Presentación do libro ‘Conversas arredor de Xorima’, de Paulo Naseiro, no Auditorio Municipal de Vilalba


O vindeiro 26 de decembro presentarase na capital chairega o libro Conversas arredor de Xorima, de Paulo Naseiro, editado polo Instituto de Estudos Chairegos. O evento marca o despegue do Proxecto Xorima, un proxecto transmedia que busca homenaxear o grupo de folk Xorima a través de múltiples medios e plataformas, recuperando a súa memoria e reunindo os membros da primeira formación despois de corenta anos.
Xorima foi un grupo revelación no nacente folk instrumental galego dos anos oitenta. Chegaron a actuar nos máis importantes festivais de folk en Galicia e traspasaron as súas fronteiras para acudir a citas como o Festival Intercéltico de Lorient. Do seu paso pola historia do folk galego deixaron pegada nun disco gravado en 1985.
O proxecto Xorima xa conta cunha páxina web, proxectoxorima.com, e está a producir un documental que será estreado o ano próximo. Nas redes sociais, pódense seguir todas as novidades a través de Twitter (@Proxecto_Xorima), Instagram (proxecto_xorima) e Facebook (@ProxectoXorima).
A presentación do libro Conversas arredor de Xorima terá lugar no Auditorio Municipal de Vilalba ás 20.00h, nun evento que tamén contará coa actuación de Xorima. As entradas, de balde,están dispoñibles na Casa da Cultura de Vilalba e na páxina web do Concello de Vilalba.
A organización do evento corre a cargo do Instituto de Estudos Chairegos, como principal asociación participante no proxecto, en colaboración co Concello de Vilalba.

*Información facilitada polo IESCHA

O espectáculo CONTAR CO VENTO, con María da Pontragha e o acordeón de Miguelón Paz, este sábado 27 de novembro na Casa-Museo Manuel María

Este sábado, día 27, ás 17 hrs, na Casa-Museo Manuel María, acolleremos unha contada, Contar co vento, para público infantil (maiores de 3 anos) e familiar con María da Pontragha. María, acompañada do acordeón de Miguelón Paz, contará, ás 17 horas, historias de medo, de risa e bonitas a rachar. Cómpre reservar previamente en contacto@casamuseomanuelmaria.gal ou no whataspp 698177621. O prezo do billete é de 2 euros.

Presentación da obra ‘Correspondencia entre Manuel María e Xosé Neira Vilas (1957-1997)’ este sábado, 20 de novembro, na Casa-Museo Manuel María

Este sábado, día 20, ás 18 hrs, estarán na Casa-Museo Manuel María dous grandes estudosos do noso idioma e da nosa literatura, como son os catedráticos da UdC, Xosé Ramón Freixeiro Mato e Manuel Ferreiro, para nos presentar a edición preparada por ambos os dous da Correspondencia entre Manuel María e Neira Vilas (1957-1997).

Manuel María (1929-2004) e Neira Vilas (1928-2015) son dous autores fundamentais da literatura galega da segunda metade do século XX. Ambos pertencen, por idade, á mesma xeración, mais en canto o primeiro desenvolve a súa actividade literaria desde o interior da nación en tempos de ditadura e nas primeiras décadas do período posfranquista, o segundo faino fundamentalmente desde a Galiza emigrante, seguindo o pulso cultural do seu país a quilómetros de distancia. Aínda así, mantiveron unha intensa relación por correspondencia, nomeadamente na década de 60 e nos primeiros anos da seguinte, que se foi transformando nunha amizade epistolar sustentada no compromiso mutuo coa lingua e a cultura galegas e coas clases populares.

As persoas interesadas en asistir a esta actividade, por favor, anotádevos previamente contestando este correo electrónico. 

Aproveitamos este aviso para vos anunciar que o próximo 28 de novembro, domingo, ás 18.30, no auditorio municipal Gustavo Freire de Lugo, levarase a escena A lúa vai encuberta, proxecto gañador do 2º Certame Manuel María de Proxectos Teatrais. Animámosvos, a todos aqueles e aquelas que sexades de Lugo e comarca, a que asistades. Esta peza interpretada polas compañías Incendiaria e A Quinta do Cuadrante, ten como elenco artístico a Tito Asorey, Melania Cruz, Vanesa Sotelo e Davide González. Non o dubidedes, ídelo pasar moi ben e paga moitísimo a pena vela. Máis información sobre os billetes en 

https://entradaslugo.es/evento/teatro/a-lua-vai-encuberta

Esta obra que vén de pasar por Chantada e Fene esta pasada fin de semana, tamén estará en:

20 de Novembro de 2021- BETANZOS.

28 de Novembro de 2021- LUGO.

​ 04 de Decembro de 2021- CARRAL.

05 de Decembro de 2021- SARRIA.

18 de Decembro de 2021- NOIA.

​

14 de Xaneiro de 2021- BARBADÁS.

21 de Xaneiro de 2022- CULLEREDO.

​

11 de Febreiro de 2021- O BARCO DE VALDEORRAS. 

​

10 de Marzo de 2022- MONFORTE DE LEMOS.

11 de Marzo de 2022- AMES.

12 de Marzo de 2022- OLEIROS.

13 de Marzo de 2022- RIBADEO.

25 de Marzo de 2022- RIBEIRA.

26 de Marzo de 2022- BRIÓN.

​

02 de Abril de 2022- CANGAS.

03 de Abril de 2022- CAMBADOS.

08 de Abril de 2022- ARTEIXO.

‘Mar en danza’ trae á Coruña o último espectáculo da bailarina Lucía Lacarra

‘Mar en danza’ trae á Coruña o último espectáculo da bailarina Lucía Lacarra

Fordlandia, de Lucía Lacarra e Matthew Golding, representarase o 20 de novembro no Teatro Colón dentro do ciclo ‘Mar en danza’, impulsado pola promotora cultural QueArte Producciones e a Deputación da Coruña

Lacarra tamén impartirá unha clase maxistral no Conservatorio Profesional de Danza da Deputación da Coruña o venres 19 de novembro, exclusiva para o alumnado do centro

As invitacións gratuítas para Fordlandia poden retirarse desde o venres, 12 de novembro, a través da plataforma web ataquilla.com

O ciclo ‘Mar en danza’ retoma a súa actividade en novembro con dous eventos protagonizados pola bailarina basca Lucía Lacarra, musa de Roland Petit e Helgi Tomasson. A primeira cita será o venres 19 e consistirá nunha masterclass para o alumnado do Conservatorio Profesional de Danza da Deputación da Coruña. O sábado, ás 20:30 horas, o Teatro Colón acollerá o espectáculo Fordlandia de Lucía Lacarra e Matthew Golding, que se representará por primeira vez en Galicia.

As invitacións gratuítas para o espectáculo poden reservarse desde o venres, 12 de novembro, na plataforma web ataquilla.com.

Fordlandia é a primeira incursión de Lucía Lacarra no ámbito da producción, unha aventura na que se embarcou acompañada do canadense Matthew Golding. Ambos os dous son os protagonistas deste espectáculo multidisciplinar no que conflúen danza, música e arte visual. Fordlandia foi concibido durante o confinamento e materializouse nun espectáculo onírico onde se plasma o distanciamento artístico e físico experimentado por Lacarra e Goldwing mentres vivían o encerro pandémico en Zumaia e Ámsterdam, respectivamente.

A obra trata o tema dos diferentes modos de separación forzada nunha relación aínda existindo o amor. Estrutúrase en seis piezas de danza cuxa transición se executa a través de curtas cinematográficas. Cinco pezas son de nova creación e son autoría de Anna Hop (Stillness y Close), Yuri Possokhov (Snow Storm) y Juanjo Arqués (Fordlandia y Pile of Dust). After The Rain de Christopher Wheeldon é a única peza preexistente. O título do espectáculo fai referencia a unha cidade fundada por Henry Ford no Brasil como centro produtor de caucho na década dos 30. O proxecto fracasaría e deixaría tras de si Fordlandia, unha urbe distópica estadounidense en plena selva amazónica.

Sobre Lucía Lacarra

Natural de Zumaia, Guipuzkoa, Lucía Lacarra comezou a súa formación con 14 anos na Escola de Víctor Ullate e tan só un ano máis tarde iniciou a súa carreira profesional no Ballet do célebre bailarín e coreógrafo. Ao longo da súa traxectoria foi a bailarina principal de compañías coma o Ballet de Marsella, o Ballet de San Francisco, o Ballet da Ópera de Múnich ou o Ballet de Dortmund, onde na actualidade é convidada permanente.

Entre os galardóns que recibiu figuran o Danza & Danza, o Positano, o Isadora Duncan, o Nijinsky, o Prix Benois da Danse -considerado o óscar da danza- e o Premio Nacional de Danza 2005, entre outros. En 2007 convertiuse na primeira bailarina española invitada a participar no Concerto de Aninovo de Viena e en 2010 foi nomeada ‘Bailarina da Década’ no Palacio do Kremlin. É cofundadora, canda a Matthew Golding, de Goldenlac Producciones.

Sobre Matthew Golding

O canadense Matthew Golding formouse na Royal Winnipeg Ballet School desde os 14 anos e uniuse á Universal Ballet Academy en Washington D.C. En 2002, gañou o Youth America Grand Prix e unha bolsa do Prix de Lausanne para estudar en The Royal Ballet School.

Foi bailarín principal no Het National Ballet de Ámsterdam y no Royal Ballet de Londres, e actuou coma invitado en compañías tan prestixiosas como Mariinsky, a Ópera de Múnich, English National Ballet, o Tokyo Ballet e a Ópera de Oslo, por citar algunhas. Entre os seus galardóns atópase o Premio Zwaan holandés en 2010 ademais dunha nominación ao Prix Benois de la Danse en 2012/13 pola súa interpretación en Cascanoces e Cincenta.

‘Mar en danza’ é unha iniciativa cultural impulsada pola Deputación da Coruña e QueArte Producciones con motivo da celebración este ano do 30º aniversario do Conservatorio Profesional de Danza da Deputación. O ciclo, que foi inaugurado por Julio Bocca o pasado mes de maio, retoma este mes a súa actividade con Lucía Lacarra e Matthew Golding e clausurarase en decembro co bailarín e coreógrafo basco Igor Yebra.

Velaquí a Nota informativa e Dossier Fordlandia

Concerto de AIRIÑOS DA FREBA este sábado na Casa-Museo Manuel María

Este sábado, día 13 de novembro, ás 19 horas, AIRIÑOS DA FREBA estará na Casa-Museo Manuel María, en Outeiro de Rei, para nos presentar en semiacústico o seu último traballo Con Grelos.

Música divertida e bailábel inspirada nos cuartetos, conxuntos, bandas e orquestras lucenses de mediados do século pasado que amenizaban as festas das nosas aldeas e vilas.

Con Grelos, como o anterior traballo O de Lacón, é froito do estudo, recolleita, pesquisa e divulgación da música tradicional da provincia de Lugo.

Para asistir ao concerto cómpre reservar previamente en contacto@casamuseomanuelmaria.gal ou no whatsapp 698177621. Billete: 5 euros.

Deixámosvos aquí un vídeo dun dos temas  de Con Grelos, “Polichinela”