da peza enteira, no caso de ser breve, dentro dunha duración máxima de 15 minutos.Xusto despois, haberá un tempo complementario para unha breve análise, debate ou conversa ao seu respecto, dentro dunha duración máxima 15 minutos.
No breve debate posterior ás presentacións búscase coñecer a reacción do público, nun diálogo que pode servir para enriquecer, por parte da/o dramaturga/o ou equipa de dramaturxia, o acabado desas pezas en proceso.
As (re)presentacións faranse no formato que cada dramaturga/o ou equipa de dramaturxia considere máis axeitado. Para a selección do proxectos privilexiaranse aqueles en que as presentacións reforcen ou indaguen no escénico, máis do que na simple lectura dun texto.
Aínda que o nome deste evento é “Festival”, non contamos coas infraestruturas nin a capacidade de produción dun festival de artes escénicas ao uso. Neste caso trátase dun espazo diáfano, cunha luz xeral e con mínimas posibilidades no que atinxe a equipamento técnico. Tampouco hai tremoias nin persoal técnico ao servizo das (re)presentacións dos proxectos. Por tanto, é necesario que as/os creadoras/es amosen o seu traballo, ou o bosquexo do seu traballo, dentro das súas propias capacidades para facelo.
Condicións:
– Asígnase un orzamento total de 500 euros para cada proxecto seleccionado desde Galiza e 600 euros para cada proxecto seleccionado desde Portugal, onde se entenden incluídos todos os custos (desprazamentos, etc.).
– Prazo para a presentación de propostas: 25 de setembro de 2026.
– A selección dos proxectos será realizada por parte da organización (Afonso Becerra de Becerreá, vogal da Sección de Literatura Dramática da AELG; Xosé Paulo Rodríguez, director do Teatro Rosalía de Castro da Coruña; e Célia Guido Mendes, en representación do Camões–Centro Cultural Português em Vigo (Camões–CCP em Vigo) en función de:
+ Descrición e formulación do proxecto. + Breve mostra da peza. + Currículum das/os dramaturgas/os.
Estes materiais deberán ser enviados en formato dixital, antes das 24 h. do 25 de setembro de 2026, a: oficina@aelg.org
– As/os creadoras/es seleccionados para (re)presentar os seus proxectos escénicos deben comprometerse a estar presentes durante toda a xornada que dura o Festival (dentro da XI Xornada da Sección de Literatura Dramática 2026, o domingo 25 de outubro de 2026, no Teatro Rosalía de Castro da cidade da Coruña, entre as 10:00 e as 21:00 h., aproximadamente) e participar nos debates dos proxectos (re)presentados polas/os súas/seus colegas, de tal xeito que poidan, ao final da xornada, emitir o voto correspondente para o V Premio do IX Festival Pezas dun Teatro do Porvir 2026: Galiza + Portugal.
V PREMIO DO IX FESTIVAL PEZAS DUN TEATRO DO PORVIR 2026
Ademais do orzamento asignado a cada proposta para a súa (re)presentación no IX Festival Pezas dun Teatro do Porvir 2026: Galiza + Portugal, un comité, formado polo Vogal de Literatura Dramática da AELG, Afonso Becerra, o director do Teatro Rosalía de Castro da Coruña, Xosé Paulo Rodríguez, Célia Guido Mendes, en representación do Camões–Centro Cultural Português em Vigo, e, se así o considerar, a persoa convidada de honra, e contando cos votos das/os creadoras/es participantes, seleccionará unha das propostas para ofrecerlle a posibilidade de ser estreada. O xurado tamén podería decidir deixar o premio deserto se os proxectos (re)presentados non reunisen as características e condicións necesarias.
O Noia Harp Fest pecha a súa 13ª edición coa réplica dos instrumentos medievais de San Martiño e o directo de Sona Jobarteh, a primeira muller solista de kora en sete séculos
Manuel Vilas e a agrupación Entrebescant farán soar na Igrexa de San Francisco as réplicas dos instrumentos do século XV esculpidos na fachada de San Martiño
Neleta Ortiz e Thomas Piel estrearán no Claustro de San Francisco unha obra inédita de Enrico Mainardi, mentres que a Praza do Tapal acollerá a gran clausura do evento coa música e activista africana
O Noia Harp Fest despide este sábado 1 de agosto a súa décimo terceira edición cunha última xornada que xunta a recuperación do patrimonio arquitectónico da vila, a investigación musicolóxica e un dos concertos máis agardados do seu cartel internacional. A entrada a todas as actuacións da xornada será libre e de balde ata completar a capacidade dos espazos.
A programación arrancará ás 12:30 horas na Igrexa de San Francisco co concerto de Manuel Vilas e da formación de música antiga Entrebescant. Trátase dun dos fitos máis singulares do evento, no que se empregarán en exclusiva as sete réplicas dos instrumentos medievais (dúas arpas, un rabel, dúas violas e dous salterios) reconstruídas en 2018 polo festival e o Concello a partir da iconografía do século XV da Arquivolta de San Martiño de Noia. Vilas, un dos arpistas máis prestixiosos na recuperación do patrimonio musical, únese a Entrebescant para devolverlle a vida ao son orixinal que concibiron os artesáns medievais.
Manuel Vilas nun concerto do Noia Harp Fest
Pola tarde, ás 20:00 horas no Claustro de San Francisco, a arpista Neleta Ortiz e o violonchelista Thomas Piel presentarán en primicia e coa máxima rigorosidade académica unha obra para arpa e violonchelo do prestixioso compositor e director italiano Enrico Mainardi, froito duns minuciosos traballos de investigación sobre o seu legado. Tanto este directo coma o de Manuel Vilas está organizado en colaboración coa Asociación Española de Arpistas (AEDA).
Neleta Ortiz estreará unha obra de Enrico Mainardi
O concerto de clausura do festival celebrarase ás 22:00 horas, a ceo aberto, no seu escenario máis emblemático: a Praza do Tapal e coa gambiana Sona Jobarteh como protagonista absoluta. Nada no seo dunha prestixiosa liñaxe de griots e doutora honoris causa pola Berklee College of Music, Jobarteh fixo historia ao ser a primeira muller solista de kora, rompendo con sete séculos de tradición masculina. Recoñecida tamén polo seu compromiso social e educativo como fundadora da Gambia Academy, a compositora e cantante ofrecerá acompañada pola súa banda un potente directo no que combinará a tradición mandinga co blues e o afropop.
Sona Jobarteh pechará a 13ª edición do Noia Harp Fest
Noia Harp Fest
O Festival Internacional de Arpa Vila de Noia (Noia Harp Fest) é unha iniciativa promovida por Nalgures Producións e cuxa dirección artística recae na Asociación Cultural Noia Harp Fest. O evento, que se celebra do 29 de xullo ao 1 de agosto, conta co apoio do Concello de Noia e da Xunta de Galicia a través de Turismo de Galicia e do proxecto Concertos do Xacobeo. Tamén colaboran a Sociedade Cultura Recreativa Liceo de Noia, a Asociación Española de Arpistas (AEDA) e a Deputación Provincial da Coruña e Acción Cultural Española.
AXENDA SÁBADO 1 DE AGOSTO
01.08, 12.30 horas
Igrexa de San Francisco | Manuel Vilas e Entrebescant
01.08, 20.00 horas
Claustro de San Francisco | Neleta Ortiz e Thomas Piel
01.08, 22.00 horas
Praza do Tapal | Sona Jobarteh
Os tres concertos son de acceso gratuíto e libre ata completar capacidade.
Siobhán Armstrong, Su Garrido Pombo e Park Stickney, protagonistas da terceira xornada do Noia Harp Fest
A irlandesa Siobhán Armstrong, a maior autoridade internacional na interpretación da arpa histórica gaélica encordada en metal, ofrecerá un concerto en Santa María A Nova
O Teatro Coliseo Noela acollerá a estrea dunha produción propia do festival, un directo da Banda do NHF xunto á cantautora Su Garrido Pombo, e un concerto do trío do estadounidense Park Stickney
Tras unha xornada dedicada ao talento emerxente e á experimentación sonora, o 13º Noia Harp Fest abordará este venres 31 de xullo tres propostas moi diversas. O festival moverase por diferentes espazos da vila para amosar as múltiples posibilidades do instrumento: desde a recuperación da arpa gaélica do século XVII ata a canción de autor galega ou mesmo o jazz de referencia internacional. A tríade de directos deste venres 31 serán de entrada libre e de balde ata completar a capacidade dos recintos.
A programación comezará ás 19.00 horas na Igrexa de Santa María A Nova coa actuación da irlandesa Siobhán Armstrong, recoñecida internacionalmente como a maior autoridade na interpretación da arpa histórica gaélica encordada en metal. O seu labor foi esencial para que o instrumento fora declarado Patrimonio Cultural Inmaterial da Humanidade pola UNESCO. Armstrong fundou a Historical Harp Society of Ireland e toca cunha réplica única da arpa do século XVII do Trinity College de Dublín, tallada nun só bloque de madeira de salgueiro e encordada con fíos de latón e prata, utilizando as unllas para obter o timbre orixinal do instrumento.
Siobhán Armstrong abrirá a terceira xornada do NHF en Santa María a Nova
A partir das 21.00 horas, a actividade trasladarase ao Teatro Coliseo Noela, unha das sedes centrais do evento, para estrear outra das producións exclusivas desta 13ª edición do Noia Harp Fest: o concerto que a Banda do NHF ofrecerá con Su Garrido Pombo. A agruació é unha formación variable que se crea cada ano arredor do festival, xuntando a docentes, estudantes e intérpretes afeccionados para traballar en conxunto. Nesta ocasión, a Banda do NHF achegarase á obra de Su Garrido Pombo, unha das autoras máis orixinais da música galega das últimas décadas. A propia cantautora interpretará en directo algúns dos seus temas máis coñecidos acompañada por dez arpas, con arranxos escritos expresamente para a ocasión por Rodrigo Romaní nos que dialogan recursos acústicos e electrónicos.
Su Garrido Pombo actuará na 13ª edición do Noia Harp Fest
Finalmente, contra as 22.00 horas, subirase ao mesmo escenario Park Stickney co seu trío Gustaf, Frederick &Isabel, formado xunto á saxofonista Araxi Karnusian e o baixista Björn Meyer. Formado na Juilliard School e doutorado polo Trinity Laban, Stickney é un dos arpistas máis influíntes do panorama internacional, célebre por revolucionar o papel do instrumento no jazz, ser pioneiro na arpa electroacústica e docente na Royal Academy of Music de Londres. O músico, que actualmente reside en Suíza e compaxina a súa carreira artística co seu labor como bombeiro voluntario, presentará en Noia este proxecto nado en 2015 que combina jazz, rock e música clásica a través de composicións orixinais.
De esquerda a dereita, Park Stickney, Araxi Karnusian e Björn Meyer, o trío Gustaf, Frederick & Isabel
Noia Harp Fest
O Festival Internacional de Arpa Vila de Noia (Noia Harp Fest) é unha iniciativa promovida por Nalgures Producións e cuxa dirección artística recae na Asociación Cultural Noia Harp Fest. O evento, que se celebra do 29 de xullo ao 1 de agosto, conta co apoio do Concello de Noia e da Xunta de Galicia a través de Turismo de Galicia e do proxecto Concertos do Xacobeo. Tamén colaboran a Sociedade Cultura Recreativa Liceo de Noia, a Asociación Española de Arpistas (AEDA) e a Deputación Provincial da Coruña e Acción Cultural Española.
AXENDA NOIA HARP FEST PARA O VENRES 31 DE XULLO
31.07, 19.00 horas
Igrexa de Santa María A Nova | Siobhán Armstrong
31.07, 21.00 horas
Teatro Coliseo Noela | Banda do Noia Harp Fest con Su Garrido Pombo
31.07, 22.00 horas
Teatro Coliseo Noela | Park Stickney: Gustaf, Frederick & Isabel Trio
Os tres concertos son de acceso gratuíto e libre ata completar capacidade.
Máis de 20 estudantes de arpa, de entre 8 e 18 anos, participarán no V Encontro de Escolas e Alumnado de Arpa de Galicia, que culminará cun concerto a partir das 13:00 horas no Liceo de Noia
Pola noite, o Teatro Coliseo Noela acollerá un espectáculo inédito de arpa e electrónica con Beatriz Martínez e a dj viguesa Acacia Ojea, seguido do directo da escocesa Maeve Gilchrist
A 13ª edición do Noia Harp Fest comeza este mércores 29 coa estrea absoluta de Alén do azul, a peza gañadora do Premio Portus Apostoli de Composición e interpretada pola Real Filharmonía de Galicia co arpista José Antonio Domené como solista. Mentres que o Teatro Coliseo Noela acolle esta noite a xornada inaugural, o festival prepara o seu segundo día cunha programación centrada no talento novo e na experimentación sonora.
A xornada deste xoves 30 comezará no Liceo de Noia co V Encontro de Escolas e Alumnado de Arpa de Galicia, que reunirá a 22 estudantes de entre 8 e 18 anos procedentes de Mayeusis de Vigo, Conservatorio de Torroso en Mos e as Escolas Municipais de Música de Santiago e ETRAD de Vigo.
O Encontro naceu no 2022 coa intencion de estimular o talento emerxente do país ao abeiro do único festival de arpa do noroeste peninsular. Esta reunión de estudantes chegadas de distintos puntos de Galicia permite que poidan, alén de gozar dunha xornada de convivencia e celebración na vila de Noia, ter a ocasión de conversar e coñecer de perto a grandes instrumentistas que actúan no festival. Como colofón, a partir das 13:00 horas o grupo de arpistas ofrecerá un concerto con actuacións individuais e unha obra conxunta dirixida pola figura internacional Maeve Gilchrist.
Imaxe da terceira edición do Encontro de Escolas e Alumnado de Arpa de Galicia
A sesión nocturna trasladará a actividade ao Teatro Coliseo Noela. A partir das 21:00 horas terá lugar a estrea do proxecto exclusivo da arpista Beatriz Martínez e a artista sonora e dj viguesa Acacia Ojea, un espectáculo que naceu da colaboración entre dous mundos creativos e que fusiona arpa de levas, performance e electrónica.
O punto de partida son composicións orixinais para arpa con raíces na música tradicional. Sobre esa base, Acacia Ojea manipulará o son en tempo real a través de procesos electrónicos. Non se trata dun fondo musical nin dun simple acompañamento, senón dun diálogo aberto á improvisación onde o instrumento acústico se transformará por completo.
Contra as 22:00 horas, será a quenda da escocesa Maeve Gilchrist, solista de referencia a nivel internacional, recoñecida por revolucionar a arpa celta mediante a hibridación do folclore tradicional co jazz e a improvisación. O seu aclamado álbum ‘The Harpweaver’, descrito por The New York Times como “unha sofisticada mestura de folk e jazz”, foi cualificado pola crítica como “unha obra mestra da música de cámara moderna”.
A galega Beatriz Martínez presenta un espectáculo inédito de experimentación sonora no NHF
Noia Harp Fest
O Festival Internacional de Arpa Vila de Noia (Noia Harp Fest) é unha iniciativa promovida por Nalgures Producións e cuxa dirección artística recae na Asociación Cultural Noia Harp Fest. O evento, que se celebrará do 29 de xullo ao 1 de agosto, conta co apoio do Concello de Noia e da Xunta de Galicia a través de Turismo de Galicia e do proxecto Concertos do Xacobeo. Tamén colaboran a Sociedade Cultura Recreativa Liceo de Noia, a Asociación Española de Arpistas (AEDA) e a Deputación Provincial da Coruña e Acción Cultural Española.
AXENDA XOVES 30 DE XULLO
30.07, 13.00 horas
Liceo de Noia | V Encontro de Escolas e Alumnado de Arpa de Galicia
30.07, 21.00 horas
Teatro Coliseo Noela | Beatriz Martínez e Acacia Ojea
30.07, 22.00 horas
Teatro Coliseo Noela | Maeve Gilchrist
Os tres concertos son de acceso gratuíto e libre ata completar capacidade.
Tras o éxito de IRIBARNE, a plataforma creativa decide render homenaxe a Manuel Lourenzo, figura clave do teatro galego contemporáneo recentemente falecida, levando ás táboas a primeira peza galega gañadora do Premio Nacional de Literatura Dramática
O espectáculo, que se estreará no Teatro Rosalía Castro da Coruña o 4 de setembro, combina a estética vitoriana, o abraio do mito vampírico e a música en directo do compositor Iago Hermo interpretada pola soprano e violonchelista Esperanza Mara
Unha exposición sobre a figura do mestre poderase visitar no vestíbulo do teatro antes de cada función
ButacaZero, a plataforma creativa codirixida por Esther F. Carrodeguas e Xavier Castiñeira, estreará novo espectáculo a vindeira tempada. Trátase de A velada de Londres, montaxe coa que a compañía quere render unha fonda homenaxe ao dramaturgo, actor e docente Manuel Lourenzo, cuxa estrea terá lugar o 4 de setembro no Teatro Rosalía Castro da Coruña.
A dupla creativa, tras sorprender ao mundo da escena con IRIBARNE, regresa para adentrarse, por vez primeira, no teatro do autor do Valadouro. A elección desta peza, que forma parte do volume Veladas Indecentes -coa que Lourenzo se converteu no 1997 no primeiro autor galego en gañar o Premio Nacional de Literatura Dramática-, garda unha fonda pegada emocional para Castiñeira, pois traballou como axudante de dirección do propio Lourenzo neste texto no inicio da súa carreira. Unha experiencia marcada polo consello que o Mestre lle deu naquel entón: “Abre os ollos e róubame o que poidas”. Hoxe, ButacaZero devolve aquel xesto de xenerosidade cunha montaxe rigorosa, luminosa e chea de gratitude.
Da represión vitoriana á liberación: a fascinación polo mito
A obra de Lourenzo propón unha orixinal farsa e fantasía arredor do Drácula de Bram Stoker. A trama arranca cando o procurador Jonathan Harker regresa á súa vida burguesa tras a súa viaxe aos Cárpatos, obsesionado pola figura do Conde. A súa esposa Mina tenta protexelo, pero a entrada en escena dun misterioso doutor -que resulta ser o propio Drácula- desencadea un proceso no que o mundo sobrenatural e atávico vai desprazando a ríxida moral vitoriana. Lonxe do terror convencional, o texto explora a tensión entre os instintos e a razón, entendendo a “vampirización” como un acto de amor, liberación e aceptación do desexo.
Unha posta en escena viva con música en directo e talento interxeneracional
Cunha duración concentrada dunha hora, a lectura de Castiñeira triangula o universo orixinal de Stoker, o texto de Lourenzo e unha potente dimensión escénica. A atmosfera vitoriana vaise transformando gradualmente a medida que a natureza e o elemento sobrenatural se apoderan do espazo.
O elenco de A velada de Londres combina a solidez de actores de ampla traxectoria como Xurxo Cortázar (Iribarne, Shakespeare en Roma, O Premio) con novas promesas emerxentes da escena, como Sophia Rodal e Teo Piñeiro, mantendo vivo así o espírito de Lourenzo de apostar sempre polo impulso do talento mozo. A proposta de ButacaZero destaca, ademais, pola presenza constante no escenario da soprano e violonchelista Esperanza Mara, quen canta e interpreta a banda sonora (creada por Iago Hermo) en directo e interactúa na acción dramática.
A Velada de Londres. Equipo Xurxo Cortázar, Xavier Castiñeira, Beatriz de Vega, Carlos Pinilla (arriba), Esperanza Mara e Sophia Rodal sentadas
Máis ca un espectáculo: exposición e xornadas de pensamento
Co obxectivo de espallar o legado de Manuel Lourenzo alén das súas coñecidas aparicións na televisión (Mareas Vivas, Fariña), cada función contará no vestíbulo dos teatros cunha exposición itinerante deseñada conxuntamente entre o propio Castiñeira e Paco Oti e coa axuda do arquivo da Biblioteca-Arquivo Teatral Francisco Pillado Mayor.
Co gallo da preparación e estrea desta “homenaxe-montaxe” a Manuel Lourenzo, ButacaZero tamén está a impulsar encontros e xornadas de reflexión arredor da súa figura de arredor dos principais encontros teatrais de Galicia. Así sucedeu este mes de xullo na Conversa arredor do mestre acontecida no marco da Mostra Internacional de Teatro Cómico e Festivo de Cangas (MITCFC de Cangas), ás que se sumarán novas conversas este outono.
ButacaZero
ButacaZero é a plataforma creativa de Esther F. Carrodeguas e Xavier Castiñeira coa que propoñen un teatro que dialoga coa actualidade dende unha mirada crítica e irónica, e no que a tradición teatral se mestura con linguaxes contemporáneas. A compañía, creadora e produtora de propostas como IRIBARNE (con 9 Premios María Casares, entre eles o de mellor espectáculo), O único que verdadeiramente quixen toda a vida é ser delgada, Papagena, 32m2, Despois das ondas ou Voaxa e Carmín, sitúase como un referente do teatro contemporáneo no panorama escénico galego.
SOBRE A VELADA DE LONDRES, DE BUTACAZERO
Estrea absoluta: 4 de setembro de 2026 no Teatro Rosalía Castro da Coruña.
