O Salón de Plenos do Concello de Vilalba acollerá, o sábado 21 ás 12 horas, a presentación de Nakba, o poemario de Patricia Torrado Queiruga, obra gañadora do LI Premio do Poesía de Vilalba 2025. Será un acto aberto ao público onde teremos a oportunidade de escoitar algúns dos poemas desta obra, recitados en galego e tamén en árabe.
Nakba é un berro, en versos, contra o xenocidio do pobo palestino e a destrución de Gaza. Está ilustrado pola artista gazatí Reem M Arkan. Conta cun limiar do poeta e novelista palestino Nasser Rabah, nunha edición que, a partir do galego orixinal, foi traducida a castelán, inglés (coa axuda de Patricia Martínez Ventoso) e inclúe tamén a versión en árabe a cargo de Omneia Sadek El-Shahat.
No acto participarán, ademais da propia autora, a alcaldesa de Vilalba Marta Rouco, a concelleira de Cultura Mónica González, Omneia Sadek El-Shahat, tradutora ao árabe da obra, e Henrique Alvarellos, director de Alvarellos Editora, entidade encargada da edición de Nakba.
Talía Teatro, coa interpretación de Artur Trillo, acompañado do virtuoso do acordeón Fernando Fraga, traen este sábado, 21 de febreiro, ás 17 hrs, á Casa-Museo Manuel María o espectáculo, dirixido por Paula Carballeira, Rosa caramelo e outras historias. Catro preciosos contos de Adela Turín que, a través da palabra e a música, axudarán a desmontar unha serie de ideas impostas e simplificadas, mais fortemente asumidas, sobre certas actitudes e aptitudes de mulleres e homes.
O espectáculo vai dirixido para nenas e nenos de catro a oito anos e as súas familias. Para asistir é necesario reservar (billete 2 euros) en contacto@casamuseomanuelmaria.gal ou no whatsapp 698177621
O Instituto de Estudos Chairegos, coa colaboracion do Concello de Vilalba, organiza, dentro dos actos previstos para conmemorar o MES DE ROSALÍA, o concerto de Carlos Gómez Osa: EN FEMININO. CANCIÓNS CON NOME DE MULLER, que contará co acompañamento á guitarra de Lois Cuba, e a participación de Rosana Domínguez e o Minicoro de Esmuvi, dirixidos por Baruk Domínguez.
O acto terá lugar o sábado 28 de de febreiro de 2026, ás 20:30 horas, no mesmo lugar da exposición no Auditorio Municipal de Vilalba.
O Instituto de Estudos Chairegos, co patrocinio da Área de Cultura-Vicepresidencia da Deputacion de Lugo e a colaboracion do Concello de Vilalba, organiza, dentro dos actos previstos para conmemorar o MES DE ROSALÍA, a palestra ROSALÍA. PROCLAMAR AO MUNDO QUE GALIZA EXISTE, a cargo de Francisco Rodríguez, comisariado e autor dos textos da exposición co mesmo nome que nestes días permanece aberta ao público na Sala de Exposicións do Auditorio. O acto terá lugar o venres 20 de de febreiro de 2026, ás 20:00 horas, no mesmo lugar da exposición no Auditorio Municipal de Vilalba.
Este sábado, día 14 de febreiro, ás 19.30 hrs, na Casa-Museo Manuel María o cuarteto vocal SON DE CORDA presenta Na casa delas. Un proxecto para festexar a palabra e homenaxear musicalmente a obra poética de mulleres que naceron ou moraron na provincia de Lugo (Luz Pozo Garza, María Mariño, Olalla Cociña, Olga Novo, Marica Campo e Xela Arias).
Esperanza Iglesias (soprano), Carmen Prendes (contralto), Fernando G. Jácome (tenor), e Antón Castro (baixo), acompañados polo piano de Raúl Rodríguez, e coa proxección de imaxes de Manuel Lucas e Alejandro Gándara, farán gozar o público asistente que se achegue este sábado pola Casa-Museo Manuel María.
O Instituto de Estudos Chairegos, co patrocinio da Área de Cultura-Vicepresidencia da Deputacion de Lugo e a colaboracion do Concello de Vilalba, organiza, dentro dos actos previstos para conmemorar o MES DE ROSALÍA, a exposición ROSALÍA. PROCLAMAR AO MUNDO QUE GALIZA EXISTE, producida por Galiza Cultura e Vía Galega, con textos de Francisco Rodríguez e ilustrada con debuxos de Pepe Carreiro.
A exposicion poderase visitar na Sala de Exposicións do Auditorio Municipal de Vilalba dende o 6 ata 27 de febreiro de 2026, no horario habitual do Auditorio Municipal.
