A quinta edición do programa de intercambio cultural, que conta co apoio da Xunta de Galicia, celebrará a súa programación oficial do 17 de setembro ao 22 de outubro e incorpora a Navarra como quinto territorio do proxecto de xeito definitivo
As compañías galegas Caramuxo Teatro, Rebordelos e Xampatito Pato exhibirán, no marco do circuíto Itinerario Constelacións, os seus espectáculos Crisálida, Amantis e Só, respectivamente
O programa Cruzamentos favorecerá o encontro artístico e profesional entre oito compañías en Galicia, Cantabria, Euskadi e Navarra; entre as que se atopan as galegas Marta Alonso Tejada, Os Náufragos Teatro e Paula Quintas Cía
Camiño Escena Norte (CEN), o programa de intercambio cultural no que participan compañías de teatro, danza e artes do movemento e novo circo de Galicia, Asturias, Cantabria, Euskadi e Navarra, chega este ano á súa quinta edición sumandonovas sedes e escenarios, e unha semana máis de programación, ampliando así a oferta de anos anteriores. Do 17 de setembro ao 22 de outubro, 15 compañías ofrecerán espectáculos e actividades no marco dunha proposta apoiada pola Xunta de Galicia a través da Axencia Galega das Industrias Culturais (Agadic) e cuxo eixe principal xira arredor do Itinerario Constelacións, o circuíto de representacións que chegará case a 60 localidades.
Logo de ser o territorio convidado na pasada edición, Navarra únese a Camiño Escena Norte,definitivamente, como quinta comunidade do proxecto, grazas a un importante esforzo da financiación achegada polo goberno navarro, que permitirá programar en máis espazos da comunidade foral, ademais de aumentar as funcións das compañías navarras no resto dos territorios participantes. Incorpórase tamén como colaborador o goberno vasco, o que suporá un reforzo da programación de CEN 2023 na programación en Euskadi.
Os 15 espectáculos participantes nesta edición foron seleccionados por 5 comisións profesionais de axentes do sector, unha por cada unha das comunidades implicadas no CEN. O programa amosa parte da mellor produción escénica profesional dos cinco territorios, con múltiples linguaxes, disciplinas e propostas estéticas; producións para público adulto e familiar; e cunha destacada presenza da danza e artes do movemento, ademais do novo circo.
Neste sentido, Galicia seleccionou ás compañías Caramuxo Teatro, co seu espectáculo Crisálida; Rebordelos, con Amantis; e Xampatito Pato conSó. Pola súa banda, Asturias intervirá no intercambio cultural de CEN con Saltantes Teatro e Misery;Luz de Gas con Luna; e Proxecto Piloto, que representará La bestia negra.
A participación de Cantabria virá da man de Ábrego Teatro con Lear en las catedrales; Malabaracirco Producciones Artísticas con Circus Magníficus, e Mari Paula, que presentará Fronterizas. Euskadi seleccionou os traballos de Aboon Teatre, que participará con Baby esferic; Eva Guerrero, con Gorpuztu; e Tanttaka Teatroa, que ofrecerá Sexberdinak. Finalmente, Navarra consolida a súa presenza no Camiño Escena Norte con outras tres propostas artísticas da man de Inextremis e El rey tuerto; Led Silhouette e Los Perros, e Levelibular co seu Portamundos.
Cruzamentos
Xunto ao Itinerario Constelacións está outa das liñas centrais do Camiño Escena Norte: o programa Cruzamentos, deseñado para promover o intercambio escénico, artístico e profesional entre compañías. Nesta quinta edición, esta rede de estancias artísticas e profesionais -que se enmarca na programación expandida do CEN, con distintas accións para o público e para as e profesionais- desenvolverase desde o 17 de agosto e verase reforzada coa incorporación de Navarra. A través desta iniciativa, as compañías residentes terán a oportunidade de compartir experiencias e recibir asesoramento por parte das compañías locais sobre a posta en escena dos seus proxectos.
As seleccionadas neste 2023 son, no caso de Galicia, a proposta de Marta Alonso Tejada e Lasala (Euskadi) para traballar nos proxectos Shine + Dancin’ Queen. En Cantabria, o proxecto elixido é o da compañía local Escena Miriñaque, que convida á galega Os Náufragos Teatro para investigar arredor dunha instalación-espectáculo inmersivo para bebés dentro de Meeting Baby. Pola súa banda, en Euskadi a compañía residente será a galega Paula Quintas Cía, que ofrecerá unha mirada externa sobre o espectáculo Me arrepiento da vasca Node. E, no caso navarro, a proposta seleccionada reunirá a Dinamo Danza (Navarra) e Mari Paula (Cantabria). Nesta estancia abordarase a mirada externa sobre as pezas Lake y 5778K e Luz. A estancia asturiana quedou deserta ao non se presentar ningún proxecto que involucre unha compañía con sede no Principado de Asturias.
Catálogo de Espectáculos Recomendados CEN
Unha das novidades de CEN 2023 será o Catálogo de Espectáculos Recomendados Camiño Escena Norte, unha selección de 30 producións realizada polas comisións profesionais de CEN que levarán o selo Espectáculo Recomendado Camiño Escena Norte. Esta marca de calidade servirá de promoción e apoio á distribución dos mesmos fóra do ámbito do proxecto. O catálogo editarase en formato dixital e enviarase a un total de 400 profesionais da programación das comunidades do proxecto e do resto do Estado. Precisamente o programa do Itinerario Constelacións deste ano saíu desta selección, nun proceso de programación colaborativa entre a organización e sedes adheridas. O catálogo pódese consultar no seguinte enlace: https://bit.ly/3MCeKT9
Quinta edición de Camiño Escena Norte
CEN naceu en 2019 co obxectivo de promover o intercambio cultural a través das artes escénicas, tomando como referencia e fío condutor os camiños a Santiago de Compostela. Desde o seu inicio, CEN levou o teatro e a danza a escenarios alonxados, en moitos casos, dos circuítos habituais de representación, ofrecendo así a oportunidade de acceder á cultura a públicos de municipios e localidades que non poden gozar, con regularidade, deste tipo de espectáculos.
CEN é unha iniciativa promovida polas asociacións profesionais de produtoras de artes escénicas Escena Galega (Galicia), EscenAsturias (Asturias), ACEPAE (Cantabria), Eskena (Euskadi) eESNA (Navarra), que se incorpora este ano como entidade promotora no territorio. Todas elas únense na supraentidade Camino Escena Norte Agrupación de Interés Económico, creada especificamente para o desenvolvemento, xestión e produción deste proxecto.
CEN conta co apoio económico de gobernos e institucións das cinco comunidades implicadas: a Xunta de Galicia a través da Axencia Galega das Industrias Culturais (Agadic); o Goberno do Principado de Asturias; o Goberno de Cantabria; o Goberno vasco; a Deputación Foral de Araba, a Deputación Foral de Bizkaia e a Deputación Foral de Gipuzkoa; o Goberno de Navarra; e o Goberno de España a través do Instituto Nacional de las Artes Escénicas y la Música (INAEM) e o Ministerio de Cultura y Deporte. Colaboran tamén a Deputación Provincial da Coruña, a Deputación Provincial de Lugo e o Concello de Lugo.
Nesta quinta edición, Vegalsa-Eroski mantense como patrocinador oficial e a marca lucense Cafés Candelas incorpórase como empresa colaboradora.
A quinta edición do programa celebrarase do 17 de setembro ao 22 de outubro e incorpora a Navarra como quinto territorio do proxecto
CEN editará por vez primeira o ‘Catálogo de espectáculos recomendados Camiño Escena Norte’ para a súa promoción tanto nas cinco comunidades participantes coma no resto do Estado
Camiño Escena Norte, o programa de intercambio cultural a través das artes escénicas, abre mañá, 6 de febreiro, o prazo de inscrición de espectáculos para xirar no Itinerario Constelacións da súa quinta edición, que se celebrará do 17 de setembro ao 22 de outubro. As compañías interesadas teñen de prazo até o 16 de febreiro para presentar as súas candidaturas. Aquelas que finalmente resulten seleccionadas, formarán parte da nova programación con diversas funcións nas comunidades autónomas que conforman o proxecto. Toda a información e ficha de inscrición está dispoñible na páxina web www.escenanorte.com
Unha das novidades desta quinta edición será o Catálogo de espectáculos recomendados Camiño Escena Norte, unha selección de 30 producións realizada polas comisións profesionais de CEN que levarán o selo Espectáculo recomendado Camiño Escena Norte. Esta marca de calidade servirá de promoción e apoio á distribución dos mesmos fóra do ámbito do proxecto. Este catálogo publicarase en formato dixital e enviarase ás e aos profesionais da programación das comunidades do proxecto, así como a unha selección de profesionais do resto do Estado. A programación do Itinerario Constelacións de 2023 sairá dos espectáculos incluídos no catálogos.
Por outra banda, e logo de ser o territorio convidado na edición de 2022 -cuxas actividades superaron as 6.000 persoas participantes-, Navarra únese definitivamente a Camiño Escena Norte como quinta comunidade do proxecto, grazas a un importante reforzo da financiación achegada polo Goberno navarro, que permitirá programar en máis espazos da comunidade foral, ademais de aumentar as funcións das compañías navarras nos territorios CEN. Ademais, as e os artistas desta comunidade poderán tomar parte de todas as actividades do proxecto cultural.
CAMIÑO ESCENA NORTE
Camiño Escena Norte é unha iniciativa promovida polas asociacións profesionais de produtoras de artes escénicas Escena Galega (Galicia), EscenAsturias (Asturias), ACEPAE (Cantabria) e Eskena (País Vasco). Todas elas, unidas na supraentidade Camino Escena Norte AIE -creada especificamente para o desenvolvemento, xestión e produción deste proxecto-, impulsan unha intensa programación escénica coa intención de pór en valor a diversidade cultural, lingüística e de formatos e linguaxes da produción do norte da Península Ibérica.
Desde o seu nacemento en 2019, Camiño Escena Norte leva o teatro, a danza e o novo circo a escenarios alonxados dos circuítos habituais, ofrecendo a oportunidade de acceder á cultura a públicos de municipios e localidades que habitualmente non teñen acceso a este tipo de propostas. Tamén facilita ás compañías seleccionadas en cada edición o acceso a novos espazos e escenarios nos que desenvolver a súa creatividade.
O proxecto de intercambio de artes escénicas pecha a súa cuarta edición con récord de participantes en todas as súas propostas
Camiño Escena Norte, o programa de intercambio cultural no que participan compañías de danza, teatro e novo circo de Galicia, Asturias, Cantabria, País Vasco e Navarra, acadou un novo récord na súa cuarta edición: CEN 2022 superou as 6.600 participantes, tanto nas funcións e encontros coas compañías, coma nos programas profesionais e formativos, o que supón un 47% máis de asistentes que no 2021.
Diego Vázquez Meizoso, coordinador de Camiño Escena Norte, sinala que esta edición do CEN, cuxo programa de exhibición tivo lugar entre o 10 de setembro e o 9 de outubro, “comezou como a máis ilusionante da nosa pequena historia e, finalmente, superou amplamente todas as nosas expectativas”. Neste sentido, Meizoso salienta que esta cuarta edición, cuxo lema foi ‘Medran os sorrisos’, “fixo crecer o proxecto a todos os niveis coa incorporación da Comunidade Foral de Navarra e de novas sedes, ademais dun número récord (15) de compañías participantes no programa de exhibición”. “2022 é o ano que pode marcar o futuro deste proxecto plural de intercambio escénico”, asevera o coordinador.
Precisamente este ano estreouse ESADS en Camiño, un proxecto que uniu o programa de exhibición Itinerario Constelacións co alumnado de Artes Escénicas de Galicia, Asturias e Euskadi. “Puxemos en contacto a case 60 estudantes coas compañías en xira a través de talleres e outras actividades”, apunta Meizoso. O resultado desta proposta foi, a ollos do coordinador, “enriquecedor” para o alumnado, pois o CEN achegou a posibilidade de coñecer, desde a proximidade, o traballo que unha compañía profesional realiza antes dunha función. A este respecto, Nacho Ortega, director da ESAD de Asturias, apunta que este novo programa “suma vantaxes pedagóxicas”. É unha sorte que agromara e que xere este tipo de sinerxías. Ao cabo, se unha escola de arte dramática non está en contacto coa profesión, non ofrece unha parte fundamental”, advirte.
No caso das actividades dirixidas especificamente ao público profesional, o CEN tamén experimentou un incremento notable de participación. O encontro Habitación Peregrina PRO acolleu en Lugo a 70 axentes escénicos (distribuidoras, técnicas de cultura, directoras de festivais, docentes e programadoras) e 40 compañías dos territorios implicados nesta edición (un 50% máis que na edición de 2021). En relación ao programa de estadías de creación Cruzamentos, recibiu neste 2022 un impulso económico, o que fortaleceu o intercambio escénico, artístico e profesional entre as compañías. Completando a participación profesional, CEN ofreceu cinco conversas en liña coas compañías, que están á disposición do público, en aberto, na canle de YouTube do proxecto.
Camiño Escena Norte 2022
Camiño Escena Norte é unha iniciativa promovida polas asociacións profesionais de produtoras de artes escénicas Escena Galega (Galicia), EscenAsturias (Asturias), ACEPAE (Cantabria) e Eskena (País Vasco). Todas elas, unidas na supraentidade Camino Escena Norte AIE -creada especificamente para o desenvolvemento, xestión e produción deste proxecto-, impulsan unha intensa programación escénica coa intención de pór en valor a diversidade cultural, lingüística e de formatos e linguaxes da produción galega, asturiana, cántabra e vasca.
CEN conta co apoio económico de gobernos e institucións das comunidades autónomas implicadas, como son a Xunta de Galicia a través da Axencia Galega das Industrias Culturais (Agadic), a Deputación Provincial de Lugo, a Deputación Provincial da Coruña, o Goberno do Principado de Asturias, o Goberno de Cantabria, a Deputación Foral de Araba, a Deputación Foral de Bizkaia, a Deputación Foral de Gipuzkoa e o Goberno de Navarra; ademais do Goberno de España a través do INAEM e de Vegalsa-Eroski como patrocinador oficial. Este ano, CEN tamén contou coa colaboración das casi 40 sedes locais nas que se desenvolveu. En Galicia CEN contou co apoio dos concellos de Lugo Arzúa, Vilalba, Ames e Viveiro; ademais do Festival Internacional Outono de Teatro de Carballo (FIOT), da Fundación Cidade da Cultura de Galicia e do Centro Dramático Galego.
Camiño Escena Norte 2022 presenta ‘El secreto de Julio Verne’
Camiño Escena Norte bota o pano da súa cuarta edición coa presentación, este domingo 9, do espectáculo para público infantil e familiar ‘El secreto de Julio Verne’ da compañía asturiana Fantastique Company. A función comezará ás 18.30 no andar -1 do Museo Gaiás, da Cidade da Cultura de Galicia, e a entrada será libre e de balde ata completar a capacidade do espazo.
Posteriormente, a partir das 19.45 horas, celebrarase un encontro entre Fantastique Company e o alumnado da ESAD de Galicia, no marco da actividade paralela ‘ESADs no Camiño’, novidade na programación expandida desta cuarta edición de Camiño Escena Norte e que pretende pór en contacto ás futuras profesionais das artes escénicas con compañías en activo.
Data: 9 de outubro de 2022 Hora: 18.30 horas Lugar: Andar -1 do Museo do Gaiás na Cidade da Cultura Acto: Función de ‘El secreto de Julio Verne’. Ao finalizar celebrarase un encontro co público asistente que tamén contará coa participación de Tone Martínez e Alba Bermúdez, da compañía galega Galeatro.
Data: 9 de outubro de 2022 Hora: 19.45 horas Lugar: Museo do Gaiás na Cidade da Cultura. Acto: Encontro do alumnado da ESAD de Galicia con Fantastique Company
SINOPSE ‘EL SECRETO DE JULIO VERNE’ ‘El secreto de Julio Verne’, de Irene Santos, comeza na véspera de aninovo, no momento no que Valérie descobre que a casa que sempre foi o seu fogar se converterá nun museo, o que lles obriga, tanto ela como a súa familia, a ter que marchar. Triste e enfadada pola noticia, decide agocharse no seu lugar favorito da casa: o gabinete do seu avó, Julio Verne. Esa noite coñecerá alí a un curioso ourizo latriqueiro que lle desvelará o secreto do seu avó: este non foi só un escritor, senón un grande aventureiro que viviu todas as historias que conta nos seus libros.
O proxecto de intercambio de artes escénicas propón catro espectáculos para público infantil, familiar e adulto con compañías procedentes de Asturias, Euskadi e Navarra
O 9 de outubro celebrarase no Gaiás un encontro entre o alumnado da ESAD de Galicia con Fantastique Company, á fin de poñer en contacto ás e aos estudantes con profesionais das artes escénicas en activo
O Camiño Escena Norte (2022) bota o pano en Galicia esta fin de semana. O proxecto de intercambio escénico, artístico e profesional entre compañías de Galicia, Asturias, Cantabria, Euskadi e Navarra, comunidade que se incorporou ao programa cultural nesta cuarta edición, finalizará o seu percorrido por escenarios de Galicia con cunha chea de funcións. En total, CEN 2022 ofrecerá cinco funcións de teatro e danza en Ames, Carballo, Vilalba, Viveiro e Santiago de Compostela entre o venres 7 e o domingo 9 de outubro.
A primeira cita será coa compañía asturiana Zig Zag Danza, que ofrecerá dúas funcións do seu espectáculo ‘Mímesis’, unha creación dirixida ao público infantil, especificamente á primeira infancia (0-3 anos). Zig Zag bailará o venres 7 en no Auditorio da Casa da Cultura de Milladoiro, en Ames, mentres que o sábado 8 de outubro visitará o Auditorio Municipal Carmen Estévez de Vilalba. En ambos casos será necesario retirar previamente os convites (abilleteira.concellodeames.gal e www.entradasvilalba.es) para acceder aos recintos.
O sábado 8 a actividade de Camiño Escena Norte espallarase ás localidades de Viveiro e Carballo. Precisamente nesta última CEN volve formar parte da programación oficial do Festival Internacional Outono de Teatro, FIOT, logo de facelo na súa primeira edición (2019). A compañía navarra La Caja Flotante presentará ‘Beautiful Stranger’, de Iron Iraizoz, no Pazo da Cultura da localidade bergantiñá.. As entradas están dispoñibles a través do web www.fiot.gal.
Tamén na tarde do sábado CEN visitará a Mariña lucense, concretamente o Teatro Pastor Díaz de Viveiro. Alí terá lugar a representación de ‘El enjambre’, de Kepa Arrasti, da man da compañia vasca Vaivén Producciones. As entradas poderanse reservar a través do correo rbg.cultura@viveiro.es e recoller o mesmo día da función no despacho de billetes do recinto.
Finalmente, Camiño Escena Norte 2022 pecharase po domingo 9 en Santiago de Compostela, na Cidade da Cultura, coa representación para público infantil e familiar de ‘El secreto de Julio Verne’, da asturiana Fantastique Company. A cita será ás 18.30 horas no andar -1 do Museo Centro Gaiás e a entrada será libre e de balde ata completar a capacidade do espazo. Esa mesma tarde, celebrarase un encontro entre a compañía e o alumnado da ESAD de Galicia, como parte da programación expandida ‘ESADs no Camiño’.
07.10.2022 | 18:00 horas no Auditorio Casa da Cultura do Milladoiro (Ames)
08.10.2022 | 18:00 horas no Auditorio Municipal Carmen Estévez (Vilalba)
‘Mímesis’, de Estrella García e Miguel Quiroga | Zig Zag Danza (Asturias)
‘Mímesis’ concíbese como un ritual escénico iniciático para a primeira infancia e as súas familias, que constrúe un ecosistema escénico para que sexa habitado e compartido por intérpretes e participantes. Trátase dunha coidada produción internacional de máis de tres anos, realizada entre España e Alemaña. Ao igual que as anteriores creacións de Zig Zag Danza, ‘Mímesis’ é unha proposta que parte da honestidade e do respecto, preservando a capacidade de desenvolvemento creativo dos públicos máis pequenos.
08.10.2022 | 20:30 horas no Teatro Pastor Díaz de Viveiro El enjambre’, de Kepa Arrasti | Vaivén Producciones (Euskadi) Un grupo de amigas da infancia acode a unha casa rural para celebrar a despedida de solteira dunha delas. Pero os anos non pasan en balde e aínda que sintan un vínculo moi forte entre elas, nada é o que era; ou si… O que a priori ía ser unha fin de semana de festa tola, toleará un pouco máis se cabe: trapos sucios, cousas que nunca se dixeron, confesións, alcol, droga e un enxame. Dise que no reino animal as abellas son os seres que mellor se comunican. E, segundo parece, comunícanse bailando…
08.10.2022 | 20:45 horas no Salón de actos do Pazo da Cultura de Carballo (FIOT)
‘Beautiful Stranger’, de Ion Iraizoz | La Caja Flotante (Navarra)
O 21 de maio de 2019, Ion Iraizoz celebrou o seu corenta aniversario facendo unha festa/performance á que nomeou ‘O último martes antes de cumprir 40’. En ‘Beautiful stranger’, o autor interprétase a si mesmo para tratar de reconstruír a súa festa de aniversario coa complicidade do público. Peza híbrida, entre a autoficción, a comedia existencial e a linguaxe cinematográfica, trata sobre como a memoria é invadida constantemente pola imaxinación e sobre as múltiples identidades que caben na vida dunha persoa.
09.10.2022 | 18:30 horas no andar -1 do Museo Centro Gaiás, Cidade da Cultura de Galicia, en Santiago de Compostela
‘El secreto de Julio Verne’, de Irene Santos | Fantastique Company (Asturias)
Na véspera de aninovo, Valérie descobre que a casa que sempre foi o seu fogar se converterá nun museo, o que lles obriga, tanto ela como a súa familia, a ter que marchar. Triste e enfadada pola noticia, decide agocharse no seu lugar favorito da casa: o gabinete do seu avó, Julio Verne. Esa noite coñecerá alí a un curioso ourizo latriqueiro que lle desvelará o secreto do seu avó: este non foi só un escritor, senón un grande aventureiro que viviu todas as historias que conta nos seus libros.
09.10.2022 | 19.45 a 20.30 horas no Museo Centro Gaiás
Encontro do alumnado da ESAD de Galicia con Fantastique Company
Camiño Escena Norte inclúe, como novidade da súa cuarta edición, ESADs no Camiño, unha actividade enmarcada na súa programación expandida e que quere pretende poñer en contacto ao alumnado con profesionais das artes escénicas en activo. Abordarán, nun coloquio, as características, proceso de creación e natureza do espectáculo, así como as dinámicas de funcionamento dunha compañía profesional.
