Este sábado, día 18 de novembro, ás 20 horas, na Casa-Museo Manuel María, o cuarteto vocal Son de Corda presentará, en concerto, Na Casa Deles, un proxecto musical e literario baseado en distintos escritores lucenses que xa non están fisicamente entre nós. Concretamente en Darío Xohán Cabana, Uxío Novoneyra, Lorenzo Varela, Luís Pimentel, Álvaro Cunqueiro e Manuel María.
Esperanza Iglesias, soprano, Carmen Prendes, contralto, Fernando G. Jácome, tenor, e Antón Castro, baixo, fan parte de Son de Corda. Os catro, interpretarán un poema de cada un dos seis escritores, alén doutras pezas, acompañados do pianista Raúl Rodríguez e a violinista Aldara Palmeiro.
Durante o concerto, proxectaranse sete curtas feitas por Manuel Lucas Mariño en distintos lugares vinculados aos propios escritores, e onde persoas coñecedoras das súas obras salientan a relación dos espazos ou lugares, recollidos nas imaxes, cos poetas homenaxeados no proxecto.
A entrada é libre até cubrir o aforo mais é necesario facer reserva no seguinte enderezo contacto@casamuseomanuelmaria.gal ou no whatsapp 698177621.