Este domingo 30, ás 16:00 horas, o Castelo de Santo Antón será o escenario do espectáculo Estirando el chicle en un castillo, que recolle a gravación do exitoso podcast de Carolina Iglesias e Vitoria Martín, que regresan ao EMHU por segundo ano consecutivo
Tamén o domingo 30, ás 18:00h, Ignatius Farray tomará as táboas do Teatro Colón co seu espectáculo de vivencias personais La comedia salvó mi vida
Ás 20:30h, Javier Veiga presentará no mesmo escenario a proxección do seu filme Amigos hasta la muerte, con un show-tertulia posterior protagonizado polo propio Veiga, Marta Hazas, David Amor e Xosé A. Touriñán
O luns 1 de maio será a quenda dun dos ‘showmans’ máis esperados deste terceira edición do EMHU: Juan Dávila, o auténtico mesías da improvisación, que achegará ao Colón, ás 19:30h, o monólogo cómico do momento, La capital del pecado 2.0
O Encontro Mundial de Humorismo avanza na programación da súa terceira edición esta ponte de maio con Carolina Iglesias e Victoria Martín, de Estirando el Chicle, Ignatius Farray, Javier Veiga e Juan Dávila como protagonistas.
A terceira xornada do EMHU, que se desenvolverá o domingo 30 de abril, contará cun escenario único, o Castelo de Santo Antón, que acollerá un dos shows máis destacados desta terceira edición do festival. Alí chegarán ás 16:00 horas Carolina Iglesias e Victoria Martín -que repiten no EMHU trala súa exitosa visita en 2022- para presentar o espectáculo Estirando el chicle en un castillo. Estirando el chicle é un podcast de comedia no que as cómicas conversan con mulleres relevantes da cultura e do entretemento. Nas súas xa cinco temporadas, converteuse nun dos podcasts máis escoitados de España, superando o millón e medio de ouvintes mensuais. O proxecto, galardoado con dous premios Ondas e o Premio EMHU Fenómeno no 2022, fixo historia ao vender todas as entradas do Wizink Center de Madrid en menos de 24 horas, converténdose no espectáculo de comedia máis grande que xamás se celebrou na historia do noso país. Este 2023, no EMHU, Estirando el Chicle achegarase ao Castelo de Santo Antón para unha facer unha gravación especial do podcast con público en directo.
Pola súa banda, Ignatius Farray tomará as táboas do Teatro Colón (domingo 30 de abril, ás 18:00 horas) con La comedia salvó mi vida. Durante una hora e media, Farray contará de corazón as súas vivencias e opinións como cómico coa fe de que a risa, antes ou despois, chegará. Con máis de 12 anos facendo Stand-up Comedy, o artista segue a pensar que ese é o estilo máis xenuíno e verdadeiro de facer comedia, precisamente pola implicación persoal que se supón que hai que ter coas cousas que se din ou se contan sobre o escenario.
Finalmente, a proxección da ópera prima de Javier Veiga como director cinematográfico -baseada na exitosa obra de teatro homónima que batiu récords de billeteira nos teatros galegos, nacionais e incluso internacionais- será o ramo da xornada do EMHU este domingo, 30 de abril. Ás 20:30 horas, o Teatro Colón da Coruña acollerá o primeiro pase con público en Galicia do filme Amigos hasta la muerte, que ten como protagonistas a Marta Hazas, Mauricio Ochmann e ao propio Javier Veiga e en cuxo reparto se contan, tamén, os humoristas galegos David Amor, Xosé A. Touriñán e Ledicia Sola.
Pero a velada promete moito máis, pois haberá proxección, preestrea, coloquio, espectáculo… e o poida xurdir! Así, logo do pase, o público poderá gozar xunto a Javier Veiga, Marta Hazas, David Amor e Xosé A. Toruiñán dunha tertulia para escachar coa risa, onde, ademais de coñecer unha morea de intrahistorias da gravación da película, haberá moitas sopresas e o xenuíno humor destes catro xenios e amigos.
Estrea en Galicia de La capital del pecado 2.0
O EMHU continuará no día festivo e o luns, 1 de maio, será a quenda dun dos showmans máis esperados deste terceira edición do festival: Juan Dávila, o auténtico mesías da improvisación, que achega o monólogo cómico do momento, La capital del pecado 2.0, ao Colón ás 19:30 horas, no que será a súa estrea en Galicia. Un espectáculo ideal, como él mesmo describe, “para vir coa familia, se estás solteiro ou solteira, en parella, co teu grupo de amigas, se estás buscando novas oportunidades ou algunha cita inesperada”. Sábese como comeza, pero o final sempre é decisión do público: será parte do imprevisible mentres goza do show máis falcatrueiro e atrevido do ano.
No seu programa de actividades paralelas, o EMHU 2023 conta tamén coa exposición El Guernica: una viñeta universal, humor en la oscuridad, que se poderá ver até o 30 de xuño na Casa Museo Picasso, con acceso libre. Coa mostra, que recolle ilustracións de 50 humoristas -gráficos ou escénicos-, o público poderá descubrir a reinterpretación que fan do mítico cadro de Picasso nomes como Quino, Atxe, Mingote, Gallego y Rey, Elena Ospina, Siro López, Pinto & Chinto ou até o propio Luis Piedrahita.
AXENDA PROGRAMACIÓN EMHU 2023 PARA A PONTE DE MAIO
Domingo 30 de abril
16:00 horas | Castelo de Santo Antón:Estirando el chicle en un castillo *
18:00 horas | Teatro Colón: Ignatius Farray: La comedia salvó mi vida *
20:30 horas | Teatro Colón: Amigos hasta la muerte *
Luns 1 de maio
19:30 horas | Teatro Colón: Juan Dávila: La capital del pecado 2.0(estrea en Galicia) *
* Os medios gráficos (vídeo e foto) poderan tomar imaxes unicamente durante os primeiros cinco minutos de cada show. As fotografías deberán tomarse sen flash e desde o fondo da sala. Non se permitirá o acceso á mesma durante o desenvolvemento do espectáculo. Aqueles medios que teñades algunha necesidade específica por favor, contactade con nós a través do correo ou do whatsapp. Grazas pola vosa comprensión!
O FIOT fecha a súa 31ª edición con todas as entradas esgotadas para as últimas funcións do Programa de Sala
‘La voluntad de creer’, de Pablo Messiez; ‘Silencio’, de Juan Mayorga; e ‘Recortes, caneos e otras formas de driblar’, dirixida por Tito Asorey e cuxa función será inclusiva, pechan a última fin de semana de programación do Festival Internacional Outono de Teatro de Carballo
A actriz Blanca Portillo recollerá o domingo 30, ao finalizar a función de ‘Silencio’, o Premio do Público do FIOT 2015 por ‘El testamento de María’
Aínda quedan entradas dispoñibles para asistir á estrea en Galicia de ‘Mundo para lelos’, monólogo do humorista vasco Óscar Terol, creador de programas como ‘Vaya semanita’ da ETB; ou para as últimas funcións do Certame Metro Cadrado, que terán lugar no despacho do alcalde e na sala de xuntanzas dunha empresa local
O Salón social do Pazo da Cultura acollerá tamén o sábado, a partir das 13.15 horas, a derradeira sesión da primeira tempada do Escola do espectador nas ondas, aberta ao público, e na que a xornalista Paloma Cortina conversará con Pablo Messiez e o elenco de ‘La voluntad de creer’, o último éxito da nova tempada escénica madrileña
O Festival Internacional Outono de Teatro de Carballo, o FIOT, bota o pano esta fin de semana con todas as entradas esgotadas para o seu Programa de Sala, que ofrecerá tres espectáculos das grandes voces das escenas galega e estatal: Juan Mayorga, Blanca Portillo, Pablo Messiez, Tito Asorey e Xosé A. Touriñán.
O sábado 29 acollerá representacións de catro montaxes, todas elas estreas galegas ou absolutas; ademais da derradeira sesión ao vivo da Escola do espectador nas ondas. O día comezará coas últimas funcións das pezas que participan no VI Certame de Micro-Escenas Metro Cadrado: ’Viaxar é un pracer’, de Assircópatas (Dani Blanco e Antón Coucheiro), unha comedia do absurdo que reflexiona sobre o noso papel coma turistas e que se poderá ver no despacho do alcalde; e ‘Actriz, chora’, a peza de Cacharela Teatro (Alba Nogueira e Irene Lorenzo) que critica, desde a comedia, os estereotipos e os desafíos do sector artístico, en especial das mulleres novas. Ambas obras contarán con catro pases (13.00, 13.30, 19.00 e 19.30 horas) e, coma sempre, recoméndase reservar previamente a praza en fiot.microteatroentrada@gmail.com.
Tamén pola mañá terá lugar a derradeira sesión da primeira tempada da Escola do espectador nas ondas, os encontros abertos ao público, con vermú e petiscos, para coñecer desde a proximidade as propotas escénicas do FIOT. A partir das 13.15 horas no Salón social do Pazo da Cultura, a xornalista Paloma Cortina (Dramedias, de RNE) manterá unha conversa co elenco de ‘La voluntad de creer’ e co seu director e creador, Pablo Messiez, quen participará vía telemática na gravación do podcast. A obra, unha coprodución do Teatro Español e Buxman Producciones, terá precisamente esa tarde (20.30) a súa estrea en Galicia.
‘La voluntad de creer’, escrita e dirixida por Pablo Messiez, indaga na relación entre vontade, fe e suxestión a partir da historia dunha familia, cuxo irmán menor sostén ser Xesús de Nazareth. A peza, que inicia a súa xira estatal en Carballo logo da súa estrea en Naves del Matadero do Teatro Español -converténdose no último gran éxito da tempada escénica madrileña-, inspírase na película ‘Ordet’, de Carl Theodor Dreyer, quen á vez adaptou a obra ‘La palabra’, de Kaj Munk. Xa en horario nocturno, a partir das 23.00 horas, o humorista Óscar Terol, creador de ‘Vaya semanita’ ou ‘Allá abajo’, presentará no Mercado municipal o seu último monólogo: ‘Mundo para lelos’, no que revelará ao público, desde a comedia, un gran tesouro: nin existe o listo integral, nin o intelixente a tempo completo, todas escondemos miserias e encrucillados sen resolver. As últimas entradas para o espectáculo do actor vasco están dispoñibles en www.ataquilla.com.
O domingo 30 terá lugar o regreso de Blanca Portillo a Carballo, logo da súa aclamada interpretación de ‘El testamento de María’ na edición de 2015, e que as asistentes do FIOT recoñeceron co Premio do Público 2015. Desta quenda a actriz volve coa aclamada ‘Silencio’, do recoñecido dramaturgo Juan Mayorga, a quen se lle outorgou estes días, precisamente, o Premio Princesa de Asturias; galardón que se suma aos Premio Nacional de Teatro e Literatura Dramática, ademais de diversos Max. ‘Silencio’ parte do discurso de ingreso de Mayorga na Real Academia Española, un texto que converteu en teatro e no que pon de manifesto o valor do tempo e do silencio. Unha vez remate a función, o director do FIOT, Alberto Sueiro, fará entrega do Premio do Público 2015 a Blanca Portillo.
Peche inclusivo con ‘Recortes, caneos e outras formas de driblar’
Finalmente, a última función do Programa de Sala deste 2022 será o 31 de outubro. Chegará da man de Tito Asorey, Xosé A. Touriñán e Ainé Producións, desta quenda en coprodución co Centro Dramático Galego. ‘Recortes, caneos e outras formas de driblar’, fará a primeira parada da súa xira en Carballo cunha función que porá o broche dourado á 31ª edición do FIOT. Precisamente esta última representación afondará nun dos retos principais deste ano do festival, como é a sustentabilidade e, particularmente, e inclusión e atención ás diversidades. Coa colaboración do CDG, o público asistente poderá gozar do espectáculo con audiodescrición. como xa aconteceu na función de ‘Pirolíticos’, e interpretación en lingua de signos, ao igual que nas pezas da Rúa dos Contos ‘Habito terra’ ou ‘Contando polos dedos’, que nesta ocasión será proxectada sobre os lateriais do escenario. Aquelas persoas con diversidade visual ou auditiva -ou portadoras de audífono- que queiran facer uso do servizo do dispositivo de lazo magnético ou coñecer o funcionamento do sistema, poden escribir un correo electrónico a fiot.carballo@gmail.com.
O FIOT despide esta fin de semana a súa 31ª edición coas voces de Juan Mayorga, Blanca Portillo, Patricia de Lorenzo, Pablo Messiez e Tito Asorey
As grandes figuras das escenas galega e estatal serán o ramo da última fin de semana de programación do Festival Internacional Outono de Teatro de Carballo
O FIOT ofrecerá o sábado 29 a estrea en Galicia do último éxito da tempada madrileña, ‘La voluntad de creer’, dirixida por Pablo Messiez, e do monólogo ‘Mundo para lelos’, do humorista vasco Óscar Terol; ademais doutras dúas estreas absolutas no marco do Certame Metro Cadrado: ‘Viaxar é un pracer’, de Assircópatas, e ‘Actriz, chora’, de Cacharela Teatro
O Salón social do Pazo da Cultura acollerá tamén o sábado, a partir das 13.15 horas, a derradeira sesión da primeira tempada do Escola do espectador nas ondas, na que a xornalista cultural Paloma Cortina (Dramedias) conversará con Pablo Messiez e o elenco de ‘La voluntad de creer’
O Festival Internacional Outono de Teatro de Carballo, o FIOT, despedirá esta fin de semana a súa 31ª edición por todo o alto. As grandes voces das escenas galega e estatal daranse cita en Carballo: Juan Mayorga, Blanca Portillo, Grupo Chévere e Patricia de Lorenzo, Pablo Messiez, Tito Asorey e Xosé A. Touriñán, os pratos fortes deste #FIOT31, terán un especial protagonismo estes días, nos que o público poderá gozar de ata tres espectáculos do Programa de Sala. O sábado 29 será a xornada central co certame ao acoller representacións de catro montaxes, todas elas estreas galegas ou absolutas; ademais da derradeira sesión ao vivo da Escola do espectador nas ondas.
A primeira das citas terá lugar o venres 28. A Xograresa de Outono 2019, Patricia de Lorenzo,presentará en Carballo -no marco co ciclo OTNI- a súa conferencia performativa ‘Pequenas mentiras para contar grandes verdades’, un traballo no que aborda, a partir do proceso de construción dos distintos papeis que interpretou co Grupo Chévere, como é a representación de personaxes que, na meirande parte das ocasións, actúan como subalternas e reproducen os imaxinarios do poder. De Lorenzo expón como o traballo de actriz pode ser, ás veces, un modelo de resistencia e testemuño real da xente anónima que nunca é protagonista.
Ao día seguinte será a quenda do máis recente éxito da tempada escénica madrileña: ‘La voluntad de creer’, unha coprodución de Buxman Producciones e do Teatro Español escrita e dirixida por Pablo Messiez. A obra iniciará este sábado 29 a súa xira estatal e a primeira parada será en Carballo, dando pé á celebración da estrea en Galicia desta montaxe, que indaga na relación entre vontade, fe e suxestión a partir da historia dunha familia, cuxo irmán menor sostén ser Xesús de Nazareth. A peza inspírase na película ‘Ordet’, de Carl Theodor Dreyer, quen á vez adaptou a obra ‘La palabra’, de Kaj Munk. A estrea galega de ‘La voluntad de creer’ terá lugar o sábado 29 no Auditorio do Pazo da Cultura contra ás 20.30 horas.
Outra das citas máis esperadas deste #FIOT31 chegará o domingo 30. Será o regreso de Blanca Portillo ás táboas do Pazo da Cultura logo da súa aclamada interpretación no 2015 de ‘El Testamento de María’, a coprodución do Centro Dramático Nacional, Festival Grec e Avance Producciones Artísticas, que resultou gañadora do Premio do Público do FIOT daquel ano. Desta quenda, a actriz volve coa aclamada ‘Silencio’, do recoñecido dramaturgo Juan Mayorga, un dos autores vivos máis representados e a quen se lle outorgou estes días, precisamente, o Premio Princesa de Asturias das Letras; galardón que se suma aos xa recibidos Premio Nacional de Teatro (2007), Premio Nacional de Literatura Dramática (2013), e numerosos Max como Mellor Autor ou Mellor Adaptación.
‘Silencio’ toma como referencia, precisamente, o discurso de ingreso de Mayorga na Real Academia Española, un texto que o dramaturgo converteu en teatro e no que pon de manifesto o valor do tempo e do silencio. Blanca Portillo é a responsable de levar á escena a peza, na que o autor tamén viaxa polos silencios teatrais que aínda soan na súa memoria e no seu corpo.
A última función do Programa de Sala deste 2022 será o 31 de outubro. Chegará, coma no 2019 (edición que se pechou con ‘Fariña’), da man de Tito Asorey, Xosé A. Touriñán e Ainé Producións, desta quenda en coprodución co Centro Dramático Galego. ‘Recortes, caneos e outras formas de driblar’, que parte dun texto do xornalista Nacho Carretero e que conta con dramaturxia de José L. Prieto, fará a primeira parada da súa xira en Carballo cunha función que porá o broche dourado á 31ª edición do FIOT.
Xornada de estreas e despedidas o sábado 29
Este mesmo sábado 29 o público do FIOT tamén poderá gozar coas dúas últimas montaxes do VI Certame de Micro-Escenas Metro Cadrado, a liña de programación que promove a creación de pezas escénicas experimentais en espazos non teatrais e singulares de Carballo. Ao igual que na fin de semana pasada, terán lugar dúas estreas absolutas: ‘Viaxar é un pracer’, de Assircópatas, unha comedia do absurdo que reflexiona sobre o noso papel coma turistas e que se poderá ver no despacho do alcalde; e ‘Actriz, chora’, a peza de Cacharela Teatro que critica, desde a comedia, os estereotipos e os desafíos do sector artístico, en especial das mulleres novas. Ambas obras contarán con catro pases (13.00, 13.30, 19.00 e 19.30 horas) e, coma sempre, recoméndase reservar previamente a praza en fiot.microteatroentrada@gmail.com.
De xeito paralelo, no salón social do Pazo da Cultura celebrarase a derradeira sesión da primeira tempada da Escola do espectador nas ondas, os encontros nos que artistas, xornalistas especializadas en artes escénicas e público comparten conversa e facilitan a comprensión e análise dos espectáculos que conforman a programación do festival. Desta quenda, a xornalista cultural de RTVE Paloma Cortina (Dramedias) manterá unha conversa aberta ao público co elenco de ‘La voluntad de creer’ e co seu director e creador, Pablo Messiez, quen participará vía telemática na gravación do podcast.
Xa pola noite o Mercado municipal acollerá a última función da XXIII edición do ciclo de narración oral Rúa dos Contos: será coa estrea en Galicia de ‘Mundo para lelos’, a última creación do humorista, actor e director vasco Óscar Terol, quen porá en evidencia un mundo que se asoma incomprensible para todas as persoas e do que sempre tentamos ocultar o noso “eu parvo”.
Juan Mayorga, Blanca Portillo, Pablo Messiez, Leo Bassi, Xosé A. Touriñán, Chévere ou Pont Flotant son algunhas das voces destacadas da nova edición do FIOT
O Festival Internacional Outono de Teatro de Carballo celebra a súa 31ª edición do 30 de setembro ao 31 de outubro e os seus abonos e entradas estarán dispoñibles proximamente a través da web oficial www.fiot.gal
Un total de 39 espectáculos, 8 estreas absolutas, 9 estreas en Galicia e 2 coproducións conforman o cartel do #FIOT31, que reafirma a súa aposta polas voces singulares e as e os artistas cunha identidade propia e única
Silencio, de Juan Mayorga e protagonizada por Blanca Portillo; La voluntad de creer, o novo de Pablo Messiez; Búho, de Titzina; Eclipse total, de Pont Flotant; Pirolíticos, estrea absoluta de Mofa e Befa; 70 años: Leo Bassi, o regreso do bufón todoterreno a Carballo após 25 años; Recortes, caneos e outras formas de driblar, do CDG e Ainé; ou Impalpable, de Sambuseck, gran sensación da escena arxentina que triunfa agora a nivel estatal, son algunhas das propostas
Neste 2022 tampouco faltarán á cita seccións clásicas do festival, como OTNI, FIOT en ruta, Teatro de Rúa, Rúa dos Contos -este año, en lembranza de Pedro Brandariz-, Micro-escenas Metro Cadrado, FIOTeen e Fiotiño
O Festival Internacional Outono de Teatro de Carballo, o FIOT, o certame escénico de referencia en Galicia, festexará a súa 31ª edición do 30 de setembro ao 31 de outubro, cun completo programa dun mes de funcións e actividades para todos os públicos.
Este ano, baixo o lema #VocesFIOT, o festival aposta pola visualización da singularidade e da identidade das compañías que conforman a súa programación. Visións, propostas e voces moi diferentes, moi persoais e singulares. Todas elas confirman que no FIOT collen todas as voces e todos os públicos: o programa do festival procura, precisamente, esa diversidade, conscientemente, coa intención de chegar a un amplo e diverso abano de espectadores.
O FIOT celebra neste 2022 unha firme proposta artística, na que destaca o seu gusto polo teatro de autor; a súa ambición pola calidade e diversidade e o seu compromiso con creadoras emerxentes. Á vez, o festival convidará ao público a facer memoria e recuperar historias de diferentes xeracións. Pero este ano o FIOT recordará especialmente a Pedro Brandariz cunha homenaxe no ciclo que tantas veces acolleu o seu humor único: a Rúa dos Contos.
O FIOT decorrerá desde o venres 30 de setembro cunha chea de propostas para todos os públicos a través das diferentes liñas de programación que conforman o festival: Programa de Sala, OTNI, FIOT en Ruta, Teatro de Rúa, Rúa dos Contos, Metro Cadrado, FIOTeen e Fiotiño volverán encher de actividade escénica Carballo. A sección de actividades paralelas, nomeada En Paralelo, acollerá dúas exposicións, dúas xornadas profesionais e outras propostas culturais
Nesta 31ª edición o festival contará con figuras únicas das artes escénicas, como Leo Bassi, quen debutou en Galicia hai 25 anos precisamente no FIOT. Aquela actuación propiciou un cambio relevante na historia do certame: a promoción dunha programación de artistas con voces moi diferentes e persoais. A recuperación de Leo Bassi, coa estrea en Galicia de 70 años: Leo Bassi, afonda nesta idea das #VocesFIOT.
Outras voces imprescindibles do panorama escénico tamén estarán no FIOT. É o caso de Blanca Portillo e o seu Silencio, creación de Juan Mayorga; da estrea en Galicia de La voluntad de creer, a última obra de Pablo Messiez; e, como non, a celebración do 30º aniversario de Mofa e Befa. O FIOT estreará a súa nova obra, Pirolíticos; a exposición ‘Trinta anos de Mofa e Befa’; Evaristo Calvo recibirá o galardón Xograr de Outono 2022 e o dúo será protagonista dunha actividade específica, no marco do festival, no que outro evento senlleiro de Carballo, Derrubando Muros, colaborará co FIOT.
Polo Programa de Sala tamén pasará a nova creación do Centro Dramático Galego e Ainé,Recortes, caneos e outras formas de driblar, dirixida por Tito Asorey, con Xose A. Touriñán e con texto de Nacho Carretero; ou unha das sensacións do teatro arxentino, Sambuseck, con Imparable. E a Carballo tamén volverán dúas compañías clave das artes escénicas a nivel estatal para estrear en Galicia as súas últimas creacións: Pont Flotant (Eclipse Total) e Titzina (Búho).
O FIOT naceu hai 31 anos para xerar toda unha estrutura escénica. Por iso conta cunha liña de programación específica de apoio á narración oral, a Rúa dos Contos, que este ano regresa aos bares e rende homenaxe a Pedro Brandariz. Figuras como Alberte Montes, Marta Doviro, Óscar Terol, Good Sex Maritxu, Marta Iglesias ou Quico Cadaval estarán en Carballo, ademais das voces emerxentes e virais de Pablo Meixe e Adrián do Regenco. O festival manterase na rúa e no espazo público para celebrar o circo e as iniciativas para todos os públicos: o Teatro de Rúa, que este ano se celebrará na Praza do Concello os venres 30, 7 e 14; ao igual que boa parte das obras do CertameMetro Cadrado,que este ano celebra a súa sexta edición con 4 estreas absolutas de figuras recoñecidas ou novas compañías do sector a nivel autonómico. Serán pezas site-especific que se realizarán en seis localizacións diferentes de Carballo.
O apoio á creación estará presente a través da coprodución de pezas como Pirolíticos, de Mofa e Befa, ou Wombo Combo, da compañía de Carballo Galeatro; ao igual que o apoio á investigación e ao tecido emerxente coa celebración de residencias (Natalia Fernandes) ou do Certame Metro Cadrado; así como a visualización de novos formatos e novidosas propostas escénicas, a través da liña de programación OTNI. Esta contará con dúas estreas en Galicia (Beautiful Stranger, en colaboración con Camiño Escena Norte; e Conferencia espectacular, de David Espinosa). O OTNI completarase coa participación de Patricia de Lorenzo, do Grupo Chévere e Xograresa de Outono, e o seu Pequenas mentiras para contar grandes verdades; e da compañía madrileña Amor Total con Freak.
Xornadas profesionais e avance na inclusión
O FIOT naceu coa vocación de xerar e impulsar o tecido escénico, pero tamén como espazo de encontro para públicos, compañías e axentes culturais. Por iso, durante o #FIOT31 celebranrase xornadas profesionais da asociación Escena Galega ou do Colectivo NOGA, ademais da visita do alumando do CEU de Xestión Cultural da Universidade de Santiago. Á vez, o certame serve como rede para espallar e descentralizar a actividade escénica pola comarca de Bergantiños: o teatro chegará aos centros sociais de Verdillo e Ardaña co FIOT en Ruta ou á residencia de maiores de Carballo coa Rúa dos Contos.
O FIOT é moito máis que unha programación de espectáculos. É un motor para as artes escénicas galegas. Esa filosofía de rede, de xerar comunidade, de proxecto de continuidade ou de amosar outras realidades sociais periféricas é a súa base. Esa sustentabilidade pola que aposta o FIOT desde hai anos avanza, neste 2022, un paso máis: o programa do FIOT31 introduce a inclusión. O festival incorpora dúas funcións que serán accesibles en lingua de signos. Trátanse de accións pequenas de nacen con vocación de continuidade e que, de novo, visualizan o compromiso do FIOT por ser máis sustentable e inclusivo.
Entradas
Os abonos e as entradas para a 31ª edición do FIOT sairán á venda nos vindeiros días a través da páxina web oficial www.fiot.gal. Tal e como é habitual, as socias da Asociación Cultural Telón e Aparte terán un prazo propio para a adquisición dos seus billetes. Unha vez remate este, sairán á venda os bonos e entradas para os diferentes espectáculos que conforman a programación do festival.
