O festival, impulsado pola promotora viguesa Sinsalaudio, recolle este ano un segundo premio da industria, logo do recoñemento pola súa Contribución á Igualdadeque se lle outorgou nos Iberian Festival Awards, celebrados en marzo
O festival Sinsal SON Estrella Galicia vén de sumar un novo galardón polo seu traballo a prol da sostibilidade. Os Premios FEST recoñeceron este martes 25 de outubro, durante a gala celebrada no marco do encontro profesional BIME Live & PRO, en Bilbao, o labor de Sinsal no eido do coidado e respecto pola contorna, unha das premisas clave do evento e eixo fundamental de traballo desde hai máis dunha década. O codirector de Sinsal, Luis Campos, recolleu o premio ao festival máis relevante en canto á Sostibilidade Medioambiental.
Trátase do terceiro galardón que consegue Sinsal nos Premios FEST, que recoñecen os mellores festivais celebrados en España da tempada. O primeiro deles chegou no 2015, ano no que foi escollido como o Mellor festival de pequeno formato. Catro anos despois, gañou o Premio FEST 2019 ao Festival máis sostible. Pasados outros catro anos, o sector segue a atopar a proposta de Sinsalaudio como a máis sostible, a nivel medioambiental, do Estado.
Sinsal SON Estrella Galicia, un dos encontros máis singulares e coidados do panorama estatal de festivais, celébrase desde o ano 2010 na Illa de San Simón. O evento nace coa intención de ofrecer ao público de todas as idades unha pequena mostra do máis estimulante da creación contemporánea do momento, á vez que promove o coñecemento e posta en valor do patrimonio cultural, natural e histórico da illa. Así, artistas emerxentes da escena galega, nacional e internacional viaxan cada verán até o corazón da Ría de Vigo, nas Rïas Baixas, para presentar as súas propostas, Todas elas conforman un cartel secreto que o público descoñece ata o momento de desembarcar: a filosofía de Sinsal é ofrecer unha proposta especial e única a 800 persoas cada día (o evento desenvólvese en horario diurno), a través dunha experiencia singular na que a auténtica cabeza de cartel do evento é a propia illa de San Simón, declarada Ben de Interese Cultural.
O coidado da illa, tanto no aspecto ambiental -cun impacto mínimo negativo na natureza grazas á aplicación de numerosas políticas sostibles, como a reutilización de materiais, a eliminación total de plásticos ou o consumo de enerxías limpas, por exemplo- como no da conservación e posta en valor do patrimonio natural e cultural -coa promoción de actividades ligadas ao territorio e a realización de propostas paralelas á programación musical durante a celebración do festival-, inciden, precisamente, na intención de Sinsal de contribuír a achegar e promover a sostibilidade como motor de cambio.
Ademais, Sinsal SON Estrella Galicia destaca pola súa aposta pola diversidade cultural, que demostra a través dunha programación aberta a todos os estilos e experiencias, desde os sons máis populares e até a música experimental, pasando pola electrónica, a psicodelia ou mesmo as músicas urbanas. Na recente edición de 2023, pola illa pasaron 26 bandas de 18 países chegadas de Angola, Arxentina, Bélxica, Burkina Faso, Colombia, Corea do Sur, Estados Unidos, Estonia, España, Francia, Holanda, Xapón, Marrocos, Nixeria, Portugal, Reino Unido, Sudán e Uganda. Unha aposta que permite afondar a Sinsal no seu compromiso pola igualdade, tal e como recoñeceron este ano os Iberian Festival Awards (IFA 2023), ao sinalar o Sinsal SON Estrella Galicia como o evento musical de España máis destacado pola súa Contribución á Igualdade: a presenza feminina é moi relevante tanto nas súas propostas musicais (como líderes ou por estar conformadas 100% por mulleres) coma no seu staff ou mesmo na súa programación, que pon o foco na diversidade lingüística de todo o territorio estatal, ademais de atender e visualizar artistas queer.
O proxecto de intercambio cultural a través das artes escénicas entre Galicia, Asturias, Cantabria, Euskadi e Navarra pecha a súa programación oficial con récord de asistencia nas súas propostas artísticas, profesionais e formativas, cun 22% máis de participantes
Camiño Escena Norte (CEN), o programa de intercambio cultural entre compañías de danza e artes do movemento, teatro e novo circo de Galicia, Asturias, Cantabria, Euskadi e Navarra, alcanzou os 8.330 participantes na súa quinta edición, tanto nas funcións e encontros coas compañías como nos programas profesionais e formativos, o que supón un 22% máis de asistentes que no 2022. Así, o resultado desta quinta edición converte a Camiño Escena Norte nun proxecto único dentro do panorama escénico estatal, con centenares de profesionais implicados nunha coidada programación que chega a públicos de áreas rurais e urbanas.
No caso galego, comunidade na que o proxecto conta co apoio da Xunta de Galicia a través da Axencia Galega das Industrias Culturais (Agadic), a participación ascendeu a 1.800 persoas, tanto nas 11 funcións programadas nas localidades de Ames, Arzúa, Carballo, Lugo, Melide, Mondoñedo, Ribadeo, Santiago de Compostela, Vimianzo e Viveiro (no caso de Portomarín a función cancelouse en contra da vontade de CEN e da compañía), coma nos encontros entre artistas e público. Foi o caso, por exemplo, de Telmo Irureta e Miren Arrieta (intérpretes de Sexpiertos, da compañía vasca Tanttaka Teatroa) no marco de Vieiros, a rede de colaboración con proxectos locais que se estreou, este ano, no caso galego, co Festival Internacional Outono de Teatro de Carballo, o FIOT; ou no taller co alumnado da Escola Supertior de Arte Dramática de Galicia realizado pola compañía cántabra Mari Paula Danza & Performance, no marco da programación expandida ESADS en camiño.
Ademais das actividades co público, Galicia acolleu a celebración dunha nova edición do encontro profesional Habitación Peregrina PRO, celebrado en Lugo os días 19 e 20 de setembro, cita na que se xuntaron representantes de case 40 compañías das cinco comunidades. “O balance é moi positivo”, indica Diego Vazquez Meizoso, coordinador de Camiño Escena Norte. “O proxecto afianzouse. Esta foi a edición máis expansiva, con 130 actividades en case 60 localidades de Galicia, Asturias, Cantabria, Euskadi e Navarra, en cinco semanas de programación”, sinala.
Un dos éxitos de Camiño Escena Norte é a relación cos públicos. Desde a primeira edición, o programa apostou porque o artístico non quedase limitado ao espazo escénico, e que compañías e espectadores dialogasen e intercambiasen experiencias posfunción. “Este ano reforzamos este aspecto con máis encontros, máis coloquios e máis talleres, e a resposta do público foi moi positiva: encontros cheos e moi participativos; talleres sen prazas libres e un diálogo enriquecedor entre creadores e público. Estamos moi contentos porque vemos que a nosa aposta funciona: os profesionais agradécennolo e o público responde”, asevera Meizoso.
CEN 2023 pecha a súa programación oficial, pero o seu labor continúa a través do web www.escenanorte.com. Neste espazo pódese descargar o Catálogo de Espectáculos Recomendados Camiño Escena Norte, unha ferramenta moi útil para profesionais, que complementa o labor realizado nos cinco territorios nas últimas semanas.
Sobre Camiño Escena Norte
CEN é unha iniciativa promovida polas asociacións profesionais de produtoras de artes escénicas Escena Galega (Galicia), EscenAsturias (Asturias), ACEPAE (Cantabria), Eskena (Euskadi) e ESNA (Navarra). Todas elas únense na supraentidade Camiño Escena Norte Agrupación de Interese Económico, creada especificamente para o desenvolvemento, xestión e produción deste proxecto, que toma o roteiro histórico dos Camiños de Santiago como referencia para ofrecer unha intensa programación escénica.
Camiño Escena Norte conta co apoio económico de gobernos e institucións das cinco comunidades implicadas: Xunta de Galicia, a través da Agadic; Goberno do Principado de Asturias; Goberno de Cantabria; Goberno Vasco; Deputación Foral de Araba; Deputación Foral de Bizkaia; Deputación foral de Gipuzkoa e o Goberno de Navarra. O programa tamén conta co apoio do Goberno de España a través do Instituto Nacional das Artes Escénicas e a Música (INAEM) e do Ministerio de Cultura e Deporte; e a colaboración da Deputación provincial da Coruña, a Deputación Provincial de Lugo e o Concello de Lugo.
Vegalsa-Eroski é patrocinador oficial de Camiño Escena Norte e o proxecto contou nesta quinta edición coa colaboración especial da marca lucense Cafés Candelas e da asociación Te Veo de Artes Escénicas para la Infancia y la Juventud.
