As cantareiras presentan o sinxelo, que interpretan na Xira Midas, acompañado dun videoclip no que o movemento é o protagonista absoluto da man de Carla Cervantes e Justin de Jager.
“Ás veces cómpre parar e que escoitemos o noso corpo para poder avanzar”, sinalan as pandeireteiras sobre o novo adianto do seu terceiro disco,que verá a luz nas vindeiras semanas.
Tanxugueiras lanza este venres, 3 de xuño, o seu sinxelo Desidia, tema que formará parte do seu novo disco, o terceiro, e que verá a luz nas vindeiras semanas. Desidia, que xa está dispoñible desde hoxe en todas as plataformas dixitais e que Sabela Maneiro, Aida Tarrío e Olaia Maneiro interpretan nos directos da Xira Midas, é unha reivindicación da necesidade do autocoidado. As cantareiras empregan un símil co baile para narrar o proceso de escoita e liberación da culpa para avanzar no camiño.
“Ás veces cómpre parar e escoitar o noso corpo. Entender o que nos di e o que nos pide, sen que nos teñamos que sentir culpables por non ser, non dar, non chegar ao que se nos esixe ou autoesiximos. Temos que nos sentir libres desa falsa culpa. Podemos parar, sen ser xulgadas, para poder volver, gozar de nós e dos nosos movementos, e pisar máis forte aínda”, sinalan as pandeireteiras.
Desidia narra o proceso do descubrimento e aceptación da necesidade real do autocoidado. A música e as letras das cantareiras, inspiradas na música tradicional galega e na lírica popular, afondan nese camiño. Desde os primeiros síntomas de apatía e falta de motivación, explicitado nas frases “rematade xa esta bailiña / estou cansa, preciso deitar” que acompañan o pasodobre, que pé ao retrouso “Ai quedar, deixame quedar”. Desde o desleixamento á valentía de recoñecer a necesidade de parar. Desde o punto no que os movementos do baile e dos corpos se atopan e acompañan, como metáfora, o proceso de volver estar en pé. “Os meus puntos vou guiando, os meus pasos van medrando, os meus brazos tornan alto” acadan o seu esplendor co retrouso “Ai!, bailar que eu vou guiar”.
Videoclip con Carla Cervantes e Justin de Jager
Desidia acompáñase dun videoclip (dispoñible en Youtube) dirixido por Trece Amarillo e producido por PlayPlan que se rodou o pasado mes de maio en Marín (Pastoriza), Bueu (Agrelo) e Moraña. Nesta nova peza audiovisual, as pandeireteiras ceden o seu protagonismo habitual á coreografía e interpretación de Carla Cervantes e Justin de Jager.
Trátase da primeira colaboración conxunta entre Cervantes (xunto con Sandra Egido forma o dúo Lookathingsdifferent) e De Jager (coreógrafo, entre outros, do Scapino Ballet Rotterdam), especializados en threading, un estilo de baile no que os corpos se enfían. Precisamente a coreografía, ideada por Cervantes, constrúe o movemento a partir do diálogo que nace entre os corpos e que ten, como testemuña, o patrimonio natural galego. Os corpos xeran nós, camiños e aberturas durante a súa conversación, que medra e avanza a medida que o fai a propia canción.
A regueifeira, cantora e poeta Alba Maríadesenvolverá, na Casa-Museo Manuel María, un obradoiro de iniciación á regueifa este sábado, día 4 de maio, ás 18 hrs.
A actividade de dúas horas de duración, é gratuíta e está dirixida para todos os públicos, adultos e crianzas a partir dos dez anos.
Para asistir é necesario anotarse previamente a través do correo electrónico contacto@casamuseomanuelmaria.gal ou no whatsapp 698177621.
Lembrar, por último, que ás 20 hrs, do mesmo sábado, celebrarase o concerto deZOELAS.
Este sábado, día 4 de xuño, ás 20 horas, pecha a programación deste curso cun concerto musical a cárrego de ZOELAS.
Un proxecto orixinario das terras da Ulloa en que se mestura as raíces do canto tradicional con melodías de variados estilos musicais e letras propias que conviven con coplas recollidas. Canto coral feminino con Bea, Érica, María, Pilar e Patricia acompañadas de Michel (guitarra), Miguel (percusión) e Bruno (requinta, zanfona e gaita).
Para asistir ao concerto é necesario reservar previamente o billete (5 euros) en contacto@casamuseomanuelmaria.gal ou a través do whatsapp 698177621. Se o tempo acompañar, fariase na horta da Casa-Museo.
Despois desta actividade farase a pausa habitual do tempo de verán, retomando a programación cultural para inicios de outubro. O 9 de xullo celebrarase no Campo de Santa Isabel de Outeiro de Rei o Convivio da Cultura Galega, a nosa romaría campestre á que quedades convidados (informaremos máis adiante).
O IESCHA organiza a conferencia de FELIPE SENÉN, historiador da cultura galega, que leva por título: “O patrimonio cultural galego, estado da cuestión: tradición, creación e aculturación”, que terá lugar na Casa da Cultura de Vilalba, o venres 3 de xuño de 2022, ás 20:00, nun acto presentado por Marisa Barreiro.
Os billetes para as cinco funcións que terán lugar os días 11, 12 e 13 de novembro no Auditorio Sede Afundación de Pontevedra están xa á disposición do público en www.inventio.gal cun prezo reducido, dun 30% de desconto, até o vindeiro 17 de xuño
Inventio é unha creación para público familiar chea de humor, misterio e fantasía; unha viaxe sensorial a un ritmo vertixinoso e con ecos de cinema futurista, que visitará 15 escenarios de Galicia, España e Portugal de setembro de 2022 a xaneiro de 2023
As entradas para Inventio, o novo espectáculo de gran formato con ilusionismo, danza, artes circenses e música inspirado no Camiño de Santiago, xa están á venda para as funcións de Pontevedra. O público pode adquirir os seus billetes, cun prezo reducido, dun 30% de desconto, até o vindeiro 17 de xuño, para as representacións que terán lugar no Auditorio Sede Afundación de Pontevedra os días 11, 12 e 13 de novembro.
Ilusionismo, levitacións, equilibrios, malabares, números aéreos, animación audiovisual, composicións de música tradicional galega fundidas con sons electrónicos… Todo isto e moito máis é Inventio, o espectáculo para público familiar que se poderá ver durante cinco funcións no Auditorio Sede Afundación de Pontevedrao vindeiro outono. Trátase dunha creación que reborda humor, misterio e fantasía, na que conviven a comedia e o drama, a danza, o ilusionismo e as artes circenses; unha experiencia sensorial a un ritmo vertixinoso e con ecos do cinema futurista de Stanley Kubrick, Ridley Scott ou Denis Villeneuve, que non é máis ca “unha viaxe cara a todo iso que nos fai humanos: a nosa capacidade de sentir”.
Cunha atmosfera máxica e unha posta en escena vangardista, Inventio recupera a paisaxe, os costumes, a música, a arte ou a arquitectura de Galicia nun espectáculo delicado e cegador, de busca e descubrimento. Inventio é un camiño de regreso á sensibilidade a partir da tradición e a modernidade. Baixo a dirección creativa do mago Martín Varela, trátase dunha iniciativa da promotora galega Thinking Up Events, Xunta de Galicia a través do programa Xacobeo 21-22 e Fundación “la Caixa”, co apoio de Sargadelos, que contará cunha xira que visitará 15 escenarios de Galicia, España e Portugal entre os meses de setembro de 2022 e xaneiro de 2023.
A estrea absoluta de Inventio terá lugar o 30 de setembro no Teatro Jofre de Ferrol e o espectáculo aterrará en Pontevedra na segunda fin de semana de novembro para ofrecer cinco funcións. O venres 11 terá lugar o primeiro pase, ás 20.00 horas, mentres que o sábado 12 de novembro haberá unha dobre sesión ás 17.00 e ás 20.30 horas. Finalmente, o domingo 13 haberá, tamén, outra dobre sesión, ás 12.00 e ás 17.00h. Co gallo da activación da venda de entradas, o público poderá adquirir até o vindeiro 17 de xuño os seus tickets cun prezo reducido, cun desconto dun 30% sobre o prezo final. Neste período de venda, as entradas irán desde os 10,50€ até os 17,50€ en función da situación da butaca. Toda a información está dispoñible no espazo web www.inventio.gal.
A HISTORIA. Ano 2094. O noso mundo é branco, aséptico, limpo, ordenado. O noso universo é frío e tan impersoal coma o quirófano dun hospital. Deixamos de sentir e de comunicarnos. Aterramos no futuro, si, pero perdemos a memoria e a emoción. Galicia. Último ano Xacobeo deste século XXI. Unha troupe formada por un ilusionista, seis bailaríns e sete artistas de circo comproban que xa non existe o Camiño de Santiago, xa ninguén o lembra. Non quedan peregrinos nin un camiño que percorrer xuntos. Tampouco a auga ou a chuvia, o son das gaitas, o verde dos campos ou a pegada do mar na area. Nin rastro nin lembranza ningunha. Que era todo aquilo? Onde quedaron a viaxe, a busca e o descubrimento? Onde liscou a sensibilidade? Velaquí as preguntas que van guiar a esa troupe circense, que teima nunha misión: reconstruír a súa identidade cultural. Sobre as táboas, os artistas vense envoltos nunha aventura sen igual. O pasado tócaos maxicamente e unha forza sobrenatural transformaraos.
Inventio nace co obxectivo de servir de vehículo de coñecemento e divulgación do Camiño de Santiago e da cultura galega a través dunha historia de buscas e encontros, apta para público familiar e adulto. Trátase dun espectáculo que dota o noso patrimonio cultural dun enorme poder simbólico: tradicións nadas hai séculos que perduran hoxe, e fano enriquecidas e felizmente contaminadas doutras manifestacións artísticas, cunha ollada aberta que pon en valor o que nos constrúe e o que nos une.
O EQUIPO. Con dirección do novo ilusionista galego Martín Varela e dramaturxia de José L. Prieto, o equipo creativo e artístico de Inventio está formado por máis de 40 persoas, entre elas seis bailaríns e sete artistas circenses e mais o propio Varela, que exercerá de guía do espectáculo. Á fronte da dirección artística, Suso Montero, recoñecido escenógrafo cunha dilatada traxectoria en teatro e televisión. Na dirección de maxia, dous destacados ilusionistas españois -Fani Triana e Martín Camiña- e na de circo, Jorge Miquel, un estudoso cunha longa traxectoria na posta en marcha de proxectos circenses. Na dirección musical, José Trincado ‘Triki’, produtor e técnico que traballou con grupos como Milladoiro ou compañías como a Fura dels Baus. Á fronte do ballet e as coreografías, Mercedes Suárez; Alberto Casas no deseño de iluminación e Conchi Silvent na dirección de vestiario.
Non sei se tocaba ou non unha antoloxía poética neste espazo, aínda que tampouco sigo unha orde fixa para falar dos libros. Porén, este chegou a minde casualidade, nunha das visitas á biblioteca. Pouco antes lera outra dasantoloxías poéticas máis recentes, Poesía galega novísima, publicada pola editorial Urutau, onde coinciden algunhas das voces que aquí atopamos. En calquera caso, a primeira impresión, unha portada na que aparecen case seguidas as palabras “poesía” e “GADIS”, descolocoume algo e iso xa foi motivo suficiente para espertar a miña curiosidade.
A introdución por parte da profesora María Xesús Nogueira desvélanos parte dese misterio, pois sitúanos na homenaxe á poeta Xela Arias, Letras Galegas 2021, defensora de levar a poesía a lugares pouco habituais. Debo recoñecer que me gusta a proposta e que me gustaría ver moita máis poesía pola rúa,polos parques, polos hospitais ou, incluso, polas autoestradas. Por que non? Mais o realmente revelador é o interior do libro. Poesía sublime que se filtra polos buratos dunha cesta da compra. Porque o feito de achegar a poesía a todos os públicos non debe restar nin un ápice da súa calidade.
Andrea Nunes, Tamara Andrés, Lúa Mosquetera, Gonzalo Hermo, Samuel L. París, Ismael Ramos, Quico, Helena Salgueiro, Xabier Xil, Rosalía Fernández Rial, Daniel Landesa, Celia Parra, Cristina V Miranda, Pompa & Boato e Alba Cid constitúen esta magnífica polifonía. Diversa na forma e no tema, mais impregnada de frescura e cotiandade. Así mergullámonos no amor- balea/ mentres se abren as espigas/ co recendo aínda do primeiro pracer/ brindando pola amizade/ escribindo postais desde cidades tristes/ lembrando o rito da casa cada quince de agosto/ asumindo a derrota en cada píxel da pantalla. Sen aforros/ sen reloxo/ perdidas nalgún lugar do atlas/ somos dor e somos pracer. Foi así como comezamos a parirnos…
Benvida sexa a poesía que, con furia nova, nos atrapa para sempre. Neste caso, deixarse vencer é a mellor das recompensas.
