por martinho | Oct 15, 2020 | Autores/as, Creación, Novas, Xeral
Para este sábado 17 de outubro, o IEU programa, dentro do seu proxecto Flora da Ulloa, a última excursión botánica do ano, adiada desde pasados fins de semana pola meteoroloxía adversa. O sábado 17 seica estará bastante cuberto -tras dun venres con bastante sol-, mais a día de hoxe con baixas posibilidades de choiva.
Aparte de rexistrar a flora que detecten, principalmente nas penedías de xisto, explorarase a localización do castro próximo e o estado dunha superficie bastante grande que mantén arborado autóctono.
Por mor das novas limitacións polo COVID-19, limitarase a un máximo de 10 persoas.
por martinho | Ago 27, 2020 | Novas, Xeral
Despois da exitosa excursión do pasado domingo 16 de agosto pola ribeira do Ulla (12 persoas e encontro dun importante núcleo da ameazada Scrophularia herminii), o IEU prepara para o próximo domingo 30 de agosto, dentro do proxecto FLORA DA ULLOA outra andaina polo monte coa ansia de procurar e identificar plantas polas brañas da Serra do Careón e o seu contorno.
Á mañá visitarán a braña do Puxeiro, lindante con Friol e Toques, onde se poderán ver plantas raras na Ulloa e tamén en Galicia, como unha especie de toxo das brañas (Genista berberidea, exclusiva da Galicia atlántica e norte de Portugal) ou a pimpinela maior (Sanguisorba officinalis).
A tarde será máis aventureira e exploratoria, buscando lugares brañentos pola zona central da serra e polo contorno das aldeas de Dorra, Ermita, Émora e Labagueira (parroquia de Cuíña).
Farase case imprescindible o uso de botas e pantalón largo. Polas condicións actuais, tamén será obrigatorio o uso da máscara sanitaria
por martinho | Jul 27, 2020 | Autores/as, Novas, Xeral
Despois destes meses de parón debido á pandemia, o domingo 2 de agosto , o IEU retomará as excursións botánicas do proxecto Flora da Ulloa.
Dentro da temática de flora rara e ameazada, e coorganizado con Quercus Sonora, a visita levará ata a Carballeira de Lebesende, en perigo por un proxecto de enerxía eólica que pretende cruzar dita carballeira cun vial de acceso para un único muíño, para o cal existen alternativas a priori menos agresivas.
En Anexo van alegacións feitas polo Instituto de Estudos Ulloáns ao respecto, baseadas no traballo realizado por Quercus Sonora.
O obxectivo será coñecer máis detalles da flora desta carballeira e arredores, tanto para seguir recopilando información da flora ulloana como para ter máis coñecemento no que basear as alegacións que se poidan facer ao respecto do proxecto eólico nun futuro.
As prazas será limitadas en torno a 10 persoas e será preciso levar mascara de protección para evitar potencial propagación do coronavirus. A volta está prevista para o medio día, en torno ás 14h.
Se non hai novidades coa pandemia e coa meteoroloxía, seguirán outras excursións cada dúas semanas até, cando menos, mediados do mes de outubro.
por martinho | Feb 13, 2020 | Autores/as, Novas, Xeral
O IEU retoma o proxecto FLORA DA ULLOA con novas excursións centradas en coñecer as plantas máis raras e ameazadas da Ulloa, como desculpa para seguir coñecendo a comarca e o conxunto da súa flora. O inverno está fraquiño e o impulso primaveral asoma por varias frontes; os amarelles ou narcisos son do máis propio deste tempo
Á mañá, de forma máis divulgativa e mediante un paseo accesible a calquera, visitarase A Peneda para coñecer e valorar a poboación do Narcissus cyclamineus, un narciso exclusivo da Galicia atlántica e norte de Portugal, do que só coñecemos esta poboación na Ulloa, no seu limite leste da área de distribución.
Á tarde procurarase a especie, e o que se tercie, na ribeira do Ferreira (sábese dunha poboación xa no concello de Guntín), só para espíritos e pernas aventureiras, nunha das zonas máis salvaxes e inaccesibles da Ulloa.
As persoas participantes deben avisar a súa asistencia para a xeira da tarde.
por martinho | Oct 10, 2019 | Autores/as, Novas, Xeral
Como a pasada fin de semana resultou imposible organizar a excursión inicialmente prevista polo río Seco, nas serpentinas que lindan Palas con Santiso e onde son frecuentes as principais rarezas botánicas da Ulloa, e como aínda apenas choveu, desde o IEU (dentro do proxecto Flora da Ulloa) adiaron esa excursión para o sábado 19 , de maneira que este próximo sábado 12, as persoas que asistan patearán as ladeiras do Farelo, por onde hai máis dun século o cura Baltasar Merino rexistrou algunhas das primeiras plantas das que a ciencia botánica ten coñecemento na Ulloa.
As poucas excursións que farán no inverno serán os sábados, xa que desde o domingo 20 o monte convértese nun perigoso campo de combate que acostuma provocar accidentes mortais, aínda que non estarán libres de topar con batidas ao porco bravo, que tratarán de evitar.
Seguirán a procurar brañas e gándaras, onde varias especies raras aínda poden estar en flor, como as orballiñas do xénero Drosera, unhas curiosas plantas insectívoras que non se viron este ano.
Neste comezo do outono, seguramente tamén se encontrará e se aprenderá a distinguir as dúas tollemerendas que aparecen no cartel anexo: Crocus serotinus, unha especie de zafrán bravo, que xa se observou en flor desde o pasado día 27; e Merendera montana, dunha familia distinta, cando menos aberta desde o día 20.
*Información achegada desde o IEU.
