Clotilde Trouillaud, que regresa á vila de Noia logo do seu exitoso concerto en solitario no 2018, e o dúo conformado por Hermanos Corbalán, habituais en citas como o Festival de Edimburgo, son dous dos pratos fortes desta edición do festival
A Igrexa de Santa María A Nova tamén acollerá un concerto de dúas grandes figuras da música antiga no país: a cantante Paula Ceremyzynsk e o arpista Manuel Vilas
Noia Harp Fest, o único festival especializado en arpa do noroeste peninsular, propón para este venres 5 unha singular viaxe sonora, que partirá da Praza do Tapal, para percorrer dous territorios cunha ampla tradición arpística: Paraguai e a Bretaña francesa.
Noia acollerá mañá pola noite dúas das citas máis agardadas desta edición do festival. Por unha banda, o regreso de Clotilde Trouillaud, unha das arpistas mais prestixiosas da súa xeración e que está a revolucionar o xeito de entender a música para arpa na Bretaña. Logo do seu exitoso concerto en solitario no Noia Harp Fest no 2018, Trouillaud continúa o seu camiño musical, cheo de paisaxes diversas e coloristas, e regresa este ano coa súa formación Lune Bleue Trio, acompañada por Erwan Bérenguer (guitarra) e Jean-Marie Stephant (batería).
Pola outra, unha cita coa música americana a través dunha sorprendente formación, inédita na escola de arpa paraguaia: o dúo de arpas formado polos irmáns Sixto e Juanjo Corbalán. Os dous teñen cadansúa carreira en solitario ou en diferentes formacións, mais como dúo están presentes habitualmente na programación do mellor certame de Europa, o Festival de Edimburgo, así coma en festivais de medio mundo. Mañá pola noite conquistarán ao público noiés coa súa excepcional linguaxe e a sutileza do tratamento das melodías da tradición arpística coas que debuxan imaxes cheas de forza e contrastes sonoros, soportados nun virtuosismo difícil de imaxinar para os que non o escoitan en directo. Antes, pola mañá, impartirán a segunda das clases maxistrais programadas polo Noia Harp Fest na Igrexa de Santa María A Nova.
Precisamente no museo terá lugar a terceira das citas musicais desta xornada. Será un concoerto con dúas grandes figuras da música antiga xuntas: a cantante polaca Paulina Ceremuzynsk, quen reside desde o ano 2004 en Galicia e investigou a reconstrución musical das cantigas de amigo, e o arpista compostelán Manuel Vilas, recoñecido polo seu traballo coa arpa ibérica, aínda que realiza un gran labor en investigación sobre a arpa jesuítica chiquitana -Bolivia- así como na arpa dobre do s.XIV que circulaba baixo a coroa de Aragón.
NOIA HARP FEST
O IXFestival Internacional de Arpa Vila de Noia (Noia Harp Fest) celébrase do 3 ao 7 de agosto. O evento, dirixido por Rodrigo Romaní, é unha proposta ecléctica, cunha ampla diversidade estilística, cuxo fío condutor é a interpretación musical a través da arpa. Savourna Stevenson, Steve Kettley, Hermanos Corbalán, Kora Jazz Trío, Clotilde Trouillaud, Paula Ceremuzynksa, Manuel Vilas, Beatriz Martínez, Rafa Fernández Trio, Anna Amigó, Trío Clepsidra ou Bleuenn le Friec forman parte do seu cartel, que a veciñanza pode gozar de xeito gratuíto tanto a ceo aberto -Xardíns da Central do Tambre, Praza do Tapal- coma no interior de recintos culturais da vila -Igrexa de Santa María A Nova, Teatro Coliseo Noela, Liceo de Noia-.
Noia Harp Fest conta co patrocinio do Concello de Noia, coa colaboración da Xunta de Galicia a través do Xacobeo 21-22 e da iniciativa concertosdoxacobeo.gal, ademais do soporte de Acción Cultural Española a través do programa PICE. O festival conta tamén coa colaboración de Cabaniñas do Bosque, da distribuidora dixital de música Altafonte e co apoio tanto do Liceo de Noia coma da Asociación Terra de Outes.
AXENDA NOIA HARP FEST – VENRES 5 DE AGOSTO 11.30 horas, Igrexa Santa María A Nova | Clase maxistral con Juanjo e Sixto Corbalán ‘A arpa paraguaia’ 20.00 horas, Igrexa Santa María A Nova | Concerto de Paulina Ceremuzynska & Manuel Vilas 22.00 horas, Praza do Tapal | Concertos de Lune Bleue Trio e Hermanos Corbalán
A península do Morrazo acollerá este venres un dos momentos máis especiais da 19ª edición do festival Sonrías Baixas. O mítico rapeiro Kase.O, considerado un dos mellores MCs do rap en castelán, ofrecerá en Bueu o seu último concerto en Galicia deste verán antes da súa retirada dos escenarios, anunciada esta primavera.
Kase.O, quen xa visitou no 2021 o recinto Multiusos da Estacada -nun concerto vibrante no que esgotou todas as entradas dispoñibles-, regresa este verán para celebrar unha despedida ao ritmo dun dos proxectos musicais ao vivo máis aclamados do rap hispano dos últimos anos: ‘JazzMagnetism’, unha proposta na que o MC explora a fusión entre xéneros fondamente marcados pola capacidade de improvisación e a calidade artística: o jazz e o hip hop.
Alén desta despedida, o SonRías propón para esta segunda xornada un cartel marcado polo seu habitual espírito festivo, cheo de potencia e enerxía. O festival acollerá a actuación de Rayden no marco da xira do seu 20º aniverario sobre os escenarios. O rapeiro e artista multidisciplinar presentará en Bueu o seu último álbum, ‘Homónimo’, que inclúe éxitos como ‘El mejor de tus errores’ ou ‘La mujer cactus y el hombre globo’.
Catro bandas darán a coñecer este venres no SonRías os seus traballos discográficos máis recentes. No caso de Ciudad Jara, o novo proxecto musical de Pablo Sánchez (La Raíz), volve a Bueu neste 2022 para presentar ‘Cinema’ nun potente espectáculo. Enérxico é tamén o cualificativo que define o directo de Bala, o dúo conformado por Anxela Baltar e Violeta Fernández. Logo dun pequeno parón, o grupo -unha das bandas de referencia do stoner e metal alternativo na actualidade- xira por escenarios de todo o país para dar a coñecer o seu terceiro traballo, ‘Maleza’, publicado o ano pasado. A noite tamén contará co rapeiro García Mc, quen convidará ao público do festival a percorrer unha estimulante travesía sonora polas dez illas do seu ‘Arquipélago Quilombo’, un show ecléctico e fiado con maestría no que se citan estilos como o reggae, o latin ou o hip hop. Coma el, o músico e produtor Arnau Moreno, Emlan, dará a coñecer o seu disco ‘Nuestro plan’, cun novo e sorprendente espectáculo de rock e pop, na que será a súa primeira actuación en territorio galego.
O cartel deste venres completarase coa actuación de Buhos, o grupo festivo de referencia en Cataluña na actualidade. Cun espectáculo ateigado de rock e mestizaxe musical, a banda ofrecerá no SonRías a súa única actuación deste verán en Galicia, na que avanzará os temas que darán vida ao seu novo e esperado próximo disco.
O galardón, que pretende salientar a traxectoria de profesionais das artes escénicas galegas co recoñecemento de figuras imprescindibles do sector de xeito anual, entregarase durante a celebración da nova edición do Festival Internacional Outono de Teatro de Carballo en outubro
O xurado destacou que “Calvo é un histrión de carácter e selo propio que, coa súa enerxía actoral peculiar, a súa agudeza creativa e o seu dilatado oficio, soubo dar vida ás máis inesquecíbeis e orixinais criaturas escénicas, sendo un dos cómicos de referencia no teatro galego”
Por outra banda, a 6ª edición do certame de Micro-Escenas Metro Cadrado xa ten pezas finalistas: as creadoras e creadores Compañía Anxela Blanco, Dani Blanco, Cacharela Teatro, Sr. Lili, Colectivo #ChamizoBelloVila e Mónica Paradela Cuñarro foron seleccionados para presentar as súas creacións experimentais na nova edición do FIOT este outubro
O Festival Internacional Outono de Teatro de Carballo, o FIOT, outorgará este 2022 o premio Xograr de Outono a Evaristo Calvo. Deste xeito, o encontro, unha cita de referencia en Galicia e no Estado polo seu traballo a prol da creación de novos públicos e o o fortalecemento da escena, mantén viva a chama da posta en valor e o recoñecemento de figuras imprescindibles do sector cultural galego, coa entrega anual dun galardón que quere salientar a traxectoria de profesionais das artes escénicas.
Nesta ocasión, as xograresas e xograreses do FIOT decidiron premiar ao cómico Evaristo Calvo. No seu fallo, o xurado destacou que “Calvo é un histrión de carácter e selo propio que, coa súa enerxía actoral peculiar, a súa agudeza creativa e o seu dilatado oficio, soubo dar vida ás máis inesquecíbeis e orixinais criaturas escénicas, sendo a día de hoxe un dos cómicos de referencia no teatro galego”. O artista recollerá este outono en Carballo, durante a celebración da nova edición do FIOT, o testigo da actriz Casilda García Alfaro, galardoada en 2021.
FINALISTAS DO CERTAME DE MICRO-ESCENAS METRO CADRADO
Por outra banda, a sexta edición do certame de Micro-Escenas Metro Cadrado do Festival Internacional Outono de Teatro de Carballo xa ten pezas finalistas. Compañía Anxela Blanco, Dani Blanco, Cacharela Teatro, Musicarte Rey Saavedra, Colectivo #ChamizoBelloVila e Mónica Paradela Cuñarro presentarán as súas últimas creacións experimentais na nova edición do FIOT prevista para este outono, nunha das liñas de programación máis queridas polo público local, quen valorará, como é habitual, tanto a mellor interpretación coma o mellor espectáculo.
O Certame de Micro-escenas Metro Cadrado é un concurso para proxectos escénicos de pequeno formato concibidos para poñer en escena en espazos non teatrais. Ten por obxecto apoiar a creación escénica de novos formatos e a compañías e creadoras e creadores emerxentes, así como captar novos públicos e implicar aos espectadores e á cidadanía nas artes escénicas.
Metro Cadrado ofrece ao público da comarca unha nova experiencia escénica, diferente ás habituais nos recintos: sen barreiras, sen artificios e desde a proximidade. Con esta intención, o FIOT convida ás compañías ou artistas emerxentes a crear ou deseñar un espectáculo (de teatro físico, música, clown, performance, danza, manipulación de obxectos…) de entre 10 e 20 minutos, que se poida poñer en escena, especificamente, nun espazo non teatral.
Nesta sexta edición do certame recibíronse un total de 36 propostas, tanto de creadores individuais como de equipos formados por profesionais de diferentes disciplinas: performance, teatro, danza, circo, etc. A maior parte de propostas proceden de novos creadores, pero tamén houbo profesionais consolidados nas artes escénicas con afán de experimentar. Entre todas elas, o xurado do Metro Cadrado, conformado por figuras do sector cultural, seleccionou media ducia de espectáculos finalistas:
· Xeografía dos corpos, presentada por Compañía Anxela Blanco.
· Viaxar é un pracer, presentada por Dani Blanco.
· Actriz, chora, presentada por Cacharela Teatro.
· Cinecleta, cinema doméstico a pedais, presentada por Sr. Lili.
· Menú do día, presentada por Colectivo #ChamizoBelloVila.
· Homeless, presentada por Mónica Paradela Cuñarro.
As pezas seleccionadas polo xurado, unha vez representadas na vindeira edición do FIOT, recibirán unha compensación económica de 450€. Ademais, todas as obras exhibidas serán valoradas polo público asistente mediante un sistema de votacións e optarán aos seguintes premios: Premio do Público de 150 € e Premio á Mellor Interpretación de 150 €.
As pezas que se poderán ver durante o mes de outubro na nova edición do FIOT. Tal e como é habitual no Metro Cadrado, cada espectáculo contará con catro funcións para facilitar a súa visualización por parte do público. Dúas serán en horario de mañá e outras dúas en horario de tarde. Tanto na web do FIOT coma no programa de man do festival poderanse consultar, con antelación, as horas e lugares das representacións.
As arpistas Beatriz Martínez, Carmen Bernal e Reyes Gómez, protagonistas da segunda xornada do Noia Harp Fest
Beatriz Martínez, a instrumentista galega máis relevante no eido da arpa céltica, presenta o seu primeiro álbum en solitario nos xardíns da Central do Tambre
O Teatro Coliseo Noela celebra desde as 22.00 horas un concerto especial da man da Asociación Española de Arpistas (AEDA) no que participará o Trío Clepsidra
O talento feminino é o protagonista da segunda xornada do Noia Harp Fest, que se celebra desde este mércores e até o domingo 7. As arpistas Beatriz Martínez, Reyes Gómez e Carmen Bernal actúan mañá, xoves 4 de agosto, no marco do único festival especializado do instrumento que se celebra no noroeste da Península Ibérica.
A actividade comezará ás 11.30 horas no Liceo de Noia coa primeira das clases maxistrais que ofrece este ano o festival, nomeada ‘Contando historias’ e que impartirá a intérprete Reyes Gómez, arpista do Trío Clepsidra. O programa continuará en horario de tarde (19.30 horas), nos xardíns da Central do Tambre, coa presentación de ‘Tal como as nubes’, o primeiro álbum en solitario de Beatriz Martínez, a figura máis relevante de Galicia no eido da arpa céltica. Este traballo aporta unha concepción moi novidosa no tratamento da música de tradición oral para esta arpa coa que se misturan, cunha sensibilidade especial e un estilo absolutamente propio, temas de composición orixinal. Formada na Etrad de Vigo, compoñente da orquestra SonDeSeu e do grupo Ghaveta, a arpistas ten unha sólida carreira como intérprete. No concerto estará acompañada ao buzuki e á guitarra acústica por Diego Langarica.
Xa pola noite, contra ás 22.00 horas, no Teatro Coliseo Noela celebrarase o Concerto Especial AEDA, en colaboración coa Asociación Española de Arpistas (AEDA), no que participarán Carmen Bernal(gañadora do I Certame AEDA para novos intérpretes) e o Trío Clepsidra. Este último explora o atractivo e orixinal repertorio existente para arpa, viola e frauta travesera nas súas múltiples posibilidades. Os seus integrantes, nados en Salamanca e formados nos principais centros europeos, realizan unha intensa actividade profesional baseada en frecuentes colaboracións con orquestras nacionais; concertos de música de cámara xunto a ensembles especializados en repertorio clásico, antigo e contemporáneo; e a docencia en diferentes conservatorios e cursos de perfeccionamento.
AXENDA NOIA HARP FEST – XOVES 4 DE AGOSTO 11.30 horas, Liceo de Noia | Clase maxistral con Reyes Gómez: ‘Contando historias’ 19.30 horas, Xardíns da Central do Tambre | Concerto de Beatriz Martínez & Diego Langarica 22.00 horas, Teatro Coliseo Noela | Concerto especial AEDA: Carmen Bernal e Trío Clepsidra
Noia celebra cinco xornadas de exaltación da música instrumental co inicio do único festival de arpa no noroeste peninsular: o Noia Harp Fest
A nova edición do Festival Internacional de Arpa Vila de Noia celebrarase entre o 3 e o 7 de agosto en distintas localizacións da cidade, con concertos con entrada libre, e contará con artistas procedentes de Galicia, Escocia, Senegal, Paraguai, Bretaña ou Polonia
A directora de Turismo da Xunta de Galicia, Nava Castro, e o concelleiro de Cultura e Turismo de Noia, José Pérez, participaron na presentación do evento, que forma parte da programación musical do Xacobeo 21-22; nun acto no que supervisaron os labores de preparación dos distintos escenarios do festival da man do seu director, Rodrigo Romaní
A vila de Noia transformarase desde mañá nun grande escenario no que a música instrumental será protagonista. Este mércores, 3 de agosto, comeza unha nova edición do único festival de Galicia e do noroeste da Península Ibérica que ten como absoluta protagonista a arpa. O corazón da Ría da Estrela volverá acoller o Noia Harp Fest, que este ano celebra súa novena edición cun cartel conformado por artistas dunha notable calidade artística e chegados de Escocia, Senegal, Paraguai, Bretaña, Polonia ou Galicia.
O Festival Internacional de Arpa Vila de Noia conta co patrocinio do Concello de Noia, coa colaboración institucional da Xunta de Galicia a través do Xacobeo 21-22 e da iniciativa concertosdoxacobeo.gal, ademais do soporte de Acción Cultural Española a través do programa PICE. Noia Harp Fest (NHF) conta tamén coa colaboración de Cabaniñas do Bosque e a distribuidora dixital de música Altafonte, ademais do apoio tanto do Liceo de Noia coma da Asociación Terra de Outes.O director artístico do NHF, Rodrigo Romaní, presentou esta mañá a programación completa do festival, unha proposta ecléctica cunha ampla diversidade estilística e cuxo fío condutor é a interpretación musical a través da arpa. Savourna Stevenson, Steve Kettley, Hermanos Corbalán, Kora Jazz Trío, Clotilde Trouillaud, Paula Ceremuzynksa, Manuel Vilas, Beatriz Martínez, Rafa Fernández Trio, Anna Amigó, Trío Clepsidra ou Bleuenn le Friec formarán parte desta novena edición do evento, que a veciñanza poderá gozar de novo tanto a ceo aberto -Xardíns da Central do Tambre, Praza do Tapal- coma no interior de recintos culturais da vila -Igrexa de Santa María A Nova, Teatro Coliseo Noela, Liceo de Noia- de xeito gratuíto.
Rodrigo Romaní deu a coñecer a proposta nun percorrido polas distintas localizacións do festival -como a Igrexa Santa María A Nova, o Teatro Coliseo Noela ou a Praza do Tapal- no que tamén participaron a directora de Turismo da Xunta de Galicia, Nava Castro, e o edil de Cultura e Turismo do Concello de Noia, José Pérez. Tal e como apuntou Castro, o evento, “que situará a Noia no epicentro galego da música instrumental”, forma parte da programación musical do Xacobeo 21-22, que conta con más de 100 eventos ao longo de toda a xeografía galega e que atende a diferentes públicos e estilos musicais.
Pola súa banda, o concelleiro apuntou cara o fondo vínculo entre o festival e a cidade, grazas á aproximación do feito cultural á cidadanía e a proxección turística que supón para Noia a celebración do evento. Ao fío, lembrou que este ano o NHF contou, grazas á colaboración do Concello, con presentacións en localidades como Madrid, Braga ou Porto; e, neste sentido, tamén puxo en valor a convocatoria da primeira edición do Premio Internacional de Composición Portus Apostoli, unha aposta innovadora por ampliar o repertorio das obras para arpa e orquestra. O título do premio fai precisamente referencia á Ruta Xacobea recoñecida recentemente polo Cabildo da Catedral de Santiago, un camiño marítimo utilizado desde 1147 e que parte da vila. A día de xoxe, numerosos edificios de Noia -entre os que se atopa a Igrexa de Santa María A Nova- conservan gravados, inscricións gremiais e restos arquitectónicos que manifestan a relación da localidade co Camiño de Santiago.
O galardón, que conlevará unha achega económica de 2.000 euros para a composición gañadora, suporá a estrea da obra, interpretada pola Real Filharmonía de Galicia na tempada 2022-2023. O prazo para a presentación de propostas está aberto ao longo deste 2022 a través do web www.noiaharpfest.gal.
Programación
O IX Festival Internacional de Arpa Vila de Noia propón un programa aberto á diversidade musical e estilística, na que o público poderá gozar da interpretación de artistas procedentes de Escocia, Senegal, Paraguai, Bretaña ou Polonia, ademais de numerosas intérpretes galegas. Entre os nomes máis destacados da cita destaca a presenza da arpista escocesa Savourna Stevenson, quen se distingue polo seu particular e ecléctico impulso innovador para romper barreiras entre clásico, folk, raíz e jazz. A intérprete acompañarase o sábado 6 de agosto, na Praza do Tapal (22.00 horas) do saxofonista Steve Kettley.
Outro dos concertos imprescindibles será a do trío bretón Lune Blue (venres 5, 22.00 horas, Praza do Tapal), liderado por Clotilde Trouillaud, a prestixiosa arpista que está a revolucionar o xeito de entender a música na arpa na Bretaña. Trouillaud, que regresa ao NHF logo de ofrecer unha actuación memorable como solista na edición do 2018, brindará ao público un espectáculo cativador coa colaboración do guitarrista Erwan Bérenguer e do batería Jean-Maria Stephant.
Tampouco faltará á cita en Noia un dos países habituais e no que a arpa é o instrumento nacional: Paraguai. Desta quenda será o dúo Hermanos Corbalán -habituais no Festival de Edimburgo- o que conquiste, coa súa sutileza e virtuosismo, ao publico noiés. Primeiro actuará na praza do Tapal o venres 5 (22.00 horas) e, dous días despois, compartirá escenario coa recente incorporación ao cartel do festival, a arpista catalá Anna Amigó. A cita, que será o ramo do festival, chegará o domingo 7 de agosto ás 20.00 horas no que será, á vez, a inauguración do novo espazo cultural a ceo aberto nas Cabaniñas do Bosque de Albeida -Premio Nacional de Arquitectura 2020- na parroquia de San Cosme de Outeiro, no concello veciño de Outes.
E, desde América do Sur, o Noia Harp Fest percorrerá estilos e paisaxes sonoras diversas até chegar ao continente africano. Unha das propostas máis singulares deste ano será a presenza do Kora Jazz Trio,banda senegalesa que destaca pola súa capacidade e orixinalidade na fusión musical e que conta cunha morea de fieis en países como Brasil, Xapón, Francia ou Arxelia. A súa actuación será o sábado 6, na praza do Tapal, na sesión que comezará ás 22.00 horas.
Este verán o Noia Harp Fest tamén explora as relacións da música co audiovisual. Ese será o eixe da proposta que a arpista bretona Bleuenn Le Friec e o guitarrista noiés Rafa Fernández presenten no festival: unha conversa musical acompañada de videoproxeccións que transportarán ao público a un mundo de ensoñación (6 de agosto, 20.00 horas, Teatro Coliseo Noela). E alén da fusión, o festival tamén achegará o traballo de grandes figuras da música antiga, como é o caso da cantante polaca Paulina Ceremuzynska e o arpista compostelán Manuel Vilas (venres 5 de agosto, 20.00 horas, Igrexa de Santa María A Nova) ou mesmo do alumnado que forma parte das diferentes escolas xuvenís de arpa de toda Galicia. O colectivo será o responsable da inauguración do NHF este mércores, 3 de agosto, cun concerto no Liceo de Noia que comezará ás 19.00 horas.
O programa completarase coa presentación de Tal como as nubes, o primeiro álbum en solitario de Beatriz Martínez, a figura máis relevante de Galicia no eido da arpa céltica nos Xardíns da Central do Tambre o xoves 4 (19.30 horas). A intérprete, membro de SonDeSeu e do grupo Ghaveta, estará acompañada ao buzuki e á guitarra acústica por Diego Langarica. De seguido, no Teatro Coliseo Noela (a partir das 22.00 horas), celebrarase o Concerto Especial AEDA, en colaboración coa Asociación Española de Arpistas (AEDA), no que participarán Carmen Bernal e o Trío Clepsidra.
Actividades complementarias
Como é habitual, a veciñanza tamén poderá gozar das clases maxistrais con artistas que participan no cartel do festival. O primeiro taller chegará o xoves 4 de agosto da man de Reyes Gómez, arpista do Trío Clepsidra, no que se abordará a ‘Música española para arpa’. Ao día seguinte será a quenda do curso ‘El arpa paraguaya actual’ con Juanjo Corbalán, un dos membros do recoñecido dúo Hermanos Corbalán. Finalmente, o 6 de agosto chegará o taller doutro dos pratos fortes desta edición do Noia Harp Fest: Savourna Stvenson, quen impartirá o obradoiro ‘Música para clarsach’, unha arpa escocesa.
Este ano o festival tamén propon un obradoiro de construción, en familia, da arpa de San Martiño de Noia. Este taller, sen límite de idade, propón ás persoas asistentes poder montar e personalizar a súa propia arpa, baseada no instrumento central da arquivolta do pórtico de San Martiño de Noia. O luthier Luis Martíns -especialista en arpas antigas e barrocas, responsable da recreación dos instrumentos da arquivolta do templo- será quen imparta este curso, no que se empregarán técnicas e materiais actuais e permitirá que o público aprenda este verán a construír e montar unha arpa moi lixeira e compacta, ideal como instrumento de iniciación e tamén de viaxe.
Convidadas internacionais
No marco da celebración do Noia Harp Fest, a dirección do festival reunirase con representantes de citas arpísticas europeas. Co soporte de Acción Cultural Española a través do seu programa PICE (Programa para la Internacionalización de la Cultura Española), o Noia Harp Fest programará unha xuntanza o 5 de agosto na que figurarán como convidadas dúas citas internacionais de prestixio: o Zagreb Harp Festival de Croacia, representado pola arpista Tajana Vukelic, e o Arpe del Mondo, de Cerdeña, que contará co arpista Raoul Moretti como convidado.
AXENDA NOIA HARP FEST 2022
MÉRCORES 3 DE AGOSTO
19.00 horas, Liceo de Noia | Concerto do alumnado das escolas de arpa de Galicia
20.00 horas, Liceo de Noia | Foliada de benvida con arpistas e bailadores
