A compañía de teatro Elefante Elegante realizará este xoves 9 de outubro unha sesión de mediación co alumnado de 4.º de Socioloxía da UDC dentro do proxecto PATA DE ELEFANTE, unha iniciativa que une teatro, reflexión social e creatividade no ámbito educativo.
A actividade desenvolverase no Salón de Actos da Facultade de Socioloxía (UDC) a partir das 9:00 h, e forma parte dun proceso de investigación arredor do percorrido dunha prenda téxtil, desde a súa fabricación ata o seu desbotamento. A sesión incluirá dinámicas participativas, xogos de rol e unha instalación artística, co acompañamento dos docentes José A. Cortés e Carlos Diz, do grupo de innovación docente ACHEGA.
O proxecto PATA DE ELEFANTE, que contou co apoio do Fondo de Apoio a Proxectos Singulares para a Mellora Social 2025 da Deputación da Coruña e coa colaboración do Concello de Culleredo, desenvolveuse ao longo do ano en diversos centros educativos da área da Coruña. Culminará o martes 14 de outubro coas representacións do espectáculo ALTA COSTURA no Auditorio do Edificio de Servizos Múltiples de O Burgo (Culleredo), destinadas ao alumnado participante.
Unha e outra vez: o eterno retorno do que falaba Nietzsche, volver a cometer un a un os mesmos erros dun pasado non tan afastado; con teimosía, con grandes doses dun odio exacerbado, sen empatía e, sobre todo, sen dor dos outros.
Dicía o tamén filósofo Inmanuel Kant: algo así como que o ser humano sairá da súa “minoría de idade” cando se atreva a pensar por si mesmo usando a súa propia razón e deixe de obedecer a outros coa cegueira de quen vive máis tranquilo se llo dan feito.
Non hai moito, a arqueóloga Marga Sánchez Romero facía fincapé nunha entrevista en que o que nos fai verdadeiramente humanos son os coidados. E pregúntome: cando, como especie, deixamos de coidarnos? En que intre nos volvemos insensibles ás inxustizas? Como alguén que sabe que outras persoas sofren non é capaz de sentir ese mesmo sufrimento ou, cando menos, unha certa compaixón?
Dame en pensar que perdemos incluso a animalidade –na casa dos meus avós unha vaca aleitara os años da ovella con todo o mimo, cando perderon a nai e lográronse.
Setembro foi para min un mes difícil, mais foi un mes de aprendizaxe.
Teño unha amiga gazatí, Reem -semella que, se falamos de cifras, esquecemos que cada persoa ten un nome, que é unha entidade chea de vida, coas súas esperanzas, preocupacións, soños e realidades-; acaba de sufrir un novo desprazamento forzoso e estamos en contacto por un proxecto que nos une; ela é ilustradora. Até hai dous anos era profesora de debuxo e é nai dun neno de oito anos, Youssef, e dunha nena, Salma, de dez. A guerra deu ao traste con todo e falamos, a poder ser, cada día para sermos válvula de escape desta loucura. Unha tarde díxome: “Dame razóns para seguir debuxando, para poder esquecer que están caendo bombas a metros dos meus fillos”. E sentín o mesmo arreguizo que sinto agora mentres o escribo.
O domingo 7 faleceu a miña avoa e esquecín escribirlle. Falamos de aí a dous días e preguntoume que pasara. Conteille que a avoa fora coma unha nai para min, que era o último vencello cun lugar, cun sentimento, con certos aromas, con eses bicos e eses brazos que son refuxio. E sabedes que me dixo? “Doulle grazas a Alá porque che deixase velala, chorala e enterrala en paz”. Pódovos asegurar que me quebrou por dentro. Ela, que leva vivido todo isto: a inanición, a incomprensión por un conflito atroz e irracional; quen busca sacar forzas para inventar xogos para os seus nunha tenda cativa e plástica a onde non chega a luz ou a auga, a onde non chegan os alimentos, que teñen que desprazarse e facer longas colas para cargar os seus teléfonos e poder conectarse a internet.
E nós, ollando dende fóra, impasibles, inoportunos, impotentes. Eu, magoada dúas veces: pola perda e polo pésame sentido de quen non me coñece de hai tanto e, aínda así, empatiza coa dor de outra persoa.
Pero, como dicía, foi mes de aprendizaxes. O pasado venres, quedei cuns amigos para tomar o café na casa dunha delas, e díxenme: vou ir mercar un doce para acompañar o café posto que non me deu tempo a facelo. Teño que maldicir a hora. Que necesidade tiña?! Cheguei á pastelería en cuestión e a muller que me atendía, uns anos maior ca min, comezou a queixarse de ser autónoma, porque hai que pagar moito a Facenda, á Seguridade Social,… Tiven que interrompela e preguntarlle se a ela, cando a atendían no centro de saúde, lle pedían ver o número de conta ou se, cando lle facían unha proba, tiña que pedir un crédito para poder facela. A cousa non quedou aí porque os cruasáns seguían no forno e os moi puñeteiros non querían cocer, que ían cocer,… E a conversa seguiu marabillosamente falando de Amancio, “porque é tan boísimo que doou unhas máquinas para a diagnose do cancro, que menos mal que o temos a el”. Tiven que volver parala, porque se ese “santo” tributara neste país como debe e non evadira millóns de euros en impostos mediante o uso de filiais en Suiza, Irlanda ou Países Baixos, con eses cartos probablemente se puidese mellorar o estudo, tratamento e diagnose do cancro e doutra manchea de enfermidades. Os cruasáns,… seguían no forno. Mághoa! Porque a cousa seguiu e eu son das que “é aceptable que todo o mundo teña dereito a opinar, máis non toda opinión é aceptable”. E non vai e me defende o xenocidio palestino? Pois si, cun par, dime: “Que solten aos reféns! Verás como todo remata”. E quedei estupefacta. Porque non me falaba como unha doente psíquica; facíao coma unha persoa sen alma, sen capacidade de pórse na pel dos demais, sen poder ou querer afrontar que estamos fallando como sociedade. E cando lle dixen que non podía compararme a perda de 1.000 israelís coa de 65.000 palestinos, que a barbarie das cifras falaba soa, apostillou: “As cifras tamén hai que tomalas de quen veñen, de seguro que non son tantos e son todos terroristas”.
Quen me mandaría a min ir por cruasáns para que me fervese o sangue a primeira hora da mañá? Mais esta é unha realidade cruenta e diaria. O que si sei é a onde non vou volver entrar nin mercar ren. De seguro que haberá un Amancio que lle rescate o negocio cando as cousas lle veñan tortas e tamén sei, e sabemos, que se volvesen os tempos que algúns nostálxicos e nostálxicas ansían, estas persoas serían as primeiras en empuñar o fusil contra nós.
Por certo, o novo Papa vén de aseverar que usamos moito a palabra “xenocidio”, pero a Santa Sede non pode pronunciarse a este respecto sobre o conflito, pois igual non o é. De seguro que o anterior pontífice, que falaba de xustiza para o pobo palestino e que se interesaba diariamente polo que acontecía en Gaza, debe estar a retorcerse baixo a sepultura.
Ogallá teñades quen vos coide, a quen coidar, xente empática e loitadora, que pense por si mesma e que sexa moi consciente de que hai erros que non poden volver a cometerse.
ESTE SÁBADO CONCERTO DO BARÍTONO GABRIEL ALONSO E O PIANISTA RICARDO GARCÍA NA CASA-MUSEO MANUEL MARÍA
Será dentro da Gala-Concerto do 4º Concurso Manuel María de Composicións Musicais, onde se interpretarán as cinco composicións finalistas inspiradas en poemas de Manuel María e sete pezas baseadas en poemas Curros Enríquez, Eduardo Blanco Amor, Miguel Anxo Fernán-Vello, Marica Campo, Ramón Cabanillas, Álvaro de las Casas e Castelao
Actividade de acceso libro e gratuíto, mais é necesario reservar no seguinte enderezo electrónico contacto@casamuseomanuelmaria.gal ou no whatsapp 698177621
A Casa-Museo Manuel María celebra este sábado, 4 de outubro, ás 17.30 hrs, a gala-concerto da fase final da IVª edición do Concurso Manuel María de Composicións Musicais. A esta fase final accederon cinco pezas seleccionadas entre o conxunto das presentadas a concurso: Tenrura, O meu barco, Nas leves tardes de Outono, Eu son de Outeiro de Rei e Alborada, compostas por Manuel Pacheco Sánchez, Luis Serrapio Fernández, Yónatan Sánchez Santianes, Manuel María Veiga Lombardía e Xosé Alfredo Oliveira Pérez.
O concerto contará como intérpretes convidados os músicas galegos Gabriel Alonso, barítono, e Ricardo García, pianista. O seu concerto constará de dúas partes. Na primeira interpretarán as cinco pezas finalistas do certame, mentres que na segunda o público asistente poderá desfrutar dunha serie de pezas dos compositores galegos José Baldomir, Manuel Moreno-Buendía, Juan Durán, Xavier Montsalvatge, Antón García Abril e Rosendo Mato Hermida baseadas en poemas de Curros Enríquez, Eduardo Blanco Amor, Miguel Anxo Fernán-Vello, Marica Campo, Ramón Cabanillas, Álvaro de las Casas e Castelao.
Atrévete co risco, coa emoción, co humor tenro e intelixente. Sorpréndete co virtuosismo, coas novas linguaxes e descubre curiosas personaxes que che chegan ao corazón. Teatro creativo e exquisito.
Espectáculos para adultos e tamén para gozar en familia.
Co Bono OTNI poderás asistir a 4 obras excepcionais e case a metade de prezo (12 euros).
As novas e heteroxéneas linguaxes do circo e do teatro de obxectos, que fusionan con personalidade propia teatro físico, movemento, expresividade, destreza, linguaxe visual, danza, plástica, risco, música, poesía e emoción, son as protagonistas desta XIV edición do OTNI. Un cóctel explosivo do que brotarán peculiares personaxes na procura da súa identidade e historias que chegan ás nosas entrañas, á nosa raíz. Formas exquisitas e lúdicas que nos desafían a entender quen somos.
QUE ESPECTÁCULOS INCLÚE O BONO OTNI 2025?
Compaña
Xampatito Pato
Auditorio Pazo da Cultura
Domingo 5 de outubro, 20.00h
Déixate levar pola beleza e o humor a un universo onírico.
Experiencias, recordos, emocións… son capas que se entrelazan para definirnos como persoas únicas. Conformar a nosa identidade é un camiño que nos acompaña toda a vida.
SOBRE A 34ª EDICIÓN DO FESTIVAL INTERNACIONAL OUTONO DE TEATRO DE CARBALLO
Do 25 de setembro ao 31 de outubro, o Festival Internacional Outono de Teatro de Carballo, o FIOT, regresará ás táboas para celebrar a súa 34ª edición con 45 espectáculos, 11 estreas absolutas, 11 estreas en Galicia, 2 coproducións e figuras imprescindibles da escena teatral contemporánea. Durante cinco semanas, o FIOT achegará a Galicia una coidada selección de propostas á altura dos teatros e festivais máis representativos de España e Europa.
Así, o FIOT de Carballo encherá ás salas, as rúas e os espazos non convencionais da vila bergantiñá con pezas de artistas e compañías como Andrea Jiménez, Jan Lauwers, Juan Diego Botto, Sergio Peris-Mencheta, María Galiana, Alex O’Dogherty, Lucas Escobedo, Pont Flotant, Gabriel Chamé Buendía, Galeatro, Pistacatro, Needcompany, Gonzalo Cunill, Ainé, Quico Cadaval, Paula Quintas, Evaristo Calvo ou El Patio Teatro.
“Raíz viva, memoria colectiva” é o leitmotiv dunha edición que busca poñer en valor a orixe e a tradición como símbolos de identidade propia e faros da nosa contemporaneidade. Nesta 34ª edición, o FIOT volverase converter no “corazón do teatro en Galicia” da man das súas liñas de programación habituais, con propostas abertas a todos os públicos, formatos e sensibilidades, procedentes de 3 países –España, Bélxica, Arxentina– e 9 comunidades autónomas –Andalucía, Asturias, Comunidade Valenciana, Cataluña, Comunidade de Madrid, Galicia, A Rioxa, Castela-A Mancha e País Vasco–, ademais dunha vintena de accións de mediación.
No FIOT haberá Programa de Sala, OTNI, Rúa dos Contos, Teatro de Rúa, FIOT en Ruta, Micro-escenas M2, FIOTeen e Fiotiño, ademais de 3 residencias artísticas, 2 presentacións de works in progress e actividades paralelas como exposicións, gravacións de OndaFIOT, presentacións de libros, conversas, o Premio do Público, o Certame de Teatro Lido, etc.
Este sábado, 24 de setembro, ás 18.30 horas, o Pazo da Cultura de Carballo acolle no marco do FIOTiño a representación deste novo espectáculo para público familiar, que revisita un dos textos máis representados de Manuel María da man de queridas artistas da escena galega
En paralelo a esta estrea, o Festival Internacional Outono de Teatro tomará as rúas e prazas de Carballo a golpe de clown, equilibrios e música en directo, para inaugurar o seu Teatro de Rúa cunha dobre proposta que combina o risco e a calidade técnica do circo tradicional coa expresividade máis contemporánea, coas exquisitas funcións de Pausa, dos vascos CÍA niMú, en colaboración con Camiño Escena Norte, e Back to Classics, dos cataláns Planeta Trampolí
A narración oral e o mellor humor botan tamén a andar na tradicional Rúa dos Contos, que ven completa neste inicio do FIOT, con sete primeras propostas a golpe de contos, versos, acordes, maxia e moitas risas: Rogelio, de asSircópatas, e A xira do cuarto século. Aventura 2012, de Pepo Suevos, o xoves 25; Feitizo, de Álex Louzao, e Da vara e máis da besta, de Lois Pérez, o venres 26; Contadiña, de Marita Martínez, e Atroz, de Darío Mares, o sábado 27; e Dous ollos de vidro, de Quico Cadaval e Celso Sanmartín, no Mercado Municipal o domingo 28
As entradas para ‘Berenguela na gaiola’ e resto de propostas deste #FIOT34 están dispoñibles en Ataquilla.com e na billeteira dos espazos o mesmo día da función
A estrea absoluta de ‘Berenguela na gaiola’, de Galeatro, Xarope Tulú e Paula Carballeira, protagoniza a primeira semana da 34ª edición do FIOT. Este sábado, 24 de setebro, ás 18.30 horas, o Pazo da Cultura de Carballo acolle no marco do FIOTiño a representación deste novo espectáculo para público familiar, que revisita un dos textos máis representados de Manuel María da man de grandes artistas da escena galega.
En paralelo a esta estrea, o Festival Internacional Outono de Teatro toma as rúas e prazas de Carballo a golpe de clown, equilibrios e música en directo, para inaugurar o seu Teatro de Rúa cunha dobre proposta que combina o risco e a calidade técnica do circo tradicional coa expresividade máis contemporánea, coas exquisitas funcións de Pausa, dos vascos CÍA niMú, en colaboración con Camiño Escena Norte, e Back to Classics, dos cataláns Planeta Trampolí.
A narración oral e o mellor humor botan tamén a andar na tradicional Rúa dos Contos, que ven completa neste inicio do FIOT, con sete primeras propostas a golpe de contos, versos, acordes, maxia e moitas risas: Rogelio, de asSircópatas, e A xira do cuarto século. Aventura 2012, de Pepo Suevos, o xoves 25; Feitizo, de Álex Louzao, e Da vara e máis da besta, de Lois Pérez, o venres 26; Contadiña, de Marita Martínez, e Atroz, de Darío Mares, o sábado 27; e Dous ollos de vidro, de Quico Cadaval e Celso Sanmartín, no Mercado Municipal o domingo 28.
PRESENTACIÓN DA ESREA ABSOLUTA DE ‘BERENGUELA NA GAIOLA’ PARA ABRIR O FIOT
O Festival Internacional Outono de Teatro de Carballo, o FIOT, presentou esta mañá en rolda de prensa o espectáculo Berenguela na gaiola, das compañías Galeatro –que neste 2025 celebra o seu décimo aniversario– e Xarope Tulú. A peza é unha coprodución do FIOT, o Centro Dramático Galego e a Casa-Museo Manuel María. No acto, que tivo lugar ás 11.00 horas no Auditorio do Pazo da Cultura, contou coa participación dos equipos artísticos de ambas compañías, así como do director do FIOT, Alberto Sueiro; a concelleira de Cultura e Festas do Concello de Carballo, Maruxa Suárez; o director do Centro Dramático Galego, Fran Núñez; e o presidente da Fundación Manuel María, Alberte Ansede.
O FIOT acollerá o sábado 27 de setembro, ás 18.30 horas, no Pazo da Cultura, a estrea absoluta de Berenguela na gaiola no marco do FIOTiño. Berenguela vive nunha residencia, pero quere volver á súa casa da aldea. Alí coñece a Aurora, que ten unha imaxinación sen límites, e a Tomás, sempre calado e pensativo. Berenguela propón unha revolta e volverse salvaxes e perigosas, pero Aurora suxire que fagan no teatro o que non lles deixan facer na realidade: ser libre e cambiar o mundo, ou, polo menos, o seu mundo.Os tres anciáns escollerán para representar a obra de Manuel María Aventuras e desventuras dunha espiña de toxo chamada Berenguela, onde cadaquén escolle o personaxe que quere representar.
A compañía carballesa Galeatro e Xarope Tulú alíanse neste proxecto que gañou a cuarta edición do Certame Manuel María de Proxectos Teatrais e para o que contan coa dramaturga e directora Paula Carballeira, Premio Nacional de Literatura Dramática. Ambas compañías están comprometidas con linguaxes escénicas diversas dirixidas á infancia e tamén coa narración e o teatro de obxectos. O FIOT colabora coa creación como coprodutor, xunto á Casa-Museo Manuel María e ao Centro Dramático Galego.
Na rolda de prensa, a concelleira de Cultura e Festas do Concello de Carballo, Maruxa Suárez, quixo destacar que “é unha honra para Carballo acoller a posta de largo da nova creación dunha compañía carballesa tan querida como Galeatro, que neste 2025 celebra o seu décimo aniversario, en tándem con outra admirada artista polo público de Carballo, a Premio Nacional de Literatura Dramática Paula Carballeira”. “Ademais da estrea, a colaboración con Galeatro supón a realización de dúas funcións dirixidas a escolares dos centros de Educación Primaria de Carballo, na preestrea da obra, que terán lugar este venres 26 de setembro”, destacou, tamén, a concelleira.
Pola súa banda, a dramaturga Paula Carballeira –tamén Xograresa de Outono do FIOT–, apuntou que “á hora de plantexar o texto, buscou que os nenos e as nenas se sentisen identificados co que estaba a acontecer na escena, coa posta en valor dun dos textos máis queridos e representados de Manuel María, que hoxe lles interpele”. Mentres, a compañía carballesa Galeatro indicou que “é un pracer traballar en casa e ter a oportunidade de montar e poñer en valor pezas para público infantil e xuvenil de mediano e gran formato, non tan habituais no noso circuito teatral, cunha aposta pola calidade e o oficio para todas as audiencias”. Sobre o galadón Certame Manuel María de Proxectos Teatrais, Xarope Tulú agradeceu que “o premio ten sentido porque permite que os espectáculos roden, garantindo 40 representacións da peza, e isto é un luxo para nós”.
O presidente da Fundación Manuel María, Alberte Ansede, apuntou que “esta é a primeira vez que se premia un espectáculo familiar, vencendo prexiuzos, con valentía, xa que estamos seguros de que será un grandísimo proxecto escénico. E aborda a obra de Manuel María máis representada, polo que temos moitas ganas e espectativas de descubrir que fixeron con ela”. Na quenda de palabras, Fran Núñez, director do CDG, expresou os seus parabéns para o proxecto e premiou “a valentía do proxecto, para un público único, non só infantil, senón, tamén, adolescente. E destacou a colaboración de institucións e compañías para sacar adiante o proxecto, rescatando un texto do noso propio repertorio, que é o noso legado”. Núñez incidiu, tamén, “no apoio especial do FIOT para a realización da residencia técnica e artística no Pazo da Cultura”.
Pola súa banda, o director do FIOT, Alberto Sueiro, salientou que “a coprodución desta peza enmárcase na liña de apoio do festival ao tecido escénico galego e o fomento da creación teatral por parte do FIOT. Deste xeito, a compañía realizou unha residencia artística e técnica no Pazo da Cultura de Carballo durante todo o mes de setembro antes desta agardada estrea para público xeral a tarde deste sábado 27 de setembro”. Sueiro mostrouse “contento e agradecido desta colaboración, e de que o FIOT poida cumprir cunha das súas principais divisas: ser útil para o sector e para as compañías, acollendo esta residencia artística e esta estrea, para darlle impulso a un proxecto tan grande e con tantos axentes implicados, no que temos unha confianza ciega e estamos convencidos de que será o mellor arranque para esta 34ª edición do festival”. Finalmente, os artistas quixeron convidar “a públicos de todas as idades a gozar no FIOTiño cunha proposta escénica familiar que descobre a maxia do teatro e da imaxinación como unha ferramenta para cambiar o mundo”.
GRAN ACOLLIDA DO PÚBLICO ÁS PROPOSTAS DO #FIOT34 E ENTRADAS AÍNDA DISPOÑIBLES
A gran acollida do público ás propostas escénicas do FIOT viuse de novo reflectida neste 2025, xa que o festival esgotou en apenas tres días os bonos para o seu Programa de Sala, ademais das entradas para algunhas das propostas máis agardadas, como Vulcano, 14.4 ou Yo solo quiero irme a Francia. En total, o público adquiriu xa máis dun 50% dos tickets totais do festival (cifra que ascende a un 84% se nos referimos ás funcións do Programa de Sala que se poderán desfrutar no Auditorio do pazo da Cultura de Carballo). As entradas para outras xoias deste #FIOT34 como Berenguela na gaiola ou Territorio Regueifa, están aínda dispoñibles na plataforma Ataquilla.com e na billeteira do Pazo da Cultura o mesmo día da función, desde 90 minutos antes do seu inicio.
SOBRE A 34ª EDICIÓN DO FIOT DE CARBALLO
Do 25 de setembro ao 31 de outubro, o Festival Internacional Outono de Teatro de Carballo, o FIOT, regresará ás táboas para celebrar a súa 34ª edición con 45 espectáculos, 11 estreas absolutas, 11 estreas en Galicia, 2 coproducións e figuras imprescindibles da escena teatral contemporánea. Durante cinco semanas, o FIOT achegará a Galicia una coidada selección de propostas á altura dos teatros e festivais máis representativos de España e Europa, con propostas que triunfan no Teatro Español, a Compañía Nacional de Teatro Clásico, o Centro Dramático Nacional, os Teatros del Canal, o Festival de Almagro, Fetén, o Festival Temporada Alta de Girona ou o Festival de Otoño de Madrid.
Así, o FIOT de Carballo encherá ás salas, as rúas e os espazos non convencionais da vila bergantiñá con pezas de artistas e compañías como Andrea Jiménez, Jan Lauwers, Juan Diego Botto, Sergio Peris-Mencheta, María Galiana, Alex O’Dogherty, Lucas Escobedo, Pont Flotant, Gabriel Chamé Buendía, Galeatro, Pistacatro, Needcompany, Gonzalo Cunill, Ainé, Quico Cadaval, Paula Quintas, Evaristo Calvo ou El Patio Teatro.
Nesta 34ª edición, o FIOT volverase converter no “corazón do teatro en Galicia” da man das súas liñas de programación habituais, con propostas abertas a todos os públicos, formatos e sensibilidades, procedentes de 3 países –España, Bélxica, Arxentina– e 9 comunidades autónomas –Andalucía, Asturias, Comunidade Valenciana, Cataluña, Comunidade de Madrid, Galicia, A Rioxa, Castela-A Mancha e País Vasco–, ademais dunha vintena de accións de mediación.
No FIOT haberá Programa de Sala, OTNI, Rúa dos Contos, Teatro de Rúa, FIOT en Ruta, Micro-escenas M2, FIOTeen e Fiotiño, ademais de 3 residencias artísticas, 2 presentacións de works in progress e actividades paralelas como exposicións, gravacións de OndaFIOT, presentacións de libros, conversas, o Premio do Público, o Certame de Teatro Lido, etc.
Recoñecido como un proxecto pioneiro e clave da cultura en Galicia e unha cita referente da cultura galega, non só en termos de exhibición, senón tamén de produción e acompañamento artístico, no #FIOT34 non faltarán producións con selo galego que formarán parte fundamental do seu programa, da man de compañías e artistas tan queridas polo público de Carballo como Contraproducións, Ainé, Pistacatro, Paula Quintas Cía., Evaristo Calvo, Quico Cadaval e Celso Sanmartín, Marita Martínez ou Galeatro –esta última, en tándem artístico con Xarope Tulú e a Premio Nacional de Literatura Dramática Paula Carballeira–.
Cabe destacar que, fiel á súa vocación de apertura, con propostas transversais e inclusivas para o goce de todos os públicos, neste #FIOT34 moitas das grandes propostas están orientadas a todos os públicos, non exclusivamente adultos, como é o caso das marabillosas Matres ou Farra. Un ano máis, haberá espazo para o risco, os clásicos, os emerxentes, as novas linguaxes… e, en definitiva, unha invitación ao descubrimento.
“Raíz viva, memoria colectiva” é o leitmotiv dunha edición que busca poñer en valor a orixe e a tradición como símbolos de identidade propia e faros da nosa contemporaneidade. Trátase dunha chamada á orixe: a aquilo que nos sostén por dentro, aínda que non se vexa. Como as entrañas do corpo, a raíz e a memoria forman parte desa anatomía común que nos une: emocional, cultural e escénica.
SOBRE O FESTIVAL INTERNACIONAL OUTONO DE TEATRO DE CARBALLO (FIOT)
Máis de tres décadas creando teatro
O Festival Internacional Outono de Teatro (FIOT) é un festival que ofrece un programa comprometido coas artes escénicas e cos proxectos máis prestixiosos do teatro actual. Está organizado pola Asociación Cultural Telón e Aparte e conta coa colaboración do Concello de Carballo. Pola súa traxectoria, a calidade da programación, a variedade das propostas de intermediación cultural que ofrece e pola súa proxección, o FIOT sitúase como un dos festivais máis importantes de Galicia e referente cultural durante o outono: un mes completo de programación, con preto de 40 espectáculos e ducias de actividades paralelas, converten a Carballo na capital das artes escénicas da comunidade galega.
Desde hai 34 anos, o FIOT dá a coñecer en Carballo o traballo de compañías de referencia e de creadoras emerxentes. Mais, especialmente, busca atraer novos públicos ao teatro. O festival nace en 1992 como espazo para ofrecer unha programación de teatro de calidade na comarca de Bergantiños e impulsar unha estrutura creativa arredor das artes escénicas na zona. Desde entón, FIOT é o lugar de encontro entre artistas, compañías e programadoras, e aposta por estimular a creación e o traballo en rede tanto a través da oferta de espazos para residencias artísticas como da implicación, do propio festival, na produción e novos espectáculos, fundamentalmente de compañías galegas.
Nas súas pasadas 33 edicións, FIOT contou coa participación das compañías máis relevantes de Galicia e España, ademais do ámbito internacional, outorgando así espazo a numerosas disciplinas, novas linguaxes, xéneros e formatos; ademais de ofrecer estreas absolutas ou no territorio galego. Desde xeito, máis de 350 formacións e artistas presentaron os seus traballos no FIOT, con nomes tan salientables no marco do panorama escénico galego, nacional e internacional coma Blanca Portillo, Pablo Messiez, Rafael Álvarez ‘El Brujo’, Yllana, Ron Lalá, Pont Flotant, Titzina, Kamikaze Producciones, Compañía do Chapitô, Leo Bassi, Grupo Chévere, Timbre 4, Mofa e Befa, Xosé A. Touriñán, Quico Cadaval…
Ao longo da súa traxectoria, diversos recoñecementos acreditaron o intenso traballo do FIOT para achegar as artes escénicas do século XXI á cidadanía e recoñeceron o festival como unha das iniciativas teatrais do noroeste peninsular máis relevantes na actualidade. Entre outras distincións cítanse, ademais da ‘Insignia Cultural’ do ‘Observatorio de la Cultura’ da Fundación Contemporánea como mellor proxecto cultural de Galicia en 2022, o Premio da Cultura Galega 2018 no ámbito das artes escénicas outorgado pola Xunta de Galicia ou o Premio Galego do Ano 2018, entre outros.
