O traballos enviaranse por vía electrónica ao enderezo comunicacion@vilalba.es. E o prazo de presentación dos mesmos rematará ás 23:59 horas do 17 de abril de 2020.
En Culturalia GZ quixemos xuntar a celebración do Día Mundial da Poesía e o Día Internacional da Muller mediante a edición virtual da Antoloxía de 21 Voces Poéticas. 8 DE MARZO. Versos na Loita Común, onde se reune a sensibilidade estética de poetas coma Adolfina Mesa, Andrea Fernández Maneiro, Antonio García Teijeiro, Arancha Nogueira, Beatriz Dourado, Beatriz Maceda Abeleira, Carlos Da Aira, Eva Veiga, Iria Collazo López, Lourdes Maceiras, María José Fernández López, Mariña Maceiras, Miguel Díaz, Natalia González Gómez, Navia Rivas de Castro, Patricia Torrado Queiruga, Pepa Álvarez Gómez, Primitivo Oliva Fernández, Rochi Nóvoa Vázquez, Ximena Mariño e Xosé Otero Canto.
Unha humilde publicación na que se mestura e/ou conflúen o ritmo reivindicativo dos versos coa expresividade cromática das imaxes que os acompañan.
No seguinte enlace temos acceso á introdución e á versión galego-portuguesa que o poeta André Da Ponte realizou de O Cemitério Marinho, de Paul Valéry.
· Xa están publicados os vídeos do venezolano Rubén Martínez e do galego Luís Prego baixo a etiqueta #ocontononpara
Trala cancelación do Festival Atlántica por mor das medidas tomadas para
controlar a propagación do coronavirus, a organización do encontro está a
publicar nas súas canles sociais unha colección de vídeos con contos gravados
ex profeso polos artistas desta edición. Este material vaise difundir coa
etiqueta propia #ocontononpara e outras vinculadas a esta situación excepcional
como #ficonacasa ou #quedonacasa.
Xusto logo das medidas acordadas pola Xunta e polos concellos, produciuse
unha cancelación masiva de actividades culturais na comunidade galega. A
dirección do Festival centrou as súas forzas en garantir a volta dos artistas
aos seus lugares de residencia antes do previsible peche dos desprazamentos,
pero no medio desta actividade xurdiu a idea de agasallar o público con contos
destes narradores.
Algúns deles chegaron a ter algunha función e mesmo a participar na gala
inaugural do Atlántica, pero os máis deles marcharon coa metade dos
espectáculos por facer. Estes vídeos son un xeito de paliar ese baleiro e
tamén, unha contribución para alixeirar a corentena que se está a vivir no
país. Por iso, haberá historias para todos os públicos: contos para nenos e
tamén para maiores.
Xa está publicado un conto do venezolano Rubén Martínez e un punto de baile do galego Luís Prego, pero vanse engadir as historias de moitos máis artistas,
como Sandra Araguas (Huesca), Fernando Saldaña (Salamanca), Aline Cântia e
Chicó do Céu (Brasil), Carolina Rueda (Colombia), Noelia Carioca (Salamanca),
José Luis Gutiérrez “Guti” (Zamora) ou Sofía Maul (Madeira, Portugal), por
citarmos algúns. Tamén haberá historias de contadores galegos como Pablo Díaz,
Raquel Queizás, Charo Pita, Celso Sanmartín, María da Pontragha, Cris de Caldas
ou Dani Blanco.
Con esta acción, o Festival Atlántica únese á vaga de solidariedade que
se está a desenvolver nas redes sociais, onde se está a brindar contido
cultural para estes días de peche na casa. En palabras de Soledad Felloza,
directora do festival, “Atlántica non apaga o seu faro de historias, que
nunca choveu que non escampase e volveremos navegar; cando volva a primavera,
como dicía Álvaro Cunqueiro, serán mil primaveras máis”.
Á poucos días para a inauguración oficial do Festival Atlántica, chega
unha das citas tradicionais deste encontro de narración oral: a función na Aula
de Pediatría do Hospital Clínico Universitario de Santiago. Este ano visitarán
o centro hospitalario os brasileiros Aline Cântia e Chicó do Céu e levarán ata
aló o seu espectáculo ‘Contos de lá nos cantos de cá’ [17:30, Aula de
Pediatría, en portugués].
Todas as historias desta obra acontecen nunha inmensa árbore baixo a cal
un avó de Minas Gerais se detén para descansar. Alí, sentado nun tronco, comeza
a contar contos: o da árbore xenerosa ou o dun par de zapatos namorados. Narra
contos que viñeron de lonxe, contados por camiñantes que chegaban alí traendo
historias do mundo: dunha princesa medorenta, dun neno que danzaba coas abellas
ou dunha árbore de froita amarela, da orixe das estrelas ou do amor entre
Godofredo e Estela. Contos que invitan ao espectador a silenciar os ruídos
externos e entrar no tempo do ‘érase unha vez…’.
A contadora Aline Cântia e o músico e compositor Chicó do Céu
traballan xuntos dende hai dez anos en investigacións, proxectos e camiños
compartidos. En 2011 fundaron o Instituto Cultural Abrapalavra, que xa gañou
quince premios por diferentes traballos ligados á tradición. O Instituto
traballa na produción de traballos que dialogan con recollidas de tradición
oral, estudos independentes, creación de grupos de narradores de historias e
actividades de formación artístico-cultural. Co obxectivo de descentralizar e
democratizar o traballo artístico, o Instituto adoita realizar accións
nacionais e locais, de carácter continuo ou permanente. Todas estas accións,
actividades e presentacións contan cun rexistro sonoro e audiovisual. O dúo
define o propósito do Instituto Cultural Abrapalavra nunha frase: “Contar,
cantar e escoitar historias foi o camiño que escollemos para un profundo e
pracenteiro intercambio de experiencias, saberes e feitos”.
O programa completo do Atlántica así como a información sobre os artistas
pódese consultar na web do Festival (http://festivalatlantica.gal).