A montaxe escrita por Esther F. Carrodeguas e dirixida por Andrés Lima chega este sábado a Carballo en estrea en Galicia, xunto a outras interesantes propostas como Cosas pequeñas, de PSiRC, e Doce metros cuadrados de piel, de La Rueda Teatro Social
Do mércores 14 ao domingo 18, o FIOT ofrecerá teatro, creación experimental, micro-escenas, propostas para a mocidade e o público familiar, ademais dunha homenaxe a Manuel Lourenzo e actividades de encontro coa comunidade
No marco das Residencias Paraíso de RPM, este xoves 15 de outubro, ás 20.00h, no Pazo da Cultura, con acceso libre, chegará o ‘work in progress’ Asoballada por fentos, do artista e investigador galego Álvaro Corral Cid, unha revisión crítica da memoria folclórica
O X Certame de Micro-Escenas M² continúa este sábado 17 con novas propostas de microteatro en espazos non convencionais, mentres que o FIOTeen ofrecerá este mércores 14 unha función escolar do multipremiado espectáculo Caballito de mar
No marco das actividades paralelas do festival, o sábado 17 o FIOT festexará unha sentida homenaxe a unha figura fundamental do teatro galego, coa inauguración dunha exposición e unha conversa Arredor de Manuel Lourenzo. A pegada que continúa
Todos os detalles desta 35ª edición do FIOT poden consultarse na páxina web do festival, www.fiot.gal, mentres que as entradas para as diferentes liñas da programación aínda dispoñibles poden adquirise a través de Ataquilla.com
O Festival Internacional Outono de Teatro de Carballo, o FIOT, afronta a súa cuarta semana de programación cunha axenda que, do mércores 14 ao domingo 18 de outubro, volverá reunir en Galicia destacadas propostas da escena contemporánea, creación emerxente e actividades para públicos de diferentes idades. Un dos grandes momentos chegará este sábado coa representación de Libres!!!, unha montaxe escrita por Esther F. Carrodeguas, dirixida polo Premio Nacional de Teatro Andrés Lima e protagonizada por Alba Flores, que se poderá ver por primeira vez en Galicia da man do FIOT.
A semana contará tamén coa estrea en Galicia de Cosas pequeñas, de PSiRC, unha proposta multidisciplinar que combina circo contemporáneo, teatro de obxectos e poesía visual; e con Doce metros cuadrados de piel, de La Rueda Teatro Social, unha interesante creación de teatro comunitario e interxeracional arredor dos corpos, os afectos e a sexualidade. O programa complétase con novas propostas do OTNI, o FIOTeen, o Certame de Micro-Escenas M² e o FIOT en Ruta, ademais dos obradoiros en paralelo e unha homenaxe a Manuel Lourenzo.
O FIOT35 continúa así cunha resposta moi positiva do público, que xa desde os inicios do festival agotara máis do 90% do aforo dispoñible para as súas propostas escénicas e de mediación nesta 35ª edición. O FIOT quere agradecer a confianza e a fidelidade das persoas espectadoras que, desde finais de setembro, están a acompañar esta nova entrega do ‘corazón do teatro en Galicia’ e a contribuír a converter Carballo nun punto de encontro arredor das artes escénicas.
ALBA FLORES PROTAGONIZA UNHA REIVINDICACIÓN DA UTOPÍA E DA LIBERDADE
O sábado 17 de outubro, ás 20.00 horas, no Auditorio do Pazo da Cultura, o Programa de Sala recibirá Libres!!!, de Teatro del Barrio e do Comisionado para a Celebración dos 50 anos de España en Liberdade, unha montaxe que chega a Galicia por primeira vez.
A obra recupera a memoria de Mujeres Libres, a organización anarcosindicalista que, durante a Guerra Civil, defendeu a emancipación feminina, o antifascismo e a revolución social. Nun presente saturado de discursos de colapso e distopía, a dramaturga galega Esther F. Carrodeguas reivindica a potencia da utopía alegre e trae ao escenario a aquelas mulleres ousadas e rebeldes que desafiaron as normas e loitaron pola liberdade e a igualdade.
Con dirección do Premio Nacional de Teatro Andrés Lima e coa actriz Alba Flores á fronte do elenco, a proposta constrúe un cabaré anarcosicalíptico no que se mesturan humor corrosivo, música e cancións para recuperar a memoria dunha loita colectiva e preguntarse que queda hoxe daquela rebeldía, daquela alegría de vivir e daquela vontade de cambiar o mundo.
Xunto a Alba Flores, forman parte do reparto Laura Galán, Nüll García e Eva Valdelomar. Libres!!! conecta así coa liña temática do #FIOT35, que baixo o lema «Cando todo cae, ven ao teatro» propón mirar o colapso non só como unha caída, senón tamén como unha oportunidade para imaxinar outras realidades e transformar o presente.
O OTNI ACHEGA ‘ASOBALLADA POR FENTOS’, DA MAN DO COLETIVO RPM
O xoves 15 de outubro, ás 20.00 horas, no Pazo da Cultura, o ciclo OTNI presentará o ‘work in progress’ Asoballada por fentos, no marco das residencias Paraíso de RPM, do artista e investigador galego Álvaro Corral Cid, unha mostra aberta do proxecto desenvolvido durante a súa residencia artística en Carballo.
A proposta, situada entre o concerto e a conferencia performativa, combina arquivo e performance co acompañamento musical de Gabi Reboredo para convidar o público a revisar os materiais da memoria folclórica galega e os arquetipos construídos arredor da identidade cultural. A través de elementos como as muiñeiras, os bordados ou os noticiarios cinematográficos, Corral Cid investiga a instrumentalización das músicas, as danzas e o folclore durante o franquismo e a súa proxección nos modos contemporáneos de reproducir culturas enxebres.
Asoballada por fentos representa o espírito do OTNI, unha das liñas máis singulares do FIOT, dedicada a propostas que exploran os límites da creación escénica e que permiten ao público achegarse a procesos artísticos en desenvolvemento. A entrada é gratuíta.
‘COSAS PEQUEÑAS’, CIRCO CONTEMPORÁNEO E POESÍA VISUAL NO OTNI
O venres 16 de outubro, ás 21.00 horas, no Pazo da Cultura, será a quenda de Cosas pequeñas, de PSiRC, unha proposta que chega por primeira vez a Galicia e que combina circo contemporáneo, teatro, teatro de obxectos, microcine e poesía visual.
Nun soto cheo de pantallas e cámaras ocultas, un home de corenta e tantos anos, cámara fracasado e malabarista líquido, observa o mundo a través das súas lentes dixitais e analóxicas. Ante o avance das máquinas e o poder dos algoritmos, propón unha reinvención e unha nova maneira de mirar. A pregunta que atravesa a peza é tamén unha das grandes cuestións do noso tempo: mentres as máquinas aprenden a pensar, que nos fai verdadeiramente humanos?
Interpretada por Adrià Montaña, a montaxe constrúe un universo íntimo e inquietante que combina movemento, humor delicado e experimentación visual. PSiRC conta cunha sólida traxectoria no circo contemporáneo, con espectáculos premiados e xiras por Europa e América.
O X CERTAME M² CONTINÚA CON ‘FOGAR’ E ‘A CASA DO AVÓ’
O sábado 17 de outubro, o FIOT volverá levar as artes escénicas a espazos cotiáns de Carballo coa segunda xornada do X Certame de Micro-Escenas M², unha iniciativa pioneira en Galicia que aposta polos formatos de pequeno tamaño, a experimentación e a proximidade entre artistas e espectadores. Entre as 12.00, 13.00, 17.30 e 18.30 horas, poderán verse dúas novas pezas finalistas, ambas en estrea absoluta.
No Xardín Rosalía de Castro, a compañía La Tercera presentará Fogar, unha creación colectiva que parte da historia de Claudia, unha muller farta da cidade que decide mudarse ao campo. Alí atópase con personaxes e situacións inesperadas que lle permiten cuestionar os prexuízos e estereotipos asociados ao choque entre o rural e o urbano. A través da comedia, as máscaras e o teatro físico, a compañía propón mirar os demais desde unha perspectiva diferente.
Na tenda de segunda man Buy & Sell, Candil Teatro presentará A casa do avó, de Jimmy Núñez. A peza parte da venda dos obxectos dunha casa familiar tras o falecemento do avó para reconstruír a historia dunha familia rota por unha herdanza e dun home que trata de comprender o pasado mentres carga co peso das lembranzas. A través dos obxectos que atopan —ou non— un novo dono, a montaxe convida a reflexionar sobre a memoria, o consumo e as vivencias que permanecen nos bens aos que damos unha segunda vida.
O Certame M² reafirma así a aposta do FIOT pola creación emerxente e polas experiencias teatrais inmersivas, que sitúan o público a poucos metros da escena e transforman os espazos habituais da vila en lugares para a ficción.
UNHA HOMENAXE A MANUEL LOURENZO E A PEGADA QUE CONTINÚA
O sábado 17 de outubro, ás 17.00 horas, no vestíbulo do andar 0 do Pazo da Cultura, inaugurarase a exposición Manuel Lourenzo. A pegada que continúa, unha homenaxe a unha figura fundamental do teatro galego.
A mostra enmárcase nas actividades paralelas do FIOT e súmase ao recoñecemento da traxectoria dun dramaturgo, actor e director cunha profunda pegada na creación escénica e na cultura galega. A exposición poderá visitarse durante os días de programación, xunto á mostra Zoom FIOT 2025, que continúa aberta de 17.00 a 21.00 horas.
‘CABALLITO DE MAR’, SOBRE A DIVERSIDADE, OS AFECTOS E A LIBERDADE DE SER
O mércores 14 de outubro, ás 11.00 horas, no Auditorio do Pazo da Cultura, o FIOTeen ofrecerá unha función escolar de Caballito de mar, de Flyhard Produccions, unha proposta que aborda a diversidade, os afectos e a liberdade de ser.
Martí ten vinte anos e iniciou a súa transición hai un ano, cando comezou a tomar testosterona para modificar o seu corpo. A súa vida dá un xiro inesperado cando descobre que está embarazado. Mentres toma unha decisión, reflexiona sobre o seu corpo, a súa transición e os códigos de xénero establecidos.
Escrito por Pau Coya e dirixido por Rebeca del Fresno, este monólogo interpretado por Marc Torres vai máis alá do embarazo adolescente non desexado e da visibilidade das identidades non cisheteronormativas para converterse nunha celebración de todos os corpos. Ao remate da función haberá un encontro coa compañía, unha oportunidade para afondar nas cuestións que suscita a obra e favorecer o diálogo co público mozo.
‘AS AVENTURAS DE NABIZA GIRL’ E ‘DOCE METROS CUADRADOS DE PIEL’, TAMÉN NO FIOT
O domingo 18 de outubro concentrará dúas propostas que, desde linguaxes moi diferentes, convidan a cuestionar os modelos sociais e a mirar o mundo desde outras perspectivas.
Ás 18.00 horas, no Centro Social de Verdillo, o FIOT en Ruta recibirá As aventuras de Nabiza Girl: O estraño caso da cultura minguante, de Isabel Risco. A superheroína galega regresa acompañada do seu inseparable Don Galizo para enfrontarse a unha nova misión: salvar a cultura. Interpretada por Isabel Risco e Alberte Bello e dirixida por Fran Rei, a proposta mergulla o público nunha sucesión de situacións disparatadas nas que o humor, a retranca e a sátira serven para reivindicar o feminismo, a lingua e o medio ambiente. Unha comedia irreverente que confirma o regreso dunha das heroínas máis singulares do teatro galego.
Xa ás 20.00 horas, no Auditorio do Pazo da Cultura, será a quenda de Doce metros cuadrados de piel, de La Rueda Teatro Social, unha montaxe que chega por primeira vez a Galicia e que explora os misterios do corpo, o desexo, a sexualidade e a identidade ao longo das distintas etapas da vida.
Seis persoas, tres novas e tres maiores, comparten historias, humor, praceres, cicatrices e experiencias para reflexionar sobre como habitamos os nosos corpos e como cambian os afectos co paso das décadas.
A proposta nace do proxecto de mediación e creación interxeracional Morderse la lengua, arredor da sexualidade, e conta coa participación de persoas de diferentes idades. A función en Carballo incorpora así o traballo desenvolvido coa comunidade, nunha experiencia escénica que busca abrir espazos de diálogo sobre cuestións que atravesan todas as xeracións.
MÁIS DO 90 % DAS ENTRADAS XA ESGOTADAS DESDE PRINCIPIOS DE OUTUBRO
O FIOT quere agradecer a grandísima resposta e a fidelidade do público, que está a acompañar o festival desde o inicio desta 35ª edición e que confirma, un ano máis, a súa vinculación coas artes escénicas e co proxecto cultural de Carballo.
A 8 de outubro, o festival tiña postas á venda 5.479 entradas correspondentes a 28 dos 43 espectáculos programados. Nese momento soamente quedaban dispoñibles 516 entradas, o 9,42 % do total, un indicador da boa acollida que está a ter a programación, con máis do 90% do aforo xa esgotado cando aínda restaban catro semanas de programa. Cabe mencionar que parte da programación conta con acceso gratuíto ou libre, polo que non está incluída neste cómputo de entradas.
O FIOT quere lembrar, tamén, que, aínda que as entradas estean esgotadas, en practicamente todos os espectáculos poden aparecer algunhas localidades adicionais na billeteira do Pazo da Cultura, aberta 90 minutos antes do inicio da función. Trátase dun número moi reducido de entradas procedentes de reservas de protocolo anuladas pola compañía, de abonados que comunican que non poderán asistir ou de butacas reservadas para persoas con discapacidade que finalmente non foron adquiridas e poden volver poñerse á disposición do público. Por iso, o festival anima as persoas interesadas a consultar a dispoñibilidade de cada espectáculo e, cando corresponda, achegarse á billeteira antes da función.
Máis aló da dispoñibilidade de entradas, o FIOT inclúe propostas con entrada gratuíta ou libre, entre elas as seis pezas do Certame Micro-Escenas M², as actividades do FIOTeen e o work in progress de Álvaro Corral Cid, así como as catro propostas de Teatro de Rúa e outras actividades puntuais. Deste xeito, o festival continúa ofrecendo diferentes vías de acceso á creación escénica e de participación na vida cultural da vila.
UNHA COIDADA SELECCIÓN CO MELLOR DA ESCENA ACTUAL EN CARBALLO
“Cando todo cae, ven ao teatro”. Baixo este lema, chega unha nova entrega do FIOT, o Festival Internacional Outono de Teatro de Carballo, que celebra a súa 35ª edición do 23 de setembro ao 31 de outubro de 2026. Un ano máis, o festival busca reunir o mellor da escena actual en Carballo ao longo de cinco semanas, nun cartel ecléctico no que hai Programa de Sala, OTNI, Rúa dos Contos, Teatro de Rúa, FIOT en Ruta, FIOTeen, FIOTiño e Micro-escenas M2.
No rpograma da 35ª edición do Festival Internacional Outono de Teatro de Carballo danse cita nomes imprescindibles da escena galega, española e internacional, como Alba Flores, Alberto Velasco, almealera, Andrés Lima, Carles Sans (fundador de Tricicle), Chévere, a Companhia do Chapitô, Delphine de Vigan, Esther Carrodeguas, Gloria Muñoz, Juan Carlos Fisher, Lúa Mosquetera, María Velasco, Mofa e Befa, Rafael Álvarez, El Brujo, Spinish Circo, Titzina e moitas máis figuras que merece a pena revisitar ou descubrir.
En total, ‘o corazón do teatro en Galicia’ achegará a todos os públicos 43 espectáculos, 8 estreas absolutas, 9 estreas en Galicia, procedentes de dous países (España e Portugal) e 8 comunidades autónomas (Andalucía, Aragón, Cataluña, Comunidade Valenciana, Comunidade de Madrid, Castela León, Galicia e Illas Baleares).
Á cita con esta nova entrega do FIOT non faltarán tampouco coproducións, residencias artísticas e máis dunha vintena de actividades de mediación de públicos e apoio á creación teatral, como a exposición ZoomFIOT, presentación de libros e coproducións, gravación en directo dos podcasts do OndaFIOT, os Café con…, un homenaxe a Manuel Lorenzo, lecturas dramatizadas, encontros co público ao rematar a función, a colaboración coa Noite Europea das Persoas Investigadoras, o Premio do Público, o Certame de Teatro Lido ou a entrega do galardón Xograr de Outono a Antonio Porteiro.
Toda a información de horas e venda de entradas está dispoñible na web do festival en www.fiot.gal. O FIOT – Festival Internacional Outono de Teatro está organizado pola Asociación Telón e Aparte eo Concello de Carballo, co patrocinio da Xunta de Galicia, a Deputación da Coruña, o Ministerio de Cultura e a Fundación Luís Calvo Sanz. Un ano máis, conta tamén coa colaboración da Libraría Brañas, Camiño Escena Norte, o Colectivo RPM e o CCA Carballo.
SOBRE O FIOT: 35 ANOS CREANDO TEATRO
O Festival Internacional Outono de Teatro (FIOT) é un festival que ofrece un programa comprometido coas artes escénicas e cos proxectos máis prestixiosos do teatro actual. Está organizado pola Asociación Cultural Telón e Aparte e conta coa colaboración do Concello de Carballo. Pola súa traxectoria, a calidade da programación, a variedade das propostas de intermediación cultural que ofrece e pola súa proxección, o FIOT sitúase como un dos festivais máis importantes de Galicia e referente cultural durante o outono: un mes completo de programación, con preto de 40 espectáculos e ducias de actividades paralelas, converten a Carballo na capital das artes escénicas da comunidade galega.
Desde hai 35 anos, o FIOT dá a coñecer en Carballo o traballo de compañías de referencia e de creadoras emerxentes. Mais, especialmente, busca atraer novos públicos ao teatro. O festival nace en 1992 como espazo para ofrecer unha programación de teatro de calidade na comarca de Bergantiños e impulsar unha estrutura creativa arredor das artes escénicas na zona.
Desde entón, FIOT é o lugar de encontro entre artistas, compañías e programadoras, e aposta por estimular a creación e o traballo en rede tanto a través da oferta de espazos para residencias artísticas como da implicación, do propio festival, na produción e novos espectáculos, fundamentalmente de compañías galegas.
Nas súas pasadas 34 edicións, FIOT contou coa participación das compañías máis relevantes de Galicia e España, ademais do ámbito internacional, outorgando así espazo a numerosas disciplinas, novas linguaxes, xéneros e formatos; ademais de ofrecer estreas absolutas ou no territorio galego. Desde xeito, máis de 360 formacións e artistas presentaron os seus traballos no FIOT, con nomes tan salientables no marco do panorama escénico galego, nacional e internacional coma Blanca Portillo, Pablo Messiez, Rafael Álvarez, El Brujo, Yllana, Ron Lalá, Pont Flotant, Titzina, Kamikaze Producciones, Compañía do Chapitô, Leo Bassi, Chévere, Timbre 4, Mofa e Befa, Xosé A. Touriñán, Quico Cadaval, Pablo Remón, Andrés Lima…
Ao longo da súa traxectoria, diversos recoñecementos acreditaron o intenso traballo do FIOT para achegar as artes escénicas do século XXI á cidadanía e recoñeceron o festival como unha das iniciativas teatrais do noroeste peninsular máis relevantes na actualidade. Entre outras distincións cítanse, ademais da ‘Insignia Cultural’ do ‘Observatorio de la Cultura’ da Fundación Contemporánea como mellor proxecto cultural de Galicia en 2022, o Premio da Cultura Galega 2018 no ámbito das artes escénicas outorgado pola Xunta de Galicia ou o Premio Galego do Ano 2018, entre outros.
A compañía asturiana Saltantes Teatro porá en escena este sábado 17 no Auditorio Gustavo Freire La balada del norte, baseada na aclamada novela gráfica de Alfonso Zapico
Oito intérpretes dan vida a máis dun cento de personaxes nunha montaxe con música en directo sobre a memoria histórica e o conflito social das concas mineiras
O circuíto de intercambio cultural a través das artes escénicas Camiño Escena Norte (CEN) regresa na súa oitava edición á cidade de Lugo. Este sábado 17 de outubro, o Auditorio Municipal Gustavo Freire acollerá, ás 20.30 horas, a representación de La balada del norte, da compañía asturiana Saltantes Teatro.
Adaptada e dirixida por Luis Alija a partir dos catro tomos da novela gráfica de Alfonso Zapico (Premio Nacional do Cómic 2012 por Dublinés), a obra traslada ao escenario unha epopea coral sobre a Revolución de outubro de 1934 nas concas mineiras asturianas. Oito intérpretes encarnan máis de cen personaxes e percorren máis de cincuenta localizacións grazas a unha escenografía de módulos móbiles. A música en directo, a cargo de David Varela, e un espazo sonoro xerado case na súa totalidade en escena polo propio elenco envolven unha montaxe de 120 minutos que aborda o conflito social, o amor, a perda e a memoria colectiva a través do destino cruzado dos seus protagonistas.
As entradas para asistir á función do sábado 17 en Lugo están á venda a través de www.entradaslugo.es (ao día seguinte, a obra poderase ver no Salón Teatro de Santiago de Compostela). A presenza de Camiño Escena Norte na provincia completarase odomingo 25 de outubro no Auditorio Hernán Naval de Ribadeo co espectáculo de ilusionismo 3 Elementos, da compañía navarra Hodei.
Sinopse La balada del norte
La balada del norte recrea os tempos convulsos de grandes desigualdades da Revolución asturiana do 34. O protagonista, Tristán Valdivia, un xornalista sen xornal, abandona Madrid en 1933 para regresar ao norte, onde o espera o seu pai, o marqués de Montecorvo. En medio do ruído das minas de carbón e da negrura dos vales asturianos, xorden personaxes luminosos mentres os vellos e os novos tempos chocan frontalmente. Coa folga xeral revolucionaria, a dinamita mineira, o fracaso da Revolución e a posterior represión, Tristán une o seu destino ao dos perdedores da Historia. A montaxe retrata a fuxida polas montañas de Asturias nun frío inverno de derrota, nunha historia que evoca a casa en ruínas e o fogar baleirado pola Guerra Civil española de 1936.
Saltantes Teatro
Saltantes Teatro naceu en 2013 da man de Luis Alija e Nerea Vázquez, ambos licenciados en Arte Dramático pola ESAD de Asturias. En máis dunha década levou aos escenarios máis dunha ducia de producións de estilos moi diversos, do teatro familiar ao musical, o terror psicolóxico ou o teatro histórico. Entre os seus últimos traballos figuran Misery (Premio Oh! 2023 á mellor produción), El Gorrumbu (Premiu Nel Amaro 2023) e El Chigre Menguante (Premios Oh! 2024 á mellor escenografía e á mellor autoría). Con La balada del norte continúa a liña dos seus últimos espectáculos arredor da identidade do norte peninsular.
Camiño Escena Norte
CEN é unha iniciativa promovida polas propias asociacións profesionais de produtoras de artes escénicas Escena Galega (Galicia), EscenAsturias (Asturias), ACEPAE (Cantabria), Escena (Euskadi), ESNA (Navarra) e AEscena (A Rioxa). O programa mostra, desde a súa creación, parte da mellor produción escénica profesional dos seis territorios, con múltiples linguaxes, disciplinas e propostas estéticas que abranguen teatro, monicreques, ilusionismo, danza e artes do movemento e circo contemporáneo.
Camiño Escena Norte conta co apoio económico da Xunta de Galicia, a través da Axencia Galega das Industrias Culturais (Agadic) e da Deputación de Lugo; xunto ao Gobierno del Principado de Asturias, Gobierno de Cantabria e Gobierno Vasco; as deputacións forais de Araba, Bizkaia e Gipuzkoa; o Gobierno de Navarra, o Gobierno de La Rioja e o Ministerio de Cultura. Vegalsa-Eroski mantense como patrocinador oficial.
AXENDA DE CAMIÑO ESCENA NORTE EN LUGO
17.10.2026, 20:30 h | Lugo. Auditorio Municipal Gustavo Freire
La balada del norte, de Saltantes Teatro (Asturias)
Teatro · Público adulto (a partir de 16 anos) · 120 minutos
Teatro de Ningures estreará o vindeiro 15 de outubro o novo espectáculo TELMA & LOLA no Teatro Principal de Ourense dentro do Festival Internacional de Teatro de Ourense (FITO), para despois continuar en Cangas o día 17 no Auditorio Municipal X. M. Pazos Varela, no Auditorio Municipal de Vigo o venres 23 e en Moaña o 30 de outubro.
De Manuel María a Begoña Caamaño é o título do concerto que Uxía, acompañada por Santi Cribeiro (acordeón) e Sérgio Tannus (guitarra), dará este sábado, 17 de outubro, ás 20 horas, na Casa-Museo Manuel María.
Interpretarán pezas do traballo musical sobre poemas de Manuel María realizado, en 2012, por Uxía, e cancións do último traballo de esta, en homenaxe a Begoña Caamaño, “Indómitas (nove ondas a Begoña Caamaño)” (2026).
Uxía fará este mesmo concerto o día 16 de outubro, venres, ás 20 horas, no novo Espazo Cultural Manuel María (rúa do Socorro, 30 A Coruña). Se estades interesados en asistir ao da Coruña comentarvos que debedes reservar en espazocultural@manuelmaria.gal ou no whatsapp 641027032.
O Instituto de Estudos Chairegos, coa colaboración do Concello de Vilalba, organiza a presentación do libro CANTOS DE DOR E LIBERDADE. Voces galegas por Palestina, que terá lugar o vindeiro venres 16 de outubro, ás 19:00 h., na Biblioteca Municipal AGUSTÍN FERNÁNDEZ PAZ. No acto poderemos escoitar algúns dos poemas na voz das súas autoras.
*Na nota informativa achegada polo IESCHA hai que mudar o lugar de presentación do libro, e onde di Casa da Cultura de Vilaba, debe aparecer escrito Biblioteca Municipal AGUSTÍN FERNÁNDEZ PAZ.
A compañía portuguesa regresa este venres a Carballo cunha particular revisión cómica da epopea de Homero, mentres Gloria Muñoz protagoniza o sábado a estrea en Galicia de ‘Las gratitudes’, de Delphine de Vigan, dirixida por Juan Carlos Fisher
Do 8 ao 12 de outubro, a 35ª edición do FIOT ofrece propostas para públicos de todas as idades, desde o circo de ‘Domte’ ata o teatro documental de ‘Vidas enterradas’ e o OTNI ‘Yo nací en un surco de judías’, de almealera, Premio Fetén 2026 ao mellor espectáculo
Dani Blanco –que ven de gañar o premio a o mellor espectáculo de rúa pola peza ‘Crunch2!’, da Compañía MUU, nos Premios Manu Lago de Novo Circo Galego celebrados onte– e a súa compañía asSircópatas presentan a estrea absoluta de ‘Oh! Onde deterse a mirar’, o luns 12, ás 18.00 horas, no Pazo da Cultura, para toda a familia
O X Certame de Micro-Escenas M² estrea o sábado 10 as súas primeiras pezas deste ano, mentres que a Rúa dos Contos suma novas propostas de humor e improvisación
Todos os detalles desta 35ª edición do FIOT poden consultarse na páxina web do festival, www.fiot.gal, mentres que as entradas para as diferentes liñas da programación aínda dispoñibles poden adquirise a través de Ataquilla.com
O Festival Internacional Outono de Teatro de Carballo, o FIOT, entra na súa terceira semana de programación cunha axenda que, do xoves 8 ao luns 12 de outubro, volverá levar as artes escénicas a diferentes espazos de Carballo e tamén ás parroquias. A programación estará marcada por dúas grandes citas do Programa de Sala: o regreso da portuguesa Companhia do Chapitô, este venres 9, coa súa particular e hilarante revisión da Odisea, e a estrea en Galicia de Las gratitudes, o sábado 10, adaptación do fenómeno literario de Dephine de Vigan, con Gloria Muñoz como protagonista e dirección de Juan Carlos Fisher.
A semana ofrecerá tamén OTNI, Teatro de Rúa, Rúa dos Contos, Micro-Escenas M2, FIOTiño e FIOTeen, con circo contemporáneo, narración oral, teatro documental, creación experimental e propostas para os públicos máis novos. Entre elas, destacan Domte, de Nacho Flores; Vidas enterradas, de L’Om Imprebís, Micomicón Teatro, Teatro Corsario e Teatro del Temple; Yo nací en un surco de judías, de almealera, premio Fetén 2026 ao mellor espectáculo ; e a estrea absoluta ‘Oh! Onde deterse a mirar’, de AsSircópatas, con Dani Blanco, que terá unha función escolar no FIOTeen e outra aberta ao público no FIOTiño.
Tampouco faltarán á cita as primeiras pezas curtas do X Certame de Micro-Escenas M², un taller-laboratorio con Torta Torta e as últimas propostas da Rúa dos Contos (Pequenos pero faltón, El famoso Trino,O show e DJ Maikel), nunha semana especialmente intensa que permitirá comprobar unha vez máis a diversidade de formatos, linguaxes e públicos que caracterizan o #FIOT35.
CHAPITÔ REGRESA AO FIOT COA SÚA PARTICULAR ‘ODISEA’
O venres 9 de outubro, ás 21.00 horas no Auditorio do Pazo da Cultura, a Companhia do Chapitô regresará ao FIOT para presentar Odisea, unha revisión libre, artesanal e profundamente cómica do clásico de Homero.
Todo comeza no Olimpo, nesa familia disfuncional de deuses que pon en marcha unha sucesión de aventuras, naufraxios e malentendidos arredor de Odiseo, o heroe máis cansado da mitoloxía grega. Monstros, deuses de mal xenio, astucia, teimosía e resistencia danse cita nunha viaxe na que a épica queda sometida ao particular universo da compañía portuguesa.
A Companhia do Chapitô, un dos grandes referentes do teatro portugués contemporáneo, desmonta a solemnidade do mito e constrúe unha Odisea baseada no xogo teatral, a comedia de equívocos, a mitoloxía e o absurdo. A peza está interpretada por Jorge Cruz, Pedro Diogo e Pedro da Silva e dirixida por José C. García. A troupe mantén así a súa relación co FIOT, onde xa presentou outras das súas particulares revisións dos grandes clásicos da literatura e do teatro.
GLORIA MUÑOZ PROTAGONIZA ‘LAS GRATITUDES’, ESTREA EN GALICIA
O sábado 10 de outubro, ás 20.00 horas, no Auditorio do Pazo da Cultura, chegará unha das grandes citas do Programa de Sala desta semana: Las gratitudes, de Producciones Teatrales Contemporáneas, en estrea en Galicia.
A obra parte da aclamada novela de Delphine de Vigan para construír unha historia sobre a memoria, os coidados, a vellez e esas palabras de gratitude que ás veces quedan sen dicir. Michka, unha muller maior que ve como a afasia vai apagando lentamente a súa voz, ingresa nunha clínica onde un logopeda traballará con ela mentres Marie, vinculada afectivamente á protagonista, tenta acompañala nese proceso.
A través da relación entre Michka, Marie e Jérôme, a proposta aborda con delicadeza a perda da linguaxe, a memoria e a necesidade de expresar o que sentimos antes de que o esquecemento ou o paso do tempo nos impidan facelo. A montaxe está protagonizada por Gloria Muñoz, Macarena Sanz e Rómulo Assereto e conta coa dirección do peruano Juan Carlos Fisher, un dos directores máis recoñecidos da escena contemporánea latinoamericana.
Las gratitudes chega ao FIOT como estrea en Galicia e reafirma a aposta do festival por combinar grandes nomes da escena con textos contemporáneos e propostas de referencia internacional.
‘DOMTE’: CIRCO, EQUILIBRIO E POESÍA NO PARQUE DO ANLLÓNS
Antes da función de Chapitô, o venres 9, ás 19.30 horas, o Parque do Anllóns converterase nun gran escenario de circo contemporáneo coa proposta Domte, de Nacho Flores.
Quen doma a quen? Esta é a pregunta que atravesa unha creación na que troncos e táboas van construíndo pouco a pouco un enorme ser en equilibrio, unha escultura viva que desafía a física e a mirada do público.
Inspirada nun imaxinario mitolóxico, a peza acompaña a transformación dun protagonista obsesionado con controlar todo o que o rodea e que acaba descubrindo que a verdadeira forza nace do equilibrio compartido. A música en directo e a colaboración do público no movemento das estruturas forman parte dunha proposta que viaxa entre minotauros, cabalos de Troia, quimeras e liberdade.
Creado e interpretado por Nacho Flores, Domte combina escultura, equilibrio, teatro físico e circo contemporáneo para crear unha peza visual, poética e cómica, tan delicada como espectacular, que reivindica a colaboración fronte á dominación individual.
O X CERTAME M² ESTREA AS SÚAS PRIMEIRAS MICRO-ESCENAS
O sábado 10 de outubro chegará tamén unha das citas máis singulares do FIOT: o X Certame de Micro-Escenas M², unha iniciativa pioneira en Galicia que leva o teatro a espazos cotiáns e non convencionais e sitúa o público a moi poucos metros dos intérpretes.
Entre as 12.00, 13.00, 17.30 e 18.30 horas, poderán verse dúas das pezas finalistas desta décima edición, ambas en estrea absoluta.
Na Conserxería do Pazo da Cultura, Iván Dávila presentará wOHrk, unha peza de clown e humor absurdo que parte da historia dun conserxe que recibe candidatos que buscan emprego e, tamén, un lugar onde vivir. A creación mergúllase na precariedade e nas fronteiras cada vez máis difusas entre a vida e o traballo.
Na Pastelaría Zuccaro, a Compañía Humana presentará A vinganza contra o Dr. Tirarrollas, unha peza de teatro de obxectos na que un doutor convertido en sacarrollas, unha protagonista que é un queixo de tetilla e unha nai-cigarro se rebelan contra os estereotipos de xénero e a discriminación das mulleres na sanidade.
As seis pezas finalistas do X Certame M² —cinco delas estreas absolutas— foron seleccionadas entre 25 propostas recibidas. O certame mantén o seu carácter de laboratorio para experimentar con novos formatos, linguaxes e relacións entre espazo, artistas e espectadores.
A RÚA DOS CONTOS DESPÍDESE ENTRE A NOVA RETRANCA E O HUMOR
A Rúa dos Contos terá dúas novas citas esta semana. O xoves 8, ás 21.00 horas no Valle Inclán Café, Adrián do Regenco e Pablo Alvite presentarán Pequenos pero faltóns, unha hora de humor na que os dous intérpretes e creadores combinan monólogos, improvisación e interacción co público. A infancia dos anos 90, a tecnoloxía, as tradicións, as relacións persoais e as pequenas contradicións da vida cotiá son algúns dos temas que percorre esta proposta da nova retranca galega.
O sábado 10, ás 23.00 horas na Bombonera, chegará El Famoso Trino, en estrea en Galicia. O fenómeno viral das falsas noticias cargadas de humor, retranca e sátira salta aos escenarios da man de Trino García, que recupera os personaxes e situacións máis coñecidos dos seus vídeos para construír un espectáculo de monólogos, sketches e improvisación.
E o domingo 11, ás 22.30 horas en A Reserva, será a quenda de O show, de Fábrica de Impro, unha proposta na que nada está escrito. As palabras e ideas que o público introduce en tarxetas convértense no punto de partida de historias que nacen e medran sobre o escenario sen guión nin rede de seguridade. Cada función é, polo tanto, irrepetible.
A noite continuará ás 00.00 horas con DJ Maikel, tamén en A Reserva, prolongando a programación da Rúa dos Contos máis alá do escenario.
FIOT EN RUTA: TEATRO DOCUMENTAL PARA RECUPERAR MEMORIAS SILENCIADAS
O domingo 11 de outubro, ás 12.30 horas, o FIOT en Ruta achegarase á contorna do cemiterio de Bértoa con Vidas enterradas, unha coprodución de L’Om Imprebís, Micomicón Teatro, Teatro Corsario e Teatro del Temple. Fotografías, cartas, cadernos e recordos compartidos serven para devolver o nome e a historia a persoas asasinadas durante a Guerra Civil e o franquismo. Os seus fillos, veciños e compañeiros son os encargados de romper o silencio e rescatar unhas vidas que quedaron fóra da historia oficial.
A proposta nace dunha premiada serie radiofónica de Javier del Pino, Conchi Cejudo e Gervasio Sánchez para a Cadena SER e reúne a seis dramaturgos —Mafalda Bellido, Juan Mayorga, Juan José Millás, Alfonso Plou, Laila Ripoll e Pepe Viyuela— e catro compañías de referencia da escena española.
A través dun caleidoscopio de relatos e monólogos, ‘Vidas enterradas’ constrúe un profundo mapa emocional sobre a memoria e sobre un silencio que comeza a romper.
‘LUBBERT’, UN UNIVERSO SURREALISTA EN CANCES
O domingo continuará a programación do FIOT en Ruta. Ás 18.00 horas, no Centro Social de Cances, Inda Pereda presentará Lubbert, un espectáculo de teatro físico e comedia xestual inspirado no enigmático universo de O xardín das delicias, de El Bosco.
Lubbert Dash é presentado como o primeiro bosquexo dun ser humano na Terra, un personaxe inocente e disparatado ao que lle encanta explorar mundos imaxinarios no seu xardín. Desde aí, o público mergúllase nun universo de situacións absurdas, imaxes surrealistas e criaturas grotescas.
Clown, mimo, teatro físico e humor bufonesco mestúranse nun espectáculo visual que, entre gargalladas, convida tamén a mirar o medio ambiente que maltratamos e as contradicións da condición humana.
O OTNI ACHEGA A CARBALLO COA PREMIADA ‘YO NACÍ EN UN SURCO DE JUDÍAS’
O domingo 11, ás 20.00 horas no Pazo da Cultura, o OTNI presenta Yo nací en un surco de judías, de almealera, unha peza de teatro documental que pon no centro as voces de agricultoras e gandeiras e a relación coa terra.
A creadora Laura Santos percorreu 3.600 quilómetros para escoitar diferentes testemuños e transformar esas historias nunha peza sobre a agricultura, a gandería, a memoria e o futuro do mundo rural. Unha localizadora de cine que se fai labrega, unha nena que explica na escola como realiza a transhumancia na serra de Ávila, unha neorrural que se enfronta á burocracia da agricultura ecolóxica ou unha neta de campesiños que recupera uns bancais son algunhas das historias que compoñen o espectáculo.
Obxectos, ilustracións e relatos reais constrúen un universo poético arredor dunha pregunta: por que cada vez menos persoas queren traballar na agricultura e na gandería? O espectáculo nace do proxecto científico FARM, do CSIC, que investiga as causas da falta de relevo xeracional no sector e a súa relación co despoboamento, a masculinización e a sustentabilidade.
Yo nací en un surco de judías recibiu o Premio Fetén 2026 ao mellor espectáculo.
‘OH! ONDE DETERSE A MIRAR’, PARA O PÚBLICO MÁIS NOVO
A programación desta semana terá tamén unha importante presenza para os públicos máis novos coa proposta Oh! Onde deterse a mirar, de AsSircópatas.
O espectáculo poderá verse o xoves 8, ás 11.00 horas, nunha función escolar do FIOTeen, e regresará o luns 12, ás 18.00 horas no Auditorio do Pazo da Cultura, dentro do FIOTiño, para ofrecer unha función aberta ao público familiar.
A proposta de AsSircópatas forma parte das liñas específicas do FIOT dedicadas a achegar as artes escénicas aos públicos máis novos e combina circo e música nunha experiencia pensada para mirar, descubrir e conectar coa escena desde a infancia. O espectáculo figura no programa do festival tanto dentro do FIOTeen como do FIOTiño.
UNHA SEMANA TAMÉN PARA A CREACIÓN E O ENCONTRO
A programación desta terceira semana complétase o sábado 10 de outubro, de 10.00 a 13.00 horas no Pazo da Cultura, cun taller-laboratorio con Torta Torta, que se suma ás actividades de formación, creación e mediación que acompañan a programación escénica do festival.
Estas actividades forman parte da aposta do FIOT por ofrecer unha experiencia que vaia máis alá da exhibición dos espectáculos e por xerar espazos de encontro entre artistas, público e comunidade.
UNHA COIDADA SELECCIÓN CO MELLOR DA ESCENA ACTUAL EN CARBALLO
“Cando todo cae, ven ao teatro”. Baixo este lema, chega unha nova entrega do FIOT, o Festival Internacional Outono de Teatro de Carballo, que celebra a súa 35ª edición do 23 de setembro ao 31 de outubro de 2026. Un ano máis, o festival busca reunir o mellor da escena actual en Carballo ao longo de cinco semanas, nun cartel ecléctico no que hai Programa de Sala, OTNI, Rúa dos Contos, Teatro de Rúa, FIOT en Ruta, FIOTeen, FIOTiño e Micro-escenas M2.
No rpograma da 35ª edición do Festival Internacional Outono de Teatro de Carballo danse cita nomes imprescindibles da escena galega, española e internacional, como Alba Flores, Alberto Velasco, almealera, Andrés Lima, Carles Sans (fundador de Tricicle), Chévere, a Companhia do Chapitô, Delphine de Vigan, Esther Carrodeguas, Gloria Muñoz, Juan Carlos Fisher, Lúa Mosquetera, María Velasco, Mofa e Befa, Rafael Álvarez, El Brujo, Spinish Circo, Titzina e moitas máis figuras que merece a pena revisitar ou descubrir.
En total, ‘o corazón do teatro en Galicia’ achegará a todos os públicos 43 espectáculos, 8 estreas absolutas, 9 estreas en Galicia, procedentes de dous países (España e Portugal) e 8 comunidades autónomas (Andalucía, Aragón, Cataluña, Comunidade Valenciana, Comunidade de Madrid, Castela León, Galicia e Illas Baleares).
Á cita con esta nova entrega do FIOT non faltarán tampouco coproducións, residencias artísticas e máis dunha vintena de actividades de mediación de públicos e apoio á creación teatral, como a exposición ZoomFIOT, presentación de libros e coproducións, gravación en directo dos podcasts do OndaFIOT, os Café con…, un homenaxe a Manuel Lorenzo, lecturas dramatizadas, encontros co público ao rematar a función, a colaboración coa Noite Europea das Persoas Investigadoras, o Premio do Público, o Certame de Teatro Lido ou a entrega do galardón Xograr de Outono a Antonio Porteiro.
Toda a información de horas e venda de entradas está dispoñible na web do festival en www.fiot.gal. O FIOT – Festival Internacional Outono de Teatro está organizado pola Asociación Telón e Aparte eo Concello de Carballo, co patrocinio da Xunta de Galicia, a Deputación da Coruña, o Ministerio de Cultura e a Fundación Luís Calvo Sanz. Un ano máis, conta tamén coa colaboración da Libraría Brañas, Camiño Escena Norte, o Colectivo RPM e o CCA Carballo.
SOBRE O FIOT: 35 ANOS CREANDO TEATRO
O Festival Internacional Outono de Teatro (FIOT) é un festival que ofrece un programa comprometido coas artes escénicas e cos proxectos máis prestixiosos do teatro actual. Está organizado pola Asociación Cultural Telón e Aparte e conta coa colaboración do Concello de Carballo. Pola súa traxectoria, a calidade da programación, a variedade das propostas de intermediación cultural que ofrece e pola súa proxección, o FIOT sitúase como un dos festivais máis importantes de Galicia e referente cultural durante o outono: un mes completo de programación, con preto de 40 espectáculos e ducias de actividades paralelas, converten a Carballo na capital das artes escénicas da comunidade galega.
Desde hai 35 anos, o FIOT dá a coñecer en Carballo o traballo de compañías de referencia e de creadoras emerxentes. Mais, especialmente, busca atraer novos públicos ao teatro. O festival nace en 1992 como espazo para ofrecer unha programación de teatro de calidade na comarca de Bergantiños e impulsar unha estrutura creativa arredor das artes escénicas na zona. Desde entón, FIOT é o lugar de encontro entre artistas, compañías e programadoras, e aposta por estimular a creación e o traballo en rede tanto a través da oferta de espazos para residencias artísticas como da implicación, do propio festival, na produción e novos espectáculos, fundamentalmente de compañías galegas.
Nas súas pasadas 34 edicións, FIOT contou coa participación das compañías máis relevantes de Galicia e España, ademais do ámbito internacional, outorgando así espazo a numerosas disciplinas, novas linguaxes, xéneros e formatos; ademais de ofrecer estreas absolutas ou no territorio galego. Desde xeito, máis de 360 formacións e artistas presentaron os seus traballos no FIOT, con nomes tan salientables no marco do panorama escénico galego, nacional e internacional coma Blanca Portillo, Pablo Messiez, Rafael Álvarez, El Brujo, Yllana, Ron Lalá, Pont Flotant, Titzina, Kamikaze Producciones, Compañía do Chapitô, Leo Bassi, Chévere, Timbre 4, Mofa e Befa, Xosé A. Touriñán, Quico Cadaval, Pablo Remón, Andrés Lima…
Ao longo da súa traxectoria, diversos recoñecementos acreditaron o intenso traballo do FIOT para achegar as artes escénicas do século XXI á cidadanía e recoñeceron o festival como unha das iniciativas teatrais do noroeste peninsular máis relevantes na actualidade. Entre outras distincións cítanse, ademais da ‘Insignia Cultural’ do ‘Observatorio de la Cultura’ da Fundación Contemporánea como mellor proxecto cultural de Galicia en 2022, o Premio da Cultura Galega 2018 no ámbito das artes escénicas outorgado pola Xunta de Galicia ou o Premio Galego do Ano 2018, entre outros.
