por martinho | Ene 12, 2024 | Autores/as, Creación, Novas, Outras Artes, Xeral
‘Todo esto te daré’, o novo tema de Guadi Galego con Rozalén, xa está dispoñible nas principais plataformas dixitais
A canción acompáñase dun ‘lyric video’ realizado por La Parrocha Estudio que se pode ver desde hoxe en Youtube
Todo esto te daré, o novo sinxelo de Guadi Galego no que colabora Rozalén, xa está dispoñible nas principais plataformas dixitais. A peza, orixinalmente incluída na banda sonora da ficción producida por Audible sobre o libro homónimo de Dolores Redondo, inicia agora unha nova vida coa incorporación da creadora manchega. “A voz de Rozalén leva o tema a un lugar marabilloso”, sinala Guadi Galego.
A canción, estreada este venres 12, acompáñase dunha creación audiovisual realizada por La Parrocha Estudio e que se pode ver a través de Youtube. Segundo explica Guadi Galego, Todo esto te daré é unha canción de amor inspirada “na vida dos protagonistas, nun tema de amor e dor e na propia Paula”.
O lanzamento de Todo esto te daré prodúcese no mes no que Guadi Galego regresa aos escenarios do país logo dunha ausencia de máis dun ano e medio. A artista volve cun novo directo, Síntese Horizonte, expresamente concibido para presentar, ao vivo, sobre as táboas dos teatros. Será a través de tres concertos exclusivos que terán lugar o 26 de xaneiro en Santiago de Compostela (entradas esgotadas), o 27 de xaneiro en Ferrol e o 13 de abril en Pontevedra. Os últimos billetes dispoñibles para estas dúas citas pódense adquirir na plataforma www.ataquilla.com.
Escoita Todo esto te daré https://links.altafonte.com/qb9kb8r
Todo esto te daré en video https://www.youtube.com/watch?v=haLh49nQxx8
por martinho | Ene 10, 2024 | Autores/as, Creación, Novas, Outras Artes, Xeral
O tema forma parte da banda sonora da ficción sonora producida por Audible e dirixida por Paula Cons sobre o premiado libro de Dolores Redondo
“Todo esto te daré é unha canción de amor inspirada nos protagonistas do texto, unha peza de amor e dor, e a propia Paula”, explica Guadi Galego
Guadi Galego inicia o ano 2024, no que regresará aos escenarios do país, coa publicación dun novo tema, Todo esto te daré, no que conta coa colaboración de Rozalén. A canción, que se acompaña dun vídeo, poderase escoitar a partir das 00.00 horas do venres 12 de xaneiro, nas principais plataformas dixitais, nas que xa é posible pregardar a peza.
Todo esto te daré nace dunha proposta feita pola directora de cine e guionista Paula Cons para formar parte da banda sonora da ficción sonora sobre o texto homónimo de Dolores Redondo (galardoado no 2016 co Premio Planeta). Trátase dunha produción orixinal da plataforma Audible e que neste caso dirixe a cineasta coruñesa, con quen Guadi Galego xa colaborou anteriormente. É o caso da longametraxe A ila das mentiras (2020), filme para o que a cantante de Cedeira compuxo o seu tema central Sálvora.
Agora chega este novo sinxelo, unha canción de amor inspirada “na vida dos protagonistas, un tema de amor e dor e a propia Paula”, segundo explica Guadi Galego, quen celebra a oportunidade de poder contar con Rozalén na gravación. “A súa colaboración foi un agasallo. A voz de Rozalén encaixouna no sitio que tiña que estar”, apunta a creadora.
REGRESO AOS ESCENARIOS CON SÍNTESE HORIZONTE
O lanzamento de Todo esto te daré prodúcese no mes no que Guadi Galego regresará aos escenarios do país logo dunha ausencia de máis dun ano e medio. A artista volve cun novo directo, Síntese Horizonte, unha proposta expresamente concibida para presentar, ao vivo, sobre as táboas dos teatros.
Síntese Horizonte presentarase a través de tres concertos exclusivos que a cantante ofrecerá acompañada dunha banda conformada por grandes artistas do país. É o caso de Guillerme Fernández (guitarra acústica eléctrica e sintetizada), Rubén Iglesias (baixo e sintetizadores), Isaac Palacín (batería e percursión), Álex Fernández (teclados) e de Paula Romero, Faia Díaz, Inés Salvado e Rocío Giménez no coro. Ademais, a produción do novo directo destaca tanto pola súa coidada iluminación (baixo a dirección e o deseño de Laura Iturralde e José Faro, de NONONON.LAB) como pola súa posta en escena (de Marina Oural e Ugía Pedreira -Oficina Galega de Outros Asuntos do Movemento), froito do traballo en común que as artistas desenvolven, desde hai meses, con Guadi Galego baixo a premisa de ofrecer ao público unha experiencia musical única e transformadora.
As entradas para a estrea de Síntese Horizonte o venres 26 de xaneiro en Santiago xa están esgotadas, mais aínda é posible adquirir os billetes para as citas de Ferrol (27 de xaneiro no Teatro Jofre) e de Pontevedra (13 de abril no Teatro Principal, no marco do ciclo Resoan). As entradas, nos dous casos, pódense adquirir na plataforma www.ataquilla.com
20240110-NP-Guadi-Galego-Todo-esto-te-dare-con-Rozalen
por martinho | Ene 10, 2024 | Autores/as, Creación, Literaria, Novas, Outras Artes, Xeral
O concello natal do político acolle, este sábado 13 de xaneiro, ás 19.00 h, no Auditorio Carmen Estévez, a estrea en Galicia dun dos espectáculos revelación da presente temporada escénica
Por outra banda, o sábado 20 de xaneiro, a obra de ButacaZero sobre Manuel Fraga chegará ao Auditorio de Galicia de Santiago de Compostela co aforo tamén completo
IRIBARNE é unha revisión da figura de Fraga en clave de humor escrita por Esther F. Carrodeguas e con dirección de Xavier Castiñeira, coproducida por ButacaZero co Centro Dramático Nacional (CDN) e a Mostra Internacional de Teatro (MIT) de Ribadavia
A obra desembarca en Galicia tras a súa presentación en Madrid o pasado outono, onde estivo en cartel un mes e esgotou, tamén, todas as entradas
Alén de Vilalba e Compostela, IRIBARNE xirará por toda a xeografía galega e parte da española neste 2024, con datas xa confirmadas en Pontevedra,
A Coruña, Lugo, Ribadavia, Barco de Valdeorras, Vilagarcía de Arousa, Tomiño, Cangas, Narón, Miranda del Ebro, Bilbao e Vitoria
Este sábado, 13 de xaneiro, ás 19.00 h, Vilalba acollerá a esperada estrea en Galicia de IRIBARNE, o novo espectáculo de ButacaZero. Logo da súa celebrada presentación en Madrid o pasado outono, onde a peza estivo en cartel un mes completo esgotando todas as entradas e acadando o aplauso unánime do público e da crítica, IRIBARNE aterra -coas entradas xa esgotadas- no Auditorio Carmen Estévez de Vilalba, no que será o punto de partida dunha xira por toda a xeografía galega e numerosas cidades españolas que se desenvolverá durante o 2024. A obra, unha revisión da figura de Manuel Fraga en clave de humor escrita por Esther F. Carrodeguas baixo a dirección de Xavier Castiñeira, é unha coprodución de ButacaZero co Centro Dramático Nacional (CDN) e a Mostra Internacional de Teatro (MIT) de Ribadavia.
Despois da súa estrea galega no concello natal de Fraga, a seguinte fin de semana, IRIBARNE poderá verse no Auditorio de Galicia de Santiago de Compostela (sábado 20 de xaneiro, ás 19.00 h), coas entradas tamén esgotadas desde hai días. A obra continuará así unha intensa xira que xa ten diferentes datas confirmadas dentro e fóra de Galicia, entre as que figuran Pontevedra, A Coruña, Lugo, Ribadavia, Barco de Valdeorras, Vilagarcía de Arousa, Tomiño, Cangas, Narón, Miranda del Ebro, Bilbao e Vitoria.
IRIBARNE é o sétimo proxecto do tándem creativo formado por Esther F. Carrodeguas e Xavier Castiñeira, ambos os dous responsables da compañía ButacaZero, e segue o ronsel das súas anteriores obras, fundamentadas na investigación e na reflexión para dialogar co presente dende unha ollada crítica e irónica. A obra está escrita por Carrodeguas, que a presenta como “un intento (irreverente) por comprender como chegamos ata aquí camiñando da man dun deses personaxes secundarios, pero incriblemente imprescindibles da nosa historia”. Segundo ela, é “o traballo máis difícil que escribín ata agora” e engade que “foi complexo atopar o punto de equilibrio do humor, do estilo, así como o lugar dende o que se situar”. Pola súa banda, para Castiñeira, responsable da dirección de IRIBARNE, “este personaxe é inabarcable” e “entendo o que fixo, pero non dende onde o fixo e por que o fixo”, e salienta as contradicións que foron atopando durante o proceso de investigación, tanto da súa biografía persoal como da súa traxectoria política.
Ambos os dous sinalan que pertencen a unha xeración, a da Transición, que medrou rodeada dun “silencio tácito arredor da historia política recente”, e embarcarse neste proxecto axudounos a entender de onde vimos. “Paréceme moi interesante que a obra, que se sustenta sobre o silencio, abra portas ao diálogo, aínda que sexa para provocar controversia”, apunta Carrodeguas.
POSTA EN ESCENA
A montaxe está formulada en tres episodios, que reflicten a evolución política do noso país, dende o franquismo, a transición e a democracia, para culminar co período de hexemonía de Fraga en Galicia. “Pareceunos que un político que ocupara cargos de alta responsabilidade e que se mantivo no poder ao longo dun período tan dilatado podería ser un personaxe interesante para falar sobre a identidade de España”, sinala a dramaturga.
A posta en escena de IRIBARNE ofrece, con ritmo frenético, un xogo coral no que todo o elenco -integrado por Xurxo Cortázar, Jorge de Arcos, Esther F. Carrodeguas, Mónica García, Anxo Outumuro e Lidia Veiga– se vai dando o relevo para interpretar ao protagonista. Trátase dunha “peza extremadamente divertida, moi tola, moi teatral de ver”, afirma o seu director. Nela caben todas as iconas pop das diferentes épocas, dende Palomares ata Salomé, Massiel, Serrat… pasando por episodios máis tráxicos, como Grimau, os asasinatos de ETA ou a morte de Franco. “Percorremos dende a infancia ata a morte de Fraga, e iso é toda a historia recente do país”, afirma Castiñeira. “Pero non estamos a intentar facer Historia nin un biopic, senón darlle unha volta moi cómica e contemporánea, mirando dende aquí e agora, sen acritude, o pasado”, conclúe o director.
Completan o equipo artístico Diego Valeiras, que asina o espazo escénico xunto ao propio Xavier Castiñeira e mais o vestiario, Diego Vilar, a cargo da iluminación, Pablo Fontenla, responsable da parte audiovisual, a coreógrafa Sabela Domínguez e o produtor musical Berto, creador da banda sonora orixinal da obra que inclúe o single WHO THE F*CK IS IRIBARNE? e que está editada por Subterfuge Records.
SOBRE A COMPAÑÍA
ButacaZero é a plataforma creativa posta en marcha por Esther F. Carrodeguas e Xavier Castiñeira. Con propostas como Voaxa e Carmín, #camiños, Despois das ondas, 32m2, Pagagena ou O único que verdadeiramente quixen toda a vida é ser delgada, a compañía sitúase como un referente do teatro contemporáneo no panorama escénico galego. As súas creacións concrétanse en dramaturxias feitas á medida, nas que a tradición teatral se mestura coas linguaxes contemporáneas.
Esther F. Carrodeguas é actriz, directora, perfomer e, sobre todo, escritora. Rianxeira de pura raza, asenta o seu currículo vital entre as letras, o audiovisual e o teatro. O seu estilo cabalga sobre as lindes que separan os xéneros. Graduada en Dirección e Dramaturxia pola ESAD de Galicia e licenciada en Xornalismo entre Santiago de Compostela e Turín, os seus proxectos teatrais beben da súa faceta periodística. Cunha decena de obras teatrais publicadas, os seus textos foron estreados ben na súa propia plataforma profesional (ButacaZero) ben noutras compañías privadas (De Ste Xeito, Outubro Producións) ou públicas (Centro Dramático Galego, Teatro Español ou Centro Dramático Nacional). Precisamente no 2021 foi escollida para desenvolver unha das residencias dramáticas que outorga o CDN, onde escribiu o texto Supernormales, co que foi finalista nos Premios MAX 2023 na categoría de Mellor Autoría e que foi, sen dúbida ningunha, un dos grandes éxitos da pasada tempada tanto para o público como para a crítica.
Xavier Castiñeira é licenciado en Dirección de Escena pola RESAD de Madrid e posúe un mestrado en Teatro e Artes Escénicas pola Universidade de Vigo. Tamén realizou estudos de Filoloxía Hispánica pola USC. Actualmente cursa o doutorado na UCM, investigando aspectos neurobiolóxicos nos procesos de recepción escénicos. Desde os seus comezos no mundo do teatro compaxinou o seu labor creativo co docente, impartindo desde 1988 aulas en diversos grupos afeccionados e en obradoiros regulares de interpretación, dirección ou investigación escénica. No ano 2011 incorpórase ao corpo de profesorado da ESAD de Galicia. Dirixiu unha vintena de obras de teatro, entre elas, case todas as de ButacaZero, pero tamén para compañías como Goliardos, Mairiztz, La Escuela de Música Creativa, Outumuro Producións ou De Ste Xeito.
XIRA IRIBARNE | DATAS CONFIRMADAS
Vilalba ESTREA EN GALICIA E EN GALEGO
Auditorio Municipal Carmen Estévez | sábado 13 xaneiro | 19.00 h https://entradasvilalba.es/evento/teatro/iribarne-1 | ENTRADAS ESGOTADAS
Santiago de Compostela
Auditorio de Galicia | sábado 20 xaneiro | 19.00 h https://www.compostelacultura.gal/espectaculos/evento/iribarne | ENTRADAS ESGOTADAS
Miranda del Ebro
Teatro Apolo | venres 26 xaneiro | 20.30 h https://entradas.tourmiranda.es/TicketMiranda/programacion/Pases/displayPase/f41b9dac9107e38b28ae5cc6b112dc24
Pontevedra
Pazo da Cultura de Pontevedra | xoves 8 febreiro | 21.00 h
Barco de Valdeorras
Teatro Municipal Lauro Olmo | venres 23 febreiro | 21.00 h
Vilagarcía de Arousa
Auditorio Municipal de Vilagarcía de Arousa | sábado 24 febreiro | 20.00 h
A Coruña
Teatro Rosalía de Castro | venres 15 e sábado 16 marzo | 20.30 h
Lugo
Auditorio Municipal Gustavo Freire | xoves 11 abril | 20.30 h
Tomiño
Auditorio Municipal de Goián | sábado 20 abril | 21.00 h
Cangas
Auditorio Municipal de Cangas (Auditorio Xosé Manuel Pazos) | sábado 4 maio | 20.00 h
Bilbao
Teatro Arriaga | xoves 9 maio | 19.30 h https://www.teatroarriaga.eus/programacion/iribarne/#entradas-arriaga
Narón
Pazo da Cultura | sábado 18 maio | 20.00 h
Vitoria
Teatro Principal de Vitoria | venres 7 xuño | 19.30 h https://principalantzokia.janto.es/ Ribadavia | Auditorio do Castelo | MIT Ribadavia 2024 (19-27 xullo)
20240110-NP-Vilalba-IRIBARNE
