O Concello de Cospeito e a Asociación Recreativa e Cultural de San Martiño de Pino, coa colaboración de Culturalia GZ e a Xunta de Galicia, convocan o VIII Certame de Poesía TORRE DE CALDALOBA, de acordo ás seguintes
BASES
BASES-VIII-CERTAME-DE-POESIA-TORRE-DE-CALDALOBA
A 12ª edición do Noia Harp Fest despídese ata o ano que vén consolidando o evento como todo un referente cultural no mundo da arpa. Tras cinco xornadas de concertos, con trece actuacións en sete escenarios, o festival, o único dedicado ao instrumento no noroeste peninsular, bota o pano cun éxito rotundo tanto de asistencia de público coma de calidade artística.
O evento cultural, organizado por Nalgures Producións, e que conta coa dirección artística da Asociación Noia Harp Fest, reuniu estas semanas na vila de Noia a intérpretes recoñecidas a nivel internacional, como Ana Crismán, Kevin Le Pennec, Rebecca Hill ou Yofre Brito, no marco dunha programación variada e innovadora, na que a excelencia musical foi o sinal de identidade.
Ao longo de cinco xornadas, máis de 1.800 asistentes puideron gozar dunha ampla programación de trece concertos (doce deles gratuítos) que achegaron o instrumento ao público a través da súa interpretación tanto con diferentes tipos (arpa de palancas, arpa de pedais, arpa triple barroca, arpa llanera) coma de ámbitos ou estilos musicais (clásico, folk, música antiga, flamenco, etc).
Primeiras espadas do instrumento, e tamén as xeracións máis novas do país, deron conta da súa calidade nunha serie de emprazamentos emblemáticos da vila, como Praza do Tapal, Liceo de Noia, Praza do Curro -que acolleu a foliada de benvida cunha homenaxe a Emilio Cao-, Igrexa Museo Santa María A Nova, Teatro Coliseo Noela e a Igrexa e Claustro de San Francisco. Precisamente esta última igrexa, que se estreou como sede neste 2025, revelouse como un escenario moi especial grazas a súa magnífica acústica, moi axeitada para o concerto de música antiga que ofreceu El concierto secreto, ensemble conformado por Juliette Commeaux e Laia Blasco; unha actuación celebrada coa colaboración da Asociación Española de Arpistas (AEDA), coa que Noia Harp Fest segue a tecer rede para presentar, en Galicia, o mellor do talento peninsular.
Nesta liña divulgativa, o festival celebrou o IV Encontro de Alumnado das Escolas de Arpa de Galicia, unha cita anual de referencia tanto para as e os estudantes do instrumento como para os seus centros. Unha xornada de convivencia, aprendizaxe, música e experiencia que garante un grande futuro para a arpa en Galicia. Este ano, ademais, as máis de 20 participantes tiveron a oportunidade de poder ensaiar unha peza conxunta cun dos artistas desta edición, Kevin Le Pennec.
O 12º Noia Harp Fest despediuse onte cun concerto especial, como foi a Gala de Entrega do III Premio Internacional de Composición Portus Apostoli, na que se estreou Cuatro historias gallegas, do guitarrista e compositor arxentino Federico Beilinson. O Teatro Coliseo Noela acolleu unha celebración na que a Real Filharmonía de Galicia, baixo a dirección de Sebastian Zinca (e con Claudia Besné e Francesca Romana Di Nicola coma solistas), estreou a obra gañadora deste certame, impulsado polo festival e polo Concello de Noia. Tamén se puido escoitar, por vez primeira, Folías Celtas, mención de honra do Portus Apostoli, peza composta polo uruguaio afincado na Coruña Gabriel Bussi.
Tanto a organización (Nalgures Producións) como a dirección (Asociación Noia Harp Fest) queren agradecer a artistas e público a súa participación na programación, e moi especialmente, ás institucións que fixeron posible esta 12ª edición: o Concello de Noia, Xunta de Galicia a través da Axencia Turismo de Galicia no marco dos Concertos do Xacobeo, Deputación da Coruña e Acción Cultural Española AC/E.
*Imaxes Gala Portus Apostoli © Jerry Elefarte
20250808-Balance-Noia-Harp-Fest
O Teatro Coliseo Noela acollerá a estrea mundial da peza Cuatro historias gallegas,de Federico Beilinson, e da mención de honra Folías celtas, de Gabriel Bussi, que serán interpretadas pola Real Filharmonía de Galicia baixo a dirección de Sebastian Zinca e con Claudia Besné e Francesca Romana Di Nicola coma solistas
As últimas entradas dispoñibles para a Gala, na que tamén se poderán escoitar obras de Debussy e Ravel, están á venda en www.ataquilla.com
O Noia Harp Fest prepárase para despedir a súa 12ª edición. Tras gozar de catro xornadas de concertos con Ana Crismán, Bleuenn Le Friec, Kevin Le Pennec, Quico Comesaña ou Rebecca Hill, mañá, xoves 7 de agosto, porá o ramo coa celebración da Gala de Entrega do III Premio Internacional de Composición Portus Apostoli. Durante a mesma producirase a estrea mundial da obra gañadora, titulada Cuatro historias gallegas, do guitarrista e compositor arxentino Federico Beilinson; mais tamén a mención de honra, Folías Celtas, do uruguaio afincado na Coruña Gabriel Bussi.
Precisamente esta mañá o Auditorio de Galicia (Santiago de Compostela acolleu o ensaio xeral das obras, ao que tamén asistiron, ademais de Beilinson e Bussi, o codirector do Noia Harp Fest, Rodrigo Romaní; e a directora técnica da Real Filharmonía de Galicia, Sabela García Fonte. A RFG, baixo a dirección de Sebastian Zinca, será a responsable de interpretar as pezas, nas que se acompañará de dúas recoñecidas arpistas: Claudia Besné, quen regresa ao festival após o seu exitoso paso hai dous anos, e Francesca Romana Di Nicola. Ademais, a orquestra tamén ofrecerá un repertorio no que se incluirán pezas de Claude Debussy e Maurice Ravel. As últimas entradas para asistir á cita, que terá lugar no Teatro Coliseo Noela a partir das 20.30 horas, están á venda na plataforma www.ataquilla.com. O concerto contará coa presenza tanto dos autores coma de representantes do Concello de Noia, Deputación da Coruña e Xunta de Galicia.
O Premio Internacional de Composición Portus Apostoli é certame innovador promovido polo Noia Harp Fest e polo Concello de Noia que procura aumentar o repertorio para arpa e orquestra. A súa cuarta convocatoria, aberta a compositoras e compositores de todo o mundo, xa está en marcha desde o mes de maio e recibirá partituras orixinais ata decembro. Coa estrea da última gañadora, e grazas á colaboración da Real Filharmonía de Galicia, o Festival Internacional de Arpa Vila de Noia bota o pano até o 2026.
NOIA HARP FEST
O Festival Internacional de Arpa Vila de Noia (Noia Harp Fest) é o único festival dedicado ao instrumento en todo o noroeste peninsular. A interpretación musical a través da arpa é o eixe que vertebra unha programación que, cada verán, reúne diferentes bandas e solistas sobranceiras, tanto galegas coma internacionais, de distintos estilos e orixes.
O Noia Harp Fest, que decorreu do 30 de xullo ao 2 de agosto e que mañá xoves celebra a Gala de Entrega do Premio Portus Apostoli, presenta un cartel con cinco xornadas de concertos con arpistas de Galicia, Andalucía, Bretaña, Colombia, Escocia, Italia, País Vasco ou Valencia. Ana Crismán, Alba Barreiro e Fernando Raña, Bleuenn Le Friec, Claudia Besné, D’Súpeto, Francesca Romana Di Nicola, Juliette Commeaux, Kevin Le Pennec, Laia Blasco, Noela Cotuna, Quico Comesaña, Rebecca Hill & Charlie Stewart e Yofre Brito, ademais da Real Filharmonía de Galicia, actúan nun evento que tamén promove o único Encontro do alumnado de arpa das escolas de Galicia.
Este 2025, Noia acolle trece actuacións (doce concertos e unha gran foliada de benvida) nun total de sete escenarios, como son a mítica Praza do Tapal, o Liceo de Noia, a Praza do Curro, a Igrexa Museo Santa María A Nova, o Teatro Coliseo Noela e tanto a Igrexa coma o Claustro de San Francisco. A 12ª edición do festival está organizada por Nalgures Producións, baixo a dirección da asociación Noia Harp Fest, e conta co apoio institucional do Concello de Noia, Xunta de Galicia a través da Axencia Turismo de Galicia no marco dos Concertos do Xacobeo, e de Acción Cultural Española AC/E; ademais da colaboración da Deputación da Coruña.
AXENDA NOIA HARP FEST | XOVES 7 DE AGOSTO 2025
20.30h | Teatro Coliseo Noela
Gala de Entrega do III Premio Internacional de Composición Portus Apostoli *
Real Filharmonía de Galicia
Sebastian Zinca, director
Claudia Besné, solista
Francesca Romana di Nicola, solista
* Asisten o concelleiro de Cultura de Noia, José Pérez; a deputada de Cultura da Deputación da Coruña, Natividade González; a deputada de Igualdade e Normalización Lingüística, Soledad Agra; e a delegada territorial da Xunta de Galicia na Coruña, Belén do Campo.
*Imaxes do Ensaio Gala de entrega do Premio Portus Apostoli © RFG 1-5
20250806-Axenda-NHF-xoves-7
Título: MEDO
Eu tiña medo pero ningún dos cans que ouveaba na noite trouxo a morte.
Ningún dos corvos que pousaban na aira ou no tellado da palleira.
Morreron, quizais, algúns cans. E morreron, acaso, algúns corvos. Cans que pousaban na aira, corvos que ouveaban na noite.
E eu ás veces seguía sentindo, algo atenuado, ese mesmo receo incrustado.
Non hai moito máis que contar. Hoxe un acio de palabras podrece na noite e tocan as campás a morto. Morreu o cura e tocou o campaneiro. Morreu o campaneiro e xa non quedaba ninguén para tocar. Os corvos pousan no campanario e os cans ouvean cando amence. Alleos a todo.
Ollos indiferentes observan o paso de seres confusos.
E eu, ás veces, sigo tendo medo, anque non atino a saber que o provoca mentres estendo a mirada nun lugar que non me mira. Nin falta que fai.
A Asociación Cultural Autobán, co apoio do Concello da Coruña, promove, por segundo ano consecutivo, este certame pioneiro no sector da autoedición
Neste 2025, o premio recaeu na obra “La ilusión”, cunha dotación de 1.250 € e un trofeo personalizado por Luis Yang, gañador da pasada edición do premio
O xurado especializado, integrado polos profesionais Bea Lema, Luis Yang e Sira González, decidiu outorgarlle, tamén, o accésit con diploma a Brais Rodríguez, pola súa obra “Enxoval”, cunha dotación de 350€
Na rolda final de clasificados foron tamén seleccionados os fanzines “Tales from the Wispering Realm”, de Anabel Colazo; “Foresta”, de Eloy Hermida; e “La balada del Príncipe Zarzaparrilla”, de Paz Rodríguez
Este II Premio Autobán ao Mellor Fanzine Galego 2024-2025 recibiu un total de 50 proxectos aspirantes ao galardón, que o público poderá ler na mostra ‘Expofanzines Autobán ‘no marco do festival Viñetas desde o Atlántico 2025, do 11 de agosto ao 21 de setembro, na Biblioteca de Estudos Locais da Coruña
A entrega do premio terá lugar o venres 15 de agosto no Circo de Artesáns da Coruña, no marco das actividades da edición de verán de 2025 do Festival de autoedición e BD Autobán
A información completa do II Premio Autobán ao Mellor Fanzine Galego 2024-2025 pode consultarse en: https://www.autoban.gal/premio25
O II Premio Autobán ao Mellor Fanzine Galego 2023-2024, promovido pola Asociación Cultural Autobán, co apoio do Concello da Coruña, xa ten gañadora. Julia Abalde alzouse co galardón grazas á súa obra La ilusión. O premio consta dunha dotación económica de 1.250 € e un trofeo personalizado a man polo artista Luis Yang (gañador da primeira edición do certame). O xurado especializado do certame, integrado polos profesionais Bea Lema, Luis Yang e Sira González decidiu outorgarlle, tamén, o accésit con diploma, cunha dotación de 350 €, a Brais Rodríguez, pola súa obra Enxoval.
Este II Premio Autobán ao Mellor Fanzine Galego 2024-2025 recibiu un total de 50 proxectos. Na rolda final de clasificados foron tamén seleccionados os fanzines Tales from the Wispering Realm, de Anabel Colazo; Foresta, de Eloy Hermida; e La balada del Príncipe Zarzaparrilla, de Paz Rodríguez.
A entrega do premio terá lugar o venres 15 de agosto no Circo de Artesáns da Coruña, no marco das actividades da edición de verán de 2025 do Festival de autoedición e BD Autobán. Ademais, o público poderá ver e ler todas as obras presentadas a concurso –un total de 50– na mostra ‘Expofanzines Autobán’ no marco do festival Viñetas desde o Atlántico 2025, do 11 de agosto ao 21 de setembro, na Biblioteca de Estudos Locais da Coruña.
O II Premio Autobán ao Mellor Fanzine Galego 2024-2025, promovido pola Asociación Cultural Autobán, co apoio do Concello da Coruña, recolle a participación de todas as autoras, autores e colectivos que autoeditaron un cómic ou fanzine gráfico en lingua galega ou desde Galicia entre o 15 de maio de 2024 e o 15 de maio de 2025, cun máximo de 3 obras por participante, sempre que o/a autor/a ou a maioría dos/as compoñentes do colectivo fosen de orixe galega ou estiveran fincados/as en Galicia. O tema, a técnica, o formato e o deseño do fanzine eran libres. A información completa pode consultarse en: https://www.autoban.gal/premio25.
GAÑADORES DO II PREMIO AUTOBÁN AO MELLOR FANZINE GALEGO 2024-2025
Julia Abalde (A Coruña, 1988) é una ilustradora que no seu traballo combina intimidade, perspicacia e humor, desenvolvendo, especialmente, nos seus fanzines, unha exploración visual do mundo interior a través de debuxos e textos poéticos.
Estudou Belas Artes na Universidade de Barcelona, cidade na que se instalou en 2007 e onde viviu case dúas décadas. Durante a carreira, realiza unha estancia semestral no departamento de ilustración da escola MassArt (Boston, Estados Unidos) e, posteriormente, complementa os seus estudos cun posgrado en Ilustración Creativa (Escola Eina, 2011) e cursa a mestría en Formación ao Profesorado, especialidade en Debuxo e Artes Plásticas (UNIR, 2017).
Ao longo da súa traxectoria, Julia compaxina a súa labor artística coa docencia en diferentes ámbitos: obradorista en museos e institucións como a Fundación Miró ou o Museo Picasso, docente de artes plásticas en Educación Secundaria e cocreadora do proxecto Pin Tam Pon, un xogo de estampación que serviu de punto de partida para un universo de propostas creativas como o libro “¡Tris, tras! Cuentos y actividades para imaginar, crear y jugar” ou o curso “Técnicas de estampación para niños” na plataforma Domestika.
En 2023 regresa á súa cidade natal, un retorno marcado por un proceso de dó amoroso que condensa no poemario ilustrado La ilusión, unha pequena publicación autoeditada que acolle nas súas páxinas todo o dolor, o humor e o amor propios dunha despedida e un novo comezo.
Pola súa banda, Brais Rodríguez (1980) é Licenciado en Belas Artes. Leva publicados varios fanzines no selo Carne líquida: Enxoval (2024), La chica con el sol en su cabeza (2016) ou Sombra (2017). Tamén publicou La mano del diablo, con Astiberri, no ano 2010.
En 2022 foi bolseiro da Academia de España en Roma. Participou nas exposicións Surexposition. La photo en BD (IMMIXgalerie, París, 2020), El arte en el cómic (Fundación Telefónica) ou Not Your Regular Wall (Washington D.C., 2024). Foi merecedor de varios galardóns, coma o Premio Castelao, o GZ Crea e o Injuve. É profesor na EASD Pablo Picasso.
SOBRE AUTOBÁN
Autobán é o festival coruñés de cómic autoeditado. No ano 2023, a iniciativa constitúese como asociación cultural. O seu obxectivo é a promoción da banda deseñada e a ilustración, a autoedición e a autoxestión, así como tecer unha rede de apoio para as persoas que se dedican a estas disciplinas. No seu labor inclúese a creación de eventos e actividades para a xestión de espazos nos que todos os e as amantes da autoedición sexan protagonistas.
A asociación organiza cada mes de agosto o Festival Autobán coincidindo co encontro internacional Viñetas desde o Atlántico. Trátase dun mercado de autoedición que ofrece a autores e autoras, colectivos, proxectos de autoedición e microeditoriais de toda a Península a oportunidade de amosar e vender o seu material. O encontro propón, tamén, combates de debuxantes, presentacións de proxectos, obradoiros, exposicións, música e gastronomía durante a súa celebración.
Por outra banda, a asociación promove, tamén, iniciativas como o Autobom, que se presenta como a edición de primavera do Autobán, coa vontade de ser un encontro entre a xente que se dedica e goza coa autoedición gráfica e a BD alternativa, con charlas, faladoiros, obradoiros e actividades diversas en torno ao mundo dos fanzines. De forma mensual, Autobán organiza, asimesmo, un Club de Debuxo con diferentes temáticas en espazos afines do sector.
DEZ ANOS DE HISTORIA DE AUTOBÁN
En agosto de 2024, o festival de autoedición e BD Autobán celebrou o seu 10º aniversario. O ilustrador José Domingo foi o autor do cartel dese 10º Autobán, nun homenaxe a eses 10 anos de traxectoria do evento, xa que tamén foi el quen deseñou o cartel da primeira edición de Autobán celebrada en 2014. Neste 2025, Autobán regresará á Coruña no mes de agosto para celebrar a 11ª edición do evento.
Entre os fitos do Autobán nesta década de historia cabe destacar que moitas das xoves promesas que gañaron o seu Combate de Debuxantes acabaron por converterse en historietistas e artistas de renome, como Xulia Vicente, Cynthia Alfonso, Xulia Pisón, Paula Freire, Teresa Ferreiro, Jorge Parras, Paz Rodríguez ou Aisha Rey.
As sedes máis populares do Autobán ao longo dos anos foron a añorada Nave 1839 e a actual Praza de San Andrés, pero o festival tense movido por toda A Coruña: celebrou edicións no espazo The Room, nos bares Old School, La Maleta, Ledicia, Meliora, Bar 13 ou Monty, na Sala Filomatic, na librería A Tobeira de Oza ou no local social A Revolteira, e tivo unha exposición antolóxica no Café de Macondo. En 2024 sumouse, tamén, o Círculo de Artesáns.
Nos faladoiros do Autobán teñen participado ducias de personalidades do sector, coma os debuxantes Emma Ríos, Natasha Bustos, Alberto Vázquez, Bea Lema, Roberta Vázquez, Manel Cráneo, Santy Gutiérrez, Alberto Guitián, Leandro Barea, Pepa Prieto Puy, Miguel Porto, Inés Cararejos ou Brais Rodríguez, os críticos Octavio Beares, Manuel Barreiro e Edu Maroño, os blogueiros Esteban Yáñez e Ghanito, a bibliotecaria Sira González ou os libreiros Toño Vilaverde e Simón Blanco. Tratáronse temas como a censura e a liberdade de expresión, a visibilidade feminista e LGTBIQ+ no mundo da banda deseñada, os diferentes eventos de autoedición galegos, o funcionamento dos colectivos autorais, o traballo dos humoristas gráficos, o paso á industria do videoxogo, o panorama fanzineiro a nivel estatal ou a historia da autoedición en Galicia.
MÁIS INFORMACIÓN
2025.08.05.-NP-Fallo-II-Premio-Autoban-24-25
O xoves 7 de agosto ás 20,00 h, o biólogo e investigador Javier Castroviejo Bolívar impartirá na Casa da Cultura de Palas de Rei a conferencia O río Ulla, a paisaxe e os eucaliptos.
Javier Castroviejo, ex director da Estación Biolóxica de Doñana e Presidente do Consello Internacional de Coordinación MaB (Home e Biosfera) da UNESCO, destaca polas súas investigacións científicas e a defensa da natureza especialmente en España e Iberoamérica.