Ataque Escampe lanza este martes 25 o vídeo de A cociña práctica, sinxelo no que colabora Antía Ameixeiras
A peza, asinada por David Silva e protagonizado pola propia Ameixeiras, a actriz Paku Granxa e o membro do grupo Lois Carlín, mestura a estética bucólica coa parodia dos programas de cociña
A presentación ao vivo de Cabalgata será este sábado 29 na Sala Capitol, nun concerto que abrirá un combinado de membros da Banda de Lalín; e, ao remate, a Sala Sónar acollerá unha festa posconcerto con pinchadas das djs Pídechas o Corpo e do propio grupo
Ataque Escampe estreará mañá, martes 25, a peza audiovisual que acompaña A cociña práctica, tema no que colabora a violinista e vocalista Antía Ameixeiras, e que se presenta como o cuarto sinxelo do recén estreado LP Cabalgata. O vídeo poderase visualizar a partir das 10.30 horas na canle de Youtube da banda compostelá.
“Temos perto o forno, que máis dá / vemos medrar o queique de masa nai”. A letra de A cociña práctica xoga en varios puntos coas imaxes gastronómicas para tratar, tal vez, os diversos xeitos de entender as relacións. E esa diversidade déixase ver tamén na imaxinación posta nos arranxos dun tema que busca ir máis aló do tradicional dueto home-muller, incluíndo sorpresas como referencias a Los Chichos ou Ace of Base, un solo de saxo final nos límites do kitsch e unha receita de filloas explicada por Delfina Sánchez (avoa do batería Cibrán Tenreiro).
Antía Ameixeiras, membro do dúo de música de raíz Caamaño&Ameixeiras (Premio Martín Códax na categoría de Folk) e exintegrante de Oîma ou Luar na Lubre, achégase aquí como cantante a un rexistro máis pop -ao igual que no tema Supermartes– e dá pé a unha das colaboracións máis destacadas na traxectoria de Ataque Escampe. Ela é, tamén, unha das protagonistas do vídeo musical da canción. Dirixido por David Silva, o clip é igualmente unha sucesión de sorpresas. Rodado en Lanzós (Vilalba), parte dunha estética bucólica que pode lembrar algún dos filmes de Sofia Coppola para acabar integrando imaxes como a de Antía Ameixeiras cunha motoserra e un programa de cociña que remite, nun ton algo desquiciado, aos formatos da televisión matinal. A actriz Paku Granxa (Cuñados, Saudade de ti) interpreta a presentadora e o baixista de Ataque Escampe, Lois Carlín, o cociñeiro.
Presentación ao vivo de Cabalgata na Sala Capitol
O sábado 29 Ataque Escampe actuará na Sala Capitol compostelá para presentar Cabalgata. O grupo interpretará tanto os temas deste álbum como unha selección do seu repertorio anterior, no que supón o seu regreso aos escenarios da súa cidade despois de catro anos. Acompañaraos unha selección de membros da Banda de Lalín, que abrirá o concerto achegando a tradición das bandas de música a un contexto pop. As entradas están á venda, a partir de 10 euros, na web de www.ataquilla.com; mentres na billeteira costarán 15 euros. Ao remate da presentación, poderase seguir a festa nun evento posconcerto: a partir das 00:30 horas, na Sala Sónar pincharán as djs Pídechas o corpo Guateque Sessions e un set de membros de Ataque Escampe.
Cabalgata
Cabalgata éo oitavo disco de Ataque Escampe. A banda compostelá volve amosarnos no seu novo LP, producido polo Hevi, o seu universo creativo, mantendo os seus trazos de identidade (como o coidado dunhas letras apoiadas no humor e a vulnerabilidade e o achegamento a estilos diversos) e achegando tamén numerosas novidades tanto na instrumentación -como a presenza de sintetizadores e, ocasionalmente, de saxo e bases electrónicas- como a nivel lírico. O fío principal do disco é o diálogo co pasado, non como obxecto de nostalxia senón, en palabras do grupo, “como espazo inesgotable que nos interpela”. De aí sae o intento de explorar estilos musicais doutras épocas, pero tamén temáticas que atravesan o álbum, como a infancia, os amores diferentes ou as amizades conservadas ou perdidas, simbolizadas nas letras polas diferentes imaxes de cabalos ás que fai referencia o título: a tenrura dos cabaliños de carrusel das festas, a ameaza dos policías montados ou a emotividade da relación cos animais.
O PÚBLICO INFANTIL E FAMILIAR PODERÁ ESTE SÁBADO, NA CASA-MUSEO MANUEL MARÍA, GOZAR CON BRAIS DAS HORTAS E O SEU ESPECTÁCULO MUSICAL “CONSERTASSO NA HORTA”
Grelos e temazos, cun equilibrio variado de formas e estilos – como debe ser nun ecosistema musical diverso e saudábel! A Santa Compaña aparécese entre as patacas cantando un trap. Hai unha pulga punk da praia de Liméns. As cabras tiran para o monte e os caracois reivindican o seu ritmo: o reggae. Entre as cenouras, os lagartos toman o sol ao son dun tumbao -é o propio!- e os kiwis non paran de brotar bailando ska. Tamén hai sitio para os soños, coma o de ser astronauta, ou para pedirlle axuda á veciñanza para botarlle o sulfato ás viñas. E máis temazos entre guitarrazos, charangazos e un lote de instrumentazos máis. Música e humor para toda a familia. Letras e arranxos coidados para sementar e apañar risos e ganas de cantar xuntas.
Culturalia GZ celebra o Día do Libro 2023 coa publicación dixital da obra HENKO. Nas células do efémero, de Miguel Díaz. Nesta edición antologada aparecen recollidas vintetres propostas de literatura visual e textual, selccionadas dentro do espazo homónimo HENKO, que este autor mantén na web cultural arriba citada, e nas que destaca esa maridaxe de palabra e imaxe que ofrece a súa particular mirada.
Toda a vida traballando coma unha desgraciada, e total para que? Para pasar os derradeiros anos, sen motivación ningunha, medio vexetando, deixando correr as horas, os días, os meses, os anos… Agardando ese día que a todas nos chega e, oxalá que sexa dun xeito, aquí te pillo, aquí te mato, que non hai cousa peor que estar sufrindo e agoniando na casa ou peor aínda, nun hospital. Total para ao final terse que marchar. E por riba aturar o imbécil do marido, que o único que fai é pasar o día cos ditosos encrucillados e as sopas de letras, cando non escoitando nun vello radio casete, que non sei como aínda é capaz de emitir son algún, cancións de Lola Flores, As Grecas ou Dani Daniel.
Levaba tempo con estes pensamentos e ideas derrotistas, ata que unha tarde despois de escoitar ao pánfilo do meu Lolín dicir que iamos necesitar un gato porque o galiñeiro estaba infestado de ratos, decidín cambiar de actitude. Pero imos ver, isto non pode seguir así. Eu que sempre fun unha muller arroutada e que nunca me dobreguei ante nada non podo seguir un día máis con este xeito de vida, razoei para min.
Lolín, por unha vez na vida acababa de abrirme os ollos. Que mellor gata ca min! Porque debo confesar que eu sempre fun algo felina, se cadra moito. Forte e resistente coma brava gata, preparada para esta vida, que en si, non deixa de ser un risco. E fun consciente de que chegara o intre do comezo dunha nova etapa e propúxenme ser unha gata da cabeza aos pés. Unha auténtica felina; nada de medias tintas.
E aquí estou no galiñeiro da Cortiña, horas e horas á caza do rato, e cando non, durmindo ou tomando o sol. Meus pobres, foron liscando, que remedio. Mais non me preocupa hai abondos pola leira abaixo e nos galiñeiros veciños. Malo será que no tempo que me queda neste mundo non teña alimento abondo. Porque eu, o que si non quero, é esa merda de penso que din que ten peixe e moitas porteinas. Que o coman as miñaxoias de agora, que están tan afeitas a el e que desprezan esta tenra e deliciosa carne ratonil.
—A ver Auroriña. Vés para a casa ou quedas aí. Desde hai unha tempada non saes do galiñeiro. Calquera día quedas a durmir. Por certo desde hai un tempo non se ve un rato. Mellor, non gañaba para penso. Non lle deixaban nada ás galiñas.
Pero será parvo este meu home. Xa vai boa que deixei de ser Aurora e aínda non se decatou. Maldita a hora que o coñecín na romaría do Carme. Máis me valera quedarme alindando as vacas no Prado Novo.
O Proxecto Lugares salienta o valor das comunidades locais, da experimentación e da hibridación de disciplinas á hora de transformar, dun xeito sostible, o Camiño de Santiago
A iniciativa, impulsada pola Xunta de Galicia e pola Fundación “La Caixa”, celebra este martes en Palas de Rei a primeira xornada dun espazo de debate e pensamento no que participan máis de vinte profesionais da arquitectura, da paisaxe, do deseño, da artesanía e da comunicación
O seminario continuará mañá mércores 19 coa presentación dunha serie de boas prácticas á hora de deseñar e realizar novas intervencións no espazo público polo que transita o Camiño de Santiago
A alcaldesa de Larouco e a directora da Axencia Turismo de Galicia recibirán mañá pola tarde, nas covas de Seadur, ao grupo de expertas que traballará durante toda a semana na comarca de Valdeorras
Natalia BalseiroSusan Santos Amado
O Castelo de Pambre acolle este martes 18 a apertura do Proxecto Lugares, unha iniciativa innovadora impulsada pola Xunta de Galicia e pola Fundación “La Caixa” para transformar, dun xeito colaborativo e sostible, o espazo público do Camiño de Santiago. Ao longo de toda esta semana, e nun ámbito de actuación que abrangue os municipios de Palas de Rei e Larouco, máis dunha vintena de profesionais da arquitectura, da paisaxe, do deseño e da artesanía debatirán, pensarán e deseñarán, da man da comunidade local da Ulloa e de Valdeorras, posibles intervencións para implantar no territorio.
A comisaria da iniciativa, Natalia Balseiro, salientou esta mañá o carácter innovador do proxecto, tanto pola mirada transdisciplinar do mesmo -que aúna nun mesmo proceso arquitectura, paisaxe, deseño, artesanía, comunicación e mediación- como da metodoloxía aplicada desde a súa concepción. “Un dos principais valores do proxecto reside no seu proceso ou desenvolvemento. A innovación desde a conversa, o pensamento, a investigación e práctica ou mesmo desde a publicación dos resultados deste traballo, coa intención, ademais, de que se poida replicar noutros lugares ou momentos”. Neste sentido, Balseiro destacou o carácter cultural de Proxecto Lugares e a súa implicación co territorio. “Entendemos a cultura como unha ferramenta para xerar e afianzar os lazos entre as comunidades. E con Lugares queremos precisamente relacionar ás expertas coas axentes locais para implicalas na transformación do territorio que habitan”, afirmou.
O tenente de alcalde de Palas de Rei, Amador Sande, a responsable territorial da Fundación “La Caixa”, Susan Santos; e a secretaria territorial da Xunta de Galicia en Lugo, Marta Barreiro, foron as responsables de dar a benvida ás e aos asistentes ao seminario. Ao longo da mañá sucedéronse as intervencións de expertas e expertos. Foi o caso do director da Fundación Juana de Vega, José Manuel Andrade, quen defendeu a oportunidade que supón o Camiño de Santiago para o desenvolvemento das áreas rurais. Concretamente, Andrade defendeu “a alta calidade paisaxística” das zonas polas que decorre a ruta xacobea “grazas á actividade agrícola e gandeira” posta en marcha pola veciñanza que se dedica á gandeiría, e que definiu como “os xestores do territorio”. “Hoxe en día o 50% das explotacións agrarias están dirixidas por persoas dunha media de idade de máis de 60 anos. O reto para manter e preservar esta calidade paisaxística en Galicia é o relevo xeracional. O Camiño pode contribuír á sostibilidade social dos territorios e revalorizar o rural”, aseverou o experto.
Pola súa banda, a bioenxeñeira e paisaxista Paola Sangalli apuntou á necesidade de pensar na beleza á hora de repensar e recuperar a paisaxe tanto en áreas rurais coma urbanas. Neste sentido, avogou por solucións sostibles e baseadas na natureza, “que son as que realmente nos permitirán facer frente aos desequilibrios ou desafíos como o da emerxencia climática”. Pola súa banda, a mediadora cultural Amparo Moroño avanzou, na súa ponencia, que a paisaxe é un espazo de pensamento, no que traballar coas e cos artistas, pero moi especialmente coas e cos habitantes do territorio, “quen realmente constrúe a propia paisaxe”. “O diálogo cultural, as prácticas artísticas colaborativas e o pensamento colectivo son partes fundamentais da metodoloxía dos procesos de mediación no territorio para favorecer a súa transformación”, dixo.
A primeira xornada do Seminario do Proxecto Lugares conta con catro mesas redondas, que abordan diferentes intervencións arquitectónicas, paisaxísticas e artísticas contemporáneas no espazo público do Camiño de Santiago. Na primeira delas, titulada Achegamentos, referencias, técnicas e perspectivas desde as diferentes linguaxes da arquitectura, da artesanía, da paisaxe e do deseño, estivo moderada pola xornalista de El País e historiadora da arte Anatxu Zabalbeascoa e contou coa presenza e as experiencias achegadas pola paisaxista Paola Sangalli, a artesá Inés Rir, a arquitecta e mediadora Maé Durant e a deseñadora Uqui Permui. A beleza e a ética do sostible, a xeración de espazos que coiden das persoas ou a participación directa por parte da veciñanza nos proxectos de transformación no espazo público foron algunhas das liñas destacadas desta mesa.
Durante toda a xornada abordaranse cuestións como Achegamentos ao patrimonio desde a arquitectura, na que conversarán Ariadna Cantis (comunicadora e arquitecta), Carlos Pita (arquitecto), Pedro Calaza (director da Escola Galega de Paisaxe) e Paola Sangalli; ou Linguaxes, escalas, materiais. Un camiño cara á sostibilidade, con Ana Amado (arquitecta), Izaskun Chinchilla (arquitecta), Carlos Seoane (arquitecto) e Verónica Moar (artesá). Finalmente, Ariadna Cantis (comunicadora e arquitecta), Estelle Jullian (artista), María Fandiño (arquitecta) e Julia de la Cal (artesá) falarán arredor das intervencións situadas, a conexión co territorio e coas comunidades locais.
Segunda xornada de seminario e inicio do taller en Seadur
Este mércores, 19 de abril, o Castelo de Pambre acollerá -en horario de mañá- a segunda xornada do seminario. Xa pola tarde, o grupo desprazarase até a comarca de Valdeorras, concretamente ao concello de Larouco, no que o xoves 20 dará comezo o taller do Proxecto Lugares nas covas de Seadur. Á súa chegada, contra ás 18.00 horas, as e os participantes serán recibidos pola alcaldesa do municipio, Patricia Lamela, e a directora da Axencia Turismo de Galicia, Nava Castro.
