O cantareiro e bailador ofrecerá os derradeiros directos do proxecto o 29 de novembro no auditorio Gustavo Freire e o 1 de decembro no Teatro Afundación; serán citas nas que se acompañará dun feixe de colaboradoras e amizades, celebrando por todo o alto a despedida do espectáculo, que mutará noutra proposta “Peixe foi un reto e un soño. Foi un mundo de aprendizaxes, emocións e vivencias. É o fillo que nunca tiven. Levareino sempre gravado na alma e na pel”, asevera Xisco
Xisco Feijoó soterra Peixeeste outono. O cantareiro, instrumentista e bailador despídese da actual xira de presentación do seu primeiro proxecto en solitario por todo o alto. Farao con dous derradeiros directos que terán lugar en Lugo e Vigo os días 29 de novembro e 1 de decembro, respectivamente, e nos que o artista se acompañará tanto da súa banda como de numerosas creadoras e amizades sobre o escenario, entre as que se atopan Fran Sieira, Andrea Pousa, as pandeireteiras d’O Fiadeiro ou mesmo a chelista estadounidense Natalie Haas.
Cada concerto, ateigado de música, danza e arte, será único e irrepetible. Será a celebración da vida dun proxecto que, a partir do vindeiro ano, se transformará con novas cores e sonoridades. As entradas para estas actuacións, ou “metamorfose do Peixe”, como sinala o artista, xa están á venda nas platataformas www.enterticket.es (Lugo) e www.ataquilla.com (Vigo).
Xisco Feijoó lanzou Peixe no mes de xullo de 2021. Desde entón o artista, unha das figuras clave na recuperación de música tradicional galega durante as décadas do 80, 90 e primeiros 2000 ofreceu case medio cento de actuacións en localidades das catro provincias galegas, ademais doutros municipios da península, como Madrid, Bilbao, Valencia, Segovia e Plasencia; ou mesmo de Europa, na que temas como Animal ou Caracoles soaron en Xenebra, Munich, Hamburgo, Frankfurt e Varsovia.
Agora, Xisco Feijoó regresa a dúas das cidades galegas que acolleron a presentación de Peixe.Volve para despedir, dun xeito único, un proxecto que marcou todo un fito na súa carreira artística: logo de máis de trinta anos de incesante labor de recuperación etnográfica, nos que recolleu e deu vida a numerosas melodías e ritmos tradicionais, e de colaboracións en numerosos proxectos do país; o artista publicou un traballo discográfico no que ofreceu unha novidosa mirada contemporánea sobre a música tradicional. Dous anos despois, o creador dá a despedida “a un ilusionante proxecto que naceu no cerne da pandemia e que agora tomará novas formas, como parte desa metamorfose que todas e todos os artistas experimentamos grazas ás experiencias vividas”.
“Peixe representou un reto de moitos anos”, sinala Xisco Feijoó, quen asevera que este album fixo que se aproximara “a un mundo e pantone enteiro de emocións, vivencias e aprendizaxes”. “A creación deste disco e do espectáculo foi unha experiencia única, un soño. Peixe é o fillo que nunca tiven e é algo que vou levar gravado na alma e na pel”, di, ainda que advirte que “non meterá os temas na caixa, senón que se transformarán para ter outra vida en futuros espectáculos”.
Así, este outono Xisco Feijoó di adeus a Peixe tal e como lle deu a benvida: acompañado dun bo feixe de músicas do país e colaboradoras doutros recunchos do mundo. En primeiro lugar, contará cunha numerosa banda conformada por Miryam González, Pipo Alvariño, Galen Fraser, María San Miguel, José Manuel Díaz, Marilú Campos, Antón Pombar e Sandra Costa. En segundo, en cada un dos concertos haberá colaboracións especiais de instrumentistas, cantareiras, bailadores e pandeireteiras.
Así, a primeira das citas chegará o mércores 29 de novembro. Será no Auditorio Municipal Gustavo Freire de Lugo. Xisco Feijoó acompañarase, a partir das 20.30 horas, tanto da súa banda coma de Laura Burgué (gaita), Branca Villares (voz e percusión), David Vilares (voz), Xabi Iglesias (baile) e as pandeireteiras de Cántigas e Frores. As entradas para esta actuación están dispoñibles en www.enterticket.es
A derradeira volta para darlle a despedida ao Peixeserá na súa cidade, Vigo, e nun recinto moi especial para o creador, que visitou en numerosas ocasións con O Fiadeiro. O venres 1 de decembro, o Teatro Afundación (García Barbón) será o escenario que acolla o directo, a partir das 20.30 horas. Será un festivo e alegre “enterro” do Peixe, unha singular metamorfose na que Xisco sairá ao escenario con artistas como Natalie Haas (cello), Andrea Pousa (voz), Fran Sieira (baile), Luis Lavado (voz), María e Luís Prego (baile), María Vidal (voz e percusión) e das pandeireteiras de O Fiadeiro. As entradas xa están á venda no espazo web www.ataquilla.com
O espectáculo familiar de gran formato Inventio chega a Lugo o vindeiro 5 de novembro
Esta proposta escénica galega de circo, danza e ilusionismo inspirada no Camiño de Santiago brindará dúas funcións no Auditorio Gustavo Freire ás 17.30 h e ás 20 h do sábado
Comedia, maxia, danza e artes circenses mestúranse neste espectáculo para todos os públicos que estará de xira ata mediados de xaneiro do 2023 por España e Portugal
Os billetes para as funcións están á venda na plataforma web entradas.ataquilla.com
O espectáculo Inventiochegará a vindeira semana a Lugo logo do seu paso por Ferrol, Santiago e mais Salamanca. Esta proposta de gran formato concibida para público familiar brindará dúas funcións o sábado 5 de novembro, ás 17.30 h e ás 20 h, no Auditorio Gustavo Freire. Os billetes oscilan entre os 15 e os 25 euros máis gastos de xestión e están á venda na web entradas.ataquilla.com. Ademais, hai desconto para os usuarios do Carné Xove e os menores de 24 meses non pagan sempre que non ocupen butaca.
Inventio, un espectáculo para todos os públicos que reborda humor, misterio e fantasía, e no que conviven a comedia e o drama, a danza, o ilusionismo e as artes circenses. Está concibido como un convite para gozar cos sentidos dunha historia onde o pasado e o futuro danse a man grazas á sucesión de números de maxia, levitacións, equilibrios, malabares, aéreos, audiovisuais e mais composicións de música tradicional galega fundidas con sons electrónicos. Cunha atmosfera máxica e unha posta en escena vangardista, Inventio recupera a paisaxe, os costumes, a música, a arte ou a arquitectura de Galicia nun espectáculo delicado e cegador, de busca e descubrimento. Inventio é un camiño de regreso á sensibilidade a partir da tradición e a modernidade.
Para materializar esta ambiciosa proposta escénica, Inventio conta cun numeroso equipo creativo e artístico formado por máis de 40 persoas, entre elas seis bailaríns e seis artistas circenses. Na dirección atópase o mago Martín Varela, que tamén exerce de guía do espectáculo. Como responsable da dramaturxia figura José L. Prieto e na dirección artística está Suso Montero. A dirección de maxia recae sobre os ilusionistas Fani Triana e Martín Camiña e a de circo en Jorge Miquel. A dirección musical leva o selo de José Trincado ‘Triki’ e o ballet e as coreografías son unha creación de Mercedes Suárez. Completan o equipo Alberto Casas no deseño de iluminación e Conchi Silvent na dirección de vestiario. Inventio é unha iniciativa da promotora galega Thinking Up Events, da Xunta de Galicia a través do programa Xacobeo 21-22 e mais da Fundación “la Caixa”, e conta tamén co apoio de Sargadelos.
A HISTORIA. Ano 2094. O noso mundo é branco, aséptico, limpo, ordenado. O noso universo é frío e tan impersoal coma o quirófano dun hospital. Deixamos de sentir e de comunicarnos. Aterramos no futuro, si, pero perdemos a memoria e a emoción. Galicia. Último ano Xacobeo deste século XXI. Unha troupe formada por un ilusionista, seis bailaríns e seis artistas de circo comproban que xa non existe o Camiño de Santiago, que xa ninguén o lembra. Non quedan peregrinos nin un camiño que percorrer xuntos. Tampouco a auga ou a chuvia, o son das gaitas, o verde dos campos ou a pegada do mar na area. Nin pegada nin lembranza ningunha. Que era todo aquilo? Onde quedaron a viaxe, a busca e o descubrimento? Onde liscou a sensibilidade? Velaquí as preguntas que van guiar a esa troupe circense que teima nunha misión: reconstruír a súa identidade cultural. Sobre as táboas, os artistas vense envoltos nunha aventura sen igual. O pasado tócaos maxicamente e unha forza sobrenatural transformaraos.
Inventio nace co obxectivo de servir de vehículo de coñecemento e de divulgación do Camiño de Santiago e da cultura galega a través dunha historia de buscas e encontros, apta para público familiar e adulto. Trátase dun espectáculo que dota o noso patrimonio cultural dun enorme poder simbólico: tradicións nadas hai séculos que perduran hoxe, e que o fan enriquecidas e felizmente contaminadas doutras manifestacións artísticas, cunha ollada aberta que pon en valor o que nos constrúe e o que nos une.
Logo do seu paso por Lugo, a xira de Inventio proseguirá por Pontevedra (11-13 novembro), Cáceres (26-27 novembro), Ourense (2-3 decembro), Bilbao (29-30 decembro), Vigo (3-4 xaneiro 2023) e A Coruña (13-14 xaneiro). Toda a información actualizada sobre a xira e os billetes está dispoñible no espazo web www.inventio.gal.
O espectáculo escenificarase mañá, sábado 4, no Auditorio Gustavo Freire
· O director de Industrias Culturais, Jacobo Sutil, asistiu a un dos ensaios da peza de Nacho Mañá
· Esta ópera mestura a música clásica coa música folk e nela participan, entre outros, Anxo Lorenzo e Anxo Pintos
Xa está todo listo para a ópera María Soliña que se vai representar no Auditorio Gustavo Freire de Lugo mañá sábado 4. O espectáculo é autoría do compositor Nacho Mañá e mestura a música clásica coa música folk dun xeito pioneiro que ten como resultado a primeira ópera folk galega. A representación de María Soliña na cidade lucense é posible grazas á colaboración do Concello de Lugo e mais da Xunta de Galicia no marco da convocatoria extraordinaria de subvencións para espectáculos musicais como parte da programación do Xacobeo 21-22.
O director da Axencia Galega das Industrias Culturais (Agadic), Jacobo Sutil, asistiu a un dos últimos ensaios da ópera folk galega María Soliña, antes da súa escenificación. As entradas pódense adquirir na web Enterticket a un prezo de 15 euros máis gastos de xestión. Na billeteira terán un custo de 18 euros.
Unha Soliña revisada
A obra narra a historia de María Soliña, unha canguesa de 70 anos que no século XVII foi acusada de bruxería polo Tribunal da Inquisición de Santiago e foi despoxada de todos os seus bens por parte dos poderes eclesiásticos. Nacho Mañá baseouse na peza teatral “A defensa da vila” de Xosé Manuel Pazos, exalcalde de Cangas e tamén dramaturgo, pero reinterpretouna desde unha perspectiva máis moderna, facendo fincapé nos valores de loita e poder feminino que Soliña encarnou ao longo da súa vida.
A soprano Patricia Rodríguez será a responsable de dar vida a María Soliña mentres que o tenor Diego Neira interpretará o papel do seu home, Pedro Barba. O contratenor Christian Gil-Borrelli será Sabela,a personaxe antagonista da historia, e o resto do elenco completarase co baixo Beltrán Iraburu no rol do inquisidor, co actor Lois Soaxe como o narrador cego e coas Arreneghadas no coro.
A designación de ‘opera folc’ para este espectáculo non é unha cuestión gratuíta. A mestura da música clásica e mais o folk galego queda patente no uso de instrumentos a cargo da Orquestra Sinfónica Vigo 430 e nas contribucións do gaiteiro Anxo Lorenzo e do mestre de zanfona Anxo Pintos. A dirección musical de María Soliña é reponsabilidade de Roc Fargas e a dirección escénica leva o selo de Sigfrid Monleón.
