por martinho | Abr 26, 2021 | Autores/as, Creación, Novas, Outras Artes, Xeral
ACORDEIRETA presenta este sábado, 1 de maio, na Casa-Museo Manuel María o seu traballo “Loitar cantando”
Patricia González Iglesias (pandeireta e voz) e Alex Balbuena (acordeón, bombo e voz), ACORDEIRETA, presentan este sábado 1 de maio, ás 19 horas, na horta da Casa-Museo Manuel María (se o tempo climatolóxico acompaña), o seu primeiro traballo “Loitar cantando”.
Estilo e son propios, formado por temas, (tradicionais, de autor e unha gran parte de creación propia) en que mesturan diferentes ritmos para crear un ambiente fresco e contundente, para escoitar e tamén bailar.
Nas súas letras non falta a poesía de Rosalía, Carvalho Calero, Celso Emilio Ferreiro, Curros Enríquez, Luz Fandiño….
Imprescindíbel reservar a través de contacto@casamuseomanuelmaria.gal ou no whatsapp 698177621. Billete: 5 euros
por martinho | Abr 25, 2021 | Autores/as, Creación, Novas, Outras Artes, Xeral
O Instituto de Estudos Chairegos (IESCHA) organiza a mesa redonda “O DESMANTELAMENTO DO RURAL” coa que quere unirse á reivindicación da veciñanza de Baamonde de que continúe o alumnado as clases no Colexio desa localidade, fronte ao intento de pechalo por parte do Concello de Begonte e máis da Xunta de Galicia.
O acto terá lugar o xoves 29 de abril de 2021, ás 20 horas, na Casa da Cultura de Vilalba.
Intervirán as seguintes persoas:
–Paula Iglesia Ares, secretaria da ANPA do Colexio de Baamonde e portavoz deste colectivo.
–Isabel Calvete Carrera, presidenta da Federación de ANPAS de centros de Ensino Público da provincia de Lugo (FAPACEL) e vicepresidenta da Confederación Galega de ANPAS.
–Xosé Luís González Farelo, presidente da Asociación de Veciños/as de Baamonde.
A entrada será libre ata completar aforo, cumpríndose estrictamente a normativa anti-covid, demostrando unha vez máis que “A cultura é segura”.
Adxúntase nota informativa.
por martinho | Abr 23, 2021 | Autores/as, Creación, Literaria, Novas, Xeral
BASES
Primeira.
Poderán participar todas as persoas de calquera nacionalidade e idade que presenten narracións inéditas en lingua galega, dirixidas ao público infantil e xuvenil, cunha temática vencellada ao compromiso pola igualdade de xénero, raza, nacionalidade…
Segunda.
Establécese un premio único e indivisible, dotado con 3.000 euros. Esta cantidade está suxeita ás retencións legais que lle sexan aplicables segundo a lexislación vixente.
Terceira.
A obra premiada será publicada por Edicións Xerais de Galicia, que se reserva os dereitos de edición da obra premiada nos 1.500 primeiros exemplares. Entregaránselle ao/á gañador/a 30 exemplares.
Cuarta.
A obra terá unha extensión libre e presentarase encadernada, por cuadriplicado, en papel impreso polas dúas caras, tamaño DIN A4. Presentarase baixo o sistema de plica, polo que se enviará cun sobre á parte; no exterior do sobre figurará só o lema e no interior incluirase o título da obra, o lema, unha copia do NIF do/a autor/a, o enderezo, teléfono de contacto e correo electrónico.
Quinta.
O prazo de presentación de orixinais comezará o 23 de abril de 2021, Día Internacional do Libro e prolongarase até o día 12 de xullo de 2021 (cuarto cabodano de Agustín Fernández Paz).
Sexta.
O xurado estará formado por tres persoas de recoñecido prestixio cultural. Emitirá o ditame, que será inapelable, na última semana do mes de outubro de 2021. O xurado poderá declarar o premio deserto.
Sétima.
A entrega do premio terá lugar nun acto do que se dará conta oportunamente.
Oitava.
Os orixinais remitiranse a:
V Premio AGUSTÍN FERNÁNDEZ PAZ de narrativa infantil e xuvenil pola igualdade
INSTITUTO DE ESTUDOS CHAIREGOS
Praza de Suso Gayoso, 1 (Casa da Cultura)
Apartado de Correos , nº 39
27800 Vilalba (Lugo)
Novena.
Os orixinais non premiados poderán recollelos os/as respectivos/as autores/as no local do Instituto de Estudos Chairegos (Casa da Cultura de Vilalba) durante un período máximo dun mes despois do ditame do premio. Os que non se recollan nese prazo serán destruídos.
Décima.
A participación nesta convocatoria supón a total aceptación destas bases.
Descargar Díptico e Bases
por martinho | Abr 21, 2021 | Autores/as, Creación, Novas, Xeral
O Galician Film Forum e IberoDocs estrean ‘Os corpos’ de Eloy Domínguez Serén en Escocia
- A curta forma parte da sección ‘A Spiritual Journey’, centrada no audiovisual lusófono
- ‘Os corpos estará dispoñible durante 48 horas a partir do xoves 22 de abril nos territorios de Reino Unido e Irlanda
O Galician Film Forum (GFF) de Londres colabora este ano na oitava edición de IberoDocs, o Ibero-American Documentary Film Festival de Edimburgo. Froito desta sinerxia, o veterano encontro audiovisual e o GFF estrean en Escocia a curtametraxe documental ‘Os corpos’ de Eloy Domínguez Serén. A proxección, que será en liña, terá lugar este xoves, 22 de abril, dentro da sección ‘A Spiritual Journey’.
Este apartado aglutina outras tres curtas alén da devandita ‘Os corpos’: ‘O que se não vê’ de Paulo Abreu, ‘Misericórdia’ de Xavier Marrades Orga e ‘Os mortos’ de Gonçalo Robalo. En palabras dos responsables de IberoDocs, ‘A Spiritual Journey’ é un convite para viaxar pola lusofonía e gozar “dunha experiencia cinematográfica, sensorial, espiritual e doutro mundo que vai máis aló da nosa realidade física, na procura do que non se ve e que se está a perder na era da dixitalización”.
Como complemento á proxección, a partir das 19:20 horas (horario do Reino Unido), haberá un coloquio cos directores das curtas que estará coordinado polo programador Mon Rivas e que se retransmitirá en aberto pola canle de YouTube e pola páxina de Facebook de IberoDocs.
Por mor da pandemia, o IberoDocs deste ano estase a celebrar integramente en liña e os seus contidos só serán accesibles dentro do Reino Unido e Irlanda. O festival comezou a súa programación o pasado 19 de abril e vaina prolongar ata o 2 de maio. Toda a información sobre o programa de IberoDocs así como sobre a merca de entradas atópase na web www.iberodocs.org.
De Ourense ao mundo
‘Os corpos’ é unha vibrante curta sobre o entroido de Ourense rodada a finais de febreiro do 2020, dez días antes do primeiro caso confirmado de Covid-19 en Galicia. Con esta estrea escocesa, ‘Os corpos’ engade unha nova parada ao seu percorrido internacional. A curta de Eloy Domínguez xa pasou por Holanda (IDFA), Francia (Clermont-Ferrand), Arxentina (Bafici), Corea do Sur (Jenjou IFF), Estados Unidos (True / False), Suecia (Tempo) e mais varios festivais de España (Huesca IFF, D’A Film e FIC Xixón).
Eloy Domínguez Serén naceu en Simes (Pontevedra) no ano 1985 e estudou en Salamanca, Milán e Barcelona. Na súa filmografía figuran Pettring, I den nya himlen (No novo céio), Jet Lag, Ingen ko på isen (No cow on the ice), Den gula tegelvägen (Yellow brick road), Hamada e Distancia de seguridade. Na actualidade prepara a curtametraxe Rompente.
Sección ‘A Spiritual Journey’
https://www.iberodocs.org/a-spiritual-journey
Entradas IberoDOCS
https://www.indyondemand.com/bundle/iberodocs-pass-uk-and-ireland/
por martinho | Abr 19, 2021 | Autores/as, Creación, Novas, Xeral
Coincidindo co 140 aniversario do pasamento do compositor galego Marcial del Adalid, o dúo integrado por Margarita Viso Soto e Juan Durán Alonso interpretarán este sábado 24 de abri, ás 19 hrs, na Casa-Museo Manuel María, a música escrita por Adalid para piano a catro mans. O programa será o seguinte:
Primeira parte
3 Marches
1/ Do menor
2/ Mi b maior
3/ Re menor
Sonate nº 1:
1/ Allegro moderato
2/Scherzo
3/Andante. Arietta
4/Rondó
Segunda parte
Sonate nº 2:
1/ Allegro brillante
2/Minuetto
3/Intermezzo cantabile
4/Rondó gracioso
Juan Durán é considerado pola crítica e público como o máis importante compositor galego da súa xeración, cun catálogo no que a ópera e a música sinfónica conviven cunha importantísima produción de música de cámara e lied, ademais de infinidade de orquestracións de música galega.A súa obra soa con frecuencia por todo o mundo, desde Europa a EE. UU, baixo a dirección de grandes batutas do noso tempo, como Vanska, Mena, Víctor Pablo ou Gómez-Martínez entre outros. Nomes como os de Elina Garança, Gallardo- Domâs ou o mesmo Orfeón Donostiarra cantaron moitas das súas creacións mentres a súa música de cámara foi interpretada e levada ao mundo do disco por agrupacións como Zoar, Hércules Brass ou o Grupo Instrumental Século XX.Entre outros moitos premios, Juan Durán conta co Premio dá Cultura Galega 2013 e co Premio Reina Sofía 2018. É ademais membro de número da Real Academia Galega de Belas Artes e da Academia da Música Valenciana.
Margarita Viso realiza estudos no Conservatorio Profesional de Música e Declamación de A Coruña. De piano con Jeannette Romero, de harmonía e contrapunto con Rogelio Groba. Amplía coñecementos con Mª Luisa Nache (canto), José Ferrer (trompa), Carlos López García Picos (composición), Eva Alcázar, Edith Picht-Axenfeld e Noemí Novara (piano).Como compositora é autora de diversas obras de cámara e para voz e instrumentos. Pertence á Asociación Galega de Compositores. A súa actividade como pianista acompañante incide principalmente no repertorio da música galega e española.Como musicóloga ten investigado sobre compositores galegos principalmente, destacando os seus traballos sobre Marcial del Adalid e José Baldomir. Pertence á Sociedad Española de Musicología e á Irmandade da Música Galega.Crea a editorial VISO (1997) adicada á publicación de música de autores galegos.Profesora de Solfexo e Teoría da Música (Madrid 1985), e Pianista Acompañante (A Coruña 1998), desenvolveu o seu labor docente nos conservatorios de Zaragoza, Ponferrada e A Coruña. Xubilada no 2017.En novembro de 2020 recibe o Premio da Crítica de Galicia, na sección de música.
É imprescindíbel facer reserva en contacto@casamuseomanuelmaria.gal ou no whataspp 698177621. Billete: 5 euros.
por martinho | Abr 17, 2021 | Autores/as, Creación, Novas, Xeral
CONMEMORATIVO DOS 90 ANOS DA PROCLAMACIÓN EN VILALBA DA II REPÚBLICA-SÁBADO 24 DE ABRIL DE 2021-12:00 – TEMPLETE PRAZA DA COSNTITUCIÓN DE VILALBA
O Instituto de Estudos Chairegos-IESCHA, en colaboración co alumnado da Escola Municipal de Teatro e o Concello de Vilalba, celebrará un acto conmemorativo dos 90 anos da proclamación en Vilalba da Segunda República. Terá lugar o día 24 de abril, sábado, ás 12 da mañá, e desenvolverase no templete da Praza da Constitución -se fixese mal tempo levarase a cabo na Casa da Cultura-. En calquera caso, cumprirase estrictamente coa normativa anti-covid estipulada por mor da pandemia; deste xeito, dende o IESCHA, seguiremos apostando unha vez máis polo lema:“A cultura é segura”.
Foi o 14 de abril de 1931 cando se proclamou a Segunda República española; en Vilalba, uns días máis tarde, exactamente o 24 de abril, celebrouse a proclamación oficial da instauración do novo Réxime.
No último Caderno de Estudos Chairegos – publicación bienal do IESCHA, que vai polo número 10- Carlos Gómez Osa analiza polo miúdo a xeira republicana e a represión franquista na capital da Terra Chá no traballo titulado: “Vilalba: A política na República e a represión franquista”.
Nel figura que “O día 24 de abril (de 1931) realízase no salón de actos da Casa Consistorial a toma de posesión da Comisión Xestora, da que forman parte José Carballeira e Francisco Roca, do comité republicano e Domingo Gayoso e Manuel Taboada, do comité socialista”.
A prensa de entón publicou que “En medio de un gran entusiasmo izose la bandera tricolor en el balcón del Ayuntamiento a los acordes de la Nueva Lira y entre el disparo de potentes bombas. Varios vecinos hicieron uso de la palabra (…) En la Casa Consistorial ondearon durante nueve días las banderas republicana y gallega”.
Velaquí a nota informativa de tal actividade.