O Festival Atlántica despídese de Santiago coa sesión de peche de ‘Contos no camiño’
· Pep Bruno e Avelino González rematan os camiños francés e portugués cunha función dobre na Colexiata do Sar este sábado titulada ‘Historias de andantes’
· No concello de Teo está programado un espectáculo con Pakolas e unha sesión de contos con Celso F. Sanmartín
O festival Atlántica afronta a súa última fin de semana con espectáculos en Alfoz, Folgoso do Courel, A Pobra do Caramiñal, Outero de Rei, Dodro, Outes, Cuntis, Teo e Santiago. No caso de Compostela, o sábado está prevista unha última función na Colexiata do Sar con Pep Bruno e Avelino González que servirá tamén para pechar ‘Contos no camiño’.
A función conxunta de ambos os dous narradores leva o título de ‘Historias de andantes’ e nela Pep Bruno e Avelino González compartirán co público as súas aventuras ao longo do camiño. As entradas para asistir levan varios días esgotadas pero está aberta unha lista de agarda nesta web por se hai cancelacións.
Pep Bruno comezou o camiño francés o pasado 4 de xullo mentres que Avelino González está a realizar o portugués en bicicleta desde o día 6. Ao longo dos seus respectivos traxectos, os dous artistas brindaron funcións de contos en varios puntos e tamén compartiron polas súas redes sociais as súas vivencias sobre a experiencia co cancelo #contosnocamiño. Con ‘Historias de andantes’ darán por rematada esta singular peregrinación de contos.
Últimas actividades en Teo
Atlántica tamén remata a súa actividade en Teo este sábado con dúas funcións gratuítas pero para as que cómpre reservar con antelación no correo entradascultura@teo.gal. Así, está prevista unha función concibida para público infantil e familiar de Pakolas co espectáculo musical ‘Ramona Órbita, a dona do tempo’ na Burga de Xermeade ás 20:30 horas.
Á mesma hora pero no Teleclube de Luou estará Celso F. Sanmartín quen debullará as historias que se agochan baixo o suxestivo título de ‘Cando viaxou unha lingua de lume nun carro de herba seca?’, un espectáculo dirixido ao público adulto. Serán 75 minutos na compaña duns dos narradores galegos máis recoñecidos, apaixonado da tradición oral e fervoroso transmisor dela.
SOBRE OS ARTISTAS
Pep Bruno, barcelonés afincado en Guadalaxara, é licenciado en Filoloxía Hispánica, Teoría da Literatura Comparada e diplomado en Traballo Social. Comezou a contar contos en 1994 e desde aquela xa percorreu numerosos festivais de todo o mundo compartindo historias para nenos e adultos. Compaxina a súa actividade como narrador coa súa faceta de blogueiro e coa impartición de cursos, conferencias e obradoiros literarios e de creación. Tamén organiza actividades de animación á lectura, escribe artigos de reflexión en revistas especializadas e colabora decote cos medios de comunicación. No ano 2010, coa obra ‘La familia C’, ganou o III Premio Internacional Compostela de Álbum Ilustrado outorgado pola Editorial Kalandraka en colaboración co Concello de Santiago. Os seus libros están traducidos a máis de dez linguas.
Avelino González é actor, contador, tradutor e director. Traballou en teatro, televisión, cine e bares, en compañías como Ollomoltranvía, en espectáculos como ‘Commedia’, en películas como ‘Heroína’ ou ‘Gallego’, en series de televisión como ‘Padre Casares’, ‘Cuéntame’, ‘Hopital Central’… e o seu labor teatral foi recoñecido con varios Premios María Casares. Cos contos xa andou por toda a península, percorreu Europa (Polonia, Alemaña, Suíza…) e saltou o Atlántico (Cuba). Fixo dous espectáculos de contos para teatros. Un deles, ‘Vento mareiro’, foi o espectáculo máis representado en Galicia no 2005 e recibiu o Premio María Casares á Mellor Música Orixinal.
Paco Cerdeira, alias Pakolas, é músico, compositor e produtor. Leva dedicándose ao público infantil dende hai case quince anos, cando entrou a formar parte de Mamá Cabra. No 2014 fundou a súa propia banda de música infantil, A Gramola Gominola, coa que publicou os discos ‘Cancións para Desafinar’ e ‘Bravas. O rexurdir da Luz’. No 2018 ganou na categoría Música Infantil dos Premios Galegos da Música Martín Códax. No ano 2015 comeza co seu proxecto en solitario, Pakolas, do que xa foron publicados dous libros-CD: ‘Pakolas’ é ‘Ramona Órbita. A dona do tempo’, ambos editados por Galaxia (Sonárbore).
Celso Fernández Sanmartín é un poeta e contacontos galego. É licenciado en Filosofía pola Universidade de Santiago de Compostela e tamén promotor de FoCuCu (Foro de Cultivos Culturais). Como contacontos, caracterízase polo seu labor como recolledor e reinventor de historias e contos. O seu repertorio está composto por historias e memorias vencelladas á tradición oral galega e tamén á europea, que presenta como un verdadeiro tesouro nos seus espectáculos, cheos de coidado, sentido e paixón pola oralidade, a comunicación e a lingua.
Gaitazumba, vermú de contos, sesión para bebés e conexión Guinea-Brasil na terceira xornada de Atlántica en Santiago
· Luís Prego, Pakolas, Marta Ortiz, Marcelo Ndong e Thomas Bakk encherán Santiago de música e contos este sábado
· As actividades son gratuítas pero cómpre reservar a través da web festivalatlantica.gal
Chega unha nova xornada do festival Atlántica en Santiago, marcada pola diversidade de propostas e que vai satisfacer a todos os públicos. Haberá música e baile con Luís Prego e Pakolas, contos para bebés con Marta Ortiz e historias de Guinea Ecuatorial e Brasil grazas a Marcelo Ndong e Thomas Bakk. Todas as actividades son gratuítas pero para asistir cómpre reservar o convite a través da web festivalatlantica.gal. O festival está presente na cidade compostelá grazas á Deputación da Coruña, a Xunta de Galicia e o Concello de Santiago.
Ás 12 do mediodía está prevista a sesión de Gaitazumba de Luís Prego e o ‘Vermú de contos’ de Pakolas na praza de Cervantes, unha actividade pensada para gozar en familia coa música e os contos de ambos os dous artistas. Este espectáculo conxunto ten as súas entradas esgotadas pero é posible apuntarse na lista de espera por se hai cancelacións de última hora.
Xa pola tarde, ás 19 horas, no palco da música da Alameda, Marta Ortiz recibirá a un público moi especial: os bebés de entre 0 e 3 anos. Os máis pequechos poderán gozar co espectáculo ‘Canta, buguina, canta!’, unha engaiolante sesión que ten como obxectivo xogar coa palabra e a poesía, coas cancións e contos, cos xogos visuais e sonoros que serán o berce da literatura. As entradas para este espectáculo pódense reservar aquí.
Contos a dúas voces en Bonaval
O sábado pechará as súas actividades cunha función a dúas voces no parque Bonaval. A partir das 21:30 horas, o público adulto ten unha cita con Thomas Bakk e mais Marcelo Ndong e as historias de ‘Contares da terra e do mare’ e ‘Que fan os fang cando contan contos’. Para asistir a este espectáculo cómpre reservar o convite nesta web.
Bakk conta cun repertorio de narrativas orixinais e de tradición oral, que vai da sátira á parábola, sobre temas que abordan valores humanos e sociais, desde os máis remotos tempos ata a actualidade. No que respecta aos contos de Ndong pertencen á cultura fang, con seis millóns de habitantes que se reparten entre Camerún, Gabón, Congo, Brazaville, República Centroafricana e Guinea Ecuatorial. Nestes contos, Marcelo Ndong móvese con precisión e efectividade, complementa o discurso verbal cunha xestualidade elegante e sosteno sobre chiscadelas, referencias e insinuacións.
SOBRE OS ARTISTAS
Luís Prego é mestre de baile e música tradicional dende 1989. Comezou no mundo da danza á idade de catro anos, na escola do prestixioso grupo vigués Lembranzas Galegas. É un estudoso e investigador do folclore tradicional galego e autor dos libros ‘Para cantar e bailar’ (Ed. do Cumio, 2008) e ‘Xogos musicais’ (Ed. do Cumio, 2013). É popular nas redes sociais por ser o creador e administrador do grupo de Facebook Baile e música de Galiza, dedicado a difundir os traballos de campo realizados por toda a xeografía galega desde finais dos 80 ata a actualidade. Tamén é creador e administrador da páxina Un punto ao día con Luís Prego, feita para ensinar e divulgar a riqueza dos pasos do baile solto en Galicia.
Paco Cerdeira, alias Pakolas, é músico, compositor e produtor. Leva dedicándose ao público infantil dende hai case quince anos, cando entrou a formar parte de Mamá Cabra. No 2014 fundou a súa propia banda de música infantil, A Gramola Gominola, coa que publicou os discos ‘Cancións para Desafinar’ e ‘Bravas. O rexurdir da Luz’. No 2018 ganou na categoría Música Infantil dos Premios Galegos da Música Martín Códax. No ano 2015 comeza co seu proxecto en solitario, Pakolas, do que xa foron publicados dous libros-CD: ‘Pakolas’ é ‘Ramona Órbita. A dona do tempo’, ambos editados por Galaxia (Sonárbore).
Marta Ortiz é catalá, de orixe andaluza e vive e conta en Galicia desde o 2007, así que tamén é galega de adopción e corazón. Viviu en varias cidades ata que chegou a Santiago de Compostela, onde namorou dos contos. Conta soa e acompañada, para persoas de calquera idade, con obxectos, co xesto, coa rima e coa música. O seu repertorio nace de contos tradicionais, de historias de vida, de lembranzas incompletas, onde realidade e ficción se encerellan ata que non se sabe onde remata unha e comeza a outra. Tamén forma parte da compañía Tropa de Trapo co músico e narrador Brais das Hortas e é socia fundadora de Charlatana Cooperativa Galega de Artistas.
Thomas Bakk, brasileiro, naceu no Rio de Xaneiro e vive en Portugal desde hai máis de vinte anos. Defínese a si mesmo como “contautor”. É autor, actor, dramaturgo, contador de historias e poeta. Ten máis de 50 obras publicadas, e unha vintena delas foron xa representadas en Portugal, Brasil e Angola. Como letrista ten composto para bandas sonoras teatrais, e mesmo ten participado co músico brasileiro Lenine na creación das letras de “A cor del’ arte” e “Aviso aos navegantes”, pezas teatrais da súa propia autoría. Foi tamén guionista da Rede Globo, profesor de educación artística e investigador literario. Na actualidade centra a súa actividade profesional na narración oral, levando contos creados por el a hospitais, cárceres, ONG e aos máis importantes festivais de narración oral de España e Portugal. Participa con asiduidade en conferencias e sesións de narración en congresos, bibliotecas, librerías, feiras do libro, escolas, facultades, asociacións, espazos culturais, institucións públicas e empresas por todo o país veciño. Nas súas sesións, Bakk adoita narrar e interpretar varias personaxes, utilizando o teatro, a música e a interacción co público nunhas sesións sorprendentes e divertidas.
Marcelo Ndong naceu en Guinea Ecuatorial e con 12 anos ingresou na Escola de Circo da ‘Cidade dos Muchachos’ de Ourense. Formou parte da compañía oficial do ‘Circo dos Muchachos’, onde traballou como acróbata, malabarista, clown e cómico, e coa que realizou xiras por todo o mundo.
En 1976 matriculouse na Universidade de Santiago de Compostela e ese mesmo ano comezou os seus espectáculos como mimo en rúas e locais de España, Francia, Alemaña e Italia. Tamén colaborou en montaxes teatrais, cine e danza con diferentes grupos de Europa e América.
Dende 1990 vive en Guinea e traballa como animador no Centro Cultural Español, como profesor de teatro e director da escola de circo de Malabo. Na actualidade rexenta unha gardaría en Malabo que tódalas tardes se converte nun centro cultural improvisado e alternativo que acolle teatro, baile, maxia ou cine. A súa peripecia vital está recollida no documental ‘Manoliño Nguema’ de Antonio Grunfeld que se proxectará dentro do festival Atlántica o xoves 8 de xullo.
Atlántica fóra de Santiago
Este sábado tamén haberá actividades do festival en Chantada, Outes, Ferrol e Valga. As actividades de Atlántica continuarán ata o vindeiro 11 de xullo e están a se desenvolver por toda Galicia. O programa completo e mais a información sobre os artistas, espectáculos e a reserva de entradas pódese consultar na web do festival. Por mor das cambiantes restricións sanitarias, cómpre consultar a web para coñecer a información máis actualizada sobre reservas e accesos aos espectáculos.
