Ataque Escampe publicará ‘Cabalgata’,  o seu novo álbum, o vindeiro martes 18 de abril

Seis anos despois do seu último LP, o grupo compostelán lanza un disco no que se achega a novos estilos (synth-funk, hi-NRG, hip hop, no wave), mais sen abandonar o pop

A nivel lírico, o fío do disco pasa por un diálogo co pasado que non cae na nostalxia, abordando temas como as amizades conservadas ou perdidas (Lamborghini, Amigo, Cabaliño lento) ou a infancia (Fuck the Police), entre outros

A presentación ao vivo terá lugar o sábado 29 de abril na Sala Capitol e as entradas xa están á venda na plataforma www.ataquilla.com


A banda Ataque Escampe publicará Cabalgata, o seu oitavo álbum, o vindeiro martes 18 de abril nas principais plataformas dixitais. O novo LP do grupo compostelán, do que xa se coñecen Lamborghini, Viaxamos a Miami e Cabaliño lento, está conformado por 10 temas e conta coa produción do Hevi (Ortiga, Novedades Carminha). A reserva de Cabalgata xa está dispoñibile a través do enlace https://ffm.to/cabalgata.
Cabalgata séntese como unha sorte de retorno. Non é que nos últimos anos o grupo estivese inactivo, nin moito menos: Ataque Escampe publicou o EP A alma ou as compilacións de rarezas Ídolos adolescentese A vida dos animais, e versionou a Ana Kiro no sinxelo Por última vez. Pero, con todo, pasaron xa seis anos desde o anterior disco longo (Primeiros bicos, 2017). Neste novo traballo discográfico, o grupo compostelán volve amosarnos o seu universo creativo, mantendo señas de identidade(como o coidado dunhas letras apoiadas no humor e a vulnerabilidade e o achegamento a estilos diversos) e achegando tamén numerosas novidades.
Esas novidades fíltranse en diferentes aspectos de Cabalgata. Na instrumentación, por exemplo, destaca a presenza dos sintetizadores e, ocasionalmente, do saxo e as bases electrónicas, cos que aparecen influencias pouco vistas no grupo como a música disco e hi-NRG (presente no primeiro adianto,Lamborghini), o hip hop da vella escola (Fuck the Police) ou a no wave (Amigo). 
No aspecto lírico, o fío principal do disco podería ser o diálogo co pasado, non como obxecto de nostalxia senón, en palabras do grupo, “como espazo inesgotable que nos interpela”. De aí sae o intento de explorar estilos musicais doutras épocas, pero tamén temáticas que atravesan o álbum, como a infancia, os amores diferentes ou as amizades conservadas ou perdidas, simbolizadas nas letras polas diferentes imaxes de cabalos ás que fai referencia o título: a tenrura dos cabaliños de carrusel das festas, a ameaza dos policías montados, a emotividade da relación cos animais á que podería apuntar Cabaliño lento, o terceiro adianto do LP e tema que pecha o álbum. 
Ao mesmo tempo, como vén sendo habitual nos discos de Ataque Escampe, as letras e as músicas poñen tamén en relación o traballo do grupo co contexto político, histórico e artístico que o marca. Deste xeito, en Cabalgata asoma un conxunto ben variado de figuras e referencias que van do presente ao pasado: Bad Bunny, Nina Simone, Roberto Carlos, Bruce Lee, Wallace Stevens, Luz Pozo Garza… Entre todas elas pode observarse tamén unha vontade por achegarse ao popular, visible na presenza da Banda de Lalín na letra de Terras raras ou na inclusión dunha receita de filloas, explicada por Delfina Sánchez (avoa do batería Cibrán Tenreiro), en A cociña práctica.

Presentación ao vivo na Sala Capitol
O retorno que supón Cabalgata levará tamén de volta ao grupo aos escenarios de Santiago de Compostela: Ataque Escampe estará na Sala Capitol o sábado 29 de abril para presentar o disco, nun evento que abrirá un combinado de membros da Banda de Lalín. Así, péchase en certa maneira o círculo aberto pola mención á Banda dentro do disco ou a presenza de parte da súa formación no videoclip do adianto Lamborghini. As entradas xa están á venda, a partir de 10 euros, na web de www.ataquilla.com; mentres na billeteira costarán 15 euros.

Lista de cancións de Cabalgata:

  1. Terras raras
  2. Supermartes
  3. Entra o dragón
  4. Fuck the Police
  5. A cociña práctica
  6. Pantalón curto
  7. Lamborghini
  8. Viaxamos a Miami
  9. Amigo
  10. Cabaliño lento

20230411-NP-Ataque-Escampe-publicara-Cabalgata-o-18-de-abril

Este sábado proxección do programa DESERTORES DO ASFALTO, con Idoia Cuesta, Pepa Lombao e Xosé Ramón Rodríguez, na Casa-Museo Manuel María

Este sábado, 15 de abril, ás 18 horas, o programa da TVG Desertores do asfalto, producido por NÓS, produtora cinematográfica galega, estará na Casa-Museo Manuel María para proxectar tres historias que veñen de gravar en Outeiro de Rei. Concretamente as protagonistas son a artesá especializada en cestaría e tecidos e veciña de Cela, Idoia Cuesta, a oleira e veciña de Bonxe, Pepa Lombao e o gandeiro de San Clodio e animador do proxecto Vida de Aldea, Xosé Ramón Rodríguez.

Por tanto este sábado darán a coñecer ás súas protagonistas, e a todos aqueles que se queiran achegar e acompañar, o resultado das gravacións feitas. Coas historias e coa exhibición deste sábado montarán un capítulo, que presenta Rocío Barrio, e que se exhibirá nos próximos meses na televisión pública.

As persoas que queirades asistir podedes anotarvos en contacto@casamuseomanuelmaria.gal ou a través do whatsapp 698177621.

Desertores do asfalto é un programa televisivo que vai pola súa terceira temporada percorrendo Galiza e que tenta pór en valor a cultura popular, a innovación no rural, as tradicións que se mesturan co novo e o día a día das parroquias e da súa veciñanza…

Presentación do libro BEN SABE O MAR QUE POSÚO O BOTÍN DAS PIRATAS, de Luz Campello, na Casa da Cultura de Vilalba

O vindeiro VENRES 14 de ABRIL de 2023, ás 20:00 H., na CASA DA CULTURA DE VILALBA celebrarase a presentación do libro BEN SABE O MAR QUE POSÚO O BOTÍN DAS PIRATAS, de LUZ CAMPELLO, editado pola EDITORIAL GALAXIA. 

O acto contará coa presenza da autora do libro, LUZ CAMPELLO; con PILAR MASEDA e LUZ AIRADO, poetas da NPG, e con MARISA BARREIRO, presidenta do IESCHA.

NOTA_INFORMATIVA_LUZ-CAMPELLO

Presentación do libro ‘Cerámica común na Gallaecia romana’, de Sara Barbazán Domínguez, na Casa da Cultura de Vilalba

Este venres 31 de marzo, ás 20:30, na Casa da Cultura de Vilalba, terá lugar a presentación do libro CERÁMICA COMÚN NA GALLAECIA ROMANA, de SARA BARBAZÁN DOMÍNGUEZ, organizado pola ASOCIACIÓN DE AMIGOS DO MUSEO DE VILALBA-AMUPAV, entidade coa que o IESCHA colabora e apoia nas súas actividades e reivindicacións.

O acto contará coas intervencións de ÁNGEL VILLA VALDÉS (Museo Arqueológico de Asturias); EDUARDO RAMIL REGO (Universidade de León), e SARA BARBAZÁN DOMÍNGUEZ (autora do libro).

Ataque Escampe publica ‘Cabaliño lento’, un novo adianto de ‘Cabalgata’, o seu oitavo álbum

Neste terceiro avance, a banda traballa coas texturas electrónicas e os sintetizadores nunha evocadora letra que mestura imaxes medievais e contemporáneas

O vídeo da canción, a cargo de David Silva, xoga coa idea dos retratos filmados situando ao grupo na estrañeza dun recinto ecuestre

Con este sinxelo, Ataque Escampe revela tamén información sobre o LP Cabalgata,  con cancións producidas polo Hevi e que estará dispoñible a finais de abril

O Ataque Escampe publicará mañá, venres 31 de marzo, Cabaliño lento, novo adianto do seu álbum Cabalgata, o que será o oitavo traballo de estudio de Ataque Escampe e que estará dispoñible a finais de abril. O tema, producido polo Hevi, acompañarase dun vídeo dirixido por David Silva. 

O imaxinario dos cabalos é rico e variado ao longo da historia da arte. Cadros, filmes e cancións teñen xogado con el, levándonos da épica dos westerns ou os retratos ecuestres á realidade do traballo agrario ou a maxia festiva que na infancia nos traen os carruseis e as cabalgatas de Reis. No seu novo sinxelo,Cabaliño lento, Ataque Escampe entra nesta tradición á súa maneira, presentando unha canción delicada, construída sobre texturas electrónicas, na que o cabalo é parte do relato dunha despedida incerta. En troques de épica ou maxia, amosa unha vulnerabilidade tranquila que aparece (igual que as imaxes de cabalos) a miúdo en Cabalgata, o álbum da banda para o que Cabaliño lento serve de terceiro adianto.

Despois do achegamento á música disco de Lamborghini e o synth-funk de Viaxamos a Miami, con este tema Ataque Escampe continúa achegándose a diferentes estilos sen abandonar unha perspectiva pop. EnCabaliño lento a voz achégase ao estilo da canción melódica pero o dominio dos sintetizadores pode levar a banda a un terreo próximo ao dream pop de Beach House, tamén pola repetición minimalista dunha base de caixa de ritmos e baixo que remite tanto a Gorillaz como, na súa estrutura, a algunhas danzas do barroco. A letra, con todo, vai nunha liña diferente á das referencias musicais (e novidosa para Ataque Escampe), utilizando o imaxinario medieval dunha maneira ambigua para afondar con tenrura e serenidade nos momentos, cousas e persoas queridas que quizais quedaron xa atrás no tempo.

Ao igual que nos últimos sinxelos da banda, Cabaliño Lento acompáñase dun vídeo dirixido por David Silva, que nesta ocasión entra tamén no imaxinario hípico desde unha perspectiva pouco común. Ao estilo dos retratos dos ‘screen tests’ de Andy Warhol, o director ralentiza a imaxe nun sutil zoom cara atrás para chamar a atención sobre os mínimos xestos do grupo e de Cacique, o cabalo que os acompaña. Desde a premisa sinxela dun único plano frontal, o clip combina a estrañeza de presentar a Ataque Escampe nun retrato ecuestre coa naturalidade que se impón a través dos pequenos azares incontrolables que a cámara rexistra. O vídeo estará dispoñible desde as 00.00 horas deste venres 31 na súa canle de Youtube. 

20230330-NP-Cabalino-lento-de-Ataque-Escampe