O tema poderase escoitar a partir das 00.00 do mércores 25 de setembro nas principais plataformas dixitais, dous días antes da chegada do filme ás salas
Fillas de Cassandra publicará o vindeiro mércores, 25 de setembro, o seu novo sinxelo, Cuando nadie ve. O tema, que se poderá escoitar a partir das 00.00 horas nas principais plataformas dixitais, é a canción orixinal creada polo dúo especificamente para a película Soy Nevenka, cuxa estrea mundial tivo lugar onte, sábado 21, no marco da 72º edición do Festival de San Sebastián. O filme, dirixido por Icíar Bollaín, chegará ás salas de cinema o 27 de setembro.
Cuando nadie ve trátase do debut cinematográfico, como autoras, de Fillas de Cassandra, ámbito no que Sara Faro e María SOA deron os seus primeiros pasos coa creación da música que fiou a celebración dos XXII Premios Mestre Mateo o pasado mes de marzo -un ano despois da publicación do seu primeiro disco, Acrópole-. O compositor Xavi Font, responsable da banda sonora de Soy Nevenka, foi quen falou con Fillas de Cassandra do proxecto, unha proposta aplaudida por Icíar Bollaín, “quen contactou con nós e quen nos deu liberdade absoluta para que desenvolveramos o noso traballo”, sinalan Sara Faro e María SOA.
A canción orixinal do filme naceu da lectura e do estudo do guión da película, asinado pola propia Bollaín e Isa Campo. “Para nós foi moi impactante afondar máis aínda na historia de Nevenka Fernández, tan fiada ao universo e o relato do álbum Acrópole. A nosa gran preocupación durante o proceso creativo era atopar a voz, a sonoridade, as palabras e as harmonías dunha historia tan potente, mais dun xeito elegante e mesurado, sen caer na revictimización”, di Fillas de Cassandra.
“Buscamos que a canción fixera referencia a momentos clave da película ou que incluira, dalgún xeito, reminiscencias da mesma. Por iso no retrouso, ao tomar como referencia a súa decisión, lanzamos unha mensaxe esperanzadora (y si me alejan de mí /vengan todas sin callar); ou cando é obvio que todo o mundo do seu arredor observa o que hai e non se pronuncia, dicimos iso de aquí todos miran / pero nadie ve ”, explica o dúo.
Cuando nadie ve, producido por Fillas de Cassandra, Mumbai Moon e Greta Ch’aska, tamén incorpora uns versos en galego, nos que se fai referencia directa á negra sombra de Rosalía de Castro, “que tamén persegue a Nevenka”. “I en tódalas partes me buscas / i en todas me nombras / os flashes proxectan a forma dunha negra sombra”, canta o dúo, que na gravación da peza contou coa colaboración de Cibrán Seixo no violín e de Margarida Mariño no violoncello.
“Poñer en música e palabras o que viviu foi unha experiencia moi intensa e cremos que non hai un mellor debut posible para nós no mundo do cinema que sendo parte desta película. Estamos moi agradecidas”, aseveran María SOA e Sara Faro.
O tema Cuando nadie ve poderase escoitar nas principais plataformas dixitais desde o día 25, dúas xornadas antes da chegada da cinta ás salas de cinema, o venres 27 de setembro. A première mundial de Soy Nevenka -unha película orixinal Movistar Plus+ producida por Kowalski Films, Feelgood Media, Nva Peli AIE e produción asociada de Garbo Produzioni (Italia)- tivo lugar esta mesma fin de semana no Festival de San Sebastián, no que o filme de Icíar Bollaín competirá, na sección oficial, pola Concha de Ouro.
Fillas de Cassandra publica mañá, venres 12, o seu novo sinxelo, nomeado d’ESCARNIO, “un ritual para desfacerse da ira”
A creación electrónica do dúo vigués é un canto que se sitúa “entre a sátira e a introspección”, e que pretende dar conta “do proceso que supón deixar atrás a furia e os dixomedíxomes”
Tal e como explican María SOA e Sara Faro, a súa nova creación, en cuxa produción tamén participan Mumbai Moon e Greta Ch’aska, “é unha sorte de cantiga actualizada que se sitúa entre a queixa satírica e un exercición de autocrítica e introspección”. “d’ESCARNIO quere dar conta do proceso longo e complexo que supón abandonar a furia e os dixomedíxomes ata acadar un canto liberador; e que esixe recoñecer e nomear o dano para deixalo ir”, din.
A sutileza das melodías acústicas, a agresividade dos recursos do xénero industrial e as texturas etéreas que se dilúen entre os ritmos máis tribais, vencellados á raíz, ofrecen, como resultado, un tema de corte electrónico e compacto no que a ira se revela como un espazo de forza, mais tamén de vulnerabilidade.
d’ESCARNIO, o novo tema de Fillas de Cassandra, é unha das novidades que se pode escoitar nos directos da xira Últimas Dionisíacas, na que Sara Faro e María SOA revisitan os temas do seu disco Acrópole desde unha perspectiva máis electrónica e escura. Logo de visitar Marrocos e actuar o pasado sábado canda Ed Sheeran ou Bomba Estéreo no Gozo Festival, as artistas viguesas continuarán o seu periplo peninsular e formarán parte do cartel de citas de referencia, como é caso do Festival de Ortigueira, El Tingladu, Festival de la Luz ou Revenidas, entre outras moitas.
A música de Fillas de Cassandra, en Netflix
Alén da estrea este venres 12 do sinxelo d’ESCARNIO, a música de Fillas de Cassandra, está de actualidade nas plataformas audiovisuais.Se hai uns días II. LISÍSTRATA (varre vasoira) superaba o millón de reproducións en Spotify, ao éxito súmase tamén a difusión de canta miña sombra (negra sombra), por ser unha das pezas quese inclúen na banda sonora de Clanes, a serie de Netflix que está acadar os primeiros postos en número de visualizacións en distintos países do mundo.
Vindeiras datas confirmadas das Últimas Dionisíacas
12 de xullo. Ortigueira. Festival de Ortigueira.
25 de xullo. O Rosal.
27 de xullo. Vilanova i la Geltrú. El Tingladu.
2 de agosto. Bueu. SonRías Baixas.
3 de agosto. Catoira. Festa Vikinga.
17 de agosto. Pontevedra. Festas da Peregrina.
19 de agosto. Pobra do Caramiñal.
21 de agosto. Ferrol. Festas San Roque.
23 ao 24 de agosto. Boimorto. Festival de la Luz.
30 de agosto. Pantón. 13 Roeis Fest.
30 de agosto ao 1 de setembro. Ponteceso. Festiletras.
Sara Faro e María SOA actuarán, da man do Instituto Cervantes e AIE, en Tánxer, Tetuán, Fez, Casablanca e Marrakech do 24 ao 29 de xuño
O dúo tamén forma parte do cartel do Poborina Folk, en Teruel, onde estará o 21 de xuño, mentres que o día 22 participará no VESU Festival de Oviedo
Fillas de Cassandra levará a súa xira Últimas Dionisíacas a Marrocos este mes de xuño. O dúo conformado polas viguesas María SOA e Sara Faro visitará, do24 ao 29 de xuño, as localidades de Tánxer, Tetuán, Fez, Casablanca e Marrakech da man do Instituto Cervantes, a través do seu programa musical Cervantes en ruta, e da AIE (Sociedad de Artistas Intérpretes o Ejecutantes) por medio da iniciativa AIEEnRuta – Artistas.
Tras estrear o pasado 16 de febreiro en Vigo o seu novo directo, no que Fillas de Cassandra revisa desde unha electrónica máis potente e escura o seu álbum Acrópole, e visitar desde entón numerosos recintos, salas e festivais de todo o territorio peninsular, as creadoras de éxitos como Lisístrata (Varre vasoira) ou Tataravoa visitarán por vez Marrocos. Antes, o venres 21, serán cabeza de cartel no festival Poborina Folk, na provincia de Teruel, e ao día seguinte, o sábado 22, compartirán escenario con figuras como Xoel López ou Carlos Ares no VESU Festival ovetense.
Así, o día de San Xoán (24 de xuño), Sara Faro e María SOA, acompañadas de Marina Vidal e Tania Caamaño -xuntas, as catro, conforman a banda destas Últimas Dionisíacas-, iniciarán a xira en Tánxer, onde actuarán no exterior do Colexio Español Ramón y Cajal. O martes 25 visitarán Tetuán, concretamente o campo de fútbol de La Corniche (Martil) e, dous días despois, trasladaranse a Fez para levar o seu directo até o Colexio Francés Jean de la Fontaine. Xa o día 28, o patio do Instituto Cervantes de Casablanca acollerá a proposta musical galega e, finalmente, o 29 de xuño pecharase a xira en Marrakech, cun concerto na Escola Superior de Artes Visuais.
Vindeiras datas confirmadas das Últimas Dionisíacas
21 de xuño. Teruel. Poborina Folk.
22 de xuño. Oviedo. VESU Festival.
24 ao 29 de xuño. Marrocos. Varias localidades.
6 de xullo. Santiago de Compostela. Gozo Fest.
11 ao 14 de xullo. Ortigueira. Festival de Ortigueira.
25 ao 27 de xullo. Vilanova i la Geltrú. El Tingladu.
2 de agosto. Bueu. SonRías Baixas.
17 de agosto. Pontevedra. Festas da Peregrina.
23 ao 25 de agosto. Boimorto. Festival de la Luz.
30 de agosto. Pantón. 13 Roeis Fest.
12 ao 14 de setembro. Vilaxoán. Festival Revenidas.
O tema preséntase acompañado dun videoclip gravado no litoral da ría de Vigo, que amplifica aínda máis a profunda carga emotiva, e ao tempo combativa, da canción
Rebeliom do Inframundo e Fillas de Cassandra veñen de asinar a súa primeira colaboración, Contra vento e marea. O tema, que xa está dispoñible nas plataformas dixitais, preséntase como un arrebatador, cómplice e fascinante xogo de contrastes entre dúas formacións esenciais na actual escena da música galega. O sinxelo demostra que a confluencia entre as dúas bandas que agromaron en Vigo é natural, enriquecedora e proveitosa para a música do país.
Contra vento e marea, explica Nervo, é “unha oda á superación, a remar contracorrente, a manterse a flote, a sobrevivir no medio desta puta loucura”. É un canto a non deixarse levar pola ira, mesmo sendo conscientes que hai razóns dabondo para que a ira aflore. “É unha canción chea de orgullo, forza e valor, evocadora de todo tipo de sentimentos precisos para vencer á frustración», expón. Ao fío, María SOA e Sara Faro salientan “a forza e a colectividade” que se desprende da peza. “Como di o tema, somos rochas contra as que bate o mar. Contra todos os contratempos que poidan vir, ímonos manter firmes e mirar cara adiante”, apuntan.
Nesta primeira colaboración, Rebeliom achégase a un rexistro poético conmovedor e descarnado, cunha colosal carga emotiva, mais sen deixar, en ningún momento, a súa esencia combativa. “Som o som das ondas à beira do mare, o latejo, a espuma branca, o nosso lare, a costa e dureza. Puto, nom todo vale. Ilhas Atlânticas freando tempestade”, rapea Nervo sobre os beats de 2Pasøs e Frank Huxley. Pola súa banda, Fillas de Cassandra expoñen, dun xeito vehemente e apaixonado, a fortaleza que reside nelas. “Nas augas do inframundo fazemos o nosso mare”, cantan María SOA e Sara Faro nos primeiros compases do tema.
CREACIÓN COLECTIVA
A idea da colaboración entre Rebeliom do Inframundo e Fillas de Cassandra xurdiu hai un ano, nun encontro entre uns e outras. “Foi a primeira colaboración que nos ofreceron e, desde o inicio, cadramos xenial, xa que ambas formacións sentimos admiración pola outra”, contan María e Sara.
A construción foi colectiva. “Nós tiñamos unha melodía gardada con cariño e soubemos que ese era o momento de compartila. Esa melodía foi inspiradora para todas, comezamos a construír o tema todas á vez”, explican Fillas de Cassandra.
“As Fillas tiñan a súa parte, eu compuxen a letra que canto e Malvares o poema que soa ao remate. A partir de aí foi chegar ao estudio e xurdiu todo dun xeito supernatural. Fixémolo xa todo. A seguinte vez que nos xuntamos foi para gravar o videoclip”, lembra Nervo.
O resultado, Contra vento e marea, é pura harmonía e fusiona, dalgún xeito, dúas propostas que, lonxe de manifestarse antagónicas, se amosan en feliz comunión. Rebeliom e Fillas non suman, multiplican. Multiplicánse as emocións, o caracter evocador. Multiplican a súa potencia pero tamén a súa sensibilidade. Son as filhas do sol e os piratas con ron dos que fala a letra da canción. Vento em popa a toda vela e com decisom.
EMOCIONANTE VIDEOCLIP
A canción chega acompañada dun emotivo e sobrecolledor videoclip realizado por IzanMG, gravado no litoral de Vigo, e que se pode ver na canle de Youtube de Rebeliom do Inframundo. A peza audiovisual, na que participan as dúas bandas, relata a historia dunha traxedia no mar mesturada coa idea de superación fronte as adversidades e de situar o amor, a amizade e a solidariedade por enriba de calquera outro valor.
FILLAS DE CASSANDRA XIRA COAS ÚLTIMAS DIONISÍACAS
María SOA e Sara Faro seguen a sumar novas datas na súa xira Últimas Dionisíacas, na que revisan os temas do seu primeiro álbum, Acrópole, desde un punto máis escuro e electrónico, así como novas creacións ou mesmo algúns dos sinxelos que foron publicando nos últimos meses. É o caso de pezas como Tola, Tataravoa, Quen é a que canta? ou ANGULEELE). Nos últimos días, eventos como Festivala, Poborina Folk, Tradicionarius ou 13Roeis anunciaron a presenza do dúo nas súas novas edicións.
Estas son as vindeiras datas da xira Últimas Dionisíacas de Fillas de Cassandra.
5 de maio. Barcelona. Tradicionarius.
11 de maio. Ponferrada. Sala H
24 de maio. Ourense. OurenSound Fest.
25 de maio. Muras. VIII Romaxe artesá da Chaira.
1 de xuño. Madrid. Sala El Sol.
8 de xuño. Vilagarcía de Arousa. Festivala.
21 de xuño. Teruel. Poborina Folk.
22 de xuño. Oviedo. VESU Festival.
6 de xullo. Santiago de Compostela. Gozo Fest.
11 ao 14 de xullo. Ortigueira. Festival de Ortigueira.
25 ao 27 de xullo. Vilanova i la Geltrú. El Tingladu.
2 de agosto. Bueu. SonRías Baixas.
23 ao 24 de agosto. Boimorto. Festival de la Luz.
30 de agosto. Pantón. 13 Roeis Fest.
12 ao 14 de setembro. Vilaxoán. Festival Revenidas.
“É marabilloso poder formar parte da festa do audiovisual galego de xeitos tan diversos como os que poderá ver e escoitar o público este sábado”, sinalan María SOA e Sara Faro, que compuxeron pezas específicas para a ocasión
As creacións musicais de Fillas de Cassandra fiarán a gala dos XXII Premios Mestre Mateo do Audiovisual Galego, que se celebrará este sábado, 23 de marzo, na cidade da Coruña. María SOA e Sara Faro son as responsables das composicións que acompañarán os distintos fitos da cerimonia, ademais de ser parte da súa dinamización a través de distintas actuacións que ofrecerán ao longo da noite.
“Para nós é marabilloso poder formar parte nesta edición dos Mestre Mateo, artellando composicións para a ocasión, con motivos novidosos que noutros contextos non se poderían dar, e nunha noite na que compartiremos escenario con outros proxectos do país, como é o caso do noso benquerido Mondra. Todo o proceso de creación e desenvolvemento da proposta foi revitalizador e moi enriquecedor”, apuntan María SOA e Sara Faro.
Así, a banda sonora orixinal creada por Fillas de Cassandra fiará musicalmente as distintas escenas que conformarán a cerimonia. É o caso das entregas dos galardóns, do Premio de Honra e doutros momentos do evento, que terá lugar no Coliseum da Coruña e que se poderá seguir ao vivo a través da Televisión de Galicia.
Fillas de Cassandra regresa á cidade da Coruña tras actuar o 22 de febreiro na Sala INN, nunha adaptación do espectáculo que están a presentar na súa nova xira, nomeada Últimas Dionisíacas. Trátase dunha proposta escénica e musical na que as artistas fan unha revisión dos temas máis coñecidos do seu primeiro LP, Acrópole, desde unha electrónica máis escura e potente. No directo, no que a luz e a escenografía teñen un papel moi relevante, tamén recuperan algúns dos sinxelos publicados nos últimos meses e dan a coñecer outros inéditos para o público.
Logo da exitosa estrea das Últimas Dionisíacas o 16 de febreiro no hall do Auditorio Mar de Vigo (cita á que asistiron máis de 1.400 persoas) e do seu paso pola Coruña, Arzúa, Ribadeo ou BIlbao (acompañando a Zetak no seu Aaztiyen Tour), Fillas de Cassandra actuará tanto en Galicia coma nas localidades de Donostia (no marco do ciclo Bizi ala Iraun) e Madrid (Sala Sol); así como en grandes citas musicais do territorio peninsular, entre as que se atopan ZEID FEST, Gozo Fest, Ortigueira, El Tingladu ou Revenidas.
Vindeiras datas confirmadas das Últimas Dionisíacas
30 de marzo. Tui. Festas de San Telmo
31 de marzo. Padrón. Festas de Pascua.
12 de abril. Donostia. Ciclo Bizi ala Iraun.
13 de abril. Barakaldo. ZEID FEST.
24 de maio. Ourense. OurenSound Fest.
25 de maio. Muras. VIII Romaxe artesá da Chaira.
1 de xuño. Madrid. Sala Sol.
6 de xullo. Santiago de Compostela. Gozo Fest.
11 ao 14 de xullo. Ortigueira. Festival de Ortigueira.
25 ao 27 de xullo. Vilanova i la Geltrú. El Tingladu.
1 ao 3 de agosto. Bueu. SonRías Baixas.
12 ao 14 de setembro. Vilaxoán. Festival Revenidas.
Fillas de Cassandra, finalista en 4 categorías dos Premios MIN da Música Independente
Fillas de Cassandra tamén resultou finalista, co seu álbum debut Acrópole, en catro categorías dos Premios MIN da Música Independente, os galardóns que recoñecen a creación artística, diversidade cultural, o novo talento e a calidade das producións publicadas polas Pemes da industria española.
O dúo vigués conformado por María SOA e Sara Faro é candidato aos seguintes galardóns:
“Estamos moi contentas por todas as alegrías que nos está a dar Acrópole, pero moi especialmente por poder ver, nuns premios tan coñecidos, a tantas compañeiras finalistas, tanto nestas coma noutras categorías. Tanxugueiras, Caamaño & Ameixeiras, Bala, Baiuca, The Rapants, Grande Amore… Isto dá boa conta de todo o potencial e da boa saúde que goza a creación musical en galego”, sinalan.
A entrega destes recoñecementos, outorgados pola Unión Fonográfica Independiente (UFI), terá lugar o 17 de abril en Zaragoza.
