Bate Fado (Galunk Producións, 2026) é o novo sinxelo da banda galega,
que reivindica a música popular e a tradición como espazos de felicidade
e comunidade fronte quen non nos deixa estar e ser, e que pode escoitarse
xa nas plataformas dixitais: https://orcd.co/batefadordi
O single de Bate Fado ven acompañado dun videoclip que se estreou onte na canle
de YouTube da banda: https://www.youtube.com/watch?v=UvPjU1uYkZs
Nacidos nas rúas e locais de ensaios de Galicia hai máis dunha década, Rebeliom
do Inframundo prepara a saída do seu novo álbum, Orgulho, para o 26 de febreiro de 2026,
do que xa se coñecen os temas Sube, Balas e, agora, Bate Fado
A primeira parada do novo tour ‘Orgulho 2026’ de Rebeliom do Inframundo
en Galicia terá lugar na Sala Capitol de Compostela o venres 8 de maio, tralo seu paso
por cidades como Barcelona, Bilbao e Madrid, coas entradas xa á venda
Rebeliom do Inframundo lanza o sinxelo Bate Fado (Galunk Producións, 2026), unha canción que aparece como un berro de liberación e afirmación colectiva antes da chegada do seu novo álbum, Orgulho, previsto para o 26 de febreiro.
Bate Fado é resistencia, orgullo e raíces. Nace do afogo cotián; é un tema que espanta os demos, a crítica, a ira e o medo a arder no lume alleo. Neste terceiro adianto de Orgulho, Rebeliom do Inframundo volve poñer o corpo e a voz para lembrar que a vida é nosa e só nós decidimos sobre ela. O dedo acusador rómpese cando se atreve a sinalar.
O tema reivindica tamén a música popular e a tradición como espazos de felicidade e de comunidade. Fronte ao estrés, á presión, á ansiedade e á depresión que atravesa a cada vez máis xente, Bate Fado propón xusto o contrario: cantar, sorrir, unirse, celebrar o que somos. Tradición e orgullo como resposta política e emocional.
Musicalmente, o sinxelo volve amosar a identidade de Rebeliom do Inframundo: un rap cru e combativo que dialoga coa electrónica e coas raíces galegas, reforzando un discurso que mira de fronte á realidade sen baixar a cabeza.
O single Bate Fado (Galunk Producións, 2026) está xa dispoñible para a súa escoita nas plataformas dixitais: https://orcd.co/batefadordi
BATE FADO: TRADICIÓN E ORGULLO CONTRA QUEN NON NOS DEIXA SER
Nervo, voz de Rebeliom do Inframundo, reflexiona sobre o novo sinxelo da banda: “Bate Fado é unha canción que amosa o sentir que temos moitos e moitas nestes tempos nos que o traballo semella afogarnos; tempos nos que parece que nada ten saída e onde non nos deixan ser, non nos deixan respirar, non nos deixan ver. Só, unicamente, cando eles queren. É soltar esas ganas de dicir que non nos gusta ou, a min en concreto, non me gusta nada como está montado isto. Estamos sufrindo e esquecendo quen somos e que queremos ser realmente, que é o que nos fai felices”.
E engade: “Por iso tamén o retrouso de Bate Fado: porque, neste caso, a min, as cancións populares fanme feliz, e fan feliz a moita xente. E isto é un pouco, falando mal e claro, mandar á merda todo iso que nos mete estrés, presión, ansiedade, caídas en depresión de moita xente, cada vez máis… Bate Fado é todo o contrario: é felicidade, é cantar, é sorrir, é unidade, é estar xuntas e xuntos, é por en valor a tradición e o orgullo”.
O sinxelo vén acompañado dun videoclip, cuxa estrea tivo lugar onte na canle de YouTube da banda: https://www.youtube.com/watch?v=UvPjU1uYkZs
Tour ‘Orgulho’ 2026
📢 Primeiras datas en salas:
📍V. 06 marzo ~ BARCELONA ~ @lautconcert
📍S. 28 marzo ~ BILBAO ~ @d8_sorkuntza_faktoria
📍S. 18 abril ~ VALLEKAS, MADRID ~ @salalatrinchera
📍V. 08 maio ~ SANTIAGO DE COMPOSTELA ~ @salacapitol
🏷️ ENTRADAS XA DISPONIBLES AQUÍ EN WOUTICK 🏷️
https://woutick.com/es/listado/rebeliom-do-inframundo-orgulho-tour-2026
REBELIOM DO INFRAMUNDO, MÁIS DUNHA DÉCADA DE MÚSICA DESDE A TRINCHEIRA
Nacidos nas rúas e nos locais de ensaio de Galiza, Rebeliom do Inframundo leva máis dunha década facendo da música unha trincheira e unha celebración. Nervo, Malvares, Frank Huxley, Busto e DJ Pol forman unha alianza que vai máis alá do rap: é unha actitude, unha maneira de entender o mundo.
O seu son bebe do rap hardcore e da electrónica, pero tamén das raíces galegas e da forza dun pobo que nunca baixa a cabeza. Cada tema é un retrato entre o amor e a rabia, entre o orgullo e a ferida.
Dende Caladas Reflexivas ata Amor ou Barbárie, pasando por Lume e Rebeliom e Ilegal, a banda medrou sen traizoar o seu camiño. Hoxe, Rebeliom do Inframundo non é só unha referencia musical: é un símbolo dunha xeración que loita, crea e berra sen pedir permiso.
A banda afronta 2026 cunha forza incontestable… cara a publicación do seu novo álbum, orgulho, que verá a luz a finais de febreiro deste ano, e do que xa se coñecen adiantos como Sube e este novo sinxelo Bate Fado.
Rebeliom vive o seu mellor momento, co respaldo dun público que enche salas e corea cada verso coma se formase parte da banda. Non precisan grandes campañas nin filtros; a súa verdade corre de boca en boca, como corren as boas cousas cando son reais.
No último ano esgotaron entradas en espazos emblemáticos como a Sala Capitol de Compostela —800 persoas entregadas— e confirmaron o que xa se intuía: Rebeliom é unha das bandas máis sólidas e respectadas da escena galega actual.
O seu directo é un estoupido de enerxía, mestura de rap, electrónica e tradición galega, que converte cada concerto nunha experiencia colectiva. É un grupo de xente para a xente, cun discurso propio e unha ética de traballo que fala de verdade, comunidade e resistencia. Eles non seguen a moda, créana.
20260130-NP-Rebeliom-do-Inframundo-BATE-FADO_GAL