Andrea Fernández Maneiro, coa obra “Contra-Tempos”, gaña o IV Certame de Poesía TORRE DE CALDALOBA

E quedou como finalista a obra DA CARNE, de Rafael Lobelle González

Reunión do xurado en Cospeito

O IV Certame de Poesía TORRE DE CALDALOBA, convocado polo Concello de Cospeito e a Asociación Recreativa e Cultural de San Martiño de Pino, en colaboración con Culturalia GZ, xa ten obras gañadoras.
O xurado de dito certame, composto por Beatriz Dourado, Adolfina Mesa. Armando Requeixo, Patricia Torrado Queiruga e Xosé Otero Canto, actuando como secretario, con voz mais sen voto, Martiño Maseda, reuniuse este sábado 6 de novembro de 2021 no salón de plenos do Concello de Cospeito e, despois dunha longa deliberación, valorando entre as 32 obras presentadas, fallou por maioría de votos conceder o primeiro premio da categoría de 18 anos en diante á obra CONTRA-TEMPOS, cuxa autoría, unha vez aberta a plica, corresponde a Andrea Fernández Maneiro, de Vilagarcía de Arousa, por “tratarse dun poemario moi equilibrado, cunha voz poética potente e conmovedora, que outorga visibilidade a unha temática tan silenciada como é a da saúde mental”. E o segundo premio recaeu na obra DA CARNE, cuxo autor é Rafael Lobelle González, de Chantada, porque, tendo en conta o criterio do xurado, “estamos ante unha poesía escénica, ben estruturada, que se abre a diferentes dimensións e interpretacións, destacando a riqueza cromática no xogo das palabras”.
A categoría de menores de 18 anos quedou deserta por ausencia de participación.
A entrega de premios está prevista para o vindeiro sábado 13 de novembro de 2021, no local social de Pino, lugar onde se sitúa a Torre de Caldaloba.

Presentación virtual do libro “MANIFESTO 25N. Trinta voces pola eliminación da violencia contra a muller” a través do Centro de Documentación e Recursos Feministas de Vigo

O Centro de Documentación e Recursos Feministas, en colaboración coa Concellería de Igualdade do Concello de Vigo organiza unha presentación virtual do libro MANIFESTO 25 N. Trinta voces pola eliminación da violencia contra a muller, publicado baixo o selo de Alvarellos Editora,. Dita presentación terá lugar o vindeiro martes, 9 de novembro de 2021 ás 19:00 h.

Dita presentación contará coa participación das autoras Cristina Corral Soilán, Fátima Domínguez Silva, Eilún Del Pazo Moa e Pilar Maseda.

Ademais intervirán Henrique Alvarellos, editor e director de Alvarellos Editora, e Martiño Maseda, escritor e administrador da web Culturalia GZ, co-promotora de dita publiación

O IEU organiza a proxección do documental NEGRO PÚRPURA o sábado 6 de novembro en Monterroso

O sábado 6 de novembro ás 19,00 h, en colaboración coa Área de Cultura e Vicepresidencia da Deputación de Lugo, o IEU proxectará no salón de actos do Centro Sociocultural de Monterroso a longametraxe  Negro Púrpura, filme de carácter documental producido por Illa Bufarda e dirixida por Sabela Iglesias e Adriana P. Villanueva. 

Ao remate da proxección celebrarase un coloquio coas directoras da película.

Proxección da película-documental NEGRO PÚRPURA o 5 de novembro no Auditorio Municipal de Vilalba

O venres 5 de novembro de 2021, ás 20:00 horas no Auditorio Muncipal de Vilalba terá lugar a proxección da película documental NEGRO PÚRPURA, dirixida por Sábela Iglesias e Adriana P. Villanueva. Dita proxección está organizada polo IESCHA, en colaboración coa Área de Cultura e Vicepresidencia da Deputación de Lugo e o Concello de Vilalba.

Velaquí a nota Informativa desta proxeción.

Espectáculo “A Voar para cantar e contar a viaxe da xoaniña Xoana” con Cé Orquestra Pantasma este sábado na Casa-Museo Manuel María

Este sábado, día 6 de novembro, ás 17 horas, Cé Orquestra Pantasma, home orquestra, estará na Casa-Museo Manuel María, en Outeiro de Rei, para presentar o seu espectáculo A voar. 

Esta actividade infantil dirixida para maiores de 3 anos baséase no libro-disco A voar. 

Ao son do enerxético ritmo de Cé Orquestra Pantasma, cóntase e cántase a viaxe da pequena Xoana, xoaniña que movida pola curiosidade e o desexo de voar, emprenderá unha longa viaxe que mudará a súa vida.

Espectáculo divertido e dinámico deste proxecto musical, unipersoal e versátil, que leva a cabo César Freiria, músico autodidácta e apaixonado dos instrumentos musicais.Para asistirdes á actividade cómpre reservar previamente en contacto@casamuseomanuelmaria.gal ou a través do whatsapp 698177621. O prezo do billete é de 2 euros.

O IEU organiza a presentación da Revista CAIRÓN en Monterroso o sábado 30 de outubro

O sábado 30 de outubro de 2021 ás 18,00 h, no salón de actos do Centro Sociocultural de Monterroso, terá lugar a presentación do quinto número da revista Cairón, Boletín do Instituto de Estudos Ulloáns. 

Na presentación, que está integrada na programación da Feira de Santos, intervirán Rocío Seijas, alcaldesa de Monterroso; o xornalista Daniel Salgado, director de Cairón; Francisco Pardo, director do IEU; o xornalista Fernando Salgado; e os poetas Martiño Maseda e José Carlos Ulloa.

Tamén haberá presentacións por outras localidades. Concretamente, en Palas de Rei será o domingo 7 de novembro pola mañá e en Antas de Ulla o sábado 13 de novembro pola tarde.